Nanang tu iya nya anak tuai kayau ke benama Orang Kaya Pemancha Dana bensumbar “Bayang” enggau Mengan ti ke lumor empat ari sembilan iko diri menyadi. Nyadi sida iya diri menyadi iya nya; (1) Tiong ke belaki ngambi Attar, (2) Landan ke belaki ngambi Mang, (3) Indun ke belaki ngambi Belabut, (4) Nanang ke bebini ngambi Rabai, (5) Aji ke bebini ngambi Dimah, (6) Luyoh ke bebini ngambi Lemai, (7) Buda ke bebini ngambi Belangkat, (8) Unting bebini ngambi Ngiok, (9) Impu, enggau (10) Tambong ke belaki ngambi Layang (Tang Tambong laban ke mali diempu sida nya alai iya lalu diiru Libau bensumbar "Rentap Tanah Kudi Menoa" tauka "Raja Ulu" laban bini Libau ke benama Sawai tauka dua bali nama iya Berinjan nya diri menyadi enggau Mengan.
Nanang tu bebini ngambi Rabai anak Orang Kaya Penglima Randi ka bensumbar “Rantai”. Lalu penatai seduai tu sama sida iya di menoa Padeh, ke mati ba Batang Layar. Nyadi mentua Nanang ke tebilang dikangau ka bansa Iban ngena nama Orang Kaya Penglima Randi mega sigi siko ari bansa orang Raja Berani Iban dalam menoa Saribas ka endang beberita serambau enggau apai iya Orang Kaya Pemancha Dana “Bayang” ka mati dalam taun 1854. Udah bekau menyadi iya ke benama Aji nya mati ngelaban bala Raja James Brooke di menoa Sungai Langit dalam taun 1858 dia Nanang lalu nganti Aji nya nyadi tuai bansa Iban dalam menoa Padeh enggau menoa Ulu Layar.
Udah bekau menyadi iya ke benama Aji nya mati di menoa Sungai Langit, dia bisi tuai Iban siko ke benama Luyoh lalu undor ngagai menoa Mukah. Datai iya din dia iya lalu berunding enggau siko tuai bansa Laut ke benama Sharif Masahor, ke sigi ditemu leboh rambau nya sigi endang bisi ati deka angkat ngelaban perintah Raja Brooke. Ninga berita ke diapadh ka iya nya dia Sharif Masahor lalu besetuju nyendia ka bala enggau senjata ke ka dikena Luyoh ngelaban perintah.
Udah ka berunding enggau Sharif Masahor di menoa Mukah, dia Nanang seduai menyadi iya siko ke benama Luyoh lalu mupok niri ka kuta ka dikena ngelaban perintah di menoa di Nanga Spak dalam ai Batang Layar. Ba alai tu mega seduai diri menyadi lalu ngenan deka ngipa sereta lalu ngelaban bala perintah bebalas ka pemati adi seduai iya ke benama Aji. Tang dalam taun 1858 dia kuta seduai nya lalu alah diserang Tuan Watson enggau Bakir sereta Abang Aing. Sebulan udah bekau sida iya ka alah di menoa Nanga Spak, dia Nanang lalu niri ka kubu baru, tang ke sekali tu mega seduai iya alah diserang bala Raja James Brooke ti betuai ka Tuan Watson enggau bala Bakir ari Kubu menoa Betong.
Ari kuta di atas Bukit Sadok tu Nanang seduai Luyoh lalu kala ngulu ka bala seduai engau bala Libau Rentap nulong Sharif Masahor ngelaban perintah di menoa Mukah. Seduai iya lalu ditemu tampak bendar nulong Sharif Masahor betempuh ngelaban bala perintah di kubu iya di Mulah enggau Igan.
Dua bulan udah bekau Sharif Masahor diburu perintah rari ngagai menoa Singapore dalam taun 1861 dia Tuan Raja James Brooke enggau Tuan Muda Charles Brooke lalu ngulu ka bala besai ngalah ka Nanang seduai Libau Rentap ba kuta seduai di Bukit Sadok. Laban ka udah enda mujur ngalah ka Sadok dua kali dulu agi ari nya dia bala Raja lalu tulih ka runding deka mai meriam besai siti ka lalu digelar sida iya ngena nama “Bujang Sadok” kena ngeruntoh ka kuta Libau Rentap.
