MIMPI ORANG KAYA PEMANCHA DANA BENSUMBAR BAYANG
Nyadi Dana ke bensumbar Bayang tu mega selalu disebut ketuai bansa Iban ke dulu kelia iya nya Rekaya Pemancha Dana Bayang. Dana tu iya nya siko ketuai bansa Iban ti datai ari menoa Saribas lalu kebuah iya dikumbai Orang Kaya Pemancha nya laban ari ketegal iya ti tau serang ngulu ka bala anembiak iya nurun mansang ngayau ngalah ka maioh bengkah menoa munsoh iya, lalu iya mega tampak nama tebilang berita udah ke ulih ngalah ka menoa ngerampit ngagai menoa ti kena pegai Sultan ari menoa Pontianak, Kalimantan Barat, Indonesia. Nyadi semoa serang kayau iya tu nitih ko cherita sigi nadai kala sabau tauka rumbau sereta dikumbai orang kelia nadai kala balang.
Nyadi Rekaya Pemancha Dana Bayang tu bisi anak sembilan iko, enam iko lelaki lalu tiga iko indu. Ari semoa bala anak iya ke lelaki nya ka semina Orang Kaya Pemancha Nanang seduai Aji tauka Saji ti sama nampong iya tau serang ngulu ka orang ngayau, lalu bala menyadi seduai ke bukai nya semina tau dikumbai orang bujang berani aja.
Nyadi leboh Rekaya Pemancha Dana Bayang tu baru deka ngangkat ka diri bujang, dia iya lemai siti udah ke bekau baru tembu makai lemai lalu tumu bendar tindok ke lalu ngujong ka iya bisi bemimipi baka ke dicherita ka iya ngagai orang munyi ti disebut ditu. Lalu cherita mimpi Rekaya Pemancha Dana Bayang tu ditusoi niang Apai Serika ngagai Busok anak Gerijih ke diau di menoa Entanak, Betong ke lalu ditampong iya ngagai niang Benedict Sandin dalam taun 1951 di Kuching.
Dalam mimpi iya nya iya tak asai ka benong bejalai niti jalai siti ke naka iya ka tawas bendar. Sekumbang iya ke niti jalai nya dia iya lalu betemu enggau orang ke maioh bendar ti benong baka kinding ngesan baur ginti, benong bejalai ka mansang nurun nginti ngagai sungai. Laban ke bedau bisi ari ka nanya ke pejalai bala sida nya, dia orang nya lalu dulu agi nanya Rekaya Pemancha Dana Bayang. Iya lalu nyaut bala sida ke ka mansang nurun nginti nya madah ka pejalai diri deka nemuai ngagai menoa orang Gelong, iya nya menoa sida Kumang bini Keling enggau bala sida Lulong sida Ngelai.
Bala sida ke ka nurun nginti nya lalu majak ngumbok mai Rekaya Pemancha Dana Bayang sama enggau sida iya nya nginti. Tang Rekaya Pemancha Dana Bayang endang majak madah ka diri enggai, laban iya sigi ka mansang ngagai menoa orang Gelong. Ninga munyi nya dia orang ka betemu enggau iya lalu nyaut, “Nya nadai ko enggau meh Dana, enti nuan nginti, nuan pan baka kami tu meh ga pemulih nuan ikan.” Iya lalu nanya ngagai sida nya jalai ti tau ditengah iya mansang ngagai menoa orang Gelong. Orang nya pan lalu madah ngagai iya ngasoh iya niti jalai ke lurus ti benong dititi iya nya tadi.
Rekaya Pemancha Dana Bayang pan lalu mupok baru nampong pejalai iya nya tadi.
Enda lama udah nya, dia iya lalu meda orang maioh bendar bejalai mansang nuju ngagai iya, lalu baka nya mega sida tu benong baka kinding ngesan jarin ka kena nangkap rusa. Bedau ga iya sempat nanya orang nya , tang orang nya lalu dulu agi ga nyapa iya nanya ka tunga pejalai iya. Iya lalu nyaut baru munyi ke dulu tadi, madah ka diri ka mansang ngagai menoa orang Gelong. Ninga saut iya munyi nya, orang maioh nya tadi lalu ngumbok iya mai iya sama enggau bala sida mansang enggau nyarin rusa. Iya lalu nyaut madah ka diri nadai hari laban iya ke beguai ka mansang ngagai rumah orang Gelong. “Nya nadai ko enggau meh Dana, enti nuan nyarin ikan, nuan pan baka kami tu ga pemulih rusa.”ko orang nya madah ka iya. Dana lalu nanya ka ni bagi jalai ke tau ditengah iya mansang ngagai menoa orang Gelong. Orang nya tadi lalu madah ka iya, ngasoh iya terus niti jalai ke lurus ti benong ditengah iya nya tadi. Iya pen lalu mupok baru nampong pejalai diri.
