BUJANG SIGAT TEMAWAI: BATU BESUNDANG

1. RUMAH ENTEKONG Nyadi cherita tu bedudok ba Rumah Entekong di Tanjong Batu Besundang, pati Batang Lidang. Sida di rumah nya, baka orang di rumah panjai bukai, bisi udah buya besekula mimit tang tebal agi ke enda nemu macha enggau nulis. Sida ke udah besekula ko jako pan semina nama udah buya sekula, tang nadai tentu nemu nulis enggau lanchar macha. Nyadi cherita ti keterubah tu ngenang sida dalam Rumah Entekong ka baum berunding ka atur jalai ti lebih menuku agi dikena sida serumah berami ngintu Gawai Dayak. Sida mega baka orang bukai baru sekali-dua udah ngintu buya enggau orang ngintu gawai nya, nya alai ator ke patut dikena lalu apin lekat ba runding sida. Nya alai semak ka katiga kali sida sarumah tu ngintu Gawai tu, dia sida baum deka netap ka ator ke entap sereta meruan agi nitih ka jalai ke dikena orang maioh ba rumah panjai bukai. Lemai siti, udah sida serumah sama udah kemas makai, dia Tuai Rumah Entekong ngasoh sapit iya ke benama Ungkir nesau sida sarumah, mai betemu baum ngagai ruai Tuai Rumah. Kabuah Entekong enggai enda mai sida sampal baum lemai nya, laban Penghulu ke megai menoa sida bisi dia malam nya, nyangka icha iya nemu agi nunjok ka ator ke manah agi dikena sida ngintu gawai nya ila. Leboh sida udah sampal datai ba ruai Tuai Rumah, dia tuai lalu bejako madah ka kabuah diri ke ngelumu ka sida sarumah lemai nya. “Kabuah aku mai kitai sabuat begelumu lemai tu, laban bisi kabuah ka berat bendar ba at aku, ukai samina berat ba aku tu siko aja, tang baka nya mega ba ati kitai ke bukai.” Ninga munyi nya, dia Enchangol lalu bejako. “Nama utai ko nuan nya deh aya, bisi deka ngambi kitai sarumah tu nyadi soldadu orang ba opis di nengeri din kini ?” pia ko iya. “Nadai ga,” ko Entekong. “Meda moa nuan tak kesal meh tadi leboh ka bejako ?” ko Enchangol nyaut Tuai Rumah. Sida bukai sama bela ngerara iya ke ngelampat jako Tuai Rumah, iya pan ngetu ga bejako. 2. BATANG AUM Jako aum sida ngetu enda lama tejanggal laban Enchangol ke ngelampat jako Tuai Rumah. Udah nya baru Lemambang Tuloi bejako. “Bejako meh apai Endu, anang limpang laban Enchangol nya,” ko iya nganu Tuai Rumah. Nya baru Entekong bejako nampong jako aum iya nya tadi. “Nyadi kitai sarumah tu baka orang bukai mega, dua kali udah ngintu Gawai Dayak. Tang jalai enggau ator kitai sabuat ke udah tu, tak asai ke agi ngiga endar sepi aku. Nya alai panjong ka Penghulu pen bisi ga ditu ari nya aku tak ngenyit mai kitai baum lemai tu, nyangka icha iya bisi ngelubang ka kitai penemu kena ngadu ka ator ke pama agi leboh kitai ngintu Gawai Dayak kena satu hari Bulan Enam tu ila,” pia ko Tuai Rumah Entekong nganu sida sabuat. Sapit Tuai Rumah lalu bejako ngasoh sida sama mansut ka runding diri ngiga jalai ke menuku agi dikena ngintu gawai nya. Ninga orang ngasoh bejako, dia Enchangol lalu angkat bediri sereta lalu bejako. “Aku nadai nemu jalai bukai lebih ari ator kitai ke udah. Nya tak udah ngena bendar sepi aku. Utai dempa bisi ga, utai di-irup tak ni naka nyawa deka. Aku jarang ngemalat nya mabok baka leboh kitai ngintu gawai tu suba. Main enggau uti baka nya ga, nadai enda ga dibantai ka kitai. Nya alai aku nadai nemu jalai nambah ka ator nya agi,” pia ko iya. “Jako ka nanya tu ukai nanya siko aja, endang sama dipinta mansut ka penemu diri, ti dipelaba ka tau kena nambah ka jalai ke udah kena kitai ngintu gawai tu,” pia ko Tuai Rumah. “bejako dia meh kita, enti bisi penemu lebih ari enggi orang ke gawa ari opis radio,” ko Enchangol bejako baru. “Nya alai enggai ka jako kelalu maioh bebelit ngapa, dia Lemambang Tuloi lalu bediri bejako. Nyadi ko iya.”Aku baka ka mampat penemu kita maioh dalam jako tu. Kabuah pia, laban penemu enggau runding kitai sabuat sama udah didinga leboh kitai ke baum berunding ka ator dikena kitai ngintu gawai tu suba, nya alai aroh ga kitai lalu apin ngenyampat nya tulih ka runding ke lebih ari ke udah. Nya alai kala maia Penghulu bisi enggau kitai begelumu mending ka aum tu, ngena kitai ngasoh iya nyidi jako orang ke gawa ari opis radio ke madah ka ator kena ngintu Gawai Dayak tu, ngambi ka kitai enda kelalu maioh achok jako, enggai ka jako lubah teputar,” pia ko Lemambang Tuloi. “Ngena nya,” ko sida ke Komiti Gawai, “awak ka aya Penghulu ngerintai jako nya ka kitai ngambi ka kitai enda kalat-kalat agi dalam pasal ator ke endang ditetap ka orang ari radio,” pia ko Komiti Gawai. Sida bukai pan sama munyi nya magang. Tuai Rumah pan lalu nampong jako iya, ngasoh Penghulu bejako. Ninga sida sama bela ngasoh, nya alai Penghulu lalu bejako. Tang laban iya endang orang landik bejako, nya alai apin iya nusoi ator Gawai nya, dulu iya ngenang julok ati ke minta gawai nya menya. Nyadi ko iya,” Menya, apin gawai tu dikemendar ka perintah, puas bendar orang ke minta nukik utai nya, nya baru ulih. Nyadi bansa ke bempu gawai nya, samoa kitai ke dikumbai bansa Dayak dalam Sarawak tu, iya nya Dayak Iban, Dayak Bidayuh, Dayak Kayan, Dayak Kenyah, Dayak Murut, Dayak Kelabit, Dayak Sebop, Dayak Murik, Dayak Punan, Dayak Remun, Dayak Selakau, Dayak Lara, Dayak Long Kiput, Dayak Berawan, Dayak Badang, Dayak Melanau, Dayak Bansa Rejang, Dayak Bisaya enggau bansa asal bukai ke ukai Islam, nya sama bempu gawai tu,” “Taja samoa bansa nya tadi dikumbai bansa Dayak, tang jako enda sabaka laban nitih ka ai enggau siti-siti raban. Samoa bansa ti udah kena sebut nya tadi endang tulin bansa asal dalam menoa tu, lalu endang bisi jako asal diri. Kena manding, baka China ke dikumbai bansa China, sida maioh raban. Bisi raban Khek, Hokkien, Foochow, Cantonese enggau sida bukai. Nyadi sida nya endang sama kadiri-kadiri jako, tang samoa sida digempong sakali lalu dikumbai bansa China. Nya alai bakan nya mega bansa Dayak ke maioh raban, tang samoa raban nya digempong sakali lalu dikumbai bansa Dayak.” “Bansa kitai Dayak mega sama baka bansa bukai dalam dunya tu, endang bisi adat-asal, penemu asal, pengawa asal, jako asal, pendiau asal sereta enggau main asal. Tang bansa kitai laun dikelala dunya laban pelajar sekula laun datai ba kitai.” “Semina utai ke lama udah ngasoh nama kitai Dayak di temu mensia dalam menoa bukai, iya nya pasal pemerani enggau penajam ati kitai maia menoa Saboh, lalu ari nya kitai dikumbai sekeda bansa bukai, Ngasu Pala,” ko Penghulu. “Dini kitai kala ngasu pala, ngasu jelu baru kitai bisi.” Ko Enchangol. Penghulu ngetu bejako enda lama, limpang ningkoh ka machis nungkun insap. Meda iya ngetu, dia Enchangol bejako begadai enggau bini Tuai Rumah. Nyadi ko iya, “Amat pama endar Penghulu tu bejako, munyi ke ditusok. Nyau ka munyi pengelanchar jako orang ke gawa ba opis radio,” ko iya. Agi deka bejako iya, endor Lemambang Tuloi ngerara, enda ngasoh inggar laban Penghulu deka nampong jako nya tadi. Penghulu pen lalu bejako baru. “Bansa Dayak endang semampai ngiga jalai ke manah kena ngemansang ka jalai pendiau, jalai pengidup, jalai pengelantang sereta enggau jalai ke tau dikena ngayan ka bansa diri, ngambi ka bansa bukai