BUJANG SIGAT TEMAWAI: MADU MIDANG

Ensera tu di tulis niang Andria Ejau lalu dikeluar ka oleh Borneo Literature Burea dalam taun 1966. Iya ada di menua Sabelak, Roban lalu besekula berengkah ari taun 1934 ngagai 1938 ba sekula St. Paul Primary School, Roban. Lalu iya tu mega siko ari bala anembiak sekula keterubah iya enggau orang mungkal sekula nya dalam taun 1934 lalu masuk belajar ba Primary One. Badu sekula ba St. Paul Primary School, Roban dia iya lalu nyambung belajar baru ngagai sekula St. Augustine Primary School, di Betong dalam taun 1938 nyentuk ngagai taun 1939 lalu badu naka Primary Six. Udah nya lalu ditampung iya baru sekula ngagai St. Augustine Secondary School, Betong ari taun 1940 ngagai taun 1941 alai iya ngetu belajar naka Form Three. Badu iya sekula naka Form Three rambau nya menya dia iya lalu nitih ka apai indai iya pindah ngagai menoa Baram lalu diau dia sampai ka nyau udah abis perang Jepun. Iya begulai enggau sida sebilik diau di Baram dalam taun 1941 nyentuk ngagai taun 1945. Lalu dalam taun 1945 nyentuk ngagai taun 1947 iya lalu gawa nyadi kepala polis ba kompeni minyak shell di Seria, Brunei. Udah ke gawa nyadi kepala polis ba shell di Seria dia iya lalu badu kategal ti bulih gawa baru nyadi kunsil kena bulan tujoh dalam taun 1947. Iya kala udah gawa nyadi kunsil di menoa Sibuti (Bekenu), Niah, Bintulu enggau di Baram berengkah ari taun 1947 ngagai taun 1956. Kena bulan tujoh dalam taun 1956 iya lalu badu gawa nyadi kunsil lalu rindu agi ka gawa ba bagi Iban Radio Sarawak di Kuching. Iya lalu nampung belajar baru dalam pengelama setaun dalam taun 1962, belajar ka pengawa bekaul enggau opis radio ba British Broadcasting Commission di London. Dalam taun 1964 iya lalu dipadu ka nyadi chariman ba serakup Sarawak Dayak National Union (SDNU) ke menoa bagi sitak pampang Kuching Timur. JAKO PENGARANG (Mr. ANDRIA EJAU) Sebarang ke udah macha Bup cherita ti dikumbai DILAH TANAH tentu udah nemu cherita Tuai Rumah Engkaul enggau anembiak iya ti dikelulu ka dalam cherita nya suba. Nyadi dalam cherita Kelulu siti tu, anembiak Engkaul udah bepechah pendiau laban penemu sida sarumah mansang beserekang enggau pangan, nya alai enda ulih gempong Tuai Rumah Engkaul agi. Ari nya sida sarumah bebagi dua. Sabagi mengkang ngelapong Engkaul, lalu sabagi nitih ka Enchaboh pindah ngati kadiri ngagai menoa baru ke dikumbai sida “MADU MIDANG”, tiban Nanga Sungai Kemali Mati di Batang Ubah Nunggang. Sida bukai ke nitih ka Enchaboh nya, Biul, Ensama, Bujang, Ensingut sereta enggau bala ipar Ensingut enggau Manang Ula. Nyadi dalam kelulu jerita tu, anembiak Enchaboh nya maioh bendar leman taja tuboh enda maioh. Nya alai bedudok ari jerita gaya pendiau enggau pengawa sereta enggau ulah sida di Rumah Enchaboh nya, ari nya kitai tau nyeremin ulah enggau pendiau mensia ke di dunya tu nyangka bisi tau pulai ka guna kelimpah ari ke ngasoh ati geli. PUN CHERITA Engkaul ke nyadi Tuai sida di menoa Dilah Tanah enda tegempong ka anembiak diri agi, laban makin sida dirara enda diasoh bejadi anak enggau kampar makin maioh-kemaioh ga sida sarumah nya belaki kampar. Nyadi Enchaboh ke sapit Engkaul, enti leboh baum munyi ke ngering ka jako Tuai Rumah, tang ari belakang aum iya besalah adat ke nagang nerima kampar. Kabuah pia, ko penemu iya. Laban Engkaul kepapas ka anembiak diri lantang senang. Nyau kelama udah nya Engkaul nemu ulah Enchaboh, nya alai iya mai sida sarumah baum. Leboh sida sama udah sampal datai ba ruai tuai, dia Engkaul bejako. “Ngelamatu aku agi ngelembut ka diri lalu nurut ka ati kita pasal kitai ke enda tau nerima kampar. Adat ke dititih ka kitai ukai adat tumboh ka aku, tang endang digaga Perintah. Nyadi laban aku ke nyadi tuai kitai jam ke diatu, aku enda tau enda bepegai ba adat. Nya alai berengkah ari diatu, sabarang kitai sarumah tu jadi enggau kampar, aku enda tau enda madah ngagai Perintah, laban nya tau pulai ka penyalah aku, enti aku neju ka utai ke salah ba adat,” pia ko Tuai Rumah Engkaul. “Anang bengat bakanya penemu kita ka tuai. Ensepi diri ke tuai tak peneka ati bedawa ka kami ke anembiak,” pia ko Biul nibar ari tisi. “Amat ko punggal nya. Ila enti kami tak bepekat ninggal ka rumah tu puas endar kita nadai orang macha tungkat. Ukai kita bisi ngelala angka enti enda aku,” ko Ensama ngelaki ka jako Biul. “Pasal kita ke bisi ati deka ninggal ka rumah tu nadai aku nemu nagang, tang aku ke bepegai ba adat Perintah, laban aku nadai nemu menoa ke nadai perintah,” ko Engkaul. Ninga jako Engkaul udah renjan bendar, ari nya jako sida sabuat sama nadai tentu lurus agi. Nya alai aum sida padam naka nya. Sida lalu sama mulai ka diri ngagai ruai diri empu. Manang Ula lalu dibai Biul ngagai bilik sida ngama indai iya ke enda dapat. Lemai siti udah nya, dia Enchaboh mai Ensama, Biul, Manang Ula, Apai Bujang berandau kadiri di langkau kebun. Nyadi ko Enchaboh nganu sida ; “Leboh kitai ke baum lemai kamari, dia kita ninga jako Tuai Rumah. Kami dua amat mipar, tang aku enggai ninga penemu iya bengat kelalu renjan. Enti munyi ko penemu iya nya, tak nadai tau belaki bebini meh kitai sarumah tu enti enda ngambi diri sarumah. Nya alai aku ke mai kita berandau kadiri di kebun tu deka angkat ari menoa Dilah Tanah tu,” pia ko iya. Baru deka bejako Ensama lalu dilampat Biul. “Aku tak pemai, pagila pan angkat deka meh aku,” ko Biul. Sida bukai ke enggau baum dia sama bela rindu ninga penemu Enchaboh nya tadi, nya alai sida sama salubang penemu deka pindah. “Ni menoa diati kita deh ?” ko apai Bujang. “Menoa Madu Midang di Batang Ubah Nunggang nyin agi puang, tang jauh bendar kulu,” pia ko Enchaboh. “Enda iboh ka jauh, amat ga kitai angkat ari Dilah Tanah tu,” ko Ensama. Lemai siti udah nya Enchaboh mai sida sarumah begelumu ba ruai iya, deka nusoi pemutus runding sida sabuat ke udah berandau ka langkau kebun nya tadi. Udah sida sampal datai, dia iya lalu bejako. “Aku ke mai kita begelumu tu bisi utai berat deka dipadah ka ngagai kita maioh, tang aku nyadang kita enda tekenyit ninga jako tu, laban penemu tu itong ka nampong aum kitai ke lemai suba,” ko iya. “Anang bejako maioh bungai, tak entong ka sakali ngambika nyamai didinga,” ko Ensama nganu Enchaboh. Nya alai ninga munyi nya, Enchaboh lalu nusoi randau sida sabuat ke di langkau kebun. Iya madah ka diri deka angkat ari Dilah Tanah. “Sepi asai Engkaul ditinggal ka anembiak iya pindah. Iya bengat enggai meda kampar,” ko ini Ensingut nelai Biul di tisi. Apin bejako sida bukai, dia Engkaul lalu nyaut. “Pasal kita ke deka angkat ari rumah tu, nadai aku nemu nan ka kita, laban kitai nadai tau berumah ba ati pangan. Nya alai enti kita tentu angkat, kita sama nemu pemali rumah, lebih agi baka adat mumpong ka perabong,” ko Engkaul. Enchaboh enggau sida bukai ke deka pindah sama madah ka diri endang enda nyeliah ka adat. Aum sida tembu naka nya. Pagi siti sida ke deka pindah nya lalu nyua ka adat ngagai Engkaul. Tembu nya sida lalu belator ngemas perengka ke dibai pindah. Malam nya Manang Ula lalu mulai ka diri ka bilik laban udah lelak bekemas sahari-hari nya. Datai di bilik dia iya bejako enggau bini diri ngenang pasal sida ke deka angkat. “Pasal rumah tu ke ditinggal ka ngapa nadai orang meli, enda aku tentu sayau laban ramu endang nadai kayu kering, atap pan udah lama. Tang utai ke bengat kesayau ka aku nya jagong ke baru bebungai puchok ba redas ari ili pendai dia,” ko iya. “Nama katusah ka nya. Tebas abis ka kejang kitai angkat ila,” ko bini iya. Udah nya Manang Ula lalu nyungkap tama ka kibong madah ka punggong diri pedis. PINDAH Cherita sida ke ba rumah Engkaul di Dilah Tanah dilengka ka naka tu, laban nusoi pengawa sida ke pindah. Orang ke nyadi tuai sida nya Enchaboh, laban Manang Ula keras ngasoh iya kena nyeliah ka jako sida Biul ke bisi ati deka ngasoh iya nyadi katuai sida ke angkat ngagai menoa baru. Tiga hari udah bekau nyua ka pemali rumah nya tadi, bala sida lalu angkat. Menoa Madu Midang nya jauh bendar. Terubah ngena perau, udah nya tampong jalai darat. Empat hari baru sida datai. Menoa nya nadai orang nguan laban nya tanah galau Perintah. Sereta datai dia Enchaboh lalu mai sida bedampa betampong. Samoa sida ke pindah nya tadi tujoh pintu nyengkaum bala ipar Ensingut. Tiga hari sida beramu lalu ngentak. Enda lama udah nya rumah pan tembu, samina dinding pantar agi bisi apin tembu. Kemas nya sida lalu manggul sama berumpang kampong ke ari ulu dampa nya. Tembu ngundang panggul, sida lalu nebas bedurok. Empat kali ulang ngagai sapintu-sapintu, tebas pan tembu. Tembu nebas, sida lalu dibai Manang Ula nebang enggai ka reban enda rangkai laban taun nya nyau. Nebang pan bakanya ga, empat kali ulang, tebang pan kemas. Sida lalu belanggang ka reban. Sakumbang ke belenggang ka reban nya sida bisi awak begiga. Barang ke bisi senapang lalu pereman ka babas. Manang Ula lalu nampun, laban iya endang enggai putus bubu, enda nyamai nadai utai diabas pagi-pagi. Sida ke pereman nimbak pan bulih. Manang Ula pulai ngabas bubu nadai kala lebu. “Nyamai bendar diau di menoa baru, puas nyawa makai ikan, makai babi,” ko tudah Ini Ensingut. “Nya lah ini, sida Uchak ke tinggal di menoa lama rangkai ngeli enda makai ikan,” ko Ensama. “Kitai ditu nama enda penyamai. Ikan maioh, babi bisi, tanah alai bumai peneka ati. Leboh ka tabin, Aya Manang ga bisi berubat,” ko iya. “Enti sema bisi surat Perintah datai ari ili, aku ga bisi nangkup ka kitai. Sida Uchak ke tinggal enggau Engkaul di menoa lama din nama penyadi leboh surat Perintah bisi nuntong, alip buta sida enda nemu,” ko iya nganu Ini Ensingut. “Agi ingat ga dek ka jako orang tasik uchu ?” ko tudah Ini Ensingut nanya Ensama. “Eh, kabat agi aku jako kitai, enti jako orang tasik nya bekebul ka pansut,” ko iya. MANANG ULA ENSERA Sekumbang belanggang ka reban, sida nadai tentu pengawa leboh ke udah pulai begiga. Nya alai lemai siti, leboh udah badu makai lemai, dia Manang Ula nat ka diri gali di ruai. Nyadi kelita tin ti selalu dikena iya diruai engkah iya ba tisau iya ke gali. Sereta meda iya gali di ruai nya, ida ke mit lalu ngulu iya kia minta tusoi ka iya ensera. Sekeda sida gali ngimbai iya ari sapiak-sapiak, bisi keda gali muak ari pala lalu sekeda dudok semak iya. “Nusoi ensera Aki, rindu ninga,” ko sida nganu iya. “Es, kita ka mit tu enda tau meda aku gali. Nyin Ini Ensingut di bilik asoh ensera,” ko iya. “Tusoi meh aki,” ko sida ngansak iya. Iya lalu nyengkau buah kuyau deka nginsap. Meda samakau nadai, iya lalu ngasoh sida ke mit ngambi ka bilik. Nyadi tudah tuai lemai nya endang ati deka nat ka diri, udah lelak nampun ka bubu sahari-hari nya. Nya alai iya lembau ensera. Tang sida ke mit enda ulih kenda ka iya. Sekeda maut patong, kedua ngurut betis iya ngicha ka iya deka nusoi ensera ka sida. Nyadi Manang Ula tu endang nelap enggau sida ke mit, tambah mega iya endang landik ensera, baik ensera tuai tauka ensera anembiak, sama ngelandik nya. “Nama ensera kerindu kita deh uchu ?” ko iya nanya sida ke bekakasak ngelingi iya dia. “Ensera Apai Sali aki,” ko anak Ensingut ke gali semak iya. “Anang. Manah agi ensera Pelandok enggau Tekura,” ko sida bukai. “Enti kita enda agi bekakasak, enda agi inggar, nya baru aku deka ensera,” ko iya nganu sida ke mit. “Au, enda kami inggar deh ako,” ko sida. Nya alai Manang Ula lalu belaboh ensera. Tu mnuyi leka ensera iya ; Pelandok seduai Tekura. Tumu-tumu pagi siti Pelandok bejalai junok-junok ba emperan ngiga buah buan. Apin tentu lama iya udah bejalai, iya pan betemu enggau Tekura. Peda Tekura rangap-rangap ngiga daun riang. Sereta Pelandok tepeda ka Tekura, iya lalu ngangau. “Oh Saum ! Kini ka nuan,” ko iya. Tekura baru deka nyuap daun riang, lalu telentang gadak-gadak tekenyit ninga nyawa Pelandok. Angkat ari ke telentang nya tadi lalu deka belanda lari. “Nama utai kelari ka nuan deh Saum !” ko Pelandok. Tekura malik ka belakang lalu meda Pelandok gising-gising katawa. Nya baru ati iya lantang, tang dada iya agi redup-redup udah kelalu kesal ati. “Nuan nya tadi kau Saum. Kini ka nuan ngenumu nya deh ?” ko iya enchabar diri ke tekenyit. “Eh, ngiga bunga buan. Jampat endar perut lapar pagi tu,” ko Pelandok. Seduai lalu berandau dia enda lama, sama nusoi tunga pejalai diri. “Enti munyi nya bejalai tua, Saum,” ko Pelandok. “Barang iya meh,” ko Tekura. Seduai lalu bejalai ngili ka ai, ngulu ka sungai, melit bukit melunggang tatai. Bejalai sahari-hari nya nyentok ka lemai. Hari pan malam seduai lalu engketut tindok ba telok bendir emperawan. “Ditu nyamai tua Saum. Enda alah kena tujah orang ke bejalai malam,” ko Pelandok nganu Tekura. “Barang iya meh Saum,” ko tudah Tekura. Seduai lalu enda bemunyi agi, laban udah lelak bejalai sehari-hari nya. Tang Tekura enda tentu masok tindok ninga kuroh Pelandok munyi ke narit sega. Nya alai pagi siti Tekura dulu angkat, laban iya endang enda tentu tindok samalam nya. Leboh iya dani, Pelandok agi mengkang jerut-jerut tindok. “Saum ! Dani dah ! Tawas hari ! Bejalai tua,” ko Tekura ngerak Pelandok. Mengkang ga Pelandok enda mengkebut. Meda iya enda dani, dia Tekura lalu ngusak tuboh iya madah ka hari nyau tinggi. Ensepi diri digusak Tekura, nya baru mata iya menchelak mimit. “Akai-rai Saum ! Tabin endar aku tu,” ko iya. “Nama pemedis nuan deh Saum ?” ko Tekura nanya iya. “Enda nemu Saum. Enda