Udah meh iya ngejang ka endor nya dia alai iya lalu tepeda ka orang maioh baru datai mansang nuju ngagai iya ba jalai nya benong ngesan badal ka kena ngulih ka babi. Leboh sida nya betemu enggau Dana, sida lalu ngumbok iya mai sama enggau sida madal babi. Iya pan lalu nyaut munyi ke dulu agi madah ka diri enggai lalu nadai hari limpang laban iya beguai enggai ka diri enda datai di menoa orang Gelong. “Nya meh Dana, enti nuan nurun madal nuan pan baka kami tu meh pemulih babi. Iya pen lalu nanya baru ngagai orang nya tunga jalai mansang ngagai menoa orang Gelong. Bala orang ke betemu enggau iya nya lalu madah ngasoh iya niti jalai ti lurus nya, laban nya meh aja jalai mansang kin. Dana pen lalu mupok baru ngejang ka bala orang nya tadi.
Nyau ke lama-lama iya udah bejalai, nama bukit diturun bukit ditiki, iya lalu tepeda ka orang maioh bendar ke benong nyau baka kinding betangkin ka duku datai mansang nuju ngagai iya ba jalai nya. Nyadi penuai bulu pala orang ke ngentudi ka bala orang nya dipeda iya pen nyau buban bendar. Apin iya sempat nanya orang nya, tang bala sida nya dulu agi mega nanya ka pejalai iya. Dana lalu nyaut madah ka diri ka mansang ngagai menoa orang Gelong.
Sida nya enda ngasoh iya beguai mansang kin laban dulu agi ka mai iya enggau sida mensiang jalai umai. Iya lalu madah ka diri enggai laban nangi ka diri enda datai ngapa ba menoa orang Gelong. “Nyadi nadai ko enggau meh Dana, tang enti nuan bumai baka kami tu ga gaya nuan pemulih padi,” ko padah apai tuai orang ke buban agi bulu pala nya. Iya lalu nanya baru ka penunga jalai iya tau mansang ngagai menoa orang Gelong. Orang nya lalu madah ngasoh iya niti jalai ti ditengah iya nya.
Iya pan lalu beguai-guai ga mupok ngejang ka bala orang maioh nya. Nyau kepuas iya udah bejalai alai iya pen lalu manggai ba tinting siti. Ari tinting nya dia iya lalu tepeda ka rumah panjai orang siti ka nyau baka ka sekayu tinting pemanjai rumah orang nya ba tinting seberai nyin nangkup ka tinting ti alai iya nya tadi. Iya lalu bejalai berari-ari alah nyau datai ba kaki tangga rumah panjai orang nya tadi. Datai iya dia, iya pen lalu bisi kakang ati, asai ke ka niki, lalu bisi ga asai ke enggai. Nyau ke lama iya ti tegir-tegir bediri ba kaki tangga rumah orang nya baru iya ka nyadi niki.
Datai iya ba pala tangga rumah panjai orang nya, peda iya tak ngenjing puang rumah nadai orang, gaya tempuan rumah panjai orang nya nyau baka lubang sumpit empa pemanjai. Bejalai kenu ko iya niti tempuan rumah orang nya, lalu leboh iya nyau datai ba tengah rumah panjai orang nya dia lalu pansut indu siko nyilak ka pintu lalu beguai ngasoh iya tama ka bilik. Iya madah ka diri enda iboh tama laban agi beguai berumban ka mansang ngagai rumah panjai orang Gelong. Indu nya pen lalu pansut ka ruai, sereta lalu ngasoh iya dudok ba pantar. Iya agi keras madah ka diri enggai, tang meh nyau kelama iya udah diumbok indu nya alai iya pen lalu nudok ka diri.
Apin lama iya udah dudok alai indu nya lalu angkat lalu nyilak ka pintu bilik, peda iya tak naka pemaioh reta pesaka orang ke dalam bilik nya. Tajau lama nyau baka digir ba sebelah tisi dinding. Nyau enda berasai alai iya lalu angkat nanya indu nya sapa bagi orang ke beempu bilik nya tadi.