Nyadi bala Raja James Brooke lalu bejalai ngulu ka ai Batang Layar nyetuk ka sida iya datai ba menoa Nanga Tiga ba Ulu Layar. Angkat ari nya sida iya lalu nyambung pejalai sida baru ngulu ka Sungai Tiput, sereta lalu terus muntang ngagai menoa Spak lngulih ka semak agi bala sida iya nuju ngagai Bukit Sadok. Leboh sida iya udah datai ba kaki Bukit Sadok dia bala sida lalu baum, Tuan Besai seduai Tuan Muda Charles Brooke lalu madah ka perintah nadai ati agi deka bemunsoh enggau Nanang seduai Luyoh, lalu perintah mega deka ngampun penyalah seduai enti seduai iya deka nyerah ka diri lalu nundok ka perintah. Tang Libau Rentap enda kena serangkung aum tu laban iya sigi enda ulih diampun perintah laban iya udah ngereja penyalah ke besai ketegal ti ngulu ka bala anembiak iya ngayau lalu ulih munoh Tuan Allan Lee di menoa Nanga Skrang dulu agi ari nya.
Ninga penemu Tuan Besai enggau Tuan Muda udah munyi nya dia bala Iban ari menoa Saribas lalu berasai lantang bendar ati. Laban enti nitih ka ati sida, sida endang enggai agi bemunsoh enggau diri sama diri. Bala tuai-tuai Iban pan lalu putus jako madah ka diri sama besetuju milih Jabu apai Umping engau menyadi iya ke benama Ngadan apai Rembi ngambi ka nyadi seruan betemu enggau Nanang seduai Luyoh ba kuta Bukit Sadok.
Jabu seduai Ngadan pan lalu niki ngagai Bukit Sadok. Datai ba atas din seduai iya lalu madah ka jaku aum perintah Raja James Brooke ngagai Nanang seduai Luyoh. Seduai iya pan lalu madah ka diri setuju ka nundok ka perintah, enti jako nya ukai semina jako ka dikena nipu seduai iya aja. Udah Nanang enggau Luyoh enggau bala seduai berunding enggau panjai agi dia seduai iya lalu mai bala sembilan iko manok sabong seduai ngambi ka sama betemu lalu berunding enggau bala Raja ba kaki Bukit Sadok. Leboh sida iya datai din dia Tuan Besai seduai Tuan Muda lalu ngasoh seduai iya nyerah ka 400 igi tajau rusa tauka pulai ngagai mata duit $3,200 00 nyadi ka chengkeram ngagai perintah ngambi ka nyadi jamin sida iya enda ngaga pengachau agi. Nyadi enti seduai iya ditemu amat nadai agi ngaga pengachau ngelaban perintah dalam kandang timpoh tiga taun ti ka deka datai dia perintah lalu deka mula ka semoa tajau seduai nya baru. Nanang seduai Luyoh pan lalu setuju sereta lalu ngasoh Uyu apai Ikum nyua ka semoa tajau nya ngagai perintah. Udah bekau nya dia bala perintah lalu ulih ngalah ka kuta Rentap ba Bukit Sadok.
Sebedau ninggal ka Bukit Sadok dia Tuan Besai lalu ngempuru ka bala tuai-tuai Iban menoa Batang Layar, menoa Batang Paku enggau menoa Batang Skrang. Leboh maia tu Tuan Besai lalu madah perintah badu agi bemunsoh ngelaban Nanang, Tuan Raja mega lalu madah ka Nanang nadai munsoh agi, lalu Nanang enda tau nurun ngayau ngapa agi enti enda dibai Tuan Raja. Tuan Besai lalu nangkan bala Iban enggau jako enda ngasoh sida agi bekayau ka pangan diri lalu majak ngemeran ka pengawa ngidup ka diri ngena chara bumai betupi enggau bedagang. Udah nya Tuan Besai lalu ngatur pendiau sida Nanang diri menyadi. Nanang lalu diasoh iya diau ba menoa Buluh Antu, dalam ai Padeh.Lalu Luyoh diasoh iya diau di menoa Sungai Langit di menoa Ulu Layar.
Dalam pun taun 1863 dia Tuan Muda lalu mai tuai-tuai Iban menoa Saribas baka Nanang ari menoa Padeh, Linggir “Mali Lebu” ari menoa Paku, Bakir ari menoa Betong, Minggat Apai Runai seduai Chulo bensumbar “Tarang” ari menoa Awik enggau Krian sama enggau sida iya nurun mansang ngayau ngukom bansa Kayan enggau Kenyah di menoa Ulu Batang Rajang laban sida iya ditemu kala ngelalai ka Sawing seduai Skalai ka rari kin udah ka munoh dua iko pemesai orang putih di menoa Kanowit.
