Nyadi Temenggong Koh Anak Jubang tu nya siko ari bala ketuai bansa Iban ti keterubah iya dichirika megai pangkat nyadi Temenggong diasoh perintah Sarawakdi menoa Batang Rajang dalam sitak menoa pegai Kapit ka diatu. Nyadi Temenggong Koh tu mega tau matak kayau lalu suah matak bala anembiak iya mansang bebunuh ngelaban bansa bukai di menoa Ulu Batang Rajang ketegal ti berebut ka menua ka alai diau. Nyadi Temenggong Koh tu ka beberita mega bisi mimpi, lalu mimpi iya baka tu:
Nyadi leboh iya baru ngangkat kadiri bujang kira leboh umor iya maia nya kelia udah manggai lima belas taun, dia iya asai ka bemimpi tesat leboh ka bejalai. Nyau kepuas ke tesat baka nya baru iya rembus ba jalai tawas ke besai bendar. Lalu ditengah iya jalai nya tadi lalu terus niki ke bukit. Datai iya di tuchong bukit nya tadi, dia iya lalu meda bisi rumah orang ba atas bukit nya. Leboh iya ka nyau datai semak rumah orang nya dia lalu pansut indu siko ke lalu bejako ngelalu ka iya ngasoh niki.
Ninga indu nya udah ngelalu ka iya, iya pan lalu nadai jako sereta terus nik ka rumah orang nya. Datai ba rumah orang nya, indu nya tadi lalu bejako baru sereta mai iya lalu tama ka bilik sida.
Lebuh iya ke tama ba bilik orang nya tadi dia iya meda bilik nya tadi tak nyau penoh dedat laban reta tengkira. Indu nya lalu bejako madah ka iya, “Nya semua reta sigi untong enggi nuan magang Koh.” Gaga bendar meh asai ati iya ensepi diri ninga indu nya udah madah ka semua reta nya endang enggi iya magang.
Udah meh indu nya tadi madah ka semoa reta nya enggi iya magang nya baru indu nya madah ka bagi orang ke beempu rumah ke ditiki iya tadi rumah orang ba menoa Tuchung Rabung Berani, Rabung Kaya. Udah ke madah ngagai iya munyi nya tadi dia indu lalu mai iya pansut baru ka ruai. Leboh indu nya mai iya ka ruai dia iya nyau berunding deka mulaika diri. Indu pan lalu enda ga nagang iya lalu ngasuh iya pulai sereta lalu madah ngagai iya ni bagi jalai ke tau ditengah iya mulai ka diri.
Udah indu nya tadi nunjuk ka jalai pulai ngagai iya, dia iya lalu asai ka bejalai nurun bukit ke ditiki iya mansang kia tadi. Nyau ka lama iya udah bejalai nurun bukit nya dia iya pan lalu rembus ba siti lebak ke dalam hendar.Berengkah ari lebak nya tadi dia iya lalu nurun haru, lalu tepeda ka buloh betong ke nyengkar melintang ba ke ditengah iya. Datai iya ba buloh betong nya dia iya lalu deka ensurok buloh betong nya. Leboh iya ke deka nguji meremi ensurok nya, dia iya lalu bisi ninga munyi nyawa orang ngangau nagang iya enda ngasoh iya ensurok buloh betong nya. Ninga jako rara orang nya dia iya lalu pedis bendar ati sereta ngeransi lalu deka nguji merejok buloh betong ke nyengkar jalai nya tadi. Tang iya lalu ditangang orang nya baru lalu enda ngasuh iya merejok melunggang ke sepiak jalai nya. “Bah ni bagi jalai ke tau ditengah aku deh?” ka iya nanya. “Enti nuan amat deka bejalai nengah jalai nya tak semina lalu dilumpong nuan aja buloh betong nya Koh,” pia ko jako orang nya madah ngagai iya” Ninga jako orang nya tak munyi nya dia iya lalu berasai malu laban iya ngadang diri empu sigi enda ulih nyimbang buloh betong nya tadi sekali mantap. “Lalu baka nya mega enti nuan enda ulih ngeluntang buloh betong nya, nuan sigi nadai jalai bukai ka ditengah.” pia ko orang nya madah ngagai iya. Ninga jako orang nya tak changka bendar dia iya lalu betambah agi ringat ke alai iya lalu enda berasai nyintak jempol ke ditangkin iya lalu mantap buloh betong nya sereta lalu putus betuntang dua.
Nyadi bagi jempol ke dikena iya nyimpong buloh betong nya asai sepi iya, endang jempol ke semampai ditangkin iya di menoa tu. Udah meh putus buloh betong nya disimbang iya endor alai indu siko lalu didinga iya bejako. Ko indu nya bejako enggau iya, “Maioh bendar orang udah nengah jalai nya Koh, tang siko pan nadai meh ari bala sida ke udah ulih tesimbang ka buloh betong ke di peda nuan nya tadi melintang ba jalai sida. Ke engka bisi siko dua ke berani nguji nyimpung nya, samina naka ngeliti aja kulit buloh betong nya kena pantap sida,” ka indu nya. “Nyadi laban nuan udah tesimbang ka buloh betong nya,enti nuan nurun mansang ngayau nadai menoa tau enda ulih dialah ka nuan jemah ila.” Udah abis jako indu nya tadi alai lelaki siko lalu pansut madah ka, enti Koh ngangau ka sida mai nurun mansang ngayau, sida sigi deka datai sama enggau iya nurun magang. Lelaki nya lalu madah ka nama diri Keling, iya nya ketuai orang di menoa Panggau Libau.
Nyadi lebuh maia Koh tu ke apin dichiri ka nyadi Penghulu menya, sekali ga iya Koh bisi bemimpi nyelai. Iya asai ke betemu enggau Tuan Raja ke ngasoh iya muka sarah. Lalu nguji dibuka iya mega sarah nya tang lalu enda ulih laban Tuan Raja nadai meri iya pemuka. Meda sarah nya tadi lalu apin ulih dibuka iya dia Tuan Raja lalu bejako baru, “Nya sabarang ko chara nuan meh muka Koh.” Ninga jako Tuan Raja munyi nya dia iya lalu nguji mabak tanchang sarah nya enggau penapat-inat. Nyau kelama dia sarah nya pan lalu tebuka ga dibabak iya. Peda iya utai dalam sarah nya sigi tak nyau penoh laban duit magang.. Tuan Raja lalu madah ngagai Koh iya nya semoa duit ka udah dipeda nya tadi sigi endang enggi iya magang.
Udah tembu iya muka sarah nya tadi alai Tuan Raja lalu bejako madah ka diri deka ngasoh iya gawa nyadi Penghulu. Koh lalu nyaut madah ka diri enda tau gawa nyadi Penghulu. “Enda tau enda,” ka Tuan Raja. Leboh seduai ke betalat ka jako nya ti ngujong ka alai Koh pan lalu tedani.
Nyadi cherita mimpi tu sigi ari tusoi niang Temenggong Koh empu ngagai niang Mujah Anak Mambang dalam taun 1951 di Kuching sebedau Temenggong Koh empu parai tuai. Nyadi Mujah ke nampong cherita tu parai dalam bulan April taun 1966 leboh umor iya nyau manggai ngagai sembilan puloh lima taun.