Tu bilik “Rangkang Kirai Raja Sua, Pepat Pudak Bujang Sempulang Gana” bisi apai tuai orang siko ke buban bulu pala ti bejalai ngentudi ka bala orang maioh ke betemu enggau nuan tadi.” Pia ko saut indu nya. “Nuan enggai tama bilik kami,” ko iya “Tang enti nuan gawa ila baka kami tu ga gaya pemulih nuan pesaka reta tengkira.” Indu nya lalu madah ka diri bini Pulang Gana empu ke benama Endu Endun Serentum Tanah Tumboh Gegaroh Niti Antara, Endu Iyak Serindak Tanggi Buloh Ngelayang Ka Dandang Uma, anak Raja Semarugah.
Iya lalu madah ka diri deka mupok, lalu indu nya pan lalu ngasoh iya bejalai niti rumah panjai nya lalu nurun ari setak ngagai tuju moa iya. Bejalai iya ngejang ka nya lalu beguai-guai lalu baka nya mega iya nama nya nurun nama nya niki bukit berari-ari. Nyau ka lama iya udah bejalai, alai iya pen lalu nyau bisi ga ninga utai baka munyi sangap orang. Bejalai iya ari nya tadi lalu nyau sepengelama mega udah nya baru iya nyau bisi ga ninga munyi auh kukok manok orang ke nyau richah bendar. “Panjai bendar ga rumah orang tu,” ko iya bejako kediri. “Nama munyi kukok manok tak nyau munyi ka sekayu tinting pengingar, kada enda tu ke dikumbai orang rumah panjai orang Gelong,” ko iya ga majak bejako kediri.
Nyau ka lama iya udah bejalai alai rumah panjai orang nya pan nyau tampak bendar di peda iya lalu rumah panjai orang ke sekali tu jauh panjai agi ari rumah ke udah ditiki iya dulu tadi. Iya pen nyau semak ke semak alai iya pen nyau ngenong ninga munyi orang tak naka iya pengerami ba rumah panjai nya tadi. Iya pen bisi ninga munyi orang nebah belikan, lalu bisi mega nya dinga iya nyayat engkerebab, bisi nya nyepu engkerurai lalu bisi mega nya munyi ke benong rindang gendang pampat.
Datai iya semak rumah iya lalu ngenong meda gaya pemanjai rumah nya. Datai di kaki tangga iya lalu ngangau nanya ka gaya penyadi rumah panjai nya tau ditiki. Peda iya lalu ayan indu siko nilik ari menyawan ba tebelayar lalu ngasoh iya niki sereta madah ka rumah sida nya nyadi nadai penti pemali ditiki temuai ke datai.
Iya pen lalu niki, datai iya ba pala tangga dia iya lalu malik ngagai pantar sereta tepeda ka lelaki siko ke benong dudok ti lalu ngasoh iya mai sama dudok ba ruai nya. Iya madah ka diri enggai dudok laban enggai enda dudok ba ruai sida Keling. “Enti nuan ngagai Keling, kaki iya nyin ke chuit-chuit gali ba panggau, ba tengah-tengah rumah panjai kami tu,” ko lelaki nya madah ngagai iya.
Iya lalu mupok bejalai niti tempuan nuju nagai ruai sida Keling. Leboh iya nyau datai ba ruai ti ketiga, dia iya lalu tekenyit meda lelaki siko tak ganjang entepa ka jari enda ngasoh iya mansa. Iya lalu ngelari ka diri nyeliah nengah ruai lalu geli ati meda gaya lelaki nya tadi. Datai iya dia lalu tekenyit baru mega iya laban meda bisi lelaki siko entepa ka jari ba tengah ruai lalu telanjai enda ngasoh iya mansa.
Naka ka pengeli ati iya ka diri ti diempang orang baka nya lalu mupok baru iya ngelipak ngelaung nengah pantar. Lalu ba pantar nya pan bisi mega siko lelaki ke telanjai entepa ka jari enda ngasoh iya mansa nengah nya. Dia iya lalu kalat-kalat enda nemu tunga jalai ke patut tau ditengah iya mansang ngagai ruai sida Keling.
Nyau ke puas iya ke kalat-kalat baka nya ngiga jalai ke lalu bedau temu dia iya berunding nikal baru. Leboh iya nyau datai ba ruai orang ke ba pala tangga nya tadi, alai lalu bisi indu siko ke benong nyilak ka pintu ti ngasoh iya lalu tama ka bilik. Iya lalu madah ka diri enda iboh lalu. “Nya nadai ko enggau meh Dana, nuan empu mega enggai lalu tama ngagai bilik kami, tu meh bilik Sempurai, lalu enti nuan majak ka ngagai bilik sida Keling nuan tau nengah nyin, ngelaung nengah ari luan bilik.. Datai nuan din lagi, bisi nuan meda indu siko ka benong meri babi makai, nama indu nya Indai Lipai, ulun tuai sida Kumang,” pia ko indu nya madah ngagai Dana.