enda kelalu saru samina ngumbai Dayak ngasu pala, tang Dayak mega pengasu runding, pengasu penemu, pengasu pengelantang, pengasu pemaik, sereta enggau samoa utai bukai ke tau pulai ka penguntong bansa diri, lalu enda ngenusah bansa bukai.” “Taja sida lama bendar udah ngasu samoa utai nya tadi, tang lalu apin tulih ka samoa utai nya nitih ka pemantup ati, nya alai ari nya semampai ngasu penemu nyentok ka kemaiatu. Tang sabengkah ari utai ke menyana agi ti udah ulih bansa Dayak, iya nya Gawai Dayak di kemendar ka perintah kena kitai diau lalu ngintu gawai kena satu hari bulan enam tiap tiap taun. Runding enggau jako ke minta Gawai nya suba, lama bendar begantong, laban perintah ke dulu suba lembau bendar meri kitai hari nya nyadi ka hari besai. Laban enti iya diberi ka kitai, iya ukai semina dikediau ka bansa kitai aja, tang dikediau ka perintah enggau samoa bansa bukai ke di menoa Sarawak tu. Tang laban bansa Dayak endang keras ati, enggai enda sabaka enggau bansa bukai ke begulai menoa enggau bansa diri ba senentang utai ke patut sabaka, nya alai penemu ke minta Hari Gawai nya enda dilengka ka nyentok ka iya ulih. Nyadi laban utai ke dipinta nya endang patut, nya alai dikemendar ka Perintah Sarawak ke udah bulih Merdeka diatu, lalu diletak nitih ka pinta raban bansa Dayak kena satu hari bulan enam genap taun berengkah ari taun 1965 suba. Nya alai bedudok ari nya, bansa kitai Dayak ulih sama ayan dikelala sebaka enggau bansa bukai dipeda samoa mensia, bisi dua hari ari 365 hari dalam sataun, dibasa samoa bansa sereta dikediau ka perintah dalam menoa Sarawak tu,” ko Penghulu. Ungkir, sapit Tuai Rumah, nyau rangap-rangap malik ngagai Peghulu ninga jako iya ngenjing enda pimpat. “Patut diasoh perintah nyadi Penghulu,” pia ko iya bejako kadiri. Udah nya Penghulu nampong jako iya nya baru munyi tu,” Julok ati orang ke numboh ke penemu enggau runding ti minta gawai nya suba, ukai samina ngambi ka bisi dikediau ka sereta lalu berami, tang awak ka samoa ke ngaku diri bansa Dayak, tau ngempong ati, berakup ka runding, sereta enggau pengawa ke tau dikena ngering sereta ngukoh ka bansa diri. Nya alai, nya kabuah orang ngaga ator dikena ngintu gawai nya ngena jalai ke pemadu mudah, ngambi ka samoa Dayak baik iya kaya tauka miskin, sama ulih ngintu Gawai nya nitih ka ator ke endang udah diletak.” Senentang tu Enchangol nibar ka jako ngagai Penghulu,”kami sabuat nadai tentu ingat ka jalai ke dipadah ka orang . Nya alai, jalai kami ngintu nadai tentu sabaka enggau pangan dalam dua tiga kali ke udah tu suba,” pia ko iya nganu Penghulu. Nya baru Penghulu nampong jako diri baru.”Maioh kitai agi saru, bebalut ka leka jako Jalai Ngintu enggau Jalai Ngerami. Nyadi Jalai Ngintu Gawai kitai tu nitih ka penemu ke udah diputus ka orang ba radio bakatu, "Kejang deka makai lemai kena malam 31 hari bulan lima, dia kitai diri sabilik patut sama begari ngena gari ke pama agi. Tembu nya sama begelumu enggau diri sabilik belator makai. Nyadi pasal pemakai nya barang naka ke dikemisi ka diri nitih ka pengelantang diri empu. Udah pemakai nya tembu disedia, dia kitai ngasoh diri sabilik ke pemadu biak ti udah nemu nyurong ka utai dempa, nyua ka chapak asi ngagai tuai bilik ke dia. Udah tuai bilik nya nyeput asi ke disurong ka iya nya, nya baru sama bela makai. Lalu leboh nya, dia tuai bilik nya patut mansut ka jako ajar, jako lalau sakali ka semina nyebut jako ngajih ka anak-uchu gayu guru, gerai nyamai. Tembu makai nya, tembu meh pengawa enggau ator sereta enggau jalai ke ngintu gawai tu,” pia ko Penghulu. “Kati ko lepas nya deh Penghulu ?” Nama pengawa agi dikereja ?” pia ko Lemambang Tuloi. “Nyadi lepas nya, enti kitai ba rumah panjai baka kitai ke lemai tu, kitai pansut ka ruai, mantai ka barang macham main kena ngerami sereta ngmesai ka gawai nya, tang nya ukai dikumbai Jalai Ngintu Gawai tu. Main nya samina dikena ngerami gawai, laban ator enggau jalai ti dikena ngintu iya udah tembu ba kitai ke begempuru makai enggau diri sabilik tadi. Enti kitai bisi pengawa bukai, tauka gawai bukai deka diserimbai ke enggau Gawai Dayak tu, ngena bendar ngambi ka hari kitai ke ngintu gawai nya enda maioh tebasau, enda lama rindang,” pia ko Penghulu. Tembu jako Penghulu nya, Enchangol lalu bejako.”Muntang bendar jalai kitai ngintu gawai enti munyi ko Penghulu nya. Enti munyi ko sida Sungai Senggang nganu aku suba, kitai ke ngintu gawai tu enda tau enda munoh babi, munoh manok, ngaga tuak, lalu nyabong. Aku ni bisi manok sabong, endang ukai orang penyabong,” pia ko iya. Penghulu lalu bejako baru nerang ka reti utai ke disebut iya nya tadi. “Pasal munoh babi, munoh manok enggau nyabong nya nitih ka pengelantang enggau pemisi diri, tang utai ti enda tau enda digaga iya nya tuak. Kabuah pia, laban tuak nya endang ai asal kitai Dayak,” ko Penghulu. Ninga Penghulu nyebut tuak, dia Tuai Rumah Entekong lalu nanya ka pasal utai ke dikumbai Ai Pengayu. Nyadi ko iya “Kami sabuat sarumah tu ukai ga enda ninga ator ke dipadah ka orang ari radio pasal utai ke dikumbai Ai Pengayu, tang pending enda sabaka lalu pengingat enda sama. Nya alai panjong ka kitai ngenang utai tu, aku minta tusoi ke Penghulu pasal ator enggau maia kitai ke patut ngirup Ai Pengayu nya,” ko iya. Apin nyaut jako nya Penhulu ke ditanya Tuai Rumah, dia Enchangol lalu bejako mampat jako sida, “Kami sarumah tu Penghulu enda sereta ngirup Ai Pengayu, laban nitih ka ator tusoi orang ba radio ke dikingat ka diri. Bisi nya ngirup maia mun lemai, bisi sekeda leboh udah badu makai lemai, sekeda ngirup maia dini hari, lalu bisi nya ngirup maia mantar tengah malam,” pia ko iya nganu Penghulu. “Ni maia nuan ngirup enggi nuan deh Igat ?” ko Penghulu nanya Enchangol. “Enggi aku lalu enda di-irup, laban enda nemu maia ke bendar. Deka nitih ka siko nyangka nya kelalu tumu. Deka nitih ka orang ke ngirup dini hari nyangka nya kelalu laun ga. Nya alai enggi aku tak semina udah di-iri ka ba changkir lalu enda di-irup,” pia ko Enchangol nyaut Penghulu. “Ni maia kitai ke patut ngirup ai pengayu nya ka bendar deh Penghulu ?” ko Lemambang Tuloi. Nyadi maia ngirup Ai Pengayu nya sereta jam udah mangkong pukul dua belas tengah malam. Laban ba itong taun kitai nitih ka gawai tu, tengah malam 31 hari bulan lima, nya maia taun betukar, nya maia ngelengka ka taun dulu lalu nyambut taun ke baru. Lalu nya mega maia kitai ngingat ka pengawa ti udah dikereja dalam taun ke udah, kitai lalu berunding ka utai ke patut dikereja kitai ila dalam taun ke baru. Pengawa ke udah salah di kereja ke udah tekelanjur dalam taun ke dulu patut dilengka ka magang, lalu ngiga jalai pengawa ti tau dikena ngadu ka jalai pendiau enggau pengidup diri dalam taun ti ka datai.” Pia ko Penghulu. “Kami ke nadai jam tu, nama utai kena ngelai maia tengah malam deh penghulu ?”pia ko bini Tuai Rumah. “Kitai ke ba rumah panjai nyamai bendar ngingat ka maia nya, laban kitai begelumu enggau pangan diri di ruai nganti maia tengah malam. Barang ke bisi jam, nya asoh ngemata ka