Nyadi enda jaoh ari pasar Betong dalam menoa pegai Saribas, lalu ba menoa ke dikumbai Entanak dia bisi siko tuai kitai Iban ke tebilang bendar tau serang lalu nama iya dikangau ka orang Unggang ke bensumbar Lebor Menoa. Leboh rambau iya tu dulu kelia sereta ba perturun Iban ke lapan serak dulu agi ari iya dia lalu nadai siko kitai Iban udah ngenampak iya tu nama tau serang.
Nyadi apin Unggang jadi bujang berani, tau kayau ngagai nyentuk ka iya tau serang, dia iya endang udah nyadi manok sabong orang leboh maia nurun ngayau. Leboh iya baru angkat bujang dia iya bisi mimpi asai ka merau ngili ka Nanga Layar lalu meraka tasik ari Nanga Saribas nyentuk ka iya lalu sangkai bekau puput ka ribut ba tengan Bukit Santubong. Enda jaoh ari menoa Kuching ke diatu. Leboh iya udah sangkai dia lalu beguai-guai niki ngagai tuchong Bukit Santubong nya.
Leboh iya udah datai ba tengah bukit, dia iya lalu betemu enggau indu dua iko ke bajik bendar gamal ke baru udah tembu badu mandi. Sereta seduai nya tepeda ka Unggang, dia siko ari indu nya lalu bejako madah kediri nadai hari ka berandau lama enggau iya. Dia siko ari indu nya lalu bejako “Ngena bendar maia nuan datai ditu, Unggang, laban kami dua baru udah tembu mandi.” Sereta indu siko nya udah bejako dia siko ari seduai lalu nyua ngagai Unggang batu perunsut ke baru udah badu dikena iya mandi. Leboh Unggang ke nyambut batu perunsut nya dia iya ke nyua lalu bejako baru, “Batu tu Unggang nyadi ka pengaroh besai tau dikena nuan matak serang leboh maia nuan ngulu ka orang nurun ngayau. Lalu baka nya mega laban nuan bisi ngembuan batu pengaroh tu, nadai siko orang bukai ke diau ba antara Loba Santubong nebing muak ari kanan nyentuk ngagai Nanga Lingga berani ka nguji ngelaban nuan ila mai bebunoh. Lalu pia mega enti nuan tak nyerang menoa bukai ngelui ari tu ila ngagai menoa muak ka Tanjung Datu. Kami duai nadai agi ulih ngemata ka serang nuan. Laban batu pengaroh tu nadai ulih nyangkong ari ngelui menoa ke udah dipadah ka kami duai tu ila. Nyadi nama aku tu Kumang, lalu iya ke enggau aku tu iya nya Lulong ke endang diau ngibun tuchong Bukit Santubong.”
Bedau lama udah bekau iya ke bemimpi tu dia Unggang lalu berengkah beban perau pengayau ke besai bendar. Nyadi gaya pemesai perau iya nya, ruang tau alai kitai nganchau tikai idas, lalu bisi menoa bukai ngumbai tikai tu bidai. Leboh perau tu udah tembu dia Unggang lalu ngena perau pengayau iya tu nan ka menoa nyaga Nanga Layar ari kena serang bala munsoh. Iya nya bansa Bajau enggau Lanun. Iya mega nyerang sebarang orang ke enda dikelala sereta enda ditemu ari ni penatai iya ke bisi mansa menoa sabelah tasik nya ke ka nguji tama ngagai Batang Layar.
Nyadi Unggang nurun ngayau nadai kala mai perau maioh laban perau iya empu besai sereta ulih ngundan maioh sakai kira seratus iko. Laban perau pengayau Unggang tu ka dua tiga buah aja, nya alai iya enda kala ulih alah laban munsoh lebuh maia beIanggar. Nya alai laban pengering sereta rita pemerani Unggang, enti sema orang bukai ninga iya bisi beranti ngelingi Nanga Layar terus ka Loba Santubong dia nadai siko orang bisi berani deka ngelanggar bala iya. Lalu Unggang mega selalu ngulu ke bala iya ngerumpak kapal besai enggau sekunyir ke datai belayar enggau bedagang ba sabelah tasik luar kin ka agi.
Nyau ka lama udah Unggang main beripa ba tasik bakanya, nya baru bisi bansa China bedagang di Sarawak (Kuching) bejako enggau iya lebuh iya rembus ba pasar sida ba Nanga Kuching. Bala China ke bedagang nya lalu madah ka diri bsi ati deka bedagang ke Saribas. Unggang madah ka tau, enti sida deka nerebai ka setunggol burak ba atas legit tiang perabong bandung (perau besai) sida ngambi ke nyamai dikelala iya. Bala China lalu madah ka diri deka, nya alai sida pan lalu dikemendar ka Unggang bedagang ke menoa Saribas.