dapat endar aku tu. Tak sekut asai seput tu,” ko iya. “Enti nuan enda dapat bejalai, aku ngema nuan Saum,” ko Tekura. “Dima enggai meh tu nyadi Saum. Enda dapat bepegai aku tu,” ko iya. “Kada enda lapar nuan deh Saum. Nama utai diketengok ka nuan deh ?” ko Tekura. “Nadai utai kedeka ka nyawa tu Saum,” ko Pelandok ga nyaut. “Madah meh Saum barang utai kedeka ka nuan. Lagi aku ngiga barang naka ulih. Anang ga nat ka nyawa diri,” pia ko tudah Tekura. Nyau kesal ati Tekura meda moa Pelandok. Gamal iya nyau lembut endar. “Enda nemu Saum, nyawa tu tak meraya endar. Tak nyelai utai diketengok, tang engka tak nadai dibabas tu,” ko iya. “Padah ka meh Saum. Lagi aku ngiga ka nuan,” ko Tekura. “Nyelai nyawa tu Saum, tak tetengok ka telu manok anak mensia,” ko iya. Seput iya pan nyau jarang-jarang, mata mupok bekalih. “Amat tusah endar Saum tu. Dini bisi telu manok anak mensia dalam babas tu. Ni mesai telu nya kini Saum ?” ko tudah Tekura nanya iya. “Enda tentu besai deh Saum. Kira mesai buah pinang meh,” ko iya nyaut Tekura. Dia meh Tekura tusah bendar ati berunding ka Pelandok nya, enggai ka iya tak mati. “Enti Saum tu tak parai, sapa ke bekaling enggau aku agi ila deh,” ko ati iya. Bakarenjoi ai mata iya kasih berunding ka Pelandok, lalu sinu ngira diri empu ke nadai kaling agi, enti Pelandok tak parai. “Nadai ko iya meh Saum. Lagi aku ngiga telu manok anak mensia ka nuan,” ko iya sirut-sirut nyabak. Iya lalu bejalai ringkap-ringkap mansang ngiga telu manok anak mensia. Pelandok lalu engkutong baru, lalu tekala nya bekuroh baru. Bejalai meh tudah Tekura sapagi-pagi nya. Nyau kelama, iya pan rembus ba jalai orang. Iya lalu niti jalai nya. Enda nemu tunga tuju diri, semina tak bejalai mai ati ke deka ngiga telu manok anak mensia. Tekura Betemu enggau Duat. Nyadi jalai ke dititi Tekura nya jalai Paloi turun ngagai kebun rungan iya. Pagi nya Paloi enggau anak iya ke penama Duat mansang ke kebun. Duat dulu, apai iya dudi. Datai ba kaki munggu, dia Duat ke dulu tepeda ka Tekura ringkap-ringkap ba tisi jalai. Lalu dijengkau iya sereta lalu dipandang ka iya ngagai apai iya Paloi. “Bai meh, dirumah lagi nunu iya,” ko Paloi nganu Duat. Datai di rumah, Duat lalu beguai-guai ngagai indai iya madah ka diri bulih Tekura. Indai iya Enchelegit nya endang lama udah tetengok ka tekura. Nya alai iya lalu ngasoh Duat nunu tekura nya, ka lauk sida lemai nya. Tang Duat enggai munoh tekura nya. Iya agi rindu bayam iya. Nyadi malam nya, Tekura nya tadi dirungkup Duat enggau timpa, lalu engkah iya ba tempuan bilik sida. Nyadi leboh sida udah tindok magang malam nya, Dia Tekura nya ngiga kekira mansut ka diri ari timpa nya. Nyau kapuas timpa nya ke bekinsit laban iya samalam-malam nya, seninjik bendar nyau datai ba lubang. Tekura nya tadi laboh lalu tepanggai ba tansang manok di baroh rumah. Iya pan lalu tegama ka utai segala lichin dalam tansang nya. “Nama utai tu kini,” ko ati iya. Hari pan nyau ka tawas. Iya lalu ngalih-ngalih ka utai ke segala nya, apin ga iya nemu utai nya. Hari pen nyau tawas-ketawas, nya baru iya meda utai nya burak. “Tu meh telu manok anak mensia kini. Idup meh nyawa tu,” ko iya bejako kadiri enda inggar. Iya lalu muai diri ari tansang manok nya kabaroh naban ke telu nya pulai ngagai Pelandok. Semina udah dipeda pun emperawan ke alai Pelandok nat ka diri, dia Tekura lalu ngangau. “Oi Saum ! Idup nuan !” ko iya. Enda nyaut ga Pelandok, semina nelentang ka diri. Mata bekalih, nyawa rangap-rangap, dilah melulor. Tekura pan datai dia, meda mata Pelandok bekalih, dilah melulor, nyawa bepupu. “Mati meh Saum tu deh. Lebu endar aku mai telu tu ka iya,” ko Tekura bejako kadiri. “Nadai Saum tu deh. Tikau ka telu manok tu,” ko iya. Ninga iya deka nikau ka telu manok nya, nya baru Pelandok nguit-nguit ka iko iya. Mata pan menchelak mimit. “Nama nya tau menchelak deh,” ko ati Tekura. Nya baru iya negu tuboh Pelandok. “Idup nuan Saum ?” ko iya. “Akai-rai Saum. Kada apus hari tu lagi. Tak tesat endar asai seput tu,” ko Pelandok. Jako iya apas-apas, enda tentu didinga. Tekura madah ka diri bisi bulih telu manok anak mensia. “Perangap ka nyawa nuan Saum. Aku nyapi nuan,” ko Tekura. Perangap ka Pelandok nyawa iya. Tekura lalu nepu telu nya ngagai nyawa iya, lalu pechah ba nyawa iya tepangka ba taring iya. Telu nya lalu ditelan iya. Udah nya iya lalu manjong madah ka nyawa diri idup. “Idup meh nyawa tu enti asai tu,” pia ko iya nganu Tekura. Iya pan lalu angkat ngenjing ka patong diri, laban nyau penat lama dibai iya tindok nganti Tekura ke datai mai telu. “Kering asai tulang tu Saum. Bejalai tua,” ko iya nganu Tekura. “Barang iya meh, enti nuan nyau dapat,” ko Tekura. Pelandok kena Akal Seduai lalu bejalai sahari-hari nya. Hari pan nyau ngalih, pejalai Tekura makin lubah kelubah. Nyau kelama iya madah ka diri enda dapat bejalai agi. Ninga munyi nya, Pelandok lalu belaboh tusah ati. “Tusah endar tua tu Saum. Udah aku, nuan ga sakit,” ko iya. Tekura lalu ngali ka diri ba telok bandir. Sereta iya gali lalu duot-duot madah ka nyawa diri parai. Sinu meda iya sakit, dia Pelandok lalu nanya ka utai dikedeka ka nyawa iya. “Nama utai deka diempa nuan deh Saum ?” ko Pelandok nanya Tekura. Nyau kesal endar moa Pelandok. “Anang enggai madah Saum. Enti tetengok ka daun riang, lagi aku ngiga. Barang utai masok ba nyawa, anang enggai madah. Nuan udah ngidup ka aku. Tu aku ga ngidup ka nuan,” ko Pelandok. “Nyelai endar utai ketengok ka nyawa aku tu Saum,” ko Tekura. “Nama utai nya deh Saum ? Padah ka meh,” ko Pelandok. Tak tetengok ka atau baya nyawa aku tu Saum,” ko Tekura. Lama Pelandok enda engkeretik, enda nemu jalai ngulih ka atau baya. Gamal Tekura pan mansang lembut-salembut. Mata bekalih, dilah nyelar. “Tusah endar laban Saum tu. Nama penyadi aku tu lagi enti iya tak parai,” ko ati Pelandok. Iya pan lalu engkelak munyi ke masak chagak bedil temaga, manjong munyi ke masak kelutong besi kemuja. “Nuan nganti ditu, Saum. Aku ngiga ka nuan atau baya,” ko iya nganu Tekura. “Pia meh,” ko tudah Tekura. Pelandok pan engkechit lalu bejalai sahari-hari nya neresap nengah kampong. Nyau kalama iya pan rembus ba tebing sungai. “Nama menoa tu kini ?” ko ati iya. Iya lalu nudok ka diri. Dia iya malik ka kiba, malik ka kanan lalu tepeda ka tupai baru deka niki batang nyiur. Pelandok Nipu Tupai. “Nuan nya Po ! Nama pengawa nuan dia ?” ko Pelandok nanya Tupai. Malik Tupai meda Pelandok dudok enda jauh ari pun nyiur nya. “Eh, ka niki buah nyiur. Tetengok meda buah iya nyin,” ko Tupai. “Pama enti nuan deka muai ka aku sigi, Po. Aus endar nyawa tu,” ko Pelandok. “Nama nyalah nya deh, ukai pedis ningkil sigi ka nuan,” ko Tupai. “Tang enti nuan muai ka aku lagi, ai iya buai dulu Po. Mina isi iya deka diempa aku. Tebok nuan ari burit. Udah ai iya abis, nuan lalu tama dalam nyin. Ari dalam buah nyiur, nya baru nuan ngetas tampok iya,” ko Pelandok ngajar Tupai. “Pia meh Po,” ko tudah Tupai. Tupai lalu niki ka puchok nyiur. Datai di puchok lalu nebok sigi. Sereta ai nyiur nya udah abis, iya lalu tama kadalam buah nyiur nya. Ari dalam buah nyin, nya baru iya ngetas tampok buah nya nitih ka ajar Pelandok. Sereta tampok nya putus, buah nya pan laboh naban ka Tupai lalu betol ninggang tengah-tengah sungai. Sereta buah nyiur nya terengkah ba sungai nya lalu disambar baya, lalu ditelan iya enggau Tupai-tupai dalam nyin. Terubah Tupai masok dalam perut baya nya, iya apin nemu diri, laban endang agi kesal ditaban ka buah nyiur nya ke laboh. Udah iya dua tiga kali nyintak seput diri, ensepi tak sendat asai, nya baru iya nemu diri dalam perut utai. Tang enda nemu orang ke empu perut alai iya tama. Iya lalu ngerit-ngerit perut baya nya ari dalam nyin. Nyau kalama iya ke ngerit nya, perut baya nya pan kebus. Iya lalu mansut ka diri muyur-uyur laban darah baya. Baya nya semina sempat ngelanggar ka diri ke tebing lalu mati. Tupai lalu manjong. “Idup nyawa !” ko iya malik ngagai Pelandok ke dugau-dugau ba tisi tebing nganti iya ke pansut ari dalam perut baya nya tadi. Meda baya nya mati, Pelandok lalu rakah-rakah katawa. Iya lalu beguai-guai muntas perut baya nya ngulih ka atau iya. Sereta tembu ngulih ka atau nya, iya lalu beguai-guai naban ka nya pulai ngagai Tekura. Udah jauh, nya baru iya malik ka belakang ngangau ka Tupai. “Jimat-jimat ka nuan enti sema agi niki Po. Enggai ka laboh,” ko iya. Iya lalu belanda naban ka atau baya nya. Pedis endar ati Tupai diakal iya. Nyau lemai hari, nya baru iya datai ba Tekura ke nganti iya ba telok bandir. Agi jauh, Pelandok lalu ngangau. “Oi Saum, agi idup nuan ?” ko iya. Tekura enda nyaut. “Parai Saum tu,” ko ati iya. Datai dia, meda Tekura ranggak-ranggak, pala melulor, nyaw bepupu. “Nadai meh Saum tu,” ko iya guot-guot. “Enti Saum tak mati, aku ga nengali atau baya tu,” ko iya bejako kadiri. Ninga Pelandok deka nengali atau baya nya kadiri, nya baru Tekura lalu matak rekong diri begadai-gadai. Nya baru Pelandok nemu iya agi idup meda iya tau engkebut. “Saum, agi ngelala nuan aku ?” ko iya. Saru tudah tuai, laban ati udah kelalu kesal. “Akai-rai Saum. Kada aku tu idup. Tak penat isi tu,” ko Tekura. “Tu atau baya Saum. Uji perangap ka nyawa nuan. Aku nyapi nuan,” ko Pelandok. Tekura lalu nukang ka nyawa diri naka-naka iya ka besai. Pelandok lalu majak ka atau baya nya ngagai nyawa iya. Tiga kali Pelandok majak ka atau baya kadalam nyawa iya, iya pan lalu manjong madah ka diri enda kala mati. “Inggar endar nyawa nuan kau Saum. Meda tadi tak suma didinga,” ko Pelandok. “Sigi baka Bujang Lembau,” ko Tekura. Lesey-lesey moa Pelandok dikeduan iya. “Sama meh pemintar tua Saum. Nuan nemu ga ngakal aku, aku ulih ga nipu nuan. Semina mimit nuan alah laban aku, laban nuan enda tegar belanda,” ko Pelandok nganu Tekura. “Apin temu meh, utai apin diuji,” ko Tekura. Seduai lalu sama katawa. “Nya meh naka ensera pelandok seduai Tekura, uchu,” ko Manang Ula nganu sida ka mit. “Rindu endar ninga aki ensera,” ko sida ke mit. “Agi belala ninga, agi aki,” ko sida ngasoh Manang Ula ensera baru. “Nya pen chu-u. Lelak aku. Pedis punggong,” ko Manang Ula. “Kita nyau maioh udah tindok. Hari nyau jauh malam,” ko iya. Sida ke mit, barang ke agi dani, lalu mulai ka diri ngagai bilik diri empu. Sida ke udah tindok dia mengkang ngelingi Manang Ula. Meda orang lama nadai ngambi sida ka udah tindok nya, nya alai Manang Ula ngangau ka indai sida ngasoh sida mai anak diri pulai ka bilik. Bini Ensingut lalu ensugau angkat ari dalam kibong, lalu pansut ka ruai. “Dek tu enda badu-badu mensera. Anak kami ke abis empa nyamok di ruai tu,” ko bini Ensingut nganu Manang Ula. “Ukai aku ke deka, sida ke ngasoh,” ko tudah Manang Ula. “Ngasoh pan orang, enti kitai enggai,” ko bini Ensingut. “Eh, anang maioh jako. Anak dek nya tanggong,” ko Manang. Bini Ensingut lalu merap anak diri, mai iya pulai ka bilik. Sereta iya nyingkang, Manang Ula lalu ngaul betis iya enggau ujong kaki. Bini Ensingut lalu ka tetungkam. “Mamau dek nya. Kini ka ngaul kaki orang,” ko bini Ensingut. “Dek ke nyingkang menyingkang. Kini ka ngindik kaki orang,” ko Manang. “Ngumba dek nya. Nyau tuai-tuai agi jegak,” ko bini Ensingut besaut enggau Manang Ula dalam petang dia. “Baka mumban tu ka maugan-ugan tumbok nanga Sarawak, pala amat udah buban, tang ati agi biak,” ko Manang Ula nganu bini Ensingut. “Gamal dek,” ko bini Ensingut. Iya lalu pulai ka bilik merap anak iya ke udah tindok. Manang Ula pan lalu mulai ka diri ka bilik. Datai di bilik lalu ngerak bini iya. “Ngachau kami tindok. Nama diambi ngelaun nya pulai. Enda puas ensera,” ko bini Manang Ula ngeransi digerak iya tindok. “Nadai ngachau dek, ngiga pua,” ko tudah Manang. Bini iya lalu nibar ka iya pua. Seduai lalu sama tindok. BETUBOH BISI DUA BULAN lepas nya bini Ensingut pan betuboh bisi lalu nyera ka udun. Nya alai iya rengik-rengik ngasoh Ensingu nginti. “Dini bisi udun menoa tu. Ukai baka di Dilah Tanah suba,” ko Ensingut. Suah endar tudah Ensingut nginti, naut indah, tang lalu enda tulih ka udun. Iya madah diri enggai ngiga agi. “Ukai utai digiga udun di menoa tu,” ko iya. Lalu putus ka iya tali ginti. Meda iya lalu enda bulih ka utai ke disera ka nyawa, dia bini iya bungah mimit. Mantai ka jako karong laban iya nemu mimit leka sabak. Nya alai bisi nemu mimit jako karong. Nyadi ki bini iya ; “Orang nya beserangan ka telok lubok tampok panas, buli nyadi pulas idas, kerangan renjan pasir radas empas kaban semah sepa. Kadua menoa iya di telok lubok jebong, buli nyadi pulas uchong empas adong ikan juara.” “Hes ! Dini bisi lubok tampok panas di menoa Madu Midang tu. Ukai baka di Dilah Tanah menya. Nya pan menoa iya, ukai iya tak enda mindah ari nya deh,” ko Ensingut. Nya alai bini iya lalu enda makai utai ke diketengok ka diri. Kandong pan nyau besai-kebesai, lalu sakumbang-kumbang ke ribat nya bini iya endang enda tinggal Ensingut. Nebas, nebang, nginti, bebubu, ngiga dambar enda tinggal pangan. Isa semina ngema bekal ka seduai, enda ga diasoh Ensingut tinggal, laban enda tentu nyamai ati ka Ensama. Tang tudah Ensama enda nemu ulu-ili. Jako bungah, jako buti amat, laban Ensama ke selalu bungah. Kandong pan nyau manggai ka lapan bulan, mengkang ga seduai kia sama kia. Nyadi pagi siti seduai nurun tumu-tumu ngabas bubu. Datai ba tampun nya dia bini Ensingut tekelinchir lalu tedudok balat