malam. Kira dua-tiga minit deka pukol 12 tengah malam, dia samoa kitai sama ngiri ka tuak ba gelas diri empu. Siko ari kitai dia asoh megai pemalu setawak. Sereta jam mangkong pukol 12 tengah malam, dia iya ke diasoh megai pemalu nya tadi nerantang ka setawak dikena ngelai taun udah betukar, lalu samoa kitai lalu sereta ngirup ai tuak ke udah disedia ka nya tadi, lalu nya ke dikumbai kitai Ai Pengayu,” pia ko Penghulu nganu sida. Udah nya Komiti Gawai sida sarumah nya, nanya ka Leka Timang Ai Pengayu ngagai Penghulu, tang Penghulu madah ka diri enda nemu. “Nya sida ke baka penemu Lemambang Tuloi nya, nya baru nemu utai baka nya,” ko iya. “Kati ko leka timang ai nya, Lemambang ? Ingat nuan ka leka timang sida ari opis radio ?” ko Enchangol nanya Tuloi. “Enda aku tentu ingat ka leka enggi sida leboh nya,” ko iya nyaut Enchangol. “Kita ke Lemambang enda lama ngarang utai ke ngumbang nya,” ko bini Tuai Rumah nganu Tuloi. Iya lalu tuchom ninga jako bini Entekong. “Enti endang ati ngarang kadiri, nadai ga nya tentu nyengala mar,” ko Lemambang Tuloi. “Uji sebut dia Lemambang, ninga ka leka,” pia ko bini Tuai Rumah nganu iya. Laban ke endang landik nampil ka leka main, nya alai Tuloi lalu nyebut Leka Timang Ai Pengayu. “Tak sekut di perut Kandang Kerigai Tak nangi di ati Nukang ka gigi dabong landai Nujah kelasah anchau tikai Ensara ka kita ke betunga Dudok berimbai Betantai ka jawa ai beganjai Laban tu dikena kitai Beserara enggau taun ka lama Lalu nerima taun ka datai. Tak malu meh tudah aku Di lempedu tangkai kamai Laban penemu tu nadai udu Pemandai tu kelalu nadai Tu ai tusu tanah ladu Sua Gemalu Bunsu Kelabu Ai temuli tanah nyadi Diberi Nabi Adi Disurong Nabi Isa Ngangkat ka dunya ari kelia Datai ka saharitu. Nya alai tanam bujang ganggam Enggau belayan kaban indu Nya alai pun Tambun berurun bungai kapu Batang lantak pemandang Buloh pengerindu Gerempong dan ujong Tempa Kuang Kapong Tenong burong Ketupong Bisu Nya alai lalu diketau Dara Mipau Betenggau ka semulau bintang buyu Dikurong Dara Lempong Dalam sintong rutan seru. Dibai pulai ngagai perentang rumah landu Lalu diengkah di kelasah Tikai bembai bunga kapu Lalu dikerekai Dara Pandai Ba penyurai ujong tanju Ditutok Dara Gauk Enggau resu alu pudu Ditesai Dara Pandai Enggau chunggai tunjok indu Dikebau Dara Bagau Muai sekau raban seku Nya alai nyengala padi puya Neladan gemala mau radu Nya alai burak padi retak Ari pirak salin Sarawak tukang Bau Udah nya di-empi orang Enggau pendi empa siko Lalu dipelam di pelawan tajau seru Tan lima malam Peda beram tak tengelam Pansut ai ke perebeni kin-kitu Lalu dikauk dara Gauk Enggau cherebok jalu indu. Dibai pansut ka ruai Ngagai kitai ke berintai Dudok begelumu Nya alai lalu dililih Nitih ka ripih Dijir changkir din ditu. Nya alai tu ai bungah kena rindu Ai basa kena bejako Kena ngansah trinting Puting dabong kuyu Kena masa kita ke tuai Ke berintai dudok begulu Nya alai ai tu Bisa kenu ko aku Ari ai ke digaga China ngelamatu Ukai samina bisa tau nganu Tang bisa ngasoh lanchar tau bejako. Enti bumai enda berasai Penoh engkabai kulit kayu Enti bekerja enda berasai Bulih menaga tajau indu. Sida ke besekula Enda berasai bulih pemandai Landik bejako Laban ai tu udah ditimang Puntang Medang seduai Apai Migu Ngambi ka samoa kitai Ke ngirup ai tu gayu-guru Gerai nyamai Kaya-raya nguan menoa.” “Orang endang sigi Lemambang, enda lama endar berunding ka utai,” ko Sapit Tuai Rumah malik ngagai Tuloi. “Em, utai ke baka nya endang ba ujong mulut magang, peneka nyebut,” ko Lemambang Tuloi nganu sida maioh ke begelumu dia. “Nya meh Timang Ai Pengayu kitai tu ila, nadai nemu ngaga lebih ari nya,” pia ko Tuai Rumah Entekong. “Ngena nya deh ! Iya ga udah ngira nya. Enti sema Lemambang nadai, deka ga aku nembu ka pengawa nya ka kitai. Tang iya udah, ngena ga enda, enda alah beserak-serak,” ko Enchangol. Udah nya Tuai Rumah Entekong bejako baru, “Putus meh aum kitai tu. Ator ke dikena ngintu gawai tu, udah ga ditusoi Penghulu ngagai kitai. Terang bendar ga utai ke ko iya. Nama Timang Ai Pengayu ngena bendar ga munyi iya ke disebut Lemambang Tuloi nya tadi. Nya alai nya meh utai ke dititih ka kitai ngintu gawai tu berengkah ari sekali tu nyentok ka dudi hari ila,” pia ko Tuai Rumah nganu sida maioh ke begelumu dia. 3. ATOR NGINTU PENDAM Tembu jako ka berunding ka pasal ngintu gawai nya tadi dia Sapit Tuai Rumah ke benama Ungkir lalu bejako nanya Penghulu. “ Lepas ari nya tadi, sabengkah agi utai ke ngasoh kami sabuat sarumah tu agi bebalut penemu, iya nya pasal jako ari radio ke mai kitai ngintu meresi pendam rambau Hari Gawai Dayak. Nya alai kala nuan ka bisi ditu Penghulu, ngena bendar nuan lalu nusoi ator nya ka kami,” ko iya. Apin sempat nyaut jako nya Penghulu, dia Enchangol lalu bejako. Nya alai ko iya, “ Aku enggai endar ninga penemu orang ka mai mensiang pendam, munyi ko jako ke ari radio suba. Enti sema tak radio orang dibilik kami nya, udah radio nya lalu aku padam. Iya bengat bejako enda patut patut. Kini ka ngrichau ka mai kitai mensiang pendam. Mali pengawa nya ko penemu orang tuai kelia. Nya Penghulu nya lalu madah, nya orang pun megai adat tuai. Nadai iya deka mai kitai mensiang pendam. Enda pia Penghulu ?” ko iya bejako nguing ngagai Penghulu. Penghulu pan bejako nimbal penemu iya nya, “ Pasal pengawa kitai ka mensiang pendam nya baka tu. Nyadi kitai Dayak tu baka bansa bukai mega, endang semampai ngiga jalai ke tau dikena ngemansang ka bansa, ngambi ka nitih ka bansa bukai ti udah maju dulu agi. Nya alai udah bekau ke bulih hari besai Gawai Dayak tu suba, dia bedudok baru pansut penemu siti agi mai berunding ka ator dikena kitai Dayak mensiang pendam. Penemu nya lalu diperunding ka tuai-tuai kitai bansa, lalu disara ka orang ari opis radio, lalu baka nya mega munyi penemu orang diluar. Ukai ngumbai kitai nadai ator enggau adat kena ngintu pendam ke udah ngelamatu, tang ator ke ngelamatu nadai ayan dipeda lalu ditemu bansa bukai. Laban runding kitai Dayak ke mungkal pendam kelia, endang ngiga tanah ke ngelipak ari alan alai orang maioh turun, lalu ngiga babas tauka pulau ke besai agi ba menoa nya.” “Kabuah pia ngambi ka tanah nya lalu digaga nyadi pulau pendam. Laban kitai mensia, lebih agi kitai ke di menoa tu, geli ati ka pangan ke udah ninggal ka dunya tu. Kabuah pia, laban enti kitai udah parai lalu dikumbai antu,.” “Nyadi pendam endang bisi meruan adat, lalu sabarang orang ke ngelanggar adat nya tentu ka kena tinggang penyalah sereta lalu diukom ngena adat. Adat nya dikena kitai mandang ka pemesai basa diri ngagai orang ke udah ninggal, laban nyentok ka pendam kitai Dayak pan bisi digaga ka adat,” pia ko Penghulu. “Nama kabuah enggai enda ngiga jalai baru dikena ngintu pendam, enti kitai agi ngering ka adat lama deh Penghulu ?” pia ko Enchangol netak jako Penghulu. “Baka tu ko nya, Igat Enchangol,” ko Penghulu nganu iya. “Nyadi kamaia tu hari penemu dunya nyau mansang, lalu ari pemansang dunya, ari nya kitai jampat ngelala senentang ator