MIMPI MINGGAT APAI RUNAI
Nyadi Minggat tu siko tuai Iban menoa Paku ke ngulu ka bala anembiak pindah mungkal menoa Batang Awik, pati kiba ai Batang Krian. Iya tau serang, lalu suah bendar nyerang ngari ka bala Raja James Brooke. Nambah ka iya ti tau serang, Minggat tu mega ngulu ka bala anembiak iya pemegi ngejang jaoh ari menoa Sarawak, iya tu mega orang ka pemulih tajau lalu pengawa iya tu dikerja iya nyentuk ka iya empu nyau parai di menoa Panai, Sumatra, seberai tiban Nanga San.
Nyadi sakali sepi Minggat dalam mimpi, iya asai ka bejalai. Leboh iya ka bejalai nya dia iya lalu betemu enggau orang siko ke ngasuh iya bebini ngambi indu siko ke benama Jara. Leboh orang nya nyebut Jara, kenaya indu nya pan lalu bisi ga dipeda iya dalam mimpi nya tadi. Dani iya pagi siti, ati iya balat irau bendar ka mimpi diri, laban dalam Batang Paku rambau nya kelia nadai iya kala ninga bisi indu benama Jara. Lalu pia mega maia nya, Jara iya nya indu siko ti diau di menoa Suri, Rimbas pan bisi ga bemimpi diasoh orang belaki ngambi lelaki ka benama Minggat.
Nyau kepuas Minggat ke tusah ati ka mimpi diri ti baka nya dia iya hari siti iya lalu bejaku enggau apai iya madah ka diri bisi ati deka nemuai ngagai menoa Batang Rimbas seraya ke lalu ngiga manok ka ka disabong. Apai iya pan nadai ga jako nagang iya. Iya pan lalu nurun ga ka nemuai ngagai menoa Batang Rimbas.
Sehari-hari nya iya bejalai nyau alah leboh iya nyau datai di menoa Suri ba pati Batang Rimbas lalu diantara menoa enggau Batang Paku. Nyau iya udah datai ba rumah orang Suri nya tadi dia iya lalu niki. Nyadi rumah panjai orang nya peda iya tak puang bendar maia nya, laban leboh maia orang benong kiroh ngereja pengawa umai. Datai iya di tengah rumah panjai nya dia iya lalu dudok, laban dia apai tuai orang siko bisi nudok ka iya.
Apin lama udah iya dudok, alai apai tuai orang nya pan lalu ngangau ke anak iya ti dibilik din. “0i Jara, uji anjong nuan baku ari bilik nya ngagai kami duai di ruai ditu,” ko apai tuai orang nya. Sereta udah ninga apai tuai orang nya tak munyi nya dia Minggat lalu tekenyit bendar ati. Dia Minggat lalu bejako dalam ati diri, “Mujur bendar ga pejalai aku tu ka.” Udah nya lalu pansut ga indu ke benama Jara ari bilik mai baku ke diasoh apai tuai orang nya tadi ajung ngagai seduai. Dara sereta tak suman bendar baka kelemayang gamal indu nya tadi baka ke dipeda Minggat dalam mimpi iya suba. Baku pan lalu diengkah ka indu nya di ruai, iya lalu pulai tama ka bilik baru.
Hari pan nyau lemai, alai Minggat lalu nurun mansang mandi ka ai. Udah pulai iya mandi, iya lalu dudok baru enggau apai Jara nya tadi di ruai. Apin bengat lama seduai iya udah berandau, alai Jara pan lalu ngumbai seduai bebai makai. Udah tembu makai, baka selama mega, orang serumah lalu nya bela datai magang ngulu Minggat ka nyadi temuai sida serumah, indu enggau lelaki bela sampal bendar datai magang betugong dia.
Nyau terentak udah sampal datai magang orang ka ngulu iya, dia bala orang Suri serumah nya lalu nanya ka nama iya, enggau nama pejalai iya ke datai ngagai rumah sida nya. Minggat pa lalu nyaut sereta madah ka diri datai ari menoa Karangan Pinggai dalam menoa Batang Paku, lalu kabuah iya ke datai kia padah ka iya nya sigi pejalai lantang ngiga manok sabong.
Sereta leboh ke ninga iya nyebut nama diri Minggat, iya lalu nyeling tepeda ka Jara bisi nelai indu siko ke dudok berimbai enggau iya lalu ngenang madah ka diri bisi udah ngambi lelaki ke benama Minggat nya tadi mimpi. “Tak baka gamal iya nya sekali-kali kenu ko gamal lelaki ka diambi aku mimpi malam nya suba,” ko Jara majak nelai indu siko ke dudok semak iya.
Udah meh Minggat ninga Jara bisi nelai indu ke berimbai enggau iya nya dudok, dia ati Minggat berunding bendar. Iya lalu lama berati ka gaya pengamat mimpi diri. Udah nya sekumbang iya ke berandau enggau orang serumah nya, dia ati iya nyau enda ulih bai iya lama berandau. Iya pan lalu madah ka bala sida nya diri empu udah lelak bendar bekau bejalai sahari nya.