endar. Semadi ulih Ensingut ngangkat, nya baru tau angkat. Pulai ke ngabas bubu nya iya madah ka diri pedis pun punggong, lalu perut muat amai deka beranak. Nya alai ensepi diri lain asai bakanya, iya ngasoh Ensingut madah ka Manang Ula minta gama Manang. Nyau meh Ensingut gisai-gisai madah ka Manang. Manang Ula pen lalu nyereta iya, laban iya endang enda kala beleman dipadah ka orang begama. Datai ba bilik Ensingut, enda chamang-chamang lalu ngama perut bini Ensingut. Lama endar iya bayam-bayam, ngasai-ngasai ka utai dia. Nyau kalama baru iya ngetu. “Nama utai ngachau nya kini aya ?” ko Ensingut. “Salamatu, enti utai bekanya, diayah ka utai dalam ai,” ko Manang. “Nama utai alam ai bengat ngayah ka iya ngenyadi nya deh aya ?” ko Ensingut. Alit ga ati iya berunding ka pemaioh utai ke tau nganu dalam ai din. Sida ikan, undang, gerama, enggau baya, samoa utai nya dalam ai magang, tang ni bagi sida nya ke bengat kempang ngayah ka bini iya. Nya ke ditanya ka iya. Nuku ka bagi sida nya ke jai, beduan bini iya. “Tentu nama ga utai ke ngayah ka nya, aya ?” ko iya nanya baru. “Nadai utai bukai, Antu Ai,” pia ko Manang Ula. Lama bimbi moa Ensingut ninga bini diri diyah ka Antu Ai. Bini iya pen nyau kasak-kasak laban pemedis nyau mansang balat-kebalat, tak seruran asai ke muat deka beranak. “Apin aroh beranak ga, kandong iya baru manggai lapan bulan,” ko Ensingut. “Iya endang ukai deka beranak, tang diayah ka utai,” ko Manang. Nya alai Ensingut nadai maioh jako, lalu ngasoh Manang berunding ngadu ka iya. “Ikai utai mit-mit pelian tu, laban utai dalam ai nya mar endar enda baka utai di darat tu,” ko Manang. “Mar pan aya, kati ko enda berubat ngidup ka nyawa,” ko tudah Ensingut. Nya alai Manang lalu ngasoh Ensingut ngambi mayang, laban iya lalu deka belian malam nya. Nyadi Ensingut tu enda nemu niki. Nya alai iya mai tudah Biul. Seduai lalu nurun, laban Biul endang enda maioh jako leboh utai ke suntok bakanya. Datai di tembawai ke alai seduai ka ngambi mayang, dia Biul nanya Ensingut, nanya ka pemedis bini iya. Ensingut nampong penemu Manang Ula, madah ka bini iya diayah ka Antu Ai leboh seduai ke ngabas bubu pagi dulu ari nya. “Naka ga Antu Ai nya bengat ngayah ka bini nuan punggal,” ko Biul nganu Ensingut. “Nya lah, enda mukai-mukai,” ko Ensingut. Tembu Biul ngaga ‘sengiat’ iya lalu niki mayang. Udah bulih mayang nya, seduai lalu pulai. Udah makai lemai nya, Manang lalu belian. Kira pukol sapuloh malam nya, sida ke berapi pan udah kemas. Nya alai sida lalu makai salau. Manang lalu ngetu belian, limpang makai. “Aya Manang giga ka atau enggau lintan dia, lelak ia nebah nyawa salemai tu,” ko Ensingut nganu sida ke nyadong lauk. “Pia pan Igat. Numbas nyawa tu makai atau manok. Tang enti bisi ayan dia, tau ga kauk ka mimit,” ko Manang. “Dinga Manang ngumbai diri enggai makai atau manok. Iya tak nya ke digiga iya. Semadi nadai,” ko sida ke biak ngemata ka iya makai. Tembu makai nya, Manang lalu belian baru. Tang laban pelian endang udah sunggak, nya alai enda lama udah nya iya lalu luput. Jari gitik-gitik, kaki ketik-ketik, mata gilik-gilik, nyawa kerik-kerik. Ngeleda ka luput nya lalu minta ai kena empungas. Udah empungas nya, baru mansang beguai-guai ngagai bini Ensingut ke gali enda jauh ari nya. Nyadi jari iya muak ari kanan baka ke bisi utai digenggam. Meda iya beguai-guai mansang ngagai bini Ensingut, dia sida ke biak lalu bedudun semak iya. Datai ba bini Ensingut, iya lalu nabak ka utai ke digenggam iya nya ngagai bubun aji iya. Dia meh sida ke biak beterunggi semak iya sebelah nya dia. “Nama utai digenggam nuan tadi aki ?” ko sida ke biak. “Eh, semengat nya uchu. Nyau ka enda ulih aku tadi. Puas aku berebut enggau antu. Nya kabuah aku lama luput, laban antu nya keih endar,” ko Manang Ula nganu sida. “Semengat ke chelum ba tapa nuan tadi aki ?” ko orang ke biak. “Iya meh nya chu,” ko iya. “Nyelai endar gamal semengat neh aki. Nyau ka baka getah engkelulut ke digumpal ka kitai,” ko sida. “Ukai nya sigi besai semengat kitai mensia deh, ulih genggam,” ko Manang nganu sida. “Berani endar aki ngelaban antu. Enti enda iya, nadai penyadi bini Ensingut nya,” ko sida ke biak bejako enggau pangan diri. “Deka kami belajar nyadi manang enti udah besai ila,” ko sida. Udah nya Manang Ula lalu ngunsut bini Ensingut enggau sakang nambah ka pelian iya nya tadi. Tiga kali iya ngunsut ka sakang nya berengkah ari pala nyentok ka punggong, iya lalu besampi : “Fo ! Ari antu pulai ka antu, ari angin pulai ka angin, ari tanah pulai ka tanah, ari ai pulai ka ai. Gayu ko antu, gerai ko Simpandai, nadai apa nadai nama ko petara, Fo !” ko iya lalu enggau jari-jari. Tunjok indu iya lalu tekait ba sintal kain tudah bini Ensingut, nyau ka tekusai kain tudah laban iya, tang seninjik jari bini Ensingut jampat nangkap tisi kain diri, enti enda pia bebadi buah sawi iya kena kaul tunjok aya Manang. “Balat endar sampi aki nyau ka tekusai sintal kain laban,” ko sida ke biak. “Sakang apa ke kena nuan nya tadi, aya ?” ko Biul nanya Manang. “Sakang saribu nya Igat. Ulih aku pegi ngagai Pulau Jambi kalia,” ko iya. “Pama tu Igat, jarang tungkal,” ko iya mandang ka puchong sakang nya ngagai Biul. “Bidik endar aya tetemu ka sakang ngemisa nya,” ko Ensingut. “Nyau kapuas ke pegi nya deh Igat,” ko iya nyaut Ensingut. Udah tembu nama ka semengat, tembu ngunsut ka sakang nya tadi, dia sida sama belator tindok. Bini Ensingut endang lalu enda tau tindok smalam nya, laban pemedis iya lalu enda belinsor. Pagi siti, dia Ensingut nanya ka upah iya ke belian. “Mar endar,” ko Manang, “laban tu tak diri sarumah. Itong ka nadai upah tu Igat. Semina aku ngambi pemali aja,” ko iya nganu Ensingut. “Nya barang ko pengasih nuan aya Manang. Nuan ukai enda nemu penyuntok aku,” ko tudah Ensingut. “Ni naka pemali ke enda tau enda deh aya ?” ko Ensingut. “Kebok sigi, manok siko, belachu sadepa, kering semengat duku sebilah enggau duit lapanbelas ringgit,” ko Manang. “Nadai ko enggau iya meh aya. Utai endang udah dikereja,” ko Ensingut. “Duku, manok,kebok enggau kain belachu nya ulih keluar ka aku diatu, aya. Tang duit nya apin bisi. Nganti aku udah nyual dambar ila, nya baru aku nyurong ka nuan,” ko Ensingut. “Barang iya meh Igat, nadai nya dipeguai ka deh,” ko Manang Ula. BERANAK ENDA CHUKOP BULAN Pemedis bini Ensingut makin majak, perut iya mansang pedis. Dua hari udah bekau ke belian nya, iya pan datai kelai. Tang ukai baka kelai orang ke beranak chukop bulan. Nya alai meda bakanya, dia Ensingut lalu madah ka indu sida sarumak ke endang teleba nekan orang beranak. Sida pan lalu begau kia. Bini Ensingut ngenjing kasak-kasak. “Nadai nya utai bukai, endang deka beranak,” ko sida ke teleba betekan. Sida lalu nekan iya. Enda ulih siko, tambah dua, enda ulih dua tambah tiga, mengkang ga enda ada. "Salah tu lekat endar. Uji padah ka sida ke lelaki ngulih ka kerng agi," ko sida ke indu dia. Ensingut lalu belanda madah ka sida setak nyin ngambika besaup nekan bini iya. Dudi orang bukai, Manag Ula dulu angkat lalu sama betekan enggau sida ka indu dia. Nyau nadai alai nyelit ka agi laban jari sida. Nyau bekansat tikai alai bini Ensingut nya beranak kena tumpu kaki Manang Ula, empa pemendar iya nulong sida betekan. Nyau kapuas sida betekan, anak nya pan ada sereta temuni, tang anak nya 'ada-lalu'. Endang enda benyawa. Meda anak nya ada-lalu, nya alai lalu digiling sida enggau tikai lalu engkah ka tisi, laban beguai ngidup ka indai iya. Sekeda sida lalu menjadi ka api di dapor alai bini Ensingut bekindu. Manang Ula ngeringak muchau. Biul kerok-kerok ngulih ka sakang. Ensama ngeringak nenong ngena ai dalam jalong, ngiga utai ke nganu anak mit nya meda iya tak ada-lalu. Ensingut enda nemu daya agi, semina gisai-gisai ngaru selepak pah. Api menyadi, bini Ensingut lalu didudok ka sida mangkang api ngenjing durong-durong baka api pandok. Apin bulih satengah jam iya udah bekindu, dia iya madah ka diri enda tan agi kelalu angat, tang sida enda ngasoh iya nginsit. Bekindu meh iya dia aus,tang sida madah ka iya enda tau ngirup. Bekindu meh iya dia samalam-malam nya, ka gali enda diasoh Manag Ula gali laban enggai ka darh niki ka pala. Enda lama udah nya peda belakang bini Ensingut ngenjing ensapong betu, iya pan jukat. Meda belakang iya nyau kelalu balat betu, nya baru sida ngasoh iya gali nyandar, tang api mengkang mau. Bini Ensingut kasa-kasak madah ka diri enda tan, tang sida madah ka iya enda tau enda bekindu enggai ka getah enda nurun. Nyau jauh malam, nya baru Bujang ke nyuloh pelandok pulai lalu nyengok sida ka bilik. Datai dia meda bini Ensingut kelah-kelah. Sida bukai bekadugau ngelingi iya ke bekindu nyandar semak dapor. "Nama utai disalai kita ngemendar nya ?" ko Bujang. "Ukai nyalai utai. Bini Ensingut bekindu, baru udah beranak lemai tu," ko sida nyaut iya. "Salah pengawa kita kelalu menjadi ka api ngemalat nya. Nadai mensia tan mengkang api baka api pandok bekanya. Rara api nya. Bini Ensingut nya tanggong katas," pia ko Bujang ngajar sida. "Kati ko iya enda bekindu deh ?" ko Biul. "Ukai enda bekindu, udah kelalu," ko Bujang. Nya baru sida nanggong iya katas. Meda iya kelah-kelah, dia Bujang lalu meri iya ai ke udah dipandok, ke udah chelap. Udah ngejang ari api, ngirup pan ga udah, nya abru seput bini Ensingut lantang mimit lalu tau ngelap enda lama. Pagi siti, bii Ensingut mengkang nadai insur. Nya alai samoa sida sarumah ke bisi sakang ko jako nadai enda udah ngunsut, nyau lichin tuboh iya laban minyak kepayang. Samoa sida ke nemu muchau, baka Manang Ula, baka Ensama, Enchaboh enggau Biul sama mantai ka penemu diri. Tang pemedis lalu enda belinsur pama. Meda pemedis iya lalu enda berubah, dia sida agi ngasoh manang Ula belian ka iya baru, tang Bujang keras ngasoh nganjong iya berubat ngagai rumah sepital perintah. Laban ko penemu Bujang, penyakit bini Ensingut nya ukai laban antu, ukai pansa utai. Tang laban iya beranak enda chukop bulan sereta salah intu sida ke nekan ka iya. Ninga Bujang ngasoh nganjongiya ngagai riumah sepital perintah, ari nya Ensingut lalu tekuing ati laban kengka sida ke bisi penemu ko jako sama udah nguji magang, tang pemedis nadai insur pama agi. Mamang Ula nyau lain jako madah ka bini Ensingut nya di ayah ka Buyu. Ninga munyi nya bini Manang keras majak ka sida ngasoh Manang belian baru, laban derisa perintah enda nemu ngubat orang diayah ka Buyu. Tang Ensingut udah tekuing ati deka nganjong bini iya berubat ngagai sepital perintah. Terubah ka lembau-lembau ati iya laban nadai ngibun anak ke tinggal di rumah. Kadua agi laban takut ka bini iya ditan ka dalam sumah sepital. Pagi siti Enchaboh ngulu ka Ensingut nganjong bini iya berubat. Nyau senmak tengah hari sida pen datai di pasar, sereta lalu niki mai iya ngagai sepital. Leboh sida datai ba rumah sepital, dia derisa baru udah ngelebus pulai ka rumah makai tangah hari. Nya alai sida dudok nganti ba moa pintu rumah sepital nya. Pukol satu satengah derisa niki baru lalu betemu enggau sida ba moa pintu nya. Bini Ensingut gali ba semin semak moa pintu nya sakumbang ke nganti derisa datai. Derisa pan tama, sida lalu ngentudi ka iya kadalam. Derisa lalu nanya ka pemedis bini Ensingut. Derisa nya enda nemu jako Iban, nya alai sida sama nyenyadi ka jako Laut. Enchaboh seduai Ensingut sama enda tentu nemu utai ko derisa, lalu iya pan enda tentu nemu utai ko seduai. "Apa macham sakit ?" ko derisa nanya Enchaboh. "semacham aja derisa, nadai maioh penyakit," ko iya. "Mana tempat sakit ?" ko derisa ga nanya sida. "Sana kena di rumah, " ko Ensingut> Beguai Ensingut nyaut meda Enchaboh lama kalat-kalat. "Enda tau kat-kat kitai bejako enggau orang dalam rumah sepital," ko Ensingut nganu Enchaboh. Jako sida tiga lalu enda tentu betemu. Laban derisa nanya ka pemedis bini Ensingut, tang kumbai Enchaboh nanya ka pemaioh macham penyakit iya. Nya alai iya madah ka pemedis nadai maioh macham. Udah nya derisa nanya ka senentang pemedis iya, tang kumbai Ensingut nanya ka endor iya ke kena sakit. Nya alai iya madah ka bini iya kena sakit di rumah sida dulu din. Nya alai jako sida tiga lalu enda betemu. kapuas ke nadai tentu nemu utai ko pangan, dia derisa lalu meresa tuboh bini Ensingut. Dia iya meda belakang iya nyau luloh magang, lalu sekeda meletor ba belakang iya apin mechah. "Nadai tu pemedis bukai, tentu tu betu. Nyangka langkau sida tak angus indah," ko ati derisa. "Apa ! Angut kah ?" ko derisa nanya Enchaboh. Dia Enchaboh seduai Ensingut sama rangap-rangap enda nemu utai ko derisa. Ka ngumbai nya jako orang Putih, nadai ga kala ninga orang ke nemu jako orang Putih munyi nya. Ka ngumbai nya jako China, nadai ga China munyi nya. "Tusah endar nadai derisa Iban. Nadai guna perintah ngasoh derisa tu bekereja ba menoa Iban, enda nemu utai ko kitai," ko Ensingut mutap. Nya ga baka bini Ensingut nyau kasak-kasak nat ka pemedis. Nyau kalama nya baru siko anembiak Iban ke nyadi penulong derisa dalam sepital nya datai. Anembiak nya nemu mimit jako orang Putih. Nya alai iya nyalin ka jako orang Putih ke dikena derisa nya ngagai Enchaboh seduai Ensingut, lalu bakanya ga nyalin ka jako seduai ngagai derisa nya. Udah nya baru jako sida tiga betemu. Enchaboh lalu nusoi kabuah belakang bini Ensingut nya luloh, tang enda madah ka pasal iya ke beranak enda chukop bulan, lalu enda