enggau penemu diri ke agi timpang ti patut diadu nitih ka utai ke ngena, awak ka menyana agi jemah ila.” “Nya alai laban pekara tu utai ti berat ba bansa kitai, ari nya tuai-tuai kitai enda sayau ka penemu enggau runding kena ngemujur ka pekara tu. Nya alai nyau kapuas sida ke berunding, dia penemu sama salubang madah ka pendam kitai bansa Dayak patut dipensiang sakali sataun. Tanah pendam kitai patut ditebas, dipensiang enggau manah ngambi ka tawas. Kayu ka mit patut dibuai magang, tang kayu ti besai teju ka dia, ngambi ka bisi ngayong tanah pendam. Pendam patut diator enggau manah, lalu gaga ka kelai ke menyana awak ka pendam nya nampak lalu tawas berari. Indu anembiak pan enda takut turun mansa pendam baka ke ngelamatu,” ko Penghulu. “Nama adat tuai madah ka pendam enda tau ditebas, kayu ke dia enda tau ditebang deh Penghulu ? Kati ko kitai muai adat nya deh ?” ko Lemambang Tuloi. “Amat nya. Nadai guna kitai ngulih ka Penemu Baru enti nya kena muai adat lama kitai,” pia ko Ungkir. “Kati ko nya deh Penghulu ?” ko iya. “Em, utai nya, baka tu ko reti,” ko Penghulu. “Penemu, Runding, Ator enggau Adat lama kitai, iya ke manah, iya ti ngena, ke bisi guna lalu tau pulai ka penguntong, pulai ka pemanah nama bansa kitai, nadai kabuah muai. Tang utai ke patut dilengka ka kitai, iya nya utai ke tau mampul bansa, utai ke mampang jalai pemansang kitai ti deka nitih ka Penemu Bau nya patut dibuai kitai.” Nyadi ngenang jako Lemambang Tuloi tadi, pasal adat kitai ke enda tau nebang kayu ba pendam. Utai nya ulih puntang ka kitai, baka kitai ke ngampun ngagai petara. Laban kabuah kitai ke nebas, kitai ke nebang kayu ba pendam nya, ukai laban kitai ngayah ka sida ke udah parai, tang laban kitai angkun, laban kitai sinu sereta bebasa ka sida. Nya alai nadai kabuah sida nganu kitai.” Pia ko Penghulu. Udah nya baru Tuai Rumah Entekong bejako. Nyadi ko iya , “ Dalam penemu aku ngena bendar penemu Penghulu nya tadi, laban kitai enda tau enda nitih ka penemu ke baru ti tau pulai ke pengelantang enggau penguntong kitai ke diatu enggau anak-uchu ichit kitai jemah ila. Nya alai pasal penemu ke mai ngintu lalu mensiang pendam sakali dalam sataun, nya manah bendar, tang kabuah kami sarumah tu lalu enda ulih nitih ka jako nya, laban jako kami sabuat agi bebalut bendar. Bisi deka, tang maioh agi ke enggai nitih ka jako ke ditabor ka orang ari opis radio. Dalam penemu aku, kami sarumah tu endang patut bendar nitih ka penemu nya kedud harii ila. Tang siti agi utai ka ditanya aku ngagai nuan Penghulu pasal utai tu, iya nya pasal maia ke ngereja pengawa ngintu pendam tu tadi. Ni maia kitai ke patut ngereja pengawa nya ? pia ko Entekong. Penghulu lalu nyaut Tuai Rumah Entekong. Nya alai ko iya , “ Nyadi laban penumboh runding ke bebai ngintu pendam tu berindik ari kitai ke udah bisi hari besai Gawai Dayak, nya alai maia ngintu pendam tu udah diperunding ka bendar, lalu diletak sama nyerimbai kitai ke ngerami Gawai Dayak nya. Nyadi laban penemu tuai-tuai maioh ke bejurai ka pekara nya suba, tebal agi deka mensiang pendam nya dulu ari ke ngintu gawai, nya kabuah maia ke mensiang pendam nya diletak kena pagi siang hari , 31 hari bulan lima genap taun, ngambi ka hari kitai ke limpang mensiang iya enda maioh tebasau, awak ka bisi agi awak alai kitai ngereja pengawa bukai ti sama tau pulai ka pemansang enggau pengelantang kitai.” Pia ko Penghulu. “Enti munyi nya ngena bendar meh ator nya, Penghulu. Penemu kami sabuat enda sabaka, bisi deka dulu ari ke ngintu gawai, lalu bisi deka dudi ari nya. Nya alai nuan udah nusoi ator nya enggau chukop, dalam penemu aku, nadai kabuah kami sarumah tu enggai nitih ka penemu nya,” pia ko Tuai Rumah Entekong. Sapit Tuai Rumah lalu bejako nanya ka penemu sida bukai. “Kati ko penemu kita udah ninga jako Penghulu nya tadi ?” ko iya. “Ngena penemu nya. Nadai kitai nemu muntang jako nya.” Pia ko Komiti sida. “Ngena meh nya. Penemu aku endang munyi nya, tang agi mending ka penemu pangan, nya alai baka ke enggai bejako peda kita,” pia ko Enchangol nganu sida bukai. “Timang Ai Pengayu dikena kitai, awak ka lalu nyuong iya ke udah disebut Lemambang Tuloi tadi,” pia ko iya. Nya alai ninga jako sama salubang ari nya aum sida ke berunding ka ator dikena ngintu Hari Gawai Dayak nya tadi lalu putus. Samoa ator sida nitih ka jalai ke udah dipadah ka Penghulu ngagai sida dalam aum nya. Aum sida pen tembu naka nya 4. PEMANSANG BARU Tembu jako ke berunding ka ator ngintu gawai sereta enggau mensiang pendam nya tadi, dia sida betanya ngagai Penghulu pasal gaya reti Pengawa enggau Pemansang Baru kemaia hari tu. Orang ke dulu betanya iya, iya nya Ungkir ke megai pengawa nyadi Sapit Tuai Rumah “Sabengkah utai deka ditanya ka aku ngagai nuan Penghulu, iya nya bagi kuasa ke dipegai kita ke tuai. Kabuah pia, laban kemaia hari tu enda baka menya. Nyadi menya temu ni bagi pengawa ke dipangku tuai, baka Temenggong, Pemancha, Penghulu enggau Tuai Rumah. Ator pengawa nya endang betingkat-tingkat. Tang diatu, laban nyau bisi Kunsilor, ari nya runding kami ke anembiak tu agi bebalut bendar, laban enda nemu ni naka sukat pengawa orang ke nyadi Kunsilor beselepak enggau kuasa kita ke tuai. Nya alai, nya utai ke berat bendar deka ditanya aku ngagai nuan.” Pia ko Ungkir. Ngena endar jako nuan nya Punggal. Aku endang deka nyebut nya ga tadi. Seninjik bendar ga nuan dulu mansut ka nya ngagai Penghulu. Kati ko nya deh Penghulu ?” pia ko Enchangol. “Aroh runding agi bebalut, laban utai ke nama Kunsilor agi baru bendar ba kitai, nya alai aroh bendar kitai apin tentu serap nemu reti ni naka bagi enggau sukat pengawa ke dikereja sida. Pengawa sida endang bebagi ari kereja orang ke nyadi Tuai Rumah, lain ari pengawa Penghulu, enda sabaka enggau kerja Pemancha, lalu jauh bebida ari pengawa orang ke nyadi Temenggong.” Pia ko Penghulu. “Kati alai nya bengat ngenyauh nya bebida deh Penghulu ?” pia ko Echangol. “Baka nya ko selepak pengawa sida nya Igat Enchangol. Nyadi Tuai Rumah, Penghulu, Pemancha enggau Temengong nya megai ator ngempong anembiak naka ke dipegai diri. Sida nya ngintu anembiak diri empu. Enti sema orang ke dalam pegai sida nya bisi laya, bisi betengik bekerik enggau pangan diri, laku sida nya meh orang ke patut ngadu ka laya nya naka sekat ke tau diputus ka sida. Lepas ari kuasa sida nya pulai ngagai atur orang baopis perintah tauka ba Kot,” pia ko Penghulu. “Nya utai ke ngasoh penemu kami sabuat ditu agi bebalut bendar, Penghulu. Laban Kunsilor kami ditu suah bendar ngator pechara bala indu-anembiak, laban sida ke nyadi kunsilor besai serangkong kuasa pegai kenu ko sida. Nya alai kami ba menoa ai Tanjong Batu Besundang tu suah bendar bechara ba Kunsilor,” pia ko Ungkir. “Kati alai kita enda bechara ba Penghulu deh ?” ko Penghulu. “Kunsilor ga madah ka kuasa diri besai agi ari kuasa Penghulu. Indah Penghulu deh kena pegai iya, kenu ko iya nganu kami,” ko Enchangol nimbal ari tisi. “Amat munyi ko punggal nya. Endang suah Kunsilor ke megai kami ditu madah ka