Udah nurun Nakoda Tinggi ka menoa Saba, nyadi Uyut anak Penghulu Garan Lembang Batu ke sama datai ari menoa Paku pen nurun mega pegi enggau Ipa seduai Chentu ngereja pengawa ngetah ka menoa Bintulu. Leboh ke ngetah tu dia Uyut lalu betemu enggau Gima ke datai ari menoa Krian ke endang sama ngemeran ka pengawa ngetah di menoa nya.
Nyau kepuas udah ngereja pengawa ngetah dalam babas ba menoa Bintulu dia Uyut seduai Gima lalu nyerara ka diri ari Ipa seduai Chentu. Uyut seduai Gima tu lalu pegi baru ke Singapura ngena kapal tambang. Ari menoa Singapura seduai iya lalu terus pegi ke menoa Trengganu. Di Trengganu dia seduai iya lalu sama-sama gawa ka babas enggau bala Iban bukai ke endang udah lama diau din. Nyau ke lama udah nya, nya baru Uyut begulai enggau Nyanggau ke datai ari menoa Nanga Boung, Paku ke endang udah dulu agi ari iya datai din. Nyadi Nyanggau seduai Uyut lalu pegi ka menoa Kuala Lumpur sereta bulih minta kerja nyadi Polis.
Udah meh bulih niki pangkat ngagai Lance Corporal, Uyut lalu di asoh perintah menoa Malaya enggau Sergeant Tampang Mat Sirong ke datai ari menoa Awik matak bala ngalah ka bansa Laut(Melayu) di menoa Bentong, Pahang ke benong kachau ngelaban perintah. Bala orang luar ke sama bisi di bai seduai maioh bendar enggau maia nya, nyengkaum Kelumpu ke datai ari menoa Kumpai dalam ai Krian. Sida Kelumpu leboh maia tu baru datai di menoa Kuala Lumpur. Nyadi Gima seduai Uyut ke begulai tadi enda mindah ari menoa Trengganu sereta agi ngemeran ka pengawa kereja getah enggau Entaban.
Leboh kayau tu Uyut beberita tampak bendar berani. Iya nimbak munsoh ke belalai dalam babas ari atas puchok kuta. Nyadi munsoh malas sereta nimbak iya berari-ari tang iya lalu enda kena, laban pengaruh empelias ke dikena iya bangat chukup bisa. Nyadi ko cherita mega, siko dua ari bala sida ke bediri ari belakang iya ba puchok kuta leboh nya mega salah magang di timbak bala munsoh.
Sereta udah abis begau endor orang lalu nitih ka munsoh ke rari. Nyadi nyampau dengah ke ulih Uyut leboh ke begau tu iya nya sembilan iko, lalu orang ke sama bisi enggau iya bedengah leboh begau tu iya nya Kelumpu, Katang, Embul enggau Nyanggau.
Udah munsoh dipelulong ka sida, Uyut lalu nangkap maioh bendar bala munsoh, ke nyau bulih dua buah perau ke lalu di bai iya pulai ka nengeri. Nyadi Uyut ke enda ulih timbak bala munsoh leboh ke begau nya tadi di tusoi Nyanggau leboh udah kayau nya tembu. Nya alai laban pemerani iya tu dia Uyut lalu digaga ka Mat Sirong ensumbar Muntigrai, tang iya enggai beempu ensumbar nya leboh iya nyau datai ba menoa Sarawak tu.
Nyadi Mat Sirong tu iya nya orang ke datai ari rumah sida Minggat dalam menoa Awik. Nyadi iya ke Kuala Lumpur laban ke gawa nyadi Polis. Dulu ari kayau tu Uyut endang udah beberita kala matak kayau ngalah ka menoa Pahang ke ngering diri bekau kayau sida Nyaru ke dulu agi ari tu menya.