mega nusoi ulah sida ke ngintu iya beranak di rumah. "Bisi udah diubat kita di rumah din iya tu ?" ko derisa nanya Enchaboh ngena jako Laut bangkut-bangkut, tang disalin ka anembiak Iban nya ngagai seduai. "Nadai enda udah macham ubat. Pelian ka udah, puchau ka udah, sakang bulih seraga udah kena ngunsut, tang baka ke enda diubat. Terubah Manang kami din ngumbai iya tu diayah ka Antu Ai. Udah nya lalu di pelian ka iya, enda ga belinsur pama. Kamari Manang ngumbai indai orang tu diayah ka Buyu, tang kami nyau berunding nganjong iya berubat kitu. Meda ubat kami diulu din tak baka ke ngunsut ka ai amat," ko tudah Ensingut. "Dini deka nyadi di pelian ka penyakit bansa tu, luloh laban api. Ni bisi Buyu ba dalam daun api," ko derisa nya nganu seduai. Derisa lalu ngetu bejako enggau seduai, laban ngubat belakang bini Ensingut ke luloh nya. "Lapa enda tuchok deh derisa ngambika jampat gerai ?" ko Ensingut. Derisa enda malik, laban tembu ngeringak ngubat belakang bini Ensingut. Udah tembu nya derisa lalu ngasoh iya gali ba katil ke endang alai orang berubat dalam sepital. Ensingut udah mupok gisai-gisai enggai ka bini iya tak ditan ka derisa bemalam dalam rumah sepital nya. Iya endang enda kala beserara enggau bini kenyau ari seduai ke jadi semilan taun nya udah. "Bini nuan tu ditan ka dalam rumah sepital tu, laban pemedis iya tu balat," pia ko derisa nganu Ensingut. "Ni pengelama iya ditu deh derisa ?" Ko Ensingut. "Enda temu pengelama, enti iya apin gerai, apin pansut. Pemedis iya tu ukai semina luloh belakang, tang darah ita enda chukop, udah bekau beranak. Nya alai gamal iya puchat," ko derisa. "Aku tau enggau iya tindok dalam rumah sepital tu derisa ?" ko Ensingut. "Ni nuan tau enggau ditu deh. Semina ngabas iya lemai-lemai, nadai penyalah. Tang enggau iya tindok ditu enda tau, enggai ka dianu Perintah," ko derisa. "Es,Ah ! Tusah endar laban penemu nya. Sapa nganjong iya kemi bira deh ? Ukai bisi orang dikelala iya dalam sepital tu," ko Ensingut. "Pasal nya anang nuan tusah. Kami tanggong jaga iya'" pia ko derisa. "Amat nya. Ukai baka kitai ke berubat ba manang luar berubat ba manang Perintah," ko Enchaboh nyelepak jako derisa. Ninga munyi nya, nya baru Ensingut nurut ka jako derisa. DIAU DI SEPITAL Bini Ensingut lalu tinggal dalam rumah sepital. Enchaboh seduai Ensingut lalu nurun ka pasar ngiga alai bemalam. Datai di pasar lalu nanya towkay sapintu. Seduai minta tindok ba sadau kedai. "Mana boleh. Titak ada tempat," ko towkay nganu seduai. Udah nya nyau ga seduai ngagai kedai sabuah lalu nanya bini towkay ba kedai nya. Seduai madah ka diri nadai alai tindok. Bini towkay nya pen madah ka nadai alai, laban anak iya maioh. Hari pan nyau petang. Seduai lalu ngelawa kedai sapintu ba bentang pasar siti, sereta lalu tama kadalam kedai. Datai dia Ensingut lalu bejako enggau towkay. "Tuki ! Tau kami duai tidor sini kah ?" ko iya. "Mana latang ?" ko towkay. "Datang Madu Midang diulu din," ko Ensingut. "Mana tumpat Madiu Midian ?" ko towkay ga. "Sana. Jaoh," ko Enchaboh. "Ata mawa julutong kah ?" ko towkay. "Tidak, mana bisi hari chari nyelutong. Bawa bini sakit udu," ko tudah Ensingut. "Titak ada balang, titak lapat titun sini," ko towkay. "Tusah tua tu. Nya ga asai perut lapar. Hari nyau petang. Dini endor tua ngendoh ka diri malam tu nganti ke ngiga alai diau pagila ?" ko Enchaboh. "Pulai ngagai rumah Pulis kin ka tua," ko Ensingut. Seduai lalu mansang ngagai rumah Pulis. Datai dia lalu besatup enggau Pulis ke bediri di luar. Meda seduai tak gesah-gesah gamal,dia Pulis lalu nanya ka kabuah seduai niki nyau malam. "Nadai kabuah bukai kami duai tu, ngiga alai ngendoh ka diri malam tu. Towkay di pasar din enggai alai duai," ko Enchaboh. "Ni boleh numpang rumah perintah, ngelanggar atoran," ko Pulis ga. Ninga enda tau numpang ba rumah perintah ko Pulis nya tadi dia seduai lalu nrun baru. Datai ba tengah jalai, dia Ensingut bejako mai Enchaboh ngendoh ka diri ba bansal perau towkay di pengkalan. Enchaboh pen deka ga, laban hari nyau udah malam endar. Seduai lalu nat ka diri dia samalam nya. Enchaboh ngenyap enda lama, tang Ensingut endang lalu enda mejam ka mata laban tusah ati ingat ka bini iya ke tinggal ba rumah sepital. Tambah mega enda ngetu betipas ka nyamok samalam-malamnya. Pagi siti seduai enda ati ngiga rumah orang alai diau sakumbang ke nganti bini Ensingut berubat. Seduai lalu ngajang perau ke dikena nganjong iya ke berubat nya tadi. Seduai lalu tindok dia sakumbang ke di pasar. Nyau katiga hari udah bekau nya, dia bini Ensingut pan bisi pama mimit. Betu ke ba belakang iya udah mupok rangkai, tang ba senentang ke balat agi luloh agi mengkang balat. Ensingut seduai Enchaboh bisi ngabas iya genap-genap lemai. Tang makin seduai bejarit ngabas iya, makin balat agi Ensingut enda betah. Chukop saminggu udah bekau seduai ke ngibun iya dia Enchaboh madah ka diri deka pulai dulu laban nadai orang dikarap ka di rumah. Ensingut keras mai iya sama agi nganti, tang Enchaboh enda ulih tan ka iya. Nya alai pagi siti Enchaboh mudik kadiri sangkai ba orang ke pulai undor. Ensingut tinggal kadiri ngibun bini iya ke agi berubat. Lemai Enchaboh ke pulai nya, Ensingut ngabas bini iya ngagai sepital, lalu bejako enggau derisa, nanya ka maia bini iya tau pansut. "Apin temu maia pansut, laban luloh ke ba belakangiya agi balat, lalu umba iya agi balat puchat laban darah ke udah maioh lenyau leboh iya beranak kamari apin tepulai. Tang iya udah manah ari leboh iya ke baru masok suba," ko derisa. "Enda iboh nganti udah gerai bendar pan. Enti iya udah tau pansut, aku deka mai iya pulai,' ko Ensingut. "Apin tau dibai pulai diatu. Apin gerai," ko derisa. Anembiak Iban ke bekereja ba sepital nya endang enda jauh derisa leboh iya bejako enggau Ensingut, laban nyalin ka jako iya nya ngagai siko nya. Udah nya derisa lalu bejalai ngubat orang bukai ke berubat dalam sepital nya. Tinggal derisa udah bejalai, dia Ensingut bejako belalai enggau bini iya. "Enti derisa datai lagi, nuan ngaga diri nyabak madah ka diri enda betah anak ke di rumah. Nambah ka nya padah ka nadai orang ngereja pengawa di rumah. Enti aku bejako ka nuan, enggai ka iya ngumbai aku keras mai nuan pulai," ko Ensingut ngajar bini iya. " Pia meh. Aku pan endang berunding ngiga jalai diri tau pansut ga. Puas endar diau kadiri ditu, nadai orang enggau bejakko. Kengka orang ke bisi ditu nadai nemu jako kitai. Nya alai aku enda betah endar," ko bini Ensingut. Enda lama udah nya derisa datai kia ka baru deka meri iya ubat, laban udah chukop maia meri ubat ngagai siko-siko. Agi jauh derisa, dia bini Ensingut endang udah sikok-sikok ngaga diri nyabak. Moa iya dipampul iya, laban enggai ka derisa meda iya nadai ai mata. Ensingut pan ngaga diri tusah ati. "Nama utai disabak ka nuan deh bini Ensingut ? ko derisa. Iya enda nyaut. Tak majak sikok-sikok. Ensingut enda bemunyi, semina gisai-gisai, garu kiba garu kanan. "Lapa nuan nyabak, deka bira ?" ko derisa ga. Nya baru iya nyaut madah ka diri enda betah anak ke tinggal di rumah. Ensingut ngetil jari iya meda iya enda nitih ka ajar nya tadi, nadai nyebut pengawa ke di rumah. Meda derisa nyeling seduai ke begetil, nya baru Ensingut ngelengka ka jari bini iya. Meda seduai begetil bakanya, dia ati derisa endang udah nangkap, endang belaba ka Ensingut enda betah tinggal bini iya berubat bemalam dalam sepital. Tang iya agi majak ka jako madah ka apin tau pansut, laban pemedis apin gerai. Enti tumu bai pulai enggai ka pemedis nya mulai baru. Ninga derisa madah ka iya enda tau pansut, dia bini Ensingut balat agi ngaga diri nyabak. Tang leboh ke dudi nya ukai tentu ngaga diri, endang nyabak bendar laban sinu berunding ka Ensingut nadai orang enggau diau di perau din. Jam pan chukop maia orang ke ngabas kaban dalam sepital nya pulai, nya alai Ensingut pan diasoh derisa pansut laban jam udah chukop. Udah bejako enggau Ensingut nya, dia derisa lalu ngintu orang bukai ke baru masok ngagai sepital nya. Nyadi kejang deka pulai nya, Ensingut mekat bini iya ngasoh iya lari ari rumah sepital nya malam nya enti orang udah tindok. Udah nya Ensingut lalu mulai ka diri ka perau. Hari pan nyau malam. Orang ke berubat dia sama udah jenoh. Ninga orang nadai agi bemunyi, dia bini Ensingut angkat begadai-gadai nengkila ka orang engka agi bisi apin tindok. meda orang udah jenoh magang, iya lalu nurun ari katil ke alai iya gali, deka mansang lari. Leboh iya baru nurun, kaki kiba udah terengkah ba geladak, lalu kaki kanan mengkang manggai ba katil, dia apai tuai orang ke sama berubat dia angkat kemi. Meda apai tuai orang nya angkat, iya lalu ngali ka diri baru ngaga diri tindok. Udah apai tuai orang ke kemi nya tadi pulai ngagai katil nya baru, dia bini Ensingut angkat baru begadai-gadai lalu pansut ari rumah sepital nya lalu bejalai beguai-guai nepat Ensingut ke ba perau di ai din. Datai dia meda Ensingut mengkang dugau-dugau endang apin tindok. "Bisi orang meda nuan pansut tadi ?" ko Ensingut nanya bini iya. "Nadai. Orang udah tindok samoa," ko iya. Seduai lalu mudik malam nya. Kira tengan niki matapanas pagi siti, nya baru seduai datai ba rumah sida diulu din. Datai ba rumah meda rumah puang. Samina sida sabilik enggau manang Ula bisi di rumah> manang Ula enda turun, laban kena idar iya nyaga rumah sahari nya. Kengka sida ke bisi di rumah nya lalu ngulu seduai ke baru pulai berubat. "Kati asai udah berubat ka sepital perintah, endu ?" ko bini Manang Ula. "Pedis endar nadai tau pansut. Tindok ngarey ngapa ba katil nadai kibong. Apai orang nya ga enda tau enggau aku dalam rumah sepital," ko iya. "Gerai ga asai nuan endu ?" ko Manang Ula. "Ni bisi gerai. Nadai tentu insur ari ke baru masok suba," ko iya. "Aku endang nyadang ubat perintah enda tegerai ka orang diayah ka Antu Buyu, tang enggai ka kumbai kita nagang kita berubat ka perintah, nya alai aku enggai bejako leboh kita ke nurun suba," ko Manang nganu Ensingut. BERUBAT BA ENSAMA Hari nyau ka sabong petang, sida ke turun pan udah datai magang. Sereta ninga Ensingut udah datai, dia Ensama lalu beguai ngabas bini iya ke pulai berubat. Sereta tama, iya lalu nanya ka asai bini Ensingut udah ke berubat ba sepital perintah. "Enda nemu punggal. Tak nadai tentu insur," ko Ensingut nyaut iya. "meda nya tak nadai belinsur, nya alai aku naban ka iya pulai," ko iya. "Nama runding nuan ngubat iya deh ?" ko Ensama. "Nadai runding bukai, nyangka agi ngasoh aya Manang nya belian baru," ko Ensingut. "Ni ulih pelian ! enti pelian iya bisa, udah gerai iya suba," ko Ensama. "Nama pikir deh punggal ?" ko Ensingut. "Aku ngelama tu enggai tak berupai luba-luba peda sida Manang, nya alai baka ka nadai penemu peda kita. Aku endang nemu pemedis bini nuan tu ukai utai dipelian. Dipandi ka, nya baru iya gerai," ko Ensama. Iya lalu dudok besila, kaki kanan lalu dipanggai ka iya atas patong kiba, sereta lalu nungkun insap. "Ngelamatu ! Naka aku ke ngubat orang, tak jarang enda gerai. Ni macham pemedis, nadai enda udah dijamah aku. Orang diayah ka utai dalam ai, orang diayah ka buyu, pedis perut, orang bagas kentut, nadai enda gerai samoa ke udah berubat ba aku," ko iya nganu Ensingut. "Meda nuan tak baka ke enda meda penusah aku meh punggal," ko tudah Ensingut. "Nya meh, enggai jegak-jegak peda sida Manang," ko iya. "Ngambika jako enda panjai, punggal, nuan nya meh ngubat indai orang u. kasih ka aku," ko Ensingut. "Aku ukai baka ka enggai, tang kita ga nadai udah ngasoh," ko Ensama. Tembu jako nya Ensama pansut ka ruai lalu nurun mandi. Sida bukai ke ngabas bini Ensingut bekalikik bejako enggau pangan, sama madah ka diri enda nemu Ensama nya nemu berubat, laban nadai kala meda iya ngubat orang. "engka penemu baru. Ni kitai nemu orang tau surat bakanya," ko bini Enchaboh. Udah badu makai lemai nya, Ensama lalu tama baru ngagai bilik Ensingut. Datai dia lalu nudok ka jalong ke dibai iya ari bilik sida, sereta lalu di isi iya ai. Udah nya lalu ditungkun ka iya dian empat puchok, nya lalu ditangas enggau menyan. Bantai ka iya lungga, lalu garis ba ai ke dalam jalong nya tadi. "Maioh endar perengka orang ke nyadi beliau." ko Biul bejako enggau sida ke indu ngemata ka iya dia. Ensama lalu kulap-kulap muchau.Udah kulap-kulap, sepu ia ga ai ke dalam jalong nya. Udah nya baru iya bejako nunjok ka semengat orang ke nganu bini Ensingut kenu ko iya. "Nyin, enti kita ka meda ba ai alam jalong tu. Nya orang ke nganu bini punggal tu," ko iya. Sida lalu berebut ka meda semengat ke ko Ensama nya. Sama ngeringak nilik ai alam jalong nya. "Ni iya enda ulih peda deh ?" ko sida nganu iya. "Iya endang bagas enda ulih peda orang ke enda nemu berubat. Orang ke endang tau berubat baka kami tu, nya baru iya nyata endar dipeda," ko iya nganu sida. "Mar endar ngubat bini punggal tu, laban pemedis tu udah lama. Enti orang ke agi baru-baru belajar berubat endang diputus ka aku enda nemu ngubat pemedis udah lama bansa tu," ko iya nganu sida dia. "Ubat dia meh punggal. Minta kasih," ko tudah Ensingut. "Lama aku ngubat tu, laban enggai nyadi enda diberi mandi dulu, nya baru ka nyadi diubat," ko iya. "Tumu pagi pegila aku meri iya mandi. Lemai tu semina ngunsut iya enggau sakang," ko iya nganu Ensingut. Iya lalu ngusai ka putut sarong ubat, lalu nyengkau puchong sigi bekerakau dawai. "Balat endar sakang