kuasa diri besai ari kuasa Penghulu,” pia ko Ungkir. “Udah nya baru Penghulu bejako baru, ko iya, “Nitih ka padah perintah naka iya ke dikingat ka aku baka tu. Orang ke nyadi Kunsilor nya nyadi pengari orang maioh ke milih iya leboh ke bepilih ka Kunsilor. Nyadi pengawa iya, mai pinta tauka penemu orang ke dalam Ward, iya nya Sitak ti dipegai iya ngagai District Council, ngambi ka utai nya diperunding ka orang ke baum dalam District Council. Enti utai ke dipinta orang nya endang amat patut, ari nya utai nya dikemendar ka aum. Lalu Kunsilor mega mai penemu tauka ator ke udah diperunding ka dalam aum sida ngagai orang ke dipegai diri, ngambi ka anembiak maioh sama nemu gaya ator ke dipejalai ka District Council. Nya alai, nya kabuah orang ke nyadi Kunsilor enda tau enda bejarit raun ngagai samoa rumah orang ti kena pegai sida, laban enti sida enda nusoi ator tauka adat nya ngagai anembiak diri, ari nya orang tentu enda nemu utai ke udah dipaum ka sida. Lalu ari nya orang ke udah milih sida asai ke lebu ngarap ke sida nyadi pengari,” pia ko Penghulu. “Kati alai Kunsilor ke ngari ka kami ditu tak suah endar udah ngator pechara deh penghulu ?” ko Lemambang Tuloi. “Nulong Tuai Rumah sakali ka nyaup Penghulu, nadai penyalah baka sida ke Kunsilor leboh ngator laya indu-anembiak, tang pasal kuasa ngadu ka pechara ngati kadiri enda tau laban sida endang nadai kuasa pengawa nya diberi perintah. Enti orang ke nyadi Kunsilor nya endang Penghulu tauka Tuai Rumah, sakali ka Pemancha, nadai penyalah iya ngadu ke pechara, laban iya endang bisi kuasa jari iya ke nyadi tuai ngempong anembiak. Sabengkah pengawa ke endang patut dikereja orang ke nyadi Kunsilor nya pasal pengawa pemansang ke dipejalai ka perintah kamaia tu, baka bekebun getah, bekebun nyiur enggau samoa pengawa bukai ke tau pulai ka pemansang. Pengawa orang ke nyadi Kunsilor begembar bendar enggau kereja orang ti ngempong anembiak dalam pasal kereja ke ngemansang ka diri, tang semina sida nadai diberi perintah kuasa ngadu ka laya,” ko Penghulu. “Enti munyi nya, nemu meh kami kagi tu ila. Ngelama tu dini nemu utai munyi tu, iya ga nadai orang madah,” pia ko Tuai Rumah. “Ukai enda beguna ka Kunsilor, tang enggai enda nemu bagi pengawa kita ka tuai,” ko Lemambang Tuloi nganu Penghulu. Tembu jako nya dia Enchangol bejako nunga ngagai Penghulu. Nya alai ko iya, “ Tak munyi ke ngelimpang ka jako kita, aku dinga nuan Penghulu,” ko iya. “Enda nya ngelmpang ka deh, endang baka kitai berandau,” ko Penghulu nyaut iya. Nyadi ko Enchangol, “Kami sabuat sarumah tu bebendar-endar rambau ke bepilih tu suba, laban enggai enda menang meh ko ati. Tang utai bengat enda ulih,” ko iya. “Ni naka pemendar kita leboh nya suba ?” ko Penghulu. “Kami sarumah tu ke nganjong nama minta pilih suba tiga iko. Kami tiga Punggal Ungkir, Lemambang Tuloi enggau aku empu. Ko jako enggai ka pengawa nya pulai ngagai orang bukai, nya meh kabuah enggai siko nganjong nama.” Lama Penghulu enda bemunyi. Nya alai ninga Penghulu enda nyaut, dia iya bejako baru. “Kati ko nya kini Penghulu, nama kabuah kami tiga bengat enda tekait siko ?” ko iya. “Aku enda nemu kuing utai nya kia. Tang enti sema baka kitai ke nyan kayu, tak nadai meh jalai orang tuboh siko telaban ka kita tuboh tiga. Tang enti baka kitai bebagi utai, enti kitai tuboh tiga ngambi siti bagi bedua utai enggau orang tuboh ngambi satengah bagi, kitai tentu nadai bulih maioh, laban siti bagi nya nyau dipedua tuboh tiga,” pia ko Penghulu. “Apai orang nya suba, bisi meh ati deka enggau orang minta pilih, tang aku enda nasoh meda iya enda nemu surat,”pia ko bini Tuai Rumah. “Leboh ngundi suba nyamai endar laban orang ke jaga dia deka nulong kami ke enda nemu surat tu. Baka aku tu, senentang alai ke nyunting nama orang ke deka dipilih nya deh enda nemu. Tang semina madah ka nama orang ke deka di-undi kitai, lalu orang ke jaga dia nyunting ka kami. Nya alai kami nadai tentu kiroh tegal ke enda nemu nulis nya Penghulu,” ko iya, “Nyamai bendar baka nya. Ni ko nuan, Penghulu ?” ko iya. Penghulu enda nyaut iya, semina bedemoh aja lalu limpang bejako ngenang utai bukai. “Nya asai enda disaut Penghulu. Tanda bengat luba-luba bejako lebih ari orang ke lelaki,” ko Enchangol nelai sida ke di tisi. 5. NANYA ANAK ENTIKONG Tuai Rumah Entekong bisi siko anak dara ke udah patut bendar tau ngatur diri belaki. Enda lama udah nya, bisi bujang orang Loba Kechuyu ngabas iya. Udah dua-tiga malam bekau ke ngabas nya, lalu ngasoh sida apai iya nanya indu nya. Nya alai meda iya pen umbas ga umor alai ngator diri, nya alai sida apai iya lalu mansang nanya indu nya ka iya. Datai ba rumah orang Batu Besundang, sida lalu terus nuju ruai tuai rumah laban endang napat ka sida. Udah kemas makai lemai nya sida pan ngulu temuai ke datai nya. Nyau kelama udah berandau ngenang pasal umai-taun, dia Tuai Rumah lalu nanya ka pejalai temuai nya. Nyadi nama apai lelaki ke nanya indu nya Biku, komiti rumah sida di Loba Kechuyu. Nyadi ko Tuai Rumah Entekong, “ Tak ngelimpang ka randau kitai sabuat, aku tu peda kita. Tang ka enda baka nya, laban kitai lama ga udah betunga tang lalu terunda-runda berandau bukai, lalu apin nanya ka batang pejalai kita ke datai kitu. Nya alai tak changka munyi jako tu. Nama pejalai kita sabuat ke datai tu ?” pia ko Entekong nguing ngagai Biku. Nyadi laban sida ke bekelingi sebelah Loba Kechuyu nya endang nadai tentu berambai jako, nya alai jako ke nyaut tanya Tuai Rumah Entekong nya tadi endang lalu dientong ka iya sekali. Nya alai ko iya, “Kami sabuat ke datai tu nampong jako Igat, anak aku, ke ngasoh nanya Endu ke di bilik dia. Laban iya madah ka diri udah ngabas indu, lalu ngasoh kami nanya iya. Nya kabuah kami tu datai ditu,” pia ko Biku. Ninga Biku enggai berambai jako, nya alai sida Entekong pan enggai ga jako panjai. Nya alai ko iya, “ Diri ke empu anak tu, nadai jako, lama-laun pan laki ga digiga. Nya alai tu kita datai nanya iya, kami sida indai iya tu nadai maioh penemu, tang ni ko runding iya empu tuboh. Nya alai ngena iya empu tanya kita,” pia ko Entekong. “Ngena nya,” ko Lemambang Tuloi.” “laban enti kitai tak nyanggup ari belakang iya, engka iya tak apin deka belaki,” pia ko iya nguing ngagai Tuai Rumah. Nya alai ninga munyi nya, ari nya bini tuai rumah lalu madah ka anak dara iya mai pansut ka ruai, laban deka nentu ka ati iya. Nya alai datai di ruai, sida lalu nanya ka runding iya pasal orang ke nanya iya nya tadi. Nyadi ko iya nyaut sida, “Enda aku nemu, barang ko sida indai dia.” “Enti udah munyi nya, jako meh nya,” pia ko Tuloi. “Endang utai udah dabas dulu. Sida ke datai tu mina nentu ka jako,” ko Enchangol bejako enggau sida di tisi. Nya alai laban Endu nya barang ko ator sida indai iya, ari nya jako sida lalu besetuju. Tinchin lalu tinggal. Sida pan lalu ngeletak maia ke melah pinang. Timpoh sida sabulan udah bekau nya. Runding sama setuju, nya alai jako lalu putus Nyadi laban malam udah jauh, nya alai orang ke begulu kia pan mupok mulai ka diri. Meda orang nyau nadai agi, ari nya Tuai Rumah Entekong ngasoh bini iya nganchau tikai ka temuai. Enda lama udah nya, sida sama tindok. Pagi siti, udah kemas makai pagi, bala sida ke nanya indu nya pan lalu mulai ka diri. 6. BEKELIKOH PASAL NGUAI Leboh sida ke nanya indu nya udah ngelebus, dia bini Tuai Rumah Entekong, ngutok laki iya meda iya nadai bejako ka pasal sida ke nguai ka pangan, laban iya endang enda ngasoh Endu nguai ka orang. “Nuan tak nadai endar kira, enda nemu diri ke nadai anak bukai. Kati enti orang tak narit iya nguai leboh melah pinang ila ?” ko iya nganu Entekong. “Enti orang deka matak iya nguai, lak ka nguai. Iya ke belaki ukai nya kitai deh ” ko Entekong. Maioh jako kelikoh seduai melaki-bini tegal nya. Empat-lima hari nya endang enda bejako enggau pangan, sama agi pedis ati. Nyau kelama udah nya, nya baru saum baru baka selama. Endu pan lama ga tusah ati meda seduai balat bekelikoh ka nya, laban takut ka diri enda nyadi. Nyau meda apai seduai indai iya saum baru, nya baru ati iya lantang. 