Iya lalu mupok bejalai ngelaung nengah luan bilik munyi ka udah dipadah ka indu nya tadi. Nyau ke lama iya udah bejalai, dia iya lalu meda bisi indu siko tak naka iya penyai gamal ti benong meri babi makai ba luan bilik nya kira ba urong senentang ba tengah-tengah rumah panjai nya tadi. Sereta indu tuai nya tepeda ka iya dia iya lalu beguai-guai ngelalu ka Dana. “Enti nuan ka ngagai Keling,” ko Indai Lipai ,”nuan nganti dulu, nganti aku tu udah tembu meri babi tu makai. Lagi tua sama sereta niki,” ko Indai Lipai. Dana pen lalu nudok ka diri sambil ke nganti Indai Lipai tembu meri babi nya makai.
Udah meh tembu Indai Lipai nya tadi meri babi makai, iya pen lalu mai Dana niki ka rumah panjai nya nengah tangga ari luan bilik. Datai seduai iya di bilik, dia Dana lalu ngenong meda pemaioh perengka reta tengkira ke dikemisi ka orang dalam bilik nya, tak chukop macham bansa utai dikemisi ka magang.
Udah nya iya lalu malik ngagai sadau, lalu peda iya naka iya pemajik gamal indu siko ke benong rindang ngebat enda jauh ari pala tangga sadau nya. Meda nya iya tak enda berasai lalu niki ka sadau ka meda indu nya ngebat. Leboh iya nyau datai ba pala tangga sadau dia iya lalu tepeda ka baru ,siko da agi ga indu ke lebih agi bajik ari nya ke benong rindang ngebat muak ka dalam nyin, Dana pen lalu mansang kin ngagai indu nya tadi.
Datai Dana din, lalu kejang iya nyau deka nudok ka diri dia iya lalu tepeda ka Randi Ke Bensumbar Rantai ti digelar Orang Kaya Panglima, endang lama udah nyangah dudok nyandar semak ngimbai indu ke benong ngebat nya tadi. Dana pen lalu nanya Randi, “Kemaia nuan datai ditu deh tuai?” ko iya. “Bedau ga tentu tak lama tu udah datai tuai,” ko saut Randi ngagai iya. “Ngena bendar mega tua tu tak betemu ditu,” pia ko timbal Dana. Iya pen lalu nudok ka diri ngimbai seduai nya.
Nyau kelama sida tiga indu nya berandau alai indu nya pen lalu madah ka diri ka ngetu laban udah lelak. Indu nya pen lalu nyandih sereta lalu berandau nungga seduai. Nyau ka lama sida tiga udah berandau alai indu nya lalu ngasoh Randi seduai Dana nesa panau ke ba dada iya nya. Randi pen lalu berengkah nesa, tang nama leboh iya ngitong baru ka meraka arong dada indu nya dia iya lalu enda teingat ka itong diri empu agi. Iya lalu berundang ngitong nya tiga kali, lalu baka nya belama ga gaya iya ngitong panau nya tadi nama udah meraka arong dada, iya lalu enda ingat ka penyampau.
Udah meh tembu Randi ngitong panau ba dada indu nya, alai indu nya lalu ngasoh Dana mega nguji niap panau nya tadi. Lalu itong Dana, lalu baka nya mega iya enda ingat ka penyampau itong diri. Enti itong iya nya udah meraka arong dada indu nya tadi dia iya lalu enda ingat ka itong diri. Dana lalu nguji ngitong panau nya tiga kali berundang baka Randi, tang iya pan baka nya mega enda ingat agi enti tiap kali iya udah ngelui arong dada indu nya.
Udah bekau nya sida tiga lalu nampong berandau baru. Nyau ke lama sida tiga udah berandau alai indu nya lalu ngaga ilom pinang dua iti. Nyadi ilom pinang nya tadi siti diengkah iya ba pah muak ari kiba lalu baka nya mega siti lalu diengkah iya ba pah muak ari kanan. Iya lalu ngasoh Randi nyeput ilom pinang nya dulu. Randi pen lalu nyeput ilom pinang ba pah indu nya muak ari kiba, lalu udah nya baru Dana nyeput ilom pinang ti muak ari kanan. Tang leboh ke nyeput ilom pinang ba pah indu nya dia Dana lalu enda berasai gatal ati lalu ngetil pah indu nya.