punggal, ngenjing kerakau puchong," ko Biul. "Ukai mudah tu punggal. Sakang ulih aku ari Pulau Jambi nyin tu," ko iya mantai ka puchong nya. Iya lalu ngunsut bini Ensingut. "Bidik endar punggal tetemu ka sakang bisa. Kati ko nama sakang nya punggal," ko Biul. "Oh, sakang Ulak Mulai tu punggal. Ukai mudah aku mai tu ari Jambi nyin menya. Enti nadai akal enda ulih bai," ko iya. "Kati ko nuan mai nya deh igat ?" ko bini Enchaboh. "Simpan aku dalam buah nyiur puda. Udah nya buah nyiur nya dibalut enggau tanah liat. Enti enda bakanya, enda ulih bai ngena kapal. Indah nya, deh kami nyau ka karam laban kabut," ko iya. "Ni utai bukai ke dikena lelaki bejalai, bisi ga nuan bulih ari Pulau Jambi nyin punggal ?" ko Biul. "Oh, nya anang nyebut. Dudi utai bukai digiga," ko Ensama. Tembu ngunsut bini Ensingut enggau sakang nya, dia Ensama lalu madah ka diri pansut ka ruai. Tiga pagi berunggu udah nya Ensama meri bini Ensingut mandi. Agi petang-petang, udah iya tama ngagai bilik sida Ensingut. Makin diberi iya mandi tumu-tumu pagi, makin penyakit bini Ensingut nya balat agi. "kati ko indai orang nya, makin diberi mandi makin penyakit majak agi ?" ko Ensingut nanya Ensama. "Endang baka iya kena entong sakang bisa. Lepas tu ila gerai iya," ko Ensama."Isa meh nya punggal," ko tudah Ensingut. "Gerai punggal, anang tusah. Nadai kala sabau sakang tu salamatu, ukai baru tu," ko Ensama. Udah nya Ini Ensingut nanya ka sabang sakang nya tadi ngagai Ensama. "Nadai maioh macham sabang tu ini. Jarum siti, duit limabelas ringgit, belachu sadepa enggau besi siti. Nya utai ke enda tau enda," ko Ensama nyaut Ini Ensingut. "Kati ko nuan ke meri iya mandi, sama masok dia tadi ?" ko Ensingut. "Sama begulai dia. Nya kabuah nya tadi bisi masok kain belachu," ko Ensama. BINI ENSINGUT PARAI Udah tembu buol ke meri mandi nya tadi, Ensama enggau Biul pereman nginti ka babas. Tinggal seduai ke pereman nya, pemedis Bini Ensingut majak balat kebalat. Dua hari udah nya nyawa iya pan nadai. Chukop maia iya dibai ka ruai, iya lalu ditanggong sida lalu diengkah ba sapat. Sida ke dia bela kiroh, lalu sakeda nyabak. Lemai nya Ensama seduai Biul ke pereman nginti pan pulai. Agi jauh, dia seduai ninga nyawa orang ngenjing belalo nyabak. "Nama tak munyi nyawa orang ke nyabak tunga ka rumah kitai, punggal ?" ko Biul nanya Ensama. "Eh, kada enda bini aya Manang. Ini orang nya endang begas tak ngelulu ka diri nyabak. Nadai nya orang bukai," ko Ensama. "Enda punggal, tak maioh munyi nyawa nya dinga aku. Kada enda udah nadai tudah bini Ensingut," ko Biul. "Enda nemu meh, enti salamatu nadai kala sabau sakang ke bai aku ari Jambi nya," ko Ensama. Hari endang udah petang . Seduai pan niki. "Amat jangka aku tadi punggal," ko Biul. "Nya lah. Endang udah umor. Bisa pan sakang enda meh ulih," ko Ensama. Tudah Biul, laban ke endang bepangan bendar enggau Ensingut, sinu bendar meda bini iya udah nadai. Nya alai iya lalu nyungkor ka diri nyabak kadalam sapat. "Naka meh nuan tu deh indai orang, bengat ninggal ka kami enda teanti ka kami duai punggal ke pulai nginti," ko leka sabak iya. Sida sarumah nya lalu nyenggai bini Ensingut malam nya. Pagi siti sida ke lelaki nurun beban. Ngalih hari nya ban sida tembu, sereta lalu dibai pulai ka rumah. Barang sida ke landik agi jari lalu ngalus ke sentubong nya sereta lalu ngerapat iya. Apin tengah malam nya, sentubong pan tembu. BERUNDING KA ULIT Sekumbang ke nyenggai antu nya sida ka tuai-tuai berunding ka ator ulit. Nyadi ko Enchaboh ; "Mun lemai tadi aku apin mansut ka jako, laban belaba ka kita sabuat sama agi peselak runding laban tu terubah kitai kena tinggang penusah ke ngemesai tu. Nyadi utai ke bai aku perunding ka kita pasal ator ulit kitai tu. Rumah kitai amat jauh ngejang ari orang, tang kitai berunding ka naka tanah kulu kili ke patut kena serangkong ulit tu," ko iya. Baru ka bejako Bujang lalu dilampat Ensama. "Penemu aku," ko iya "enda baka enggi orang. Nya alai ulit kitai tu kulu ka naka dinga panjong, kili ka naka dinga kangau," ko iya. Tembu jako Ensama nya, dia Enchaboh ngasoh Bujang bejako. Nyadi ko Bujang ; "Ngena ga penemu Ensama nya tadi, tang enti kitai besukat ka penjelai nyawa, mar bendar sepi aku. Kabuah pia, laban barang ke inggar agi nyawa, tentu jauh agi serangkong ulit. Barang ke enda besai nyawa, tentu samina didinga ari ulu ari ili pendai nya mimit. Nya alai dalam penemu aku, nyangka enggai nyadi kitai bekelai ke penyelai panjong, dalam pasal naka serangkong ulit kitai tu," ko iya. "Amat mar endar nya," ko Biul. "Ti baka Aya Manang ke besai nyawa nya tentu jauh bendar serangkong ulit iya. Tang enti baka ini Ensingut ke mit nyawa nya, semina naka pendai nya kandang ulit iya," ko iya. "Amat penemu nya. Enggai nyadi kitai bekelai ka penginggar nyawa," ko Enchaboh. Udah nya Tuai Rumah bejako baru nanya ka penemu Bujang. Laban ba utai ke besai bakatu, iya endang enda ngelaung ka Bujang. Bujang amat agi biak, tang penemu iya lurus, jako enda maioh. samoa jako iya endang leka-leka magang. "Ni runding nuan Jang?" ko Enchaboh. Nyadi ko Bujang : "Sida bukai udah magang bejako, lalu tebal agi ke deka nitih ka penemu Ensama, mai bekelai ka penginggar nyawa kena nanda kandang tanah kena serangkong ulit. Tang ko penemu aku, enggai nyadi bakanya. Kabuah pia, enti kitai bekelai nyawa, ari nya penyauh kandang ulit kitai tentu enda sabaka. Bisi jauh bisi serekat, laban nitih ka penginggar nyawa diri," ko Bujang. "Letak dia meh, enti penemu aku nya tadi salah ko kita," ko Ensama. Iya lalu birap-birap betajong panjai pulai ka setak. "Nyadi ko penemu aku, naka kandang ulit kitai kulu naka Titi Patah. Kili ka naka Kerangan Rantau Sikat. Digaga kitai kelalu jauh ari nya enggai ka enda ulih pegia, laban kitai ukai semina ngira penusah ke sakali tu aja. Ukai ngajih ka rangkang ngachok mata, tang nabat utai ka jemah ila. Nya alai nya naka penemu aku," ko Bujang. "Ngena nya jang, betul penemu nya. Ati aku pan bekanya meh tadi, tang baru ka bejako aku tadi, endor nuan nyebut nya," ko tudah Biul. Iya lalu pekasi tunga moa bini Manang. "Jugau dek tu. Kini ka nyembur moa orang !" ko tudah tuai. "Anang dudok di moa dia enti enggai kena sembur !" ko Biul. Lalu ka dijangkam iya moa bini Manang, laban iya ke endang pemutik laya. Bini Manang lalu nyurut ka diri ka tisi, enggai dijangkam iya. Sida bukai sama enda bemunyi meda Biul nyerugang deka nyangkam moa bini Aya Manang, laban endang nemu baga iya. Tejanggal mimit sida ke baum nya laban Biul, tang udah nya Enchaboh bejako baru. "Enti kitai bukai nadai penemu nambah ka enggi Bujang nya tadi, nya meh ator kitai tu," ko iya. NEBAH RADIO "Sabengkah agi jako nangkir jako pasal ulit nya tadi," ko Enchaboh. "Nama agi jako, nama nya udah ga nya tadi deh ?" ko Biul. "Amat ga munyi ko punggal. Iga jako bengat enda tau abis-abis," ko Ensama ngelaki ka jako Biul. "Enti utai patut, kati ko enda nyebut, kala kitai berunding ka iya," ko Bujang nyaut jako Ensama. "Bejako meh aya enti agi bisi utai dikenang," ko Bujang nganu Enchaboh. "Pasal radio, nya utai ke agi dibai aku perunding ka kita. Laban leboh maia ngulit, kitai endang ditemu enda tau manjong, enda tau bemain enggau nyawa inggar, baka mengap, berenong enggau bepantun. Nyadi kemaiatu laban menoa Sarawak udah bisi pun radio, lalu kitai pan bisi udah meli radio kena mending ka utai dikeluar ka orang ari pun iya din. Nya alai, nya utai bai aku perunding ka kita, sakalika kitai mai radio sama ngulit tauka mengkang tau dipasang sakumbang kitai ke ngulit tu," pia ko Enchaboh. "Amat munyi ko Igat nya. Enggai nyadi enda diperunding ka kitai pasal radio tu," ko Manang Ula. "Aku enti orang mansut ka main manang ari pun radio nyin, isa aku ngelengka ka asi, enggai meh enda mending ka iya," ko iya. "Nya alai nama runding kitai maioh tu deh ?" ko Enchaboh nanya sida sabuat. Angkat Ensama lalu ngitau ka jari deka nyaut jako Enchaboh nya tadi. "Enda iboh bediri pan bejako. Dudok pan didinga meh," ko Bujang. Ensama lalu dudok baru. "Bejako meh," ko Enchaboh. "Ko penemu aku, Radio endang enda tau sakali-kali ditebah sakumbang kitai ngulit. Indah kitai deh enda tau inggar. kati ko radio diasoh berenong," ko Ensama. "penemu aku pan munyi enggi punggal nya. Nadai guna kitai ngulit enti radio tau dipasang,' ko Biul. "Kati ko runding nuan deh Aya Manang ?" ko Enchaboh nanya Manang Ula. "Mar endar laban radio tu. Ka nebah iya, adat ulit ga enda tau inggar. Ka enda nebah iya, sayau endar ga enda ninga main. Ba pending aku, pelian enggau dungai nya bengat ngena bendar, tak sinu ati ninga," ko Manang Ula. "Ni penemu nuan deh Bujang?" ko Enchaboh. Apin sempat nyaut tudah Bujang lalu dilampat Ensama. "Iya pan nadai meh penemu lebih ari kitai. Nadai iya deka nebah radio leboh ngulit deh," ko iya. "Ni kitai nemu penemu siko-siko. keba mending ka enggi orang dulu," ko bini Enchaboh. "Bejako meh Jang," ko Manang Ula nganu Bujang. "Mar bendar berunding. Laban penusah tu laboh ba orang bukai. Ukai ngajih ka rangkang ngachok mata, tang enti sema kena ka diri empu, enda aku mai radio ngulit," ko Bujang. "Mar kitai bukai tu bejako. Uji tanya ngagai Ensingut empu ke kena tinggang penusah tu," ko Manang Ula. Baru ka nanya Ensingut empu, dia Ini Ensingut lalu nyerugang bejako, " Aku sigi enda sakali-kali ngasoh kitai sarumah tu nebah radio sakumbang ngulit tu. barang kitai masang radio dalam kandang ulit tu, endang didawa aku," ko Ini Ensingut. Iya lalu beserintak nyabak sinu ati pulai ka sapat. "Putus ka dia meh jako, puas endar lama-lama berunding," ko Biul. "Apin kita katuai nyimpul jako aum tu, aku enggai enda madah ka kabuah diri ke ngumbai radio enda patut dibai ngulit," ko Bujang. "Maioh endar jako. Enda tau abis-abis," ko Ensama. "Nadai nya salah deh, enti agi bisi alai nyelepak ka penemu," ko Enchaboh. "Kabuah radio enda tau dibai ngulit ko penemu aku, laban semina nya jalai kitai tau nemu berita tauka jako gerah enggau jampat. Lebih agi baka jako pesan, tauka jako ari perintah. Enti sema tak bisi jako gerah ari perintah ditabor ka ari radio sakumbang kitai ti ngulit tu, nama penyadi kitai enda nemu utai," ko Bujang. "Nadai perintah bengat ngerah kitai leboh ke ngulit tu deh," ko Biul. "Nya tadi penemu aku siko. Tang ni penemu dikedeka kitai maioh, nya meh dikena," ko Bujang. "penemu kitai sarumah tu tebal agi deka mai radio ngulit, nya alai enti nadai jako bukai, nya meh pemutus aum kitai tu. Nya alai berengkah ari pagila, radio kitai sarumah tu enda tau ditebah. Barang masang radio dalam kandang ulit tu kena tinggang adat. Nyadi pengelama ulit kitai sabulan," ko Enchaboh. "Nya baru ngena penemu. Nama bengat ketusah ka enda ninga utai ke ditabor ka sida ari radio," ko Ensama. Pulai nganjong antu nya, lalu ditanggam sida. JAKO GERAH ARI PERINTAH Sepuloh hari udah bekau ulit sida ditanggam, dia perintah bisi nabor ka jako gerah ari radio madah ka siko orang tutup lari ari rumah jail. Nya alai perintah nesau orang maioh enggau jako ngasoh sida sana ngadang, lalu merati ka orang ti enda tentu pendiau enggau orang ti enda temu penatai. Enti bisi tetemu ka orang bansa nya, perintah ngasoh madah ngagai Pulis enggau naka penyampat. Nyadi orang rumah bukai sama jaga ka diri empu laban udah ninga jako gerah perintah nya tadi. Tang sida di Rumah Enchaboh enda ninga, laban radio sida enda dipasang sakumbang ke ngulit nya. Tiga hari udah bekau jako gerah nya, dia bisi lelaki siko benong tengan umor niki rumah Enchaboh di Madu Midang. Iya ke niki nya maia orang mandi lemai.Samoa sida ke meda iya mansa di pendai sama enda ngelala iya. Leboh iya ke niki nya, Manang Ula benong tungging-tungging ba tengah ruai ngulr ka kerungan ngulih ka manok. Sereta iya malik ngagai pala tangga lalu tepeda ka orang nya niki. "Lalu Igat ! Dudok katas ka," ko Manang. Temuai nya lalu nudok ka diri ba kaki panggau. Manang Ula lalu tama ka bilik ngambi sarang insap. Enda lama pansut baru lalu nunga temuai nya. "Tak salah tanya aku tu Igat. Ari ni penatai nuan tu tadi nyau laun endar ?" ko Manang. "Aku tu tadi datai ari kubu dili din. Bisi dua tiga iko sida bukai sereta aku tu tadi, tang sida enda lalu kitu laban semina itong ka nganjong aku. Nya alai sida semina naka sungai ke dili din tadi. Laban sida enda tau laun pulai. Bisi orang bukai deka dianjong sida umu pagi pagila," ko temuai nya. Leboh seduai berandau, dia Ensama mansa nengah ruai pulai mandi. Lama iya merening temuai nya meda maioh endar pensil ba kandi baju. Tang iya enda dudok, lalu beguai-guai begari ngagai bilik sida empu ka setak. Tembu begari nya iya lalu bejalai ngagai ruai Manang Ula nunga temuai ke datai nya. Datai dia iya lalu nabi temuai nya ; "Good muning punggal," ko iya. Temuai nya enda nyaut, semina nyurong ka jari betabi. Udah nya temuai nya lalu nyurong ka insap ngagai Ensama. Pia nyambut, pia ga iya nilik chap segerit nya. "Em, segerit bansa lumor tiga. Bansa ke beli aku dalam bulan nyin suba, nya baru lumor satu," ko Ensama. "Nama bansa segerit nuan nya suba deh Igat ?" ko Manang Ula. "Segerit bansa Plis Gulip, nya baru nyamai endar," ko iya. Segerit Plis Gulip ko iya nya bansa Segerit Chap 'Players Gold Leaf'. Udah nya Manang Ula lalu nanya temuai nya. "Enda ngelala tu Igat, nya alai enggai laun nanya. Kati nuan ke datai ari ili nyin, nama kabuah ke mudik tu ?" ko