7. MELAH PINANG Leboh timpoh nyau semak. Sida di Tanjong Batu Besundang nya endang udah sedia magang. Taja sida nadai ngaga tuak, tang bisi ai chap langkau. Datai ba timpoh, bala orang ari Loba Kechuyu pan datai. Bala sida ditiki ka orang baka selama. Pengabang di-intu enggau chukop. Makai enda belala, ai bisa mega peneka ngirup. Malam kira pemanah iya, dia sida belator ka orang ti dipadu ka bejako ka sida ke belaki-bini. Manok sabong Tuai Rumah Entekong nya Lemambang Tuloi, lalu oang ke ngari ka lelaki ari Loba Kechuyu, iya nya Chelude. Nyadi Chelude nya ukai asal orang ke bekelingi ba menoa Loba Kechuyu nya. Iya nya anembiak baru ari rumah Engkaul di Dilah Tanah, tang laban iya endang rajin betanya ka penemu, nya alai nemu jako tuai. Seninjik iya bisi nemuai ngagai sida di Loba Kechuyu, nya alai lalu diambi sida ngari ka sapiak ari lelaki nangkup Lemambang Tuloi. Terubah di-injau sida, iya madah ka diri enggai. Tang apai Chuik ke pun empu pengawa keras bendar majak ka iya, laban ninga iya endang nemu bejako ka orang melah pinang, laban iya udah betarak ba niang Manang Ula menya. 8. JAKO KARONG Udah tembu jako Lemambang Tuloi ke nanya ka pejalai ngagai orang ke bejako ngari ka lelaki, dia Chelude ke ngari ka lelaki nya bejako nyaut Lemambang Tuloi. “Nyadi lemai kemari Kami dibai apai Chuik nyuan bulan Ngambika serepan tampak chiru, Dibai iya ngenang bintang Awak ka bekebendang tumboh bekelendu. Dibai iya nuchi hari Enggai ka kena hari minggu Nya alai pagi tadi Lalu dibai iya nurun Nya alai kami tak nurun Enggau tuboh enggau pemaioh Nurun betambit pintu, bekaling alu. Nurun enggau indu enggau anembiak Enggau bini enggau anak. Nurun samoa angkat sereta. Nya alai datai kami Ba tanah punggang tatai din tadi Ngetu bala kami dibai sida ke tuai Tang enda ga kelalu lama amai Enggai ka tepeda ka beragai Ke terebai nyerungkap rau Angkat ari nya Datai di babas tawas madang resam Ngetu ga kami dia Tang enda kelalu lama ngendam Enggai ka tepeda ka jugam ke itam bulu Angkat kami ari nya ngetu ba munggu madang kelindang ngetu ga bala kami Dibai sida ke bujang Tang enda kelalu lama rindang Enggai ka tepeda ka kijang Ke ngeranjang jarang bulu. Angkat ari nya datai ba emperan Madang paku kubok Ngetu ga bala kami dia Tang lalu apin tentu sampal dudok Dibai sida ke tuai mupok Enggai ka tepeda ka kijang laba pelandok Nya alai angkat ari nya tadi Bala kami lalu nuntong Di pendai kita dili dia Datai dia sepi isi Tak bebali chelap tedadam Nyangka kita ke di rumah tu Bisi ngusai ka batu ujan Ke nelian laboh lebat Tak kesal di jungkal tangkai ati Nyangka kita ke di rumah tu Bisi ngusai ka batu api Ti menjadi mau amat. Nya alai datai Ba tengah laman kita ke meriam Ke semetam nyagu ka rau, Lalu nunjang tangga purang Ke alai Belang Pinggang Berundang mansang ngasu. Datai ba pala tangga Tepeda ka redai pua Enggi Aji apai Limpa Ke belanda munoh jelu. Datai di ruai Meda ruai kita Baka balai Raja Melayu Malik ka panggau Meda panggau kita Baka kubau tuan Rundu Malik ka tempuan Alai Iban begulang-galu. Dia kami sabuat Lalu diasoh kita dudok Sekeda kami ke dudok nya Betentang enggau tiang sapar tiga Bukir senagir manah gaya Baka ke bisi gambar anak baya Baka ke tau ngelua Ka guna ubat gayu Sekeda bala kami dudok betentang Enggau tiang sapar empat Ke bukir senagir manah amat Baka ke bisi gambar anak menarat Baka ke tau ngelua Ka ubat sakang saribu Nya alai kami sabuat Ke datai tu mai kaban Kami ke nemuai tu mai belayan Baka sengayan meh kami tu mai raban Baka druan tu ka nepan Laban kami tu mai kita Betabi tangan besurong jari. Mai kita ngenggam gemala bulan Ke sigi melan-melan Tumboh di enturan pintu remang Mai kita nguji gemala api Ke sigi lanji-lanji Tumboh di kaki lumbong besakang Mai kita nyelepat lubang kilat Ke bekijap jampat terang Mai kita nyagam riam dalam Nyangka ukor kitai tesagam Ka gemian ikan tuman Ke bengeli tajam Tau ngebus ka geman pun rang.” Pia ko Chelude. 9. TIMANG AI Lemambang Tuloi lalu narit serungkong kaki iya . Udah nya lalu nyerepit sigerit, sereta lalu nyebut leka timang ai, nimbal Chelude. “Tu ai simpuli padi nibong Tanam jayah di tanah matah langgong Dijereki endu teruna dara tinggi Enggau badi duku chandong Enti agi kelia mula menya Dikena Rentap apai Tambong Ngansah anak perampang pedang bejengkong Tembu iya ngansah Lalu dibai iya mudik Ngagai gelenggang batang Rajang lepong Datai din kena iya ngalah Ka Kayan moa lesong Mati lesi ila pumpong Abis tanggal patong kena pansa arong Orang ke mansang nyerang. Tang ke diatu dikena aku ngansah Terinting puting ujong dabong Enggi nuan, awak ka nyawa nuan Nekis nyaris inggar berangangong Laban samoa orang Ke semumok dudok engkutong Bepangkat ka pelimbang baku tanggong Becharik ka chebik sirih laong Bebelah ka belabah pinang sagupong Ukai bisi kabuah bukai Deka ninga ka nuan Begulai ka perangkai bungai munong Gulai upong balong lawang Nya alai terinting puting ujong dabong Enggi nuan ke nekis nyaris rengong-rengong Digela aku munyi wa Pesiri kaki ular tedong Bejalai gupai umba mengkanjong Dua kali nyapa Empat kali manjong Ngangau ka orang di lepong nyaru adong Malu sengkutong tubai benang Terinting puting ujong dabong saleka Enggi nuan, digela aku Munyi wa pesiri laki ular bunga Ke bejalai gupai umba lelinga Dua kali lesap, empat kali nyata. Ngangau ka orang di pauh laba Penepan geruna burong rindang. Terinting puting ujong dabong kempat Enggi nuan, digela aku Munyi wa pesiri laki ular tungkat Bejalai gupai umba rejat Dua kali nyapa empat kali besangap Ngangau ka orang di kembayau lebat Damping disipat landong ditekang. Nya alai samoa orang Ke semumok dudok enda bekansat Bepangkang ka pelimbang batu padat Bebelah ka belabah pinang sesirap Becharik ka chebik sirih kerakap Ukai bisi pengawa bukai Semina rindu deka ninga ka nuan Begulai ka perangkai bungai kerakap Enggi endu taruna dara nelap Enggau enggi semelanyi bujang sigat Isa ka seduai enda agi begayap Main beguang.” Pia ko Lemambang Tuloi. 