Nyadi utai dibai sida China terubah datai bedagang ba menua Iban di Saribas iya nya; periuk tenaga, periuk petani, kali, pinggai, besi gerunung, geri, bun, pelaga. marik lama, tuchong ke simpai, marik engkabang, rangki enggau tanchut birang enggau kain bukai. Nyadi utai kena Iban meli utai ke dijual China tu iya nya padi. Lebuh jeman tu utai bukai enda dibeli China baka rotan enggau dambar sakali ka asil ari kampung. Lalu rega sigi pelaga iya nya sapasu padi. Pia mega rambau tu kelia bala China ke bedagang bedau tak berani diau mendam berumah ba menoa Batang Saribas nyentuk ke nyau dua peturun bala sida ke dudi ari nya baru sida berani begulai enggau bansa Iban. Enti barang sida udah abis laku, sida lalu kemaia nya mulai ka diri baru ke Sarawak lalu ngerembai ka setunggol burak ba tiang layar sida awak ka orang Iban Saribas ka beripa di tasik ngelala sida.
Nyadi semua bansa bukai ke enda nerebai ka setunggol burak enti bisi ayan lalu dibunuh orang Saribas magang. .Semina orang ke enda dibunoh sida iya nya bansa Laut Saribas ti tau nusut diri endang ari peturun aris Temenggong Kadir seduai Abang Gudam. Kebuah sida enda munuh bansa Laut tu, laban sida nya endang bansa Laut ke lama udah begulai sejalai enggau bala Iban Saribas. Sida iya deka dibai saum penemu enggau besenurut runding ba samoa utai ari serak siti ngagai serak siti nyentuk ke sehari tu.
Nya alai laban pemanah nya taja pan Iban Saribas tu bansa orang ti deka bendar ngayau baik ka ba tebing tasik tauka ba tasik besai, sereta ka bendar bebunoh ngelaban perintah Rajah Brooke, sida iya enda tak bemunsoh enggau semua raban bansa siti ngelaban bansa siti. Nyadi mensia ke diau nguan dalam sungai bukai sigi ngemendar ka Iban Saribas bebunoh ngelaban Rajah Brooke. Sida iya ngelaban Rajah berengkah ari Nanga Maro nyentuk terus ngagai Bukit Sadok di menoa entinggis Ulu Saribas berengkah ari taun 1841 ngasgai taun 1861.
Nya alai endang adat kenyau ari tuai dulu kalia enti Laut ka diau semak Nanga Layar nadai buah, nadai payan, nadai lalis tauka danan enggau tubu paku, sida mudik kulu nukar utai nya ngagai Iban ngena ikan masin, bubuk, undang kupak, tesar, enggau garam apong. Pia mega Iban, kejang deka nugal. endang ari asal bebai ka leman utai ti kena sebut nya tadi kena nukar salai kalan, salai jan enggau lauk bukai ti di kemisi ka bansa Laut lebub maia nya suba. Nyadi jako kena bansa Iban ngangau ka bansa Laut ti pangan sida kelia nya Udong. Jaku tu enda agi dikena diatu semina agi di kingat ka dalam leka main aja.
Nyau tuai Unggang Lebur Menoa lalu mati, dia iya lalu diganti anak iya ke benama Luta nyadi tuai. Leboh Luta tu nyadi tuai dia pengachau udu bendar ka nyadi di antara Iban Saribas enggau Iban Skrang belaban enggau bansa Iban Undop, Balau enggau Sibuyau ke diau ba menoa Batang Lupar. Rambau tu mega dia anak Orang Kaya Beti ke digelar Orang Kaya Pemancha Dana Bayang, enggau Unal ke bensumbar ‘Bulan’, enggau anak Uyut ke benama Linggir bensumbar ‘Mali Lebu’, sereta enggau Igoh apai Lamban udu balat bendar belaban enggau perintah menoa Brunei. Sida tu kala udah nguji belayar matak anembiak ngayau merau nebing tasik terus ka menoa Menado, Sungai Raya, Sambas enggau Mempawah ti kena pegai Belanda dalam perintah Indonesia kemaia ari nya suba.
Nyadi dalam Skrang lebuh tu tuai ke ganas amat ngulu ka inembiak nyerang tunga ka Sambas enggau Pontianak nya Libau bensumbar Libau Panggau Dara Rentap Tanah Rentap Menua, Bulan Genaya, Bulan apai Jelani, Orang Kaya Rabong, Orang Kaya Gasing, Sandom enggau Renggi. Nyadi di menoa Banting, Lingga nya Lang ke bensumbar Ijau Berani enggau menantu iya ke benama Orang Kaya Janting ke balat beberita berani leboh maia tu kelia.