iya. "Ngena nuan tumu nanya, aya. Laban aku ke mudik tu pan endang beguai endar, enda tau laun pulai," ko iya. "Nya meh Igat, meda nuan tak sikap endar enggau pensil enggau bup," ko tudah Manang. "Nyadi aku tu," ko iya "kerani ngumpol chukai enggau wang pupu orang ke jauh ari kubu. Neglamatu, di kubu din kami nerima wang bayar nya, tang ator baru digaga Perintah diatu, ngasoh kami ke kerani mudik ngagai rumah orang ke ngejang agi ari kubu, ngambika kita enda kiroh undor," ko iya. "Oh, orang perintah nuan tu kau Igat. Aku endang belaba tadi," ko Manang. "Enti udah makai lagi kitai begelumu ngagai ruai Tuai Rumah," ko Manang Ula. "Ngena nya," ko Ensama. Enda lama udah nya bini Manang Ula pan ngangau ka makai. Manang lalu mai temuai nya makai. "Makai nadai utai ka lauk," ko Manang, " Bubu aku tiga pagi tu udah nadai utai ulih. Enda nemu kabuah bubu nya tak nyau mamau. Ngelamatu enda muai ari dua tiga chapak sakali ngangkat," ko iya. Badu makai nya seduai lalu pansut ka ruai. Ensama mengkang dudok di ruai sakumbang seduai ke makai, laban iya enggai dibai Manang makai. Iya madah ka diri udah kenyang. udah nya sida tiga lalu bejalai ngagai ruai Tuai Rumah. Seninjik Enchaboh endang udah badu makai, endang udah pansut ka ruai. "Nya ruko kitai punggal," ko Enchaboh nyurong ka sarang insap ngagai temuai nya. Baru deka nanya ka pejalai temuai nya tudah Enchaboh, dia Manang Ula lalu madah ka temuai nya tadi kerani datai ari kubu deka ngumpol samoa chukai sereta enggau wang pupu. "Ngena endar meh enti sida kerani ngumpul pupu ka rumah kitu. Ngelamatu puas bendar undor, rugi tambang, rugi hari," ko Enchaboh. "Manah bendar ator Perintah baru tu, enda lebu udah merdeka," ko Manang Ula. "Nya lah. Enti nunda ka pemedis kami sebelah jalai sebelah perau, tak lembau bendar mudik. Tang laban gawa ka Perintah, nya alai barang ko ator iya. Enti kitai ngenggai ka diri, dianu iya ga," ko kerani nya. Manang Ula madah ka kerani nya beguai bendar, laban agi maioh rumah orang deka digagai. Nya alai ninga munyi nya, Enchaboh lalu nesau sida sarumah nya ngasoh sida mayar samoa chukai enggau pupu ke apin dibayar sida. Seninjik sida sarumah nya sama bisi belanja laban apin lama udah nyual nyelutong. Nya alai sida sama bebayar magang. Semina Bujang enda mayar, laban apin bisi belanja kenu ko iya nganu kerani nya. Tang kerani madah ka enda iboh ga enti apin bisi belanja. Barang maia bisi, nya ga maia mayar tang enda tau kelalu laun enggai ka diukom Perintah. Taja Bujang apin enggau sida mayar pupu leboh nya, tang iya bejako enggau kerani nya nanya ka risit sida ke udah bebayar nya tadi. Nyadi ko kerani ; "Pasal risit enda iboh disua ka ditu. leboh aku pulai ka kubu ila, dia aku masok ka samoa kira-kira tu dalam bup besai, nya baru bekirum ka risit ngagai kita sarumah tu," ko kerani nya nyaut Bujang. "Ngena meh nya kerani, kiroh ga nuan nulis ka risit ngemaioh nya malam tu," ko Manang Ula. "Kita orang Perintah ni deka ngakal," ko iya. "Nadai tau ngakal deh aya. Sasen pan duit perintah enda meh tau dikena kitai," ko kerani nya. Udah nyambut samoa duit bayar nya, kerani lalu madah ka diri angkat mulai ka diri ngagai ruai Manang Ula, laban deka tindok udah lelak sahari nya. Sida bukai pan sama mulai ka diri ngagai ruai diri empu. Samina Bujang agi dudok enggau Enchaboh dia. Leboh sida bukai udah angkat magang, dia Bujang bejako begadai enggau Enchaboh. Nyadi ko iya ; "Nyelai endar gaia pengawa kerani nya tadi peda aku. Salamatu enti orang perintah nerima chukai kitai endang lalu disua ka iya risit tekala nya. Enggi iya tu tau betanggoh, ari nya ati aku sangka bendar ka iya tu ngakal. Kada enda ukai kerani Perintah iya tu tadi," ko Bujang. "Enda iya ngakal dah. Nadai orang perintah kala ngakal salamatu," ko Enchaboh nganu Bujang. Ninga Enchaboh madah ka orang perintah nadai kala ngakal, Bujang pan enda nampong jako nya agi. Iya lalu mulai ka diri ke setak. Enchaboh pan lalu tindok ka bilik. Pagi siti kerani nya tumu angkat laban beguai ngagai rumah orang bukai deka ngumpol chukai. Pagi nya Ensama bejalai ngagai ruai Biul. Datai dia lalu ngenang Bujang ke enda mayar pupu ke kerani ke mudik nya. "Ka ngemintar kadiri. Ila asai iya disaman Perintah," ko Biul. TUNGKAT PERINTAH Udah ulit sida diketas, nya baru sida sarumah nya tau nebah radio baka selama. Tiga lemai udah bekau ke ngetas ulit nya, dia perintah ngeluar ka jako gerah ari radio ngasoh orang mayar pupu enggau chukai. Tu munyi jako gerah nya ; "Samoa orang ke apin mayar pupu enda tau enda mayar dalam timpoh saminggu berengkah ari jako gerah nya udah ditabor ka perintah. Barang enda mayar pupu diri dalam kandang timpoh nya tentu kena saman Perintah." "Saman meh barang orang ke apin mayar. Kami tu udah magang," ko Ensama nimbal jako gerah ari radio nya. "Nya baru Bujang nemu diri ila, disaman perintah," ko Biul. "Kati alai perintah agi ngerah kitai tu ? Nama kitai sarumah tu udah bebayar magang deh ?" ko Manang Ula bejako enggau Ensingut. "Orang ke gawa ba radio nya lungau. Semadi sida ke nadai pengawa," ko Ensingut. Udah nya iya lalu gisai-gisai begaru ka selepak pah. "Enti siang hari, sida ke ba radio nya ukai bisi pengawa. Semina malam sida ke bisi utai dikereja. Indah nya deh semina bejako aja," ko Ensingut ga nganu Manang Ula. "Ni ko nuan Jang ? Nama kabuah radio ngerah kitai tu ?" ko Ensingut nguing ngagai Bujang. "Ukai nya semina ngerah kitai serumah tu aja. Jako nya dituju ka perintah ngagai samoa orang ke apin bebayar, lalu samoa ke bisi radio ninga jako nya magang," ko Bujang. Sida sarumah nya udah bebayar magang ba kerani ke mudik apin lala. Semina Bujang apin mayar, nya alai duit pupu lalu dikirum ka iya ngagai Engkaul di Dilah Tanah, laban nama sida agi masok dalam Rumah Engkaul. Sida ke pindah nya endang nadai madah ngagai Perintah. Seninjik sida Engkaul pan apin mayar, nya alai pupu Bujang nya lalu dianjong iya nyereta enggi sida sarumah. Sapuloh hari udah bekau perintah ke ngerah nya, dia tungkat Perintah datai nuntong Enchaboh di Madu Midang. Nyadi tungkat perintah nya udah mansa Rumah Engkaul di Dilah Tanah. Tungkat Perintah nya endang dituju ka kia laban enda nemu sida udah angkat ari rumah nya. Tungkat nya ditikal ka Engkaul ka Kubu, sereta lalu madah ka sida ti kena panggil nya udah mindah ngagai menoa Madu Midang. Sereta tungkat nya datai ba Enchaboh lalu disua ka iya ngagai Ensama. "Peda punggal. Nama jako perintah dia kini ?" ko iya. "Nyangka ngasoh kitai ngaga rumah tegap agi," ko Biul. Ensama lalu macha jako dia, tang iya enda inggar. Semina mulut aja kimut-kimut. "Nama berita perintah Igat ?" ko Manang Ula. "Tungkat perintah ngasoh seduai punggal Enchaboh undor lengkas," ko Ensama. "Kada enda surat perintah nagih Bujang ke apin mayar pupu suba," ko Ensingut. "Nadai nyebut pasal pupu. Kita ni nemu jako dia. Tungkat ditulis orang ngena jako orang Putih," ko Ensama nganu sida Ensingut. "Agi lanchar endar punggal macha jako orang Putih. Tak bejerimut mulut iya," ko tudah Biul. "Ni tau kabat-kabat. Utai endang lama udah temu. Mar agi macha jako kitai," ko iya. "Engka meh. Meda lama udah nadai bechis-wis," ko Biul. "Rindu endar ninga orang bejako orang Putih, enti sema agi biak baka menya, enggai aku enda belajar," ko tudah Manang Ula. "Ni ulih berampas belajar ka surat. Aku baka ka mudah peda kita, laban pengingat enggau pengerawang ati ke dikena aku endang utai digenggam diri empu," ko Ensama. "Nadai nya ulih kira dah. Undor meh seduai pagila," ko iya nganu Manang Ula seduai Enchaboh. UNDOR KA TUNGKAT PERINTAH Pagi siti Enchaboh seduai Manang Ula pan undor. Sereta sangkai ba pengkalan Perintah seduai lalu beguai-guai niki ka Kubu laban enggai ka opis ditutop, laban jam orang ke gawa nyau chukop. Datai di Kubu, Enchaboh lalu nyua ka tungkat panggil nya ngagai Kunsil. Iya lalu nanya ka kabuah seduai kena panggil. "Surat tu manggil samoa kita sarumah, laban kita apin mayar pupu enggau chukai taun tu. Samoa orang rumah bukai udah magang bebayar, semina kita sarumah apin," ko Kunsil. Baru ka bejako tudah Enchaboh, dia Manang Ula lalu nyaut Kunsil madah ka samoa sida sarumah udah magang bebayar. "Dini alai kita bebayar deh ?" ko Kunsil. "Bebayar ba kerani kita di Kubu tu leboh iya ke mudik ngumpol chukai ngagai rumah kami suba," ko Manang Ula. "Kemaia kerani nya mudik ?" ko Kunsil. "Apin lama udah. Kira dua minggu tu udah," ko Enchaboh. "Bisi seduai meda kerani nya di kubu tu diatu ? ko Kunsil. Seduai lalu malik ngagaisiko, malik ngagai siko. Nadai ga tepeda ka kerani ke ngumpol chukai ngagai rumah sida. "Nadai iya dipeda ditu. Bisi kerani bukaike enda bekereja sharitu Kunsil ?" ko Enchaboh nanya Kunsil. "Tu meh samoa kerani Perintah ke di Kubu tu," ko Kunsil. "Ninga kerani nya madah ka diri ngumpol pupu kulu ka diasoh kita ari kubu tu ko iya nganu kami," ko Enchaboh. Ninga munyi nya Kunsil lalu ingat ka orang tutup ke lari ari rumah jail. "Kati, bisi kita ninga jako gerah ditabor ka ari radio dalam bulan dulu nyin kamari ?" ko Kunsil nya nanya seduai iya. "Jako gerah nama nya?" ko Manang Ula. "Jako gerah nya suba madah ka orang tutup ke lari ari rumah jail, lalu jako nya ngasoh orang sama jaga-jaga kediri empu enggai ka kena akal orang nya," ko Kunsil. "Jako nya mega ngasoh madah ka pulis sakalika sabarang orang Perintah, enti sema bisi tepeda ka orang ke enda tentu pendiau," ko Kunsil. "Nadai kami ninga gerah nya. Kami sarumah bisi sabulan tu udah enda nebah radio laban ngulit ka niang Bini Ensingut," ko Manang Ula. "Kati gamal orang ke ngumpol chukai ngagai kita nya suba?" ko Kunsil. "Tuboh iya jelan peninggi, mata iya muak ari kiba chilek-chilek mimit," ko Enchaboh. "Tentu nya orang tutup ke lari ari jail suba," ko Kunsil. "Uji seduai madah ngagai pulis ngambi ka sida ngayan ka gambar orang tutup ke lari nya suba," ko Kunsil nganu seduai. Seduai lalu mansang ngagai pulis, sereta lalu nusoi berita nya. Pulis lalu mandang ka gambar orang tutup ke lari nya ngagai seduai. Apin tentu merening bendar Manang Ula, endor iya bejako madah ka gamal orang ke ngumpol chukai ngagai rumah sida di Madu Midang sabaka bendar enggau gamal orang ti ba gambar nya. "Iya meh tu ! Isi iya tu ! Nadai alai ngiga agi," ko Enchaboh. "Kapa nyebut," ko Manang Ula. Ninga munyi nya pulis lalu mansik pekara nya enggau silik, lalu ngambi samoa jako seduai ke nusoi berita nya. Tembu nya pulis lali mai pekara nya ngagai Kunsil baru. Nya baru Kunsil terang bendar nemu orang ke kerani ko seduai nya tadi. "Orang tutup ke lari suba meh ke ngumpol chukai ngagai rumah kita ko seduai nya," ko Kunsil malik ngagai Manang Ula. "Tulah iya ila ! Kati ko duit kami nya deh Kunsil ?" ko iya. "Lalu lenyau meh duit kita nya. Sema ulih pan iya ditangkap ila, nadai meh duit kita nya agi," ko Kunsil. "Tusah endar laban orang tutup nya deh. Enti radio enda dipenti kitai leboh ke ngulit suba, enda kitai ulih akal orang tutup nya. Tang laban kitai enda ninga jako gerah perintah, nya alai kitai enda nemu utai," ko Manang Ula bejako enggau Enchaboh. Enchaboh enda nyaut, mina demuoh aja. "Salah endar radio dibai ngulit," Ko Manang. Nyau ka ngutok-ngutok Enchaboh ga ati iya din. "Kati ko kami tu deh Kunsil, agi bebayar baru ?" ko Manang Ula. "Nadai deka mayar chukai dua kali," ko Enchaboh. "Ni tau enda dibayar. Duit kita ga nadai udah diterima Perintah. Enti kita enda mayar dalam minggu tu, Perintah nyaman kita. Tusah agi kita ila," ko Kunsil. Manang Ula seduai Enchaboh lalu sama enda bemunyi agi. Enda lama udah nya Enchaboh lalu madah ka diri deka angkat. "Anang guai dulu. Aku agi bisi utai kejako ka enggau seduai," ko Kunsil. "Anang lama Kunsil. kami duai beguai deka mulai ka diri," ko Manang Ula. "Kati alai sida bukai, baka Tuai Rumah Engkaul ke megai kita di Dilah Tanah enda sama enggau seduai undor deh ?" Ko Kunsil. Lama seduai sama enda bemunyi. Udah nya baru Enchaboh bejako. "Suba amat kami sabuat begulai pendiau. Tang diatu kami udah beserara," ko Enchaboh. Dini alai pendiau kita diatu deh ?" ko Kunsil nanya Enchaboh. "Eh, Ah. Din ba menoa ke nadai orang di Madu Midang din," ko Enchaboh. "Sapa ngator kita ke pindah deh," ko Kunsil. "Em ! Nadai ga orang tentu ngator. Tak ngator diri empu. Meda menoa puang, nya alai kami pindah kin ka," ko Enchaboh. "Salah endar kita pindah ngapa nadai terang ari Perintah. kadua agi menoa di Madu Midang nya kampong galau Perintah, nya alai orang enda tau pindah kia," ko Kunsil. "Kati alai tak samoa kampong diambi Perintah magang deh ? Meda Perintah nadai kala bumai. Kapa ngalau kampong ngapa deh ?" ko Manang Ula "Kabuah Perintah ngalau kampong bekanya, enggai ka menoa tu jampat kusi. Kadua agi ngambi ka bisi alai muka pengawa pemansang ka orang di menoa ulu jemah ila," ko Kunsil. "Kita ke di Kubu tu tak peneka ngaga adat, nadai berunding enggau kami ke empu menoa," ko Manang Ula. Nyau inggar jako iya. Jari dikitau ka iya ba moa Kunsil. "Anang udu ngitau ka jari nuan aya, enggai ka ai dawat aku abis siuh lagi," ko Kunsil nganu Manang Ula. KENA DAWA PERINTAH Agi deka bejako Enchaboh, tang Kunsil lalu mai seduai ngagai mija orang ke gawa ka Opis Kampong. Dia Kunsil lalu ngasoh kerani Opis Kampong nya mansik pasal sida ke pindah nya. Kunsil mulai ka diri ngagai mija iya empu. Kerani nya lalu berandau enggau seduai. Nyau kalama, nya