10. PINANG ENDA DIBELAH Tembu jako bungah nya tadi, sida lalu nelusur turun ari sapiak-sapiak. Nadai tentu lama endor datai ba tuboh lelaki enggau indu. Seninjik bendar udah jauh ngejang, nyau serak kalima, nya alai nadai pemali agi. Jako ba senentang nya pan putus. Lepas nya sida lalu bejako ka pasal nguai. Chelude ke ngari ka lelaki dulu bejako. Nyadi ko iya, “ Jako bukai kitai tu udah kemas magang, semina siti agi utai apin dikejako ka pasal seduai ke nguai ka pangan.” Baru apus jako Chelude, dia bini Tuai Rumah Entekong lalu angkat bejako madah ka anak endang enda diasoh nguai, laban ka siko nya. Sida ari sapiak pan madah ka lelaki nya endang enda nguai ka orang. Nya alai berengkah ari nya, sida lalu bechakah. Apai indu keras narit lelaki nya nguai, lalu sida ke ari lelaki pan baka nya mega endang madah ka lelaki nya enda ninggal ka bilik. Jako nyau sama kasar. Bini Tuai Rumah Entekong nyau ngitau ka jari, madah ka anak diri endang enda diasoh angkat ari bilik nya. “Enti lelaki enggai nguai,” ko iya, “isa enda nyadi”. Nya alai ninga jako bini Tuai Rumah udah renjan baka nya, sida ke ari lelaki pan madah ka Chuik endang enda nguai. “Awak ka enda nyadi, enggai ga ngasoh iya ninggal ka bilik,” pia ko apai lelaki. Nya alai ari nya pengawa sida ke melah pinang nya tadi laboh baka buah merunjau ulu, puntan baka menasan jalai jelu. Pinang enda dibelah. Bala ari lelaki maioh lalu pulai malam nya. Penemu lalu padam naka nya. Pagi siti samoa bala orang ke datai nyau beteruduus pulai. Udah samoa orang nya pulai magang, nya baru Sapit Tuai Rumah bejako enggau sida ke empu anak enggau Lemambang Tuloi, sereta enggau sida sarumah ke dia. “Penemu tu endang salah ari pun. Jako kita ke nerima orang ke nanya suba enda chukop, apin nyentok. Leboh orang ke nanya suba, dia kita patut mutus ka jako pasal bagi seduai ke nguai ka pangan, nya baru kita nadai kachau baka tu., laban endang udah nemu sapa ke nguai. Tu nyau ka melah pinang, nya baru kita bejako ka seduai ke nguai. Nya alai salah bendar penemu kita ba senentang nya,” pia ko Sapit Tuai Rumah nganu sida. Samoa sida lama nadai engkeretik, siko pan enda ga bejako. Nyau kelama udah nya baru Enchangol bejako ari tisi. “Nya meh kita ke bisi anak dara, bisi anak bujang anang enda chukop-chukop ka jako, nya baru mutus ka runding. Tu patut bendar dikingat ka nyadi ka teladan, ngambi ka enda lebu ngapa belanja, rugi hari.” Ko iya nganu sida. 11. RAMI SEKULA Sida anembiak ba Rumah Entekong di Tanjong Batu Besundang tu, baka orang menoa bukai mega, udah ngelala pemesai guna Sekula, laban sida meda gaya penguntong enggau pemansang orang ke udah nemu surat. Nya alai sida ke tuai di rumah nya, ensepi diri merinsa nadai penemu, ari nya sida enggai enda ngasoh anak diri belajar ka surat lalu nemu nulis enggau macha. Sekula sida di rumah nya bisi kira sataun udah didiri ka, nya alai meda sekula diri nyau ka chukop taun, ari nya tuai-tuai enggau komiti sekula sida berunding deka muka lumba enggau main bukai kene ngerami sekula nya. Aum sida mujur bendar,laban samoa ator lumba enggau main-main bukai nya endang dilengka ka sida ngagai komiti sekula, laban nya orang ke tanggong ngadu ka ator pengerami nya. Aum udah putus. Maia ke muka pengerami nya pan udah diletak. Main ke dibuka rambau nya, nyengkaum lumba darat ka anembiak sekula sereta enggau lumba apai-indai anembiak, lumba orang ke indu, main ball, nyabong, bepekit ka pemajik indu dara, sereta enggau bebatak tali. Ripih main sabengkah-sabengkah endang udah diadu ka komiti samoa. Hari ke nyadi nya saminggu udah aum nya ke putus. Sida ke muka pengerami nya bisi ngambi orang rumah bukai, lalu bisi mega ngambi orang ari Kubau di ili. Nya alai datai ba timpoh, orang ke diambi pan datai. Tang bala orang ke ari Kubau datai sahari dulu ari timpoh nya nyadi. 12. NGUBAH ATOR KOMITI Sereta bala orang ari Kubau nya udah datai, dia Tuai Rumah Entekong lalu mai sida merarau ba bilik iya. Tembu ke makai nya, dia iya bejako enggau sida. “Kami sabuat ke ditu sama agi baru magang pasal pengawa ke ngerami sekula tu, laban endang nadai kala ngereja pengawa ke bansa tu ngelama tu. Tang laban empa pengeras ati ngemansang ka sekula, nya alai muka pengerami kena meransang ati apai-indai sereta enggau anembiak ke besekula ditu. Tang sabengkah utai ke ngasoh ati irau, laban sida ke nyadi komiti sekula kami tu orang baru magang, nadai udah ngereja pengawa ke bansa tu. Sida amat mega udah baum, lalu ator udah diadu ka sida, tang ati aku enda tetap meda ator sida, nya alai ngasoh kita ke datai ari ili tu mungkar ator sida nya, lalu ngadu ka ator nya baru,” pia ko Tuai Rumah Entekong. Sida ke datai ari ili pan enda betanggoh lalu mungkar ator komiti sekula nya. Samoa ator ke diadu ka komiti dibuai magang. Meda baka nya , ari nya komiti sekula sida nya nanya Entekong, nanya ka kabuah iya ngasoh sida ke datai ari ili nya ngubah samoa ator ke udah diadu ka sida. Nyadi ko saut Tuai Rumah Entekong, “kabuah aku ngasoh sida ke datai ari ili nyin ngadu ka ator ke udah diadu ka kita, laban sida orang perintah, nya alai sida tentu nemu ngadu ka ator ka manah agi,” pia ko iya. Nyadi ko komiti sekula, “Enti jako munyi nya, nadai guna lah ngasoh kami tu nyadi komiti, enti ator kami enda diguna. Kami ka nyadi komiti tu, ukai nya utai pinta kami empu, endang diasoh kita maioh, endang utai dipilih. Nyadi jako kita suba, samoa ator pasal sekula tu endang bepanggai ba kami ke nyadi komiti. Tang ke tu, baru ka muka pengerami dalam sekula tu, kita ka tuai lalu enda beguna ka ator kami. Nya alai ngambi ka jako tu pandak kami ke nyadi komiti tu enda agi megai pengawa nya, lak ka orang ari Kubau ili ai nyin nyadi ka komiti sekula kitai tu,” pia ko komiti sekula. “Enggai nyadi penemu kita munyi nya. Enda nyadi pengerami kitai, enti penemu charut baka nya,” pia ko Entekong. “Kami ke komiti tu nadai nyarut ka pengawa tu, tang nuan ke ngasoh orang ari ili nyin ngubah ator ke udah diadu ka kami. Laban naka utai ke disebut dalam aum ke berunding ka penerami tu suba, kabuah kitai ke ngambi sida ari Kubau nyin datai ngagai pengerami tu, endang ngambi sida ngabang ngemata ka pengerami kitai. Ukai ngasoh sida ngator tau ka ngubah utai ke udah diadu ka komiti. Tang nuan tak ngasoh sida ngubah ator kami ari belakang, nadai madah ngagai kami. Nya alai kami komiti tu enda megai tanggong ator tu agi. Lak ka sida ari Kubau nyn nganti kami.” Pia ko sida ke nyadi komiti sekula di Tanjong Batu Besundang nya. Udah bekau ke bejako nya, sida ke komiti nya tadi endang enda iboh ka pengerami nya agi. Bisi sida nebas ke kebun, sekeda sida turun kumai. Tawas pagi siti, datai ba timpoh pengerami ka patut nyadi, dia orang ke ngulu pengerami nya lalu nurun ka padang. Bala anembiak sekula udah sedia magang. Orang ke nyabong udah mai manok deka disabong. Datai di padang meda sida ke nyadi komiti sekula nya nadai dia. Pengawa ke udah diator sida lalu enda dikereja. Tuai Rumah Entekong lalu mai orang ke datai ari ili nya mansang ka