Nya alai pulai ari ka ngayau bansa Kayan enggau Kenyah di menoa Ulu Batang Rajang dia Tuan Muda lalu ngempur ka semua tuai-tuai kayau dalam menua bagi kedua baum ba Kubu James di Nanga Skrang. Maia ka baum tu dia Tuan Muda lalu meri besai terima kasih ngagai bala sida kelebih agi ngagai Nanang ka udah mandang ka pemerani iya sereta penaluk iya ka perintah udah bekau seduai iya Luyoh nundok ba aum Bukit Sadok kena 25 ari bulan Semilan, 1861 suba. Maya tu mega perintah lalu mulai ka 400 igi tajau rusa iya ti ka jamin seduai iya suba ngagai seduai iya baru.
Dalam taun 1879 dia Tuan Maxwell, Residen Simanggang lalu ngasoh Orang Kaya Pemancha Nanang ari menoa Padeh ngulu ka bala perintah mega sereta lalu dibantu bala sida Minggat seduai Tarang ari Kalaka, enggau Jabu seduai Utik ari menoa Bangat, Skrang ngalah ka Kedu “Lang Ngindang” tuai Iban menoa Skrang di menoa Nanga Bunu. Dalam kayau tu dia menyadi Nanang enggau anak menyadi iya ke benama Senabong seduai Timban anak niang Aji bebendar amat laban ngingat ka niang apai seduai ka udah dipumpong orang menoa Skrang ba menoa Sungai Langit dalam taun 1858 suba.
Dalam taun 1886 dia perintah menoa Sarawak lalu meri pangkat Orang Kaya Pemancha ngagai Nanang, sama enggau pangkat niang apai iya Orang Kaya Pemancha Dana “Bayang”. Maia tu mega Bunyau apai Bakir lalu diberi pangkat nyadi Pengarah, iya tu meh Iban ti keterubah diberi pangkat Pengarah. Pengawa tu dipenyadi ka ba Kubu Lili di Betong.
Dalam taun 1886 nya mega Nanang sekali agi diasoh perintah ngulu ka bala sida ngalah ka Ngumbang seduai Bantin iya nya siko tuai Iban bamenoa Ulu Batang Ai ka angkat ngelaban perintah kenyau ari taun 1882 suba. Nanang lalu ngulu ka bala Raja ti ka terubah iya betuboh lebih 12,000 iko nurun mansang ngayau ngagai menoa sida Bantin seduai Ngumbang di menoa ka dikumbai Kadang di Kalimantan, Indonesia ka leboh rambau nya agi kena pegai perintah menoa Belanda. Maya kayau tu bala perintah ulih munoh dua puluh iko anembiak Bantin seduai Ngumbang lalu ulih mega nunu lebih lapan puluh buah rumah panjai bansa Iban ke diau ngelingi nya dia.
Dalam taun 1898 taja pan udah tuai umor, tang perintah agi mega ngarap ka Orang Kaya Pemancha Nanang ngulu ka bala perintah nyerang bansa Iban di menoa Sungai Yong enggau di menoa Cheremin di Ulu Batang Rajang. Nyadi tu meh ka penudi Nanang kala ditemu orang ngulu ka bala perintah nurun mansang ngayau.
Orang Kaya Pemancha Nanang tu meh keterubah iya tuai bansa Iban ari menoa Saribas masuk pengarap Kristian. Dalam taun 1891 dia iya lalu dipilih perintah nyadi pengari kaban Kunsil Nengeri menoa Sarawak ngari ka bansa Iban datai ka iya mati dalam taun 1902 lalu dikuburka ba Pendam Terusu di menoa Padeh, dalam pati ai Batang Layar berimbai enggau kubur niang apai iya Orang Kaya Pemancha Dana “Bayang” enggau menyadi iya ke benama Aji apai Limpa. Kelimpah ari Aji seduai Luyoh menyadi lelaki iya ka bukai baka Buda seduai Unting sama nyadi katekis (catechist) enggau Gerija Kristian Anglika
Nyadi bisi sekali leboh maia iya agi biak, dia Nanang bisi bisi kala bemimpi. Lalu mimpi iya nya asai ka niki Bukit Santubong, di Sarawak. Lalu leboh ka bemimpi nya iya tak asai ka betemu enggau Kumang. Leboh ke betemu enggau Kumang ba Bukit santubong, dia iya lalu asai ka dibai Kumang tama ngagai bilik penindok iya. Udah meh Nanang nya tadi tama dalam bilik tindok Kumang, dia Kumang lalu madah ka iya, “Jemah ila nadai orang bukai bengat ulih ngalah ka nuan Nanang dalam semoa kayau.” Nyadi dalam mimpi iya nya mega Nanang asai ka meda bisi tiga iti panggau penindok dalam bilik nya. Nyadi Kumang pan lalu madah ngagai Nanang, “Panggau ka sepiak kanan nya bendar nya penindok nuan Nanang, iya ka tengah nya enggi aku lalu iya ka ari kiba nya sekali enggi Ngumbang (Brauh Langit).” Kumang mega lalu madah ka Ngumbang mega enda ulih ngalah ka kayau Nanang laban panggau penindok iya ari kiba Kumang. Udah ke bemimpi nya Nanang pan lalu tedani.