baru terang bendar nemu sida ke pindah ngagai Madu Midang nya ngati ka diri, ngalah ka kampong galau Perintah. Nya alai ari nya, samoa sida Enchaboh sarumah kena saman ketegal penyalah nya. Timpoh sida bechara empat hari berengkah ari hari saman nya dikeluar ka kerani nya tadi. Enchaboh seduai Manang Ula lalu disua ka iya saman siti siko. Nyadi Manang Ula ditan ka Perintah di Kubu nya nyadi ka jamin sida sarumah nganti ke bechara. Enchaboh pulai ka rumah lalu disempulang pulis siko ke nganjong saman ngagai sida kulu kin. "Salah endar Perintah nan ka aku bakatu, Apai Endu. Patut nuan ditan ka sida. Nuan ga tuai kitai," ko Manang Ula nganu Enchaboh. Lilih ai mata iya sinu ka diri empu kena tan ka Perintah. "Ti baka tulang agi biak menya, udah mija Kunsil nya ditumpu aku," ko iya bechakap kadiri. Ngenjing kerik-kerik ngeli iya. Manang Ula tinggal di Kubu. Enchaboh seduai pulis nya mudik. Nyau lemai hari nya baru seduai datai ba rumah sida iya di Madu Midang di ulu din. BERITA PULAI UNDOR Udah makai lemai nya Enchaboh ngelumu ka sida sarumah ngagai ruai iya. Udah sida sampal datai dia, iya lalu nusoi berita. "Berita kami duai Aya Manang ke undor kena panggil Perintah tu kamari enda mujor bendar. Laban kami duai ke undor tu kamari enda nemu utai ke dikundor ka diri. Jako dalam tungkat panggil nya kenu ko punggal Ensama, nadai madah ka kabuah ngasoh undor. Semina madah ka kabuah nya berat. Nya alai kami duai enda nyadang utai tu pulai ka penusah. Semadi nyau datai di Kubu din, nya baru nemu kabuah diri ke kena panggil," ko Enchaboh. "Nama jako dalam surat panggil nya kamari deh ?" ko Biul. "Jako dia dibacha Kunsil ka kami duai Aya Manang kamari terang bendar manggil kitai sarumah tu, laban pupu ke dibayar kitai suba nadai datai di Kubu din," pia ko Enchaboh. "Meda punggal Ensama enggai madah ka kabuah ke bendar leboh iya macha tungkat nya suba," ko Ensingut. "Nadai jako nyemetak munyi ko Enchaboh nya. Nya sigi jako ditambah ka sida di Kubu din. Ukai aku enda nemu macha. Anang ka jako ke ngemudah nya, indah jako orang Putih ke mar deh temu aku. Pejam ka mata, nemu meh aku macha utai ke ngemudah nya," ko Ensama. Udah nya iya lalu nyabut pintin pin ke dikait ka iya ba kandi baju, lalu ngaga diri deka nulis ka utai ba chebik keretas. Meda pintin pin nadai ai dawat, iya lalu ngeransi mut-mut bejako kadiri. "No beladis budo pintin pin bansa Pilut tu," ko iya. "Leboh aku undor ka pasar taun dulu kamari, maioh endar pintin pin bansa nya dijual China ba kaki lima," ko Biul. "Ni orang bisi nyual pintin pin bansa Pilut ba kedai dili dia. Kita ukai nemu utai," ko Ensama nyaut Biul. "Anang guai limpang kabukai ka jako. Lagi baru jerita bukai enggai ka utai ke deka dikerandau ka tu lalu nadai pengujong," ko Bujang. "Pajak ka berita nuan nya tadi, Aya," ko iya nganu Enchaboh. Nya baru Enchaboh bejako baru. "Kitai sarumah tu ditagih Perintah. Nyadi chukai enggau pupu ke dibayar kitai ba kerani ke mudik suba nadai datai ba Kubu din," ko Enchaboh. "Dini alai kerani nyimpan duit kitai nya suba deh, diempa iya wang nya ?" ko Ensingut. "Orang nya suba kenu ko Kunsil, ukai kerani. Nadai sida ari Kubu nyin ngasoh kerani ngumpol pupu ngagai kitai kitu," ko Enchaboh. "Meda kita ngumbai iya kerani ga meh ?" ko Biul. "Iya ga madah ka diri kerani. Sapa kitai nemu nya ukai," ko Enchaboh."Orang tutup lari ari rumah jail iya nya kenu ko Kunsil. Tu Igat pulis tu nemu," ko Enchaboh nunjok ka pulis ke nyereta iya pulai ari Kubu. "Amat jako Tuai tu. Pupu kita nya endang nadai udah datai di Kubu din. Tentu udah ditaban ka orang tutup ke lari nya suba. Nya alai kita enda tau enda bebayar baru," ko pulis nya. Ninga munyi nya lalu angkat Ensama ngedar ka jari."Begah-begah endar orang ke ngumpol pupu nya suba kau. Ila asai iya, enti iya temu. Anang enda ngumbai idong iya enda siming !" ko iya. "Nya lah punggal. Sepring duabelas nuan pasang, enti sema betemu enggau iya nya ila. Nya baru iya ensepi asai diri," ko Ensingut. Iya lalu singut-singut. Pia ga begaru ka selepak pah. "Tusah endar kitai tu bebayar dua kali. Nyau dabal dua kali," ko Biul. "lapa Aya Manang ensa asoh bejawap enggau Kunsil di Kubu din kamari deh ?" ko iya nganu Enchaboh. "Ni ulih dijawab. Indah iya deh ditan ka Perintah di Kubu din," ko Enchaboh. "Lapa Perintah nan ka iya deh ?" ko Ini Ensingut. "Bini iya enda dapat nya dia. Nya alai iya nadai enggau kitai begulu ditu," ko iya nganu Enchaboh. "Kati alai bakanya deh ?" ko Biul. "Kati ko enda bakanya. Kasatu kitai kena tinggang penusah mati. Kadua dikelakar orang tutup. Katiga disaman perintah," ko Enchaboh. "Nama kabuah Perintah nyaman kitai tu ? Ka ngumbai kitai tu enchuri, nadai ga. Ngelakar Perintah, enda ga. Ka ngumbai sida ke di Kubu din takut dialah ka kitai tu ba pengawa, nadai ga diri tu ati nya," ko Ensama. "Orang Perintah endang tak peneka ati ngaga adat," ko iya. Lalu gilik ka iya pala dia. "Tusah ! Tusah !" ko iya. "Enti sema kitai ninga jako gerah Perintah nya suba, enda kitai tu kena akal orang tutup nya," ko Bini Enchaboh. "Aku endang madah ka kitai tentu enda nemu berita, lebih agi baka jako gerah enti radio dibai ngulit. Tang Perintah nadai ngerah leboh kitai ngulit ko penemu kita maioh leboh kitai ke berunding ka ulit suba," ko Bujang. "Ukai enda tu utai ke dijangka aku," ko iya nganu sida maioh iya dia. Sida sama 'betekuley'. Siko malik ngagai siko, siko malik ngagai siko, baka orang ke enda ampit piring gamal sida sabuat. SAMAN Lama sida sama enda bemunyi. Udah nya baru Enchaboh bejako baru. "Aya Manang tu enda pansut ngapa enti kitai tu apin bechara," ko iya. "Nama utai dipechara ka deh, enti kitai deka bebayar baru ?" Ko Ensingut. "Iya ke ditan ke Perintah nya ukai pasal pupu kitai ke apin datai di Kubu din. Kabuah iya kena tan nyadi ka jamin kitai sarumah tu. Kitai disaman laban kitai pindah ngagai Madu Midang tu enda terang ari Perintah," ko Enchaboh. "Menoa tu puang. Nama penyalah kitai pindah kitu ka deh ?" ko Ensama. "Menoa tu kenu ko Kunsil, kampong galau Perintah, nya alai enda tau alai pindah. Nya kabuah Perintah nyaman kitai, lalu bechara dalam timpoh lima hari berengkah ari kamari," ko Enchaboh. Ninga Tuai Rumah udah nyebut saman nya, dia pulis nya lalu mantai ka saman ke dibai iya. "Aku diasoh Perintah nganjong saman tu ngagai kita, lalu samoa kita ke disaman tu enda tau enda undor ka Kubu dalam empat hari tu, laban Tuan DO ke bechara ka kita datai ba Kubu di ili dia besenutok enggau timpoh saman kita tu," ko pulis nya. Ninga munyi nya Ensama lalu ngedar ka jari. "Kita Perintah tu endang nadai pengawa bukai ! Ati besaman ka orang ! Sepi asai kita ila !" ko iya. "Ukai bakanya. Aku ke nganjong saman tu nitih ka ukom Perintah. Enti aku enggai nitih ka ator, aku tentu kena anu orang," ko tudah pulis nya. "Wai yu biri prot!," ko Ensama ngitau ka jari ngagai moa pulis. "Lapa deh. Nya punggal udah ka. Nadai ga tunga orang Perintah," ko Biul. Pulis nya enda bemunyi, semina nyua ka saman nya ngagai sida siko-siko. Enggi Ensama lama diteju ka iya melapui ba tengah tikai dia. Udah nya Enchaboh bejako baru. "Enda ulih kenggai ka meh adat Perintah. Nya alai abis timpoh tu kitai sama undor laban pechara tu enda ulih sangkong aku siko," ko iya. Tembu jako nya sida lalu mulai ka diri ngagai ruai diri empu. Pagi siti pulis ke nganjong saman nya pan pulai kili. Sereta pulis nya udah ngelebus, nya baru Enchaboh ngabas bini Manang ke sakit. Bini Manang nya pan baru nemu Enchaboh udah pulai, laban sida nadai ngabas iya sakumbang pulis ke dia. "Ni aya dek deh Apai Endu ?" ko bini Manang. "Iya tu kamari apin pulai, agi ditan ka orang begama di ili din. tak bekelengkui magang sida ke din," ko Enchaboh ngelalai ka Manang Ula ke ditan ka Perintah. "Pama ga enti iya nemu meli rumpong pulai ila, ngicha ka nyawa tu masok makai," ko tudah bini Manang. "Lapa iya enda nemu," ko Enchaboh. Udah nya iya madah ka diri angkat, laban iya enggai ka bini Manang nya agi itok nanya ka berita Manang ke apin pulai. BECHARA Chukop timpoh, sida sarumah pan undor. Pukol semilan pagi siti bala Enchaboh sereta enggau iya empu tama kadalam balai pechara. Sida lalu diasoh pulis ke jaga dia dudok ba bangku nganti Kunsil datai. Enda lama udah nya Kunsil pan tama. Sereta dudok ba kerusi pechara nya, dia Kunsil lalu ngasoh sida bediri ba pagar ke endang alai orang ke kena dawa bediri leboh bechara. Udah bala sida sama bediri dia, nya baru Kunsil macha leka dawa nya. Tu munyi leka dawa nya ; "Kita lima bulan udah, kita sarumah angkat ari menoa Dilah Tanah lalu pindah ngagai kampong galau perintah di Madu Midang. Kita tu pindah nya nadai bulih pemendar ari perintah. Nya alai tegal nya bala kita ngelanggar Undang-undang Kampong Galau." Tembu macha leka dawa nya, dia Kunsil lalu nanya sida siko-siko, sakalika sida ngaku penyalah nya tauka enda. Samoa sida bukai ngaku magang, semina Biul seduai Ensama enggai ngaku. Samoa sida bukai ke ngaku nya lalu diukom. Sida ke anembiakkena ukom dua puluh lima ringgit siko-siko. Tuai Rumah Enchaboh kena ukom lima puloh ringgit. Samoa sida diasoh mayar ukom nya dalam timpoh dua puloh satu hari. Enti enda dibayar dalam timpoh nya, sida ditutup sabulan siko. "Puas endar kena tutup tu ila. Patut Biul ngari ka aku kena tutup enti sema enda tegiga ka duit kena mayar ukom tu ila" ko tudah Manang Ula. "Aku ga udah jamin kitai sarumah tu sakumbang ke nganti bechara tu" ko iya nganu Enchaboh. "Pia meh enti iya deka," ko Enchaboh nyaut iya. Kunsil lalu ngeletak ukom ngasoh sida angkat ari menoa Madu Midang. Tang Enchaboh minta kasih ngagai Kunsil, agi minta diau dia sataun laban sida udah belaboh bumai. Leboh nya baru udah tembu nasau. Ninga munyi nya Kunsil meri sida timpoh sataun. Udah badu ngetau taun nya sida enda tau enda angkat. ENSAMA SEDUAI BIUL AGI BECHARA Nyadi ko Kunsil : "Seduai enda ngaku penyalah nya tadi, nya alai ari nya seduai agi bechara. Samoa kita sarumah ngaku dawa tu, tang nama kabuah seduai enggai ngaku ?" ko Kunsil nanya seduai. "Sida tu badu enda meh. Sida ga enda nemu reti utai," ko Ensama. "Ti kami duai punggal tu, biar tulang burak, enda meh ngaku," ko iya. "Menoa madu Midang ke alai kita pindah nya udah disimpan perintah, nya alai nadai orang tau diau dia enti nadai pemendar ari perintah," ko Kunsil. "Nadai guna perintah besimpan ka tanah kami ke endang empu menoa tu, enti enda dulu minta ari kami ke asal menoa tu," ko Ensama ngering diri ngelaban Kunsil. Nyau bebandir urat rekong iya bai bejako. "Anang ka kami duai deka angkat ari nya, agi ngiga orang bukai keba, ngambi ka nambah kami ke endang udah dia," ko iya. Sereta abis jako Ensama nya, dia Biul lalu bejako. "Adat perintah endang nyelai bendar, tak peneka ati enggau babas enggau tanah orang asal menoa tu. Nya baka sida ke di ili dia, nadai sida nemu kampong ke ari belakang rumah sida udah diambi Kompeni Sumil alai ngereja kayu. Bisi perintah berunding enggau sida dulu leboh ke apin ngemendar ka kampong nya pulai ka Kompani Sumil ?" ko Biul nunjok ka jari ngagai Kunsil. "Amat nya," ko Ensama. "Kami ke endang mangkang menoa tu, lebih agi baka sida ke semak kampong nya, anang ka tau ngambi kayu ka dijual, indah ngambi kayu kena berapi deh enda tau. Kati alai adat perintah bengat ngenunsang nya ?" ko iya ngedar ka jari. "Pasal ke ngaga adat Kampong nya ukai tanggong aku. Uyai nya tanggong Menteri Opis Kampong. Nyadi kami ke gawa ba perintah tu semina bejalai ka adat ke udah digaga perintah. Nya alai adat ke dikena aku mutus ka pechara tu nitih ka Undang-undang ke udah digaga perintah. Nya alai seduai sama kena ukom. Tang apin aku ngeletak penyampau ukom tu, ak dulu nanya sakalika seduai agi bisi jako tauka nadai ?" ko Kunsil. "Kati punggal ? Agi bisi utai apin disebut nuan ?" ko Ensama nganu Biul. "Nadai jako bukai dah. Nya meh jako, enggai ngasoh perintah nyimpan kampong kitai nya," ko Biul. "Enti seduai nadai jako agi, aku mutus ka pechara tu," ko Kunsil. "Putus ka dia meh Kunsil," ko Biul. "Nyadi kampong di Madu Midang nya endang lama udah disimpan perintah. Kunsilor ke megai ward kita di menoa nya endang udah nemu ator nya. Nya alai nadai kabuah kita enda nemu, enti iya bisi madah ka reti utai nya ngagai kita," ko Kunsil. "Nadai kala meda mata Kunsilor nya kami sarumah di Madu Midang nyin, Kunsil. Endang nadai kala nusoi reti ator enggau adat perintah iya nya sakumbang ke udah kena pilih suba," ko Biul. "Ni bisi ari iya bejalai ka pengawa kunsilor nya, semina kiroh laban perau lampu di pengkalan," ko Ensama. "Nya alai aku enggai enggau kita ngundi iya nya suba, tang kita ke keras ngundi iya, laban kita ngulih ka iya deka meri arak," ko Biul nguing ngagai Ensama. "Enda nya ulih petalat ka seduai pasal kunsilor nya deh. Nya ga endang udah dipilih kita ke dalam ward nya," ko Kunsil nganu seduai. "Nyau limpang jako chara tu laban seduai ke bebelit ka kunsilor nya. Nya alai pulai kia ka baru. Sduai sama salah baka sida bukai kamari. Tang laban seduai ingkar, nya alai ukom seduai berat agi ari enggi sida bukai," ko Kunsil nganu seduai. "Seduai kena ukom empat puloh ringgit siko-siko. Ukom tu enda tau enda dibayar dalam timpoh tiga minggu berengkah ari saharitu. Enti sema seduai enda mayar ukom tu dalam timpoh nya, seduai kena tutup dua bulan siko," ko Kunsil mutus ka pechara nya. Ninga