padang. Datai dia orang bejako enggau Entekong, nanya ka penunga sida ke nyadi komiti. Apin nyaut jako nya, dia Entekong lalu madah ka sida ke datai ari kubau nya diasoh iya ngubah ator ke udah diadu ka komiti sekula sida, laban ator komiti nya agi salah kenu ko iya. Ninga munyi nya, orang ke datai ngulu pengerami nya enda lantang bendar ati meda ator nya diubah nyau datai ba hari ke deka rami. Sida ke datai ari Kubau nya lalu madah ka gaya ator ke baru ti diadu ka sida, tang ator nya jauh bendar betelisih ari ator ke udah diadu ka komiti sekula. Nyadi ator komiti nya endang udah disanggup sida maioh, nya alai sida ngarap ka ator nya dikena dalam pengerami sahari nya. Tang samoa ator komiti nya tebuai magang. Nya alai ari nya orang maioh ngeransi, lalu mulai ka diri. Moa Tuai Rumah Entekong nyau baka ke ditunu, malu meda pengerami nya enda nyadi. Anembiak sekula nyau pepar nadai temu tunga. Bala sida ke datai ari ili ke diasoh Entekong ngubah ator komiti nya pan nadai nemu daya agi. Nya alai laban mensia maioh ke deka ngemata ka pengerami nya udah maioh mulai ka diri, lalu anembiak sekula pen nyau jarang ayan di padang, ari nya pengerami nya enda nyadi. Bala sida ke datai ari ili pen pulai sahari nya mai ati ke pemadu malu, laban sida udah tekelanjur bendar nyanggup jako Tuai Rumah Entekong ke ngasoh sida ngubah samoa ator komiti sekula ti ngadu ka pengerami sekula nya. 13. SEKULA NADAI KOMITI Malam siti udah nya bala apai-indai anembiak sekula mai sida sarumah nya begelumu, nanya ka kabuah Tuai Rumah Entekong ngasoh orang ke datai ari ili tak ngubah samoa ator ke udah diadu ka komiti sekula sida. Nyadi ko iya, “Kita amat udah ngator kereja ke kena ngerami sekula kitai tu, tang meda orang ke ari Kubau bisi datai nya alai aku ngasoh sida ngadu ka ator nya baru, ngambi ka manah agi. Aku enda nyadang kita ngenggai ka kereja sida ke ngubah ator nya,” ko iya. “Nama guna kitai nudok ka komiti sekula dah, enti kitai enda arap ka sida ngadu ka ator pengawa ke bekaul enggau kereja sekula ?” pia ko Enchangol nguing ngagai Tuai Rumah Entekong. “Nemu pan kitai ke di menoa ulu tu, enda ga telaban ka orang ke pandai ari Kubau,” ko Entekong nyaut Enchangol. “Enti nuan ngadang diri ngasoh orang ke ari Kubau din ngadu ka ator pengerami tu, nadai meh guna ngasoh komiti kitai kiroh ngadu ka ator nya ?” ko bala apai-indai anembiak sekula ke dia. Entekong enda munyi agi ninga apai-indai anembiak sekula beteguot nganu sereta ngutok iya tegal nya. Udah nya bala komiti sekula sida nya sama bela madah ka diri enggai agi megai pengawa nyadi komiti, laban ensepi pengawa diri enda diguna, taja sida endang dipilih orang maioh ke dia megai pengawa nya. Apai-indai anembiak sekula agi keras ngasoh sida, laban nadai nemu penyalah sida. Sekula nya pan nyadi ga sekumbang sida ke megai apin deka muka pengerami nya. Nyadi sida endang nyemetak bejako madah ka diri enda agi nyadi komiti. Nya alai meda sida enda ulih kuing ka ati, dia Sapit Tuai Rumah lalu bejako mai milih komiti baru, laban sekula enggai nyadi nadai komiti. “Sekula kitai tu baru sataun tu udah. Naka ke udah dalam pegai komiti tu kamari, sekula kitai tu manah bendar surong. Anembiak pan rajin ga belajar. Nya alai enggai ka sekula tak ditutup perintah, ari nya kitai enda tau enda milih komiti baru nganti sida ke deka badu tu. Laban enti sekula kitai ditutup, kitai rugi sereta malu,” pia ko Sapit Tuai Rumah. Nya alai ari nya sida betanya diri sama diri ke begelumu dia ngiga orang ke deka nyadi komiti. Tanya siko enggai. Tanya siko enggai ga. Siko pan nadai ka. “Kati alai kita ke lelaki bengat enggai ?” ko bini Tuai Rumah Entekong. “Ukai kami enggai megai pengawa nya, tang leboh utai udah diator lagi, dia Tuai peneka ati ngubah baka ke tu kamari. Nya kabuah orang nadai deka,” ko sida nyaut iya. Nyau kelama ke berunding dia, nya baru Sapit Tuai Rumah nguing ngagai Kepala Pengajar ke ba sekula nya., nanya ka runding ngagai iya. Apin iya nyaut jako ke nanya ke runding, dulu iya ngenang penemu Tuai Rumah Entekong ke ngati kadiri ngasoh orang ari Kubau ngubah ator komiti dalam pengerami ke enda nyadi dibuka sida. “Apin aku nyaut jako bukai dulu aku nusoi reti pengawa komiti sekula ti udah dipilih kita maioh. Nyadi pengawa sida nya, tanggong samoa ator enggau utai ke dikereja kena ngemansang ka sekula. Sida nya mega ngemata ka utai ke nanggol sekula enti sema enda maju, lalu sida nya orang ti ngiga jalai mutar ka pekara nya. Dalam pasal ngerami sekula, baka kitai ke deka ngerami sekula tu kamari, orang ke pun megai ator nya Chairman enggau komiti, laban samoa pengawa nya endang udah dilengka ka ngagai sida magang. Nya alai orang bukai nadai tau ngachau, sakali ka ngubah ator ke udah diadu ka sida, laban sida endang udah dikarap ka kitai maioh,” ko Kapala Pengajar. “Amat bendar jako Kapala Pengajar nya. Keba kitai milih komiti, laban kitai arap ka sida ngadu ka ator pengawa ke dikereja sekula. Udah sida ngator pengawa diri, dia orang ngachau lalu ngubah ator sida, nya alai aroh bendar sida pedis ati,” ko Lemambang Tuloi. “Kati ko nya deh Pengajar, nama kira mutar ka penyarut kitai tu. Nadai penyadi sekula kitai tak ditutup kategal utai ke bansa tu ?” ko Sapit Tuai Rumah. “Aku enda nemu mutar ka penyarut tu, enti ati enggau ulah ke tau ngachau ator sekula enda dilengka ka dulu. Enti kita sama besemaia, madah ka diri ngering ka ator komiti sekula, nyangka bisi jalai aku berunding ka jalai mutar ka penusah tu,” pia ko Kapala Pengajar nganu sida. Tuai Rumah Entekong lalu enda angkat pala, malu ninga jako pengajar nya tadi laban iya ngasai ka diri ke udah ngasoh orang ari ili ngubah ator komiti sekula sida. Udah nya sida ke begelumu dia sama madah ka diri deka besaup, lalu enda muai ator komiti sekula. Ninga sida sama madah ka diri enda ngachau ator, nya baru Kapala Pengajar nya nguing ngagai bala komiti ke udah madah ka diri enggai agi nyadi komiti sekula. “Aku minta kita naka ulih berunding baru pasal pengawa tu, laban enti sekula kita tu ditutup kategal nadai deka nyadi komiti, pengerugi nya pulai ka kita empu, lalu jemah ila kita kena kutok anak-uchu ichit-wit kita ke patut besekula ba sekula tu. Nya alai aku minta kita komiti lama tu, agi megai pengawa nya enggai ka sekula kita nadai penyadi,” pia ko Kapala Pengajar. Ninga jako Kapala Pengajar nya ngena, nya baru sida komiti sekula nya deka megai pengawa nya baru, laban sida endang sayau ke sekula nya puntan, enggai ka nadai alai anak sida besekula. Ninga komiti nya agi deka megai pengawa nya, nya baru apai-indai anembiak sekula ke dia lantang bendar ati. Tuai Rumah Entekong lalu enda bemunyi agi, malu ka kereja diri ke udah salah. Kira sataun udah nya, sida lalu muka pengerami sekula. Pengerami ke sakali nya mujur bendar. Apai-indai sereta enggau anembiak empu lantang bendar ati. Sekula nya pan mansang, pelajar anembiak pun maju. Nya alai nya naka cherita pasal pendiau, ulah enggau pengawa sereta enggau pemansang orang Rumah Entekong di Tanjong Batu Besundang.