Kelimpah ari mimpi iya nya tadi dia Nanang mega bisi kala bemimpi baru. Nyadi ba mimpi ke sekali tu iya asai ka diau ba langkau siti. Nyadi langkau ke alai iya diau nya digaga orang ngena kajang ba atas tuchong bukit siti. Leboh iya ke diau dia tak enda mukai-mukai ribut pan lalu datai balat bendar lalu betiup, sereta lalu mangka ka langkau ke alai iya diau nya. Nyadi langkau ke alai iya nya diau pan lalu tekebu terebai nyentuk ka nyau laboh terengkah ba pendai orang ke dipeda bisi karangan ti manah bendar.
Sereta meh udah terengkah ba pendai orang nya dia Nanang lalu pansut sereta ninga nyawa orang indu ngangau ka nama iya, “Oh Nanang , kitu nuan enggau kami duai mandi ditu.,” pia ko siko ari indu dua iko nya. Nanang pan nadai maioh jako lalu asai ka terus sama enggau seduai nya mandi ba pendai nya. “Tu, ditu meh alai nuan mandi Nanang,” pia ko indu nya madah ngagai iya. Nyadi leboh Nanang asai ke ka mandi dia, dia iya lalu ninga indu siko ke biak agi nya lalu bisi jako, “Nyadi lagi nuan nyampi ke tua indai, lalu lagi aku mega manjah iya.” Nanang pan lalu nudok ka diri ba atas Batu Galang, lalu indu nya pan lalu manjah iya ngena ai selabu. Sereta iya udah dipanjah indu nya tadi, dia indai indu nya pan lalu berengkah ga nyampi ka tudah Nanang. Lalu munyi leka sampi indu nya tadi munyi tu.
"Nyadi aku ke nyampi tu nunda munyi sampi enggi Manang Tibi ke belian nyliop hari gentilang remang,
Nyadi aku ke nyampi tu mega nunda munyi sampi enggi Manang Chelong ka belian nengkuyong di paras lesong telentang,
Nyadi aku ke nyampi tu mega nunda munyi sampi Manang Matai ke belian mansai di menoa bidai pakan melintang,
Lalu aku tu mega nunda munyi leka sampi Manang Lansu ke landik ngelulu ka diri benong nubu ba pun tiang.”
Nyadi udah ai selabu nya pan abis dikena indu nya manjah iya, lalu baka nya mega munyi leka sampi indu ke siko da nya pan tembu mega. “Udah abis leka sampi nuan nya tadi indai” pia ko indu nya bejako. “Agi menya leboh aku ke manjah Laja, dia tak apin abis ai ke didujoh ka aku endor iya udah rauh-rauh madah ka diri chelap. Nyadi nuan tu ila Nanang sigi sebakaa enggau Keling, laban sama enda nemu chelap laban dujoh ai selabu tanam tu.” Indu nya lalu madah ka nama diri Kumang. Indai Kumang lalu madah ka Nanang sigi deka nyadi bujang berani, sebaka enggau sida Keling seduai Laja di menoa Panggau Libau., iya lalu madah ka bansa bulu manok kena Nanang ngereja semoa pengawa sigi biring sempidan. Udah nya Nanang pan lalu tedani.
Nyadi mimpi iya tu ditusoi Busok Anak Gerijih ke datai ari menoa Entanak, Betong enggau Selaka Anak Budin ke datai ari menoa Stambak Ulu ke kena pegai menoa Betong.