Enda mukai-mukai benung pangachau tu nyadi, dia pengari perintah Brunai di menoa Lingga ke benama Indra Lila menyadi Lila Wangsa seduai Lila Pelawan nyabong bansa Iban Saribas enggau Iban Skrang belaya bemunsoh ngelaban bansa Iban Undup, Lingga enggau Banting ngambi ka iya bulih penguntong kategal penyarut nya. Nyadi sekali leboh bebunoh tu, dia Ngadan adi Luta ke pengkuan parai kena bunoh bala Temenggong Juti di Sebuyau. Laban pengachau tu dia Luta lalu mai bala iya nurun ngayau bebalas ngagai menoa Sebuyau lalu maioh bendar Iban Sebuyau ulih bunoh sida maia nya.
Laban ari jako petenah tu, nya alai Orang Kaya Pemancha Dana Bayang ari Padeh angkat lalu nyerang rumah Manang Langgong dalam Batang Undup, kenu ka orang ka tuai raung pan nadai agi bemunyi dalam Batang Undup bekau serang tu. Nyadi petenah tu kelia madah ka Angkum menyadi Orang Kaya Pemancha Dana Bayang mati dibunuh orang Iban Undup, tang kenu ka orang Angkum tu nadai kala kena sebut dalam tusut peturun Orang Kaya Pemancha Dana Bayang..
Udah Luta bebalas ke pemarai menyadi iya ngelaban Iban Sebuyau, dia iya lalu mai menyadi iya ke benama Mulok seduai Ketit enggau iya belayar ngagai Pulau Belitong semak Pulau Sumatra. Kebuah sida tiga kin laban Luta anak Unggang Lebur Menoa bisi ninga di Pulau Belitong semak Pulau Sumatra, orang bisi nyual tuchung besai bendar ulih dipasuk ka ngagai pala. Iya keras bendar deka meli nya awak ka bisi nyadi ka pesaka ngambi ak iya tau besai rita.Tang sida tiga menyadi tak nadai pulai ke Saribas agi. Nitih ka berita dibai Laut lebuh nya suba bisi orang nemu rampang perau sida tiga ba pasir semak Nanga Sungai Ubah kilah ujung Tanjung Datu kin ka agi.
Ketegal pemati bala anak Unggang tiga iko tu dia anak lelaki menyadi sida ke indu lalu nadai agi nampong pengawa nyadi tuai serang di Batang Layar enggau seluruh Saribas lalu pegawa tu dipegai Orang Kaya Pemancha Dana Bayang ari Padeh megai serang, ti tampak bendar berita tau numbang ka menoa sereta Linggir Mali Lebu ari Paku. Leboh rambau tu menya Orang Kaya Pemancha Dana Bayang sigi udah tuai bendar umur leboh Sir James Brooke digelar Rajah di Sarawak. Tang leboh nyau datai ba tubuh uchu Unggang ke benama Bunyau apai Bakir, iya nya bansa Iban ke pengabis dulu nunduk ka Rajah James Brooke nyadi pengiring rayat ngaga Kubu Lily di Munggu Senggang di Betong nya alai iya enda sebulu enggau sida Aji, Nanang enggau Luyoh anak Orang Kaya Pemancha Dana Bayang di Padeh. Nyadi uchu Unggang tu bisi menyadi ke benama Maoh lalu anak iya Bakir diberi Rajah James Brooke pangkat Panglima.
Pia mega, udah mati Unggang enggau bala anak lelaki iya orang Layar Ili nadai tentu agi beberita berani nya alai nama Nanga Layar lalu disebut Nanga Saribas laban Temenggung Kadir ka pindah ari Samaruang ke Nanga Saribas tampak agi rita ditemu orang dalam Batang Saribas ari bala Iban Batang Layar. Taja pan ai Layar besai agi ari sungai ai Saribas.
Di menua Layar Ili Unggang ke bensumbar Lebur Menoa udu amat nan ka menua ari diserang munsuh. Iya matak anembiak iya nyerang perintah Brunei ke benung merintah Sarawak, Sadong, Oya, Mukah, lalu terus ke Bintulu. Laban empa pemalat serang Unggang, nyau baka ka ditebas empa pangabis bangkai mensia mati dibunoh, nya alai Nanga Sarawak lalu betukar nama ngagai Nanga Tebas tauka Muara Tebas ke diatu, tampak agi disebut Kota Samarahan. Tang nama Nanga Tebas nya agi meruan ditemu orang datai ka kemaia ari tu.