Udah seduai iya tembu nyeput ilom pinang nya dia indu nya pen lalu bejako enggau seduai. “Nyadi seduai Randi enggau Dana sama-sama tau matak serang, tang serang Randi chelap agi. Nyadi serang nuan Dana ba iya ke terubah nuan nyerang ka angat, laban leboh nuan nyeput ilom pinang ke ba pah aku tadi, nuan bisi buya lain ati ngagai aku.” Pia ko indu nya.
Indu nya lalu madah ka gaya serang Dana balat agi ari gaya ari serang Randi, laban ilom pinang ke diambi iya tadi nya muak ari kanan. “Tang laban seduai ke sama-sama enda tetiap ka panau ba dada aku, nya alai bisi siko orang bukai ke enda ulih dialah ka seduai ila. Enda lama agi ila orang tu ka datai ari tisau langit ari muak ari moa mata hari mati. Iya nya Raja Ribai, idong iya manchong, kulit iya burak, mata iya bular lalu bok iya pirang. Iya tu meh ke enda ulih dialah ka seduai. Enti seduai tadi ulih niap panau ka ba dada aku nya baru siko pen nadai meh orang berani ngenatai ka jari ka ngelaban seduai,” pia ko indu nya. Indu nya lalu ngasoh seduai iya anang enda ngelalau bala sida uchu ambu seduai empu anang sekali-kali ngasoh nguji ngelaban bansa Ribai enggai ka sida ila parai.
Udah nya, indu nya lalu ngasoh seduai iya malik. Malik seduai nya tadi dia seduai lalu tepeda ka langit tak ngenjing besebun baka ke laban asap maia nunu umai taun. Seduai lalu nanya ka nama kebuah langit nya tak nyau besebun baka ke dipeda nya. Indu nya lalu madah ke nya meh gaya asap rumah munsoh ke udah ditunu seduai maia serang nya ila. “Semoa menoa tunga ngagai moa mata hari idup,” ko indu nya,”siko pen nadai meh sida dia ulih enchepai ngelaban serang seduai.” Indu nya lalu madah ngagai seduai semoa bansa orang ke chelum kulit sigi nadai berani ngangkat ka jari ka ngelaban seduai ila. Iya lalu madah ka nama diri Kumang.
Udah nya Randi seduai Dana lalu angkat mutar ka diri ka pulai, alai Kumang ke lalu ngasoh seduai iya dudok ba atas tanggoi seraong. Tak lalu ditegu Kumang tanggoi nya tadi peda tak lalu ngelayang terebai ka langit naban ka seduai iya. Tekenyit laban kesal ati laban penerebai tanggoi nya tadi dia Dana lalu tedani. Leboh iya ke dani nya tadi dia mata hari benong urong tengan niki hari siti.
Nyadi gaya mimpi Dana tu amat bendar, laban leboh maia umor iya nyau udah tuai lalu enda dapat agi alai Tuan Rajah James Brooke datai ka Sarawak lalu megai perintah ba menoa Sarawak. Iya ka sekali aja ngulu ka bala anembiak iya ngelaban Rajah, iya nya benong iya nan di menoa Nanga Padeh dalam menoa Saribas dalam taun 1843.
Udah parai Dana, dia anak iya ke benama Nanang seduai Aji enggau Luyoh enda ngasi ka pesan iya ke bemimpi nya lalu ngelaban Rajah ba menoa Padeh baru. Udah ke alah dia sida tiga lalu ngaga kuta ba menoa Nanga Spak, udah nya lalu nan di menoa Nanga Sungai Langit ti lalu ngujong ka Aji parai leboh negah Rajah dalam taun 1858. Udah nya sida iya lalu nan baru ba menoa Nanga Spak ti ngujong ka sida alah baru lalu niki ka Bukit Sadok ti alai sida iya nundok kena 25 hb.September, 1861.
Udah nundok ba Bukit Sadok alai anak Aji ka benama Senabong seduai Timban lalu pegi nguji ka ngiga kebal ka menoa Sabah ka dikena seduai iya bebalas ka pemarai apai seduai. Datai seduai iya di Sabah dia enda mukai-mukai siko ari seduai nya lalu parai laban ketegal pedis perut lalu siko ari seduai mega parai kena tangkap baya leboh ke nyemerai nitih ka pelandok meraka Batang Kinabatangan.
