Nyadi Kedu ka bensumbar Lang Ngindang nya tuai Dayak Iban di menoa Batang Skrang ke udu bebunuh ngelaban Perintah ari taun 1879 ngagai taun 1881 di Nanga Bunu enggau di Bukit Stulak, Ulu Entabai, Julau. Sereta udah abis pegachau ke digaga bala sida Lang Ngindang enggau anembiak iya, dia orang di menoa Skrang lalu diau bebaik datai ka sahari tu. Nyadi Lang Ngindang tu tau serang, lalu apin iya empu angkat ngelaban Perintah Raja Sarawak iya sigi suah bendar nulong Perintah ngalus ka menua ari ke dikachau bala munsoh, baka ngulu ke bala iya betempoh enggau bala Aji di Sungai Langit..
Nyadi Kedu tu mega bisi bemimpi sebedau iya ke tau matak serang, lalu mimpi iya baka tu: Leboh iya berumah di Nanga Bunu, sakali iya ngulu ke bala anembiak iya nurun beban perau pangayau ba pah Bukit Ensanga, antara Ulu Tebat enggau Ulu Buai pati Batang Padeh, enda jauh ari rumah sida iya di Nanga Bunu.
Sereta kayu udah tembu rebah ditebang dia iya tak pan berasai bendar lelak, nya-alai iya lalu ngali ka diri ba baruh dan kayu ke udah ditebang iya nya tadi. Iya lalu nat ka diri dia. Leboh iya ka gali dia iya enda berasai lalu tindok. Sekumbang iya ke tindok nya dia sepi iya, iya tak lalu malik engkadah ke atas lalu tepeda ka rumah orang ba atas dan kayu ke alai iya ke gali nya tadi. Dia iya meda bisi indu siko ayan nyenguk ngagai iya ke gali ari moa penyawan, ngerara iya enda ngasoh iya agi nebang kayu sabelah alai ngelingi nya dia, enggai ka nyau abis ninggang pisang enggau tebu ke ditanam sida. Kedu lalu nyaut madah ka diri enda nemu bisi rumah orang ba alai iya ke nebang nya dia. Ninga jako indu nya tadi dia Kedu lalu nanya ka sapa bagi orang ke bempu rumah alai indu nya. Indu nya lalu madah ka iya, iya nya rumah orang menoa Gelong Batu Nakong, Ngelentik Punggang. “Niki meh nuan Kedu, bisi Tutong ditu,” ka indu nya tadi. Kedu pan lalu asai ka niki rumah orang nya. Leboh iya ke bejalai nyau datai ba tengah rumah panjai nya, iya pan lalu di asoh Tutong dudok. Kedu pan lalu nudok ka diri ba ruai nya.
Udah meh Kedu nya tadi dudok, dia Tutong lalu bejako, “Badu agi nuan betebang ka utai ngelingi rumah kami tu, enggai ka utai tanam kami nyau abis rusak kena tinggang kayu ke rebah laban nuan. Enti nuan agi bisi utai deka ditebang dia ila, nuan enda tau enda madah ngagai kami dulu.” Kedu lalu minta ampun madah ka diri saru laban enda nemu dia tadi bisi rumah sida Tutong orang menoa Gelong. Lalu iya ke nebang kayu nya tadi paan laban ka beban ngaga perau pengayau ka iya empu.
Tutong pan lalu nangkan iya ngena jako baru, “Ka agi tu ila Kedu, enti sema ka nuan agi bisi pangawa bukai ke ka dikereja, nuan enda tau enda ngangau ka kami. Enti nuan madah ka kami, kami bisi datai mantu, nulong enggau nuan ngereja semoa pangawa.” Kati ko jalai aku madah ka kita?” pia ka tanya Kedu. “Eh nadai nya tak beleman bendar, taja bunoh ka nuan manok, lalu nambah ka nya lalu digaga ka nuan piring, udah nya dibiau nuan piring nya tadi sereta lalu ngangau ka bala kami ari menoa Gelong tu, nya baru kami bisi datai mantu nuan,” pia ko Tutong nyaut.
Tutong lalu madah ka Kedu udah bekau nya ila, Kedu deka tau matak serang laban iya udah kala niki ngagai rumah panjai orang di menoa Gelong. “Enti nuan mansang nyerang, nuan enda tau enda ngangau ka bala kami,” ka Tutong. Udah tembu Tutong nya bejako, alai Kedu pan lalu tedani. Udah nya baru iya nemu diri bemimpi.
Nyadi bala peturun Kedu “Lang Ngindang” enggau bala iya ke pindah ari menoa Batang Skrang diatu maioh netap diau di menoa Bawang Asan, Sibu. Lalu cherita mimpi Kedu “Labng Ngindang” tu ditusoi niang Busok anak Gerijih, ari menoa Entanak, semak pasar Betong ngagai niang Benedict Sandin.