Ninga iya nyau madah ka diri kelalu 1elak dia orang ti ngulu iya pan lalu pulai magang ngagai ruai ngagai bilik diri. Sereta meh udah pulai magang orang, alai apai Jara lalu ngadu ka endor Minggat tindok ba pantar sida. Udah tembu nya alai apai Jara pan lalu pulai ka bilik, tang leboh iya tama ka bilik Minggat sigi berati ka iya meda sakali ka iya nambit pintu bilik sida nya tauka enda. Meda iya enda nambit pintu Minggat pan berasai lantang bendar ati, iya beguai mensugau begadai-gadai tama ka bilik semina ke enda tak nyereta apai Jara, mansang ngayap ngagai Jara ke sadau.
Datai iya ba penindok Jara di sadau dia iya pan lalu terus ngerak Jara. Sereta meh Jara udah dani dia iya lalu nanya ka sapa orang ke berani datai mansang ngayap iya. Minggat lalu nyaut madah ka nama diri “Minggat”. Seduai pan lalu berandau semalam-malam nya. Nyau kepuas seduai udah berandau, dia alai Minggat lalu madah ka ati diri deka ngambi Jara ka bini. Laban ko iya, antu udah madah ngagai iya dalam mimpi ngasoh iya enda tau enda jadi enggau indu ke benama Jara. Ninga jako Minggat udah munyi nya, dia Jara pan lalu madah ka diri bisi mega mimpi diasoh antu mesti deka belaki enggau lelaki ke benama Minggat. Seduai lalu sama-sama arap ka mimpi pangan diri. Nyau ka lama seduai udah bejako enggau pangan diri malam nya dia Minggat pan enda berasai lalu tinduk. Apin lama iya udah tinduk endor iya lalu meda bintang tak baka ke di ara ka di kebung langit. Tedani iya ari mimpi nya tadi, lalu malik ka langit, peda iya agi ga bisi bintang nya tadi ayan belama. “Ni atap kita Jara,” ko iya nanya Jara. “Dia meh atap rumah kami tu,” ko Jara. “Nama nyin bintang agi bisi ayan deh?” ko Minggat. Seduai lalu sama bediri ngama atap, lalu atap pan bisi ga kena pegai seduai. Sereta seduai tepegai ka atap bintang nya tadi pan lalu lesap ari peda seduai.
Alit bendar ati seduai meda utai tak udu nyelai baka nya. Seduai pan lalu sama tindok baru. Lebuh tindok ke sekali tu dia Minggat lalu bisi bemimpi baru asai ka betemu enggau orang ka betemu enggau iya dalam mimpi ke dulu suba. Lalu ko orang nya nganu iya, “Tu meh indu ka diasoh aku ambi nuan ka bini. Baka seduai ka nengkadah bintang tadi meh baka nya ga gaya orang ila nengkadah rita anak telesak seduai.” Minggat pan lalu dani.
Nyadi malam keterubah iya ka baru udah jadi enggau Jara dia Minggat bisi mimpi baru munyi tu. Iya asai ka nengkadah ka langit lalu lebuh iya nengkadah nya tadi, peda iya bintang tak ngenjing baka ka di-ara, ngenjing terang langit laban bintang. Benong iya ngemata ka bintang nya tadi lalu dinga iya bisi orang ngangau ka iya munyi tu: “Baka nya ga nuan Minggat, ngemaioh bintang nya orang nitih ka nuan ila.”
Udah iya mimpi nya tadi, malam nya iya lalu tindok baru. Lebuh iya tindok ke sekali tu, iya lalu asai ke bemimpi bejalai niti jalai ti besai bendar. Nyau ka lama udah iya bejalai nya tadi, endor iya tak asai ke benong bejala niki bukit. Datai iya ba tuchong bukit nya, peda iya bisi rumah panjai orang sabuah dia, iya pan lalu niki ka rumah. Datai di rumah, iya lalu asoh orang nya dudok. Lebuh iya dudok, peda iya maioh bendar orang begelumu dia. Nyadi semua orang kebisi dipeda iya nya lau mai iya pansut ke tanju, iya pan lalu nitih ka sida sama enggau pansut.
Datai di tanju dia apai tuai orang siko lalu bejako, “Peda nuan asap nyin Minggat.” “Asap utai apa nama nya deh?” ko iya nanya nanya apai tuai orang nya tadi. “Eh, nyin meh gaya asap rumah munsoh ke udah alah lalu ditunu Orang Kaya Pemancha Dana, nyin asap rumah munsoh ke ditunu Linggir Mali Lebu, nyin asap rumah munsoh enggi Libau Rentap, nyin ka jauh agi nyin enggi Imba seduai Ngumbang,” ka apai tuai orang nya nunjok ka iya. “Ni asap rumah munsoh ke udah alah ditunu aku deh?” ka iya. “Nya enggi nuan Minggat, iya ka baru menyadi, nya meh gaya asap rumah munsoh ke ditunu bala kita ka tau serang,” ko apai tuai orang nya madah ngagai iya.
Apai tuai orang nya lalu madah ka iya, laban iya meda bintang ayan ngenjing merera ba langit, lalu nyentuk ka datai lima serak peturun Minggat ila agi meh bisi didinga orang berita. Apai tuai orang nya lalu madah ka rumah ke ditiki iya nya rumah orang menoa Panggau Libau, menua luchak lunyau, kena biau jila isang orang ka berani ati sereta kempang. Apai tuai orang nya lalu madah ka diri Keling. Udah nya Minggat pan lalu dani. Sereta udah dani iya lalu ninga kijang nyau rauh-rauh bemunyi nunga ke luan bilik.
Nyadi mimpi tu ditampong ari tusoi Mujah anak Mambang dalam taun 1951 ngagai niang Benedict Sandin.