munyi nya Ensama lalu narit jari Biul mai iya pansut ari balai pechara nya. Sereta seduai pansut ari kubu nya, dia Biul bejako enggau Ensama. "Tusah endar enti tua tak ditutup perintah ila," ko iya. "Nadai kitai deka ditutup. Orang perintah endang lawa endar. Ba asai enti sema sida agi mudik ngagai rumah kitai kulu kin. Anang ngumbai sida enda ensepiutai ke angat. Beri utai ke enda dipeda enggau Kunsil ke ngenyai nya," ko Ensama. "Anang pia unggal. Enda nyadi semaia tua ke deka pereman nginti ngagai sungai Apong enti tua ditutup perintah ila," ko Biul. "Sida bukai ga udah nyanggup mayar ukom, nya alai ngena tua nitih ka sida," ko iya. "Nama utai kena mayar nya !" ko Ensama. "Eh, babi ke diambu indai nuan nya jual tua. Ila aku nyual manok tambat aku ke di rumah din," ko tudah Biul. Sida bukai ke dulu tembu pechara, udah mudik pagi nya. Seduai lama bendar kalat-kalat ngiga perau. Nyau kelama, nya baru bulih nginjau perau orang di pasar nya. Datai di rumah, Ensama lalu nganu Manang Ula. Kabuah iya nganu, seduai iya alah bechara ko penemu iya laban sida bukai udah ngaku diri salah dulu. "Kati ko enda ngaku salah, enti utai endang amat salah," ko tudah Manang Ula.Timpoh Kunsil nyau semak. Nya alai sida sarumah sama kenanas begiga ka duit kena ngisi ukom nya takut ka ditutup perintah. Ensama lama endar ngumbok indai iya mai nyual babi sida. Biul nitik ai mata berunding ka manok tambat iya dijual. Ka enda nyual manok nya laban takut ka ditutup perintah. Duit sama udah bisi kena mayar ukom, nya alai Enchaboh lalu undor nganjong wang ukom nya ngagai Kunsil. BEKULI DI NENGERI Ngeransi ka diri udah kena ukom, ari nya Ensama berunding mai sida Biul, Ensingut, Manang Ula enggau sekeda sida bukai ngiga pengawa ka nengeri. Biul lalu madah ka diri deka. Tang Manang Ula lalu apin mutus ka runding. "Nuan, Igat," ko iya nganu Ensama, "badu enda nyamai meh. Nuan ga nemu surat. Nuan tentu enda pedis ngiga pengawa. Tang baka diri tu, nama pengawa ke ulih kereja di nengeri," ko iya. "Eh !, nama ketusah ka nya. Barang pengawa meh," ko Biul. "Nadai nya apa. Ukai baka ke bisi mai bini," ko Ensingut. Ninga sida sama bela keras, nya baru Manang Ula deka enggau sida. kasih ka sida anembiak bejalai kadiri kenu ko iya nganu sida. Nya alai sida sabuat lalu ngaga bekal. Tuai Rumah Enchaboh pan enda ga nan ka sida, laban nemu sida udah suntok bendar belanja bekau bebayar ka ukom. Tasau lalu dilengka ka sida iya. Sida pan nurun. Hari benong salah kelala, sida pan sangkai ba pengkalan di pasar. Sida sabuat lalu berumban ngaga langkau kajang ba tisi pengkalan China nya, laban orang di pasar nya nadai teleba sida. Sakumbang sida bukai ngaga langkau dia, Ensama niki ka pasar nanya towkay nyangka bisi deka alai sida diau. Ninga Ensama madah ka diri datai ari ulu, sida towkay lalu nanya iya. "Misi mawa jelutong kah?" ko towkay nanya iya. Ensama madah ka diri nadai mai nyelutong. Iya madah ka diri deka bekuli. Ninga sida nadai mai utai dijual, dia towkay enggai alai sida diau. Ensama mulai ka diri ngagai sida ke ngaga langkau. "Bisi China deka alai diau malam tu punggal ?" ko Biul nanya iya. "Hes ! Jai mati China ditu ! Nadai deka alai diau. Sida apin nemu aku," ko iya. "Ditu meh kitai sabuat nat ka diri ba langkau tu semalam tu," ko Ensama nganu sida. Pagi siti udah sida makai, dia bala sida sabuat lalu dibai Ensama bejalai di pasar ngiga kereja. Samoa towkay ke ditanya sida di pasar nya sama madah ka nadai pengawa. Ensepi diri enda tulih ka pengawa di pasar nya, sida sabuat lalu berunding deka mansang ngagai pasar di Nanga Loba Alit. Penyauh pasar di Nanga Loba Alit ari pasar sida di Madu Midang nya kira pejalai muto sahari. Bala sida lalu betanya pangan diri, nyangka bisi enda chukop duit ka tambang. Sida bukai bisi magang, mina tudah Biul enda chukop belanja. Nya alai meda iya nadai belanja, ari nya Ensama mai sida nyual perau Enchaboh ke dikena sida undor nya. "Kati ko nyual nya ari belakang Igat Enchaboh?" ko tudah Manang Ula. "Aku enggai di anu iya ila," ko iya. "Nadai iya nganu dah. Enti iya nanya ila, padah ka udah dichuri orang," ko Ensama. "Ngena nya punggal. Enti enda nyual perau nya, enda aku nyadi enggau kita, nadai belanja," ko Biul. Nya alai perau Enchaboh nya lalu dijual sida. Rega iya lalu dibagi sida bela. Udah nya sida lalu nanya ka muto ke bejalai ngagai pasar Nanga Loba Alit. Seninjik muto bisi kin ka sahari nya, nya alai sida lalu nepan dia. Datai di tasik, sida sabuat sama betekuak mutah, mabok gelumbang, laban sama nadai kala ka tasik. "Akai rai ! Enda kala medis tu. Enti nemu utai ngemedis tu, kapa aku enggau kita," ko tudah Manang Ula. "Kami asai nya meh, sama nadai kala ka tasik ka kitai tu," ko Biul. Dia sida nyau bechakah enggau diri sama diri. Sahari-hari nya sida di tasik. Nyau ngalih hari nya baru tama Sungai Loba Alit. Pasar nya enda jauh ari nanga, nya alai enda lama udah nya muto pan sangkai. MANDOR JALAI RAYA Sereta muto sangkai, peda datai orangsiko betanchut pandak burak, besetukin palat, jari ngepit surat. Orang nya kayo-kayo ba penyangkai muto. Sereta sida niki, iya lalu nanya. "Ari ni penatai kita tu deh ?" ko orang nya. "Datai ari Madu Midang," ko Ensama. "Kini ka pemansang kita tak maioh-maioh bakatu deh ? ko orang nya. "Mansang ngiga pengawa ka nengeri," ko Biul ngelampat jako Ensama. "Seninjik bendar aku betemu enggau kita ditu. Aku tu endang ngiga kuli. Kamari udah ga aku bulih, tang apin chukop. Nya alai ngena bendar enti kita nitih ka aku," ko iya nganu sida. "Mujur bendar kitai betemu enggau Igat tu, baka ke nemu kitai datai ga iya," ko Manang Ula. Bala sida Ensama lalu di ulu ka orang nya ngagai kedai China di pasar nya. Laban bisi sapintu kedai ba pasar nya endang selalu alai Iban diau. Datai dia sida lalu berandau baru. "Salah tanya tu dinga nuan Igat. ka enda nanya laban enda ngelala. Kati ko nuan tu endang orang di pasar tu ?" ko Manang Ula. "Ukai Aya ! Ukai orang ditu. Tang kabuah aku nurun ka pasar saharitu, munyi ko aku tadi, ngiga kuli," ko iya. "Nama batang pengawa nuan deh unggal ?" ko Biul. "Aku tu kepala mandor nangkap pengawa ngaga jalai raya kira sapuloh batu ari pasar tu. Enti nunda ka pengawa, aku enda tau ninggal ka utai datas din, tang laban kuli apin chukop nya alai aku mgemata-ngemata ka orang ke datai nyangka bisi deka bekereja. Tak berampas bendar aku ke nurun tu tadi," ko iya nganu sida. "Dini nuan bemalam di pasar tu deh Igat ?" ko Manang Ula. "Aku enda bemalam ditu, laban enggai nyadi enda pulai," ko iya. "Meda hari tu nyau lemai meh. Datai nuan din lagi ?" ko Ensingut. "Ukai lama kia. Munyi nya ke jauh. Enda bulih sakejap mata kin ka ngena kerita," ko Mandor nya. "Kati ko kitai tu deh Igat, lalu nitih ka Mandor lemai tu ?" ko Manang Ula nanya Ensama. "Nadai utai giga agi, indah kitai ke kasak-kasak ngapa. Tu mujor bendar kitai lalu besatup enggau iya di pasar tu," ko Ensama. "Manah kitai lalu nyereta iya lemai tu ngulih ka iya bisi kerita, ngicha ka enda betambang," ko Manang Ula."Ngena nya," ko Biul. "Apin kita tau nyereta aku lemai tu, laban agi maioh utai diputar ka aku ditu," ko Mandor nya nganu sida. "Enti enda tau nyereta nuan lemai tu, barang maia meh ga. Amat ga bulih pengawa," ko Ensingut. Iya lalu nguing ngagai Manang Ula lalu singut-singut. "Kati ko ator kami tu deh Igat ?" ko Manang Ula nanya Mandor nya. "Bakatu," ko Mandor. "Jalai ke digaga tu enggi perintah. Aku nyadi kapala Mandor nangkap pengawa nya. Nyadi laban pengawa tu besai bendar, ari nya samoa orang ti deka masok bekuli enggau aku enda tau enda ngeluar ka duit sengkeram dulu, itong ka jamin. Kabuah enda tau enda bejamin, laban enggai ka orang enda tentu ngereja pengawa, laban orang ke udah ngelamatu maioh bendar ngelengka ka pengawa apin abis sain. Orang ke udah ngelamatu ngelakar bendar, madah ka diri suntok belanja lalu nginjau duit. Udah sida nerima duit nya, sida lalu lari ngelengka ka pengawa agi mekang-mekang. Nya alai, nya kabuah diatu enda tau enda bejamin. Duit jamin nya di simpan ba bank perintah. Leboh kita pulai jemah ila, nya baru perintah mansut ka duit nya," pia ko Mandor nya nganu sida. "Berapa jamin siko deh Mandor ?" ko Biul. "Siko kita bejamin tiga puloh ringgit," ko iya. "Mar endar bejamin-jamin bekanya," ko Ensingut. "Ka pan enda, kitai ga ngiga diri bulih pengawa," ko Manang Ula. "Enda nya ulih seliah, endang udah ator," ko Ensama. "Kati ko duit nya, ni maia kami ngeluar ka deh mandor ?" ko Biul. "Duit jamin nya tau lalu disua ka ngagai aku diatu, awak ka aku nganjong iya ngagai perintah pagila. Laban aku enggai nyimpan duit orang lama, enggai ka lenyau ngapa," ko Mandor nya nganu sida. Sida lalu nyua ka jamin diri. Nyadi enggi Biul enda chukop, tang dibubul ka sida bukai. Leboh duit udah disurong ka sida magang, dia Mandor nya lalu madah ka diri deka angkat laban hari nyau lemai. "Pagila aku nurun baru, nya alai kita anang mindah ari kedai tu enggai ka aku puas begiga ka kita ila," ko Mandor nya nganu sida. "Pia meh, enda kami mindah ari tu. Bejalai enda meh. Nganti nuan datai ila," ko Manang Ula. NGANTI SUNGAI ENDA BEULU Hari nyau lemai, mandor nya tadi lalu mulai ka diri ngagai alai iya ke gawa kenu ko iya nganu sida. Bala sida Ensama lalu belatorka alai diri ba kedai China di pasar nya. Bilik ke alai sida nya muak ka belakang kedai, melasar tanah tang besemin. Tindok, berapi, makai sama dia. Manang Ula lalu ngulih ka periok dalam selabit. Iya lalu berapi. Biul seduai Ensingut madah ka pala diri agi ngelu udah bekau mabok gelumbang, nya alai seduai sama ngali ka diri. Nyadi Ensama lalu begari. Pasok ka iya tanchut burak, baju burak. Iya madah ka diri deka meli lauk ngagai pasar sayor. Meda iya ngeringak begari, dia Ensingut lalu nerakan sereta bejako. "Kering endar gamal punggal udah ngias diri, agi nganu endar," ko iya. "Kapa nyebut," ko Biul. "Jimat ka punggal enggai ka tesat. Mar bejalai ba pasar enda kala di tengah," ko Biul. "Eh ! Deh pegi ka tasik, enda meh tesat. Anang ka pasar ke ngemit tu," ko Ensingut. "Nama di peguai ka. Lama laun pan ngelekar meh randau entekai," ko Ensama. Iya lalu pansut ari kedai nya mansang ngagai pasar sayor deka meli lauk. "Meli budu aur, Igat !" ko Manang Ula ngangau ka iya ari endor ke berapi. Iya enda malik, enda tentu ninga utai ko Manang. Enda lama udah nya asi Manang pan mansau, tang apin makai laban nganti lauk ka dibeli Ensama. hari nyau petang bendar, apin ga Ensama datai. Biul madah ka diri nyau lapar. Deka makai dulu, nadai ga utai ka lauk. Dia meh sida tiga nganti, nadai ga Ensama datai. "Kini ka iya tu ngelamatu enda datai ?" ko Manang Ula. "Sapa kitai nemu. Kada enda tesat," ko Biul. "Pelaba aku, nadai pengawa bukai, tentu iya tu rindang sebelah sida Kuda Belang dia," ko Ensingut. Hari nyau jauh malam. China madah ka diri deka nambit pintu laban nyau ka tindok. "Anang guai nambit pintu nya toki. Siko kaban kami tadi apin pulai," pia ko tudah Manang Ula. Meda Ensama lalu enda ulih anti, sida tiga lalu makai enda belauk. Enggi Manang Ula dikuah enggau ai amat, belauk garam aja. Apin lama sida udah badu makai, endor Ensama pan datai ngenying peloh-peloh. Jari iya minching daun ensabi China. "Kini ka nuan lama endar deh punggal ?" ko Ensingut. "Lama endar aku udah meli lauk, tang betemu enggau kerani besai din tadi, lalu berandau enggau iya. Nya alai laun pulai. Deka ngelengka ka jako, mar endar agi mekang-mekang," ko Ensama. "Nama jako kerani deh Igat ?" ko Manang Ula. "Ninga aku madah ka diri ngiga pengawa, iya madah ka pengawa kerani bisi puang dalam opis sida, nya alai iya lalu deka ngambi aku gawa," ko Ensama. "Tusah endar kami dilengka ka nuan kadiri, enti sema nuan tak nyadi bekerja diambi kerani nya. kati ko semaia kitai ke enggau mandor suba deh ?" ko Biul. "Enda aku ngambi pengawa kerani nya, nyamai agi bekereja luar. Puas nyadi kerani, dudok dugau-dugau besahari-sahari," ko Ensama. "engka nuan tak deka ninggal ka kami tiga kadiri meh Igat, " ko Manang Ula. "Enda ! Ni aku deka beserara enggau kita," ko Ensama. Nyadi Ensama ke laun pulai meli lauk nya tadi ukai betemu enggau kerani munyi ke ditusoi iya, tang tesat sebelah pasar nya. Iya lama enda tetemu ka jalai pulai ngagai kedai ke alai sida diau. Tang iya malu madah ka diri tesat ngagai sida Biul. "Kami tiga udah makai tadi Igat. Enda teanti ka nuan agi, perut nyau lapar," ko Manang Ula. Ensama lalu ngulih asi kadiri. Iya makai enda belauk. Badu makai nya sida lalu sama gali tindok. Pagi siti enda mindah laban nganti Mandor ke datai. Nyau tengah hari, nadai ga iya datai. Anti ngagai lemai, nadai ga datai. Hari siti anti baru, lalu nadai ga datai. meda mandor nya lalu enda datai, dia Manang Ula mupok irau ati nyangka orang ke udah besemaia enggau sida nya tak ngakal. "Kada enda nipu kitai Mandor nya kamari, Igat," ko Manang Ula nganu Ensama. "Dini orang tengah nengeri tu berani ngakal, tang sigi iya apin datai. Nyangka agi kiroh ngator anak kuli iya datas din," ko Ensama nyaut Manang Ula. Hari siti udah nya, nadai ga Mandor nya datai ngagai sida. "Kada enda amat orang ngakal nya kamari, punggal," ko Ensingut nganu Ensama. "Enda patut iya lalu enda datai," ko Ensingut ga. "Aku enadang sangka endar ka iy nya kamari bisi ati deka ngakal kitai, meda gamal iya tak kelis-kelis," ko Biul. "Meda nuan deka ngeluar