Nyadi Tindin laki Tida tu siko ari ketuai bansa Dayak Iban kelia ke pindah angkat ari menoa Batang Ai ngagai menoa Batang Skrang. Ari menoa Batang Skrang iya lalu mai bala anembaik iya pindah baru nitih ke kala ditusoi ba cherita “Peturun Iban – Iban Betampil Enggau Beketan” ngagai menoa Batang Paku laban nitih ka anak iya ke benama Rinda nya belaki jadi enggau Demong anak Entinggi, iya nya siko ari ketuai bansa Beketan di menoa Bukit Saban dalam menoa Batang Paku.
Nyadi ari ketegal bepun ari pengawa Tindin iya nya ketuai bansa Iban, seduai Entinggi iya nya siko ari ketuai bansa Beketan ke udah berisan. Lalu berengkah ari nya mega dua bengkah raban bansa tu lalu tau betampil begulai sejalai enggau pangan diri udah seduai iya ke bebaik ngena “Adat Derian Palit Mata” bekau anak seduai ke betampil jadi melaki bini. Kebuah alai ke bisi adat ka baka nya iya nya laban anak Tindin ke benama Rinda nya jadi enggau anak Entinggi ke benama Demong udah bekau sida ke charut bebunoh ka pangan diri, lalu utai ke derian seduai tu ke jadi iya nya: antu pala sigi engkerebai ti ditutup ngena gong nitih ka ripih adat ti udah dikena Remi jadi melaki bini enggau Damu. Nyadi leboh Tindin tu agi diau di menoa Batang Skrang dia iya bisi bemimpi ti baka tu.
Nyadi lemai siti leboh iya benong tindok dia Tindin lalu bemimpi asai ka bejalai nengah jalai siti ka besai bendar. Nyau kepuas iya ka bejalai niti jalai nya, alai jalai nya pen apus dititi iya. Udah meh iya ngapus ka jalai nya dia iya lalu asai ka rembus baru ga ba jalai siti da ke sama besai baka iya ka udah. Datai iya ba jalai besai ti kedua nya, dia iya lalu tepda ka kelakuyang isang tak maioh bendar digantong orang ba sebelah tisau jalai besai nya.
Sereta meh iya udah tepeda ka kelakuyang isang nya, dia iya lalu tepeda ka orang bengat maioh bendar tuboh benong mansang beterudus ka madi ka batang ai datai ari rumah panjai ba menoa nya. Leboh maia nya iya benong asai ka bediri ba tebing ai sereta benong ngemata ka bala orang dia mandi.
Nyau ka leju iya ke udah ngemata ka orang dia mandi, dia iya lalu tepeda ka indai tuai orang siko ka baru udah badu mandi, lalu gaya umor indai tuai orang nya kira ka baru udah beselat uban bulu pala. Indai tuai orang nya pen lalu tepeda ka iya mega. Ko jako indai tuai orang nya, “Lalu Tindin, ngena bendar ga nuna tu bisi datai ditu leboh aku barun udah tembu mandi tu.” Indai tuai orang nya lalu nyurong ka iya siti batu perunsut. Udah indai tuai orang nya nyurong ka iya batu perunsut nya tadi, dia iya lalu nyurong ka baru ngagai Tindin kerupak pau. Iya pen lalu bejako benong ke nyurong ka kerupak pau nya, “Kerupak pau tu Tindin tau nyadi ka engkerabun munsoh, lalu iya mega tau nyadi ka ubat pengaruh kena nuan matak serang ngelaban munsoh. Nyadi leboh nuan ka baru datai ditu tadi, aku baru udah tembu bekusok tujoh kali. Nya alai laban nya, bala peturun nuan pen tujoh serak tampong menampong deka tau serang magang ngelaban bala munsoh nuan.” Indu tuai nya lalu madah ka diri empu iya nya Indai Keling ngagai iya. Sereta udah ninga jako Indai Keling nya, dia Tindin pen lalu tedani, sereta batu ubat pengaruh nya tadi pen agi mega mengkang ba genggam jari iya.
Enda lama udah bekau iya ka bemimpi nya alai Tindin lalu enggau orang nurun mansang ngayau nyereta nitih ka kayau apai iya empu ka benama Chaong. Nyadi leboh sida iya ka benong merau ngili ai Batang Skrang berengkah ari menoa Tanjung Lipat undor ke ili dia perau enggi Tindin enggau perau enggi apai iya seruran berumpak berari-ari niti ai.
Nyadi nyau enda berapa jauh ari menoa Nanga Skrang, leboh sida iya benong berumpak enggau perau apai iya nengah ai, dia tak enda mukai-mukai alai kemudi perau Tindin lalu kena kait unak ke dipeda melulor ari langit. Meda utai tak nyelai baka nya dia Tindin lalu mansang mumpong nyimpong unak nya tadi ke lalu putus sereta terus nyadi batu. Nyadi gamal gaya unak ke udah bebali nyadi batu nya, iya nya enda nyalah-nyalah suman bendar baka gaya duri jelai. Unak ka bebali nyadi batu nya lalu diambi Tindin, benong ke ngambi batu unak nya dia iya lalu meda unak nya bisi tinggal ka tujoh iti kengkang, ti lalu ditaroh iya nyadi ka ubat pengaruh.
Nyadi malam siti Tindin lalu bemimpi baru ti alai iya lalu dipadah ka Indai Keling baka ka dulu ari nya mega. Iya nya tujoh serak turun menurun tuboh anak telesak Tindin deka tampong menampong tau nyadi tuai serang kayau magang nitih ka gaya penyampau kengkang unak jelai ke udah disimpong iya leboh ke ngait kemudi perau iya leboh ka berumpak enggau apai iya maia sida ti nurun mansang ngayau merau ngili ai Batang Skrang.
Nyadi mimpi Tindin Bejulok Pimpin Beragai Ngindang ka dua kali tu nyata bendar, laban sereta meh udah parai tuboh iya empu dia tujoh serak, guna, tampun, tusok enggau kabak ke udah ulih sida nya lalu abis kena empa api di menoa Beduru dalam Batang Paku leboh rumah Penghulu Kinyeh ka angus kena empa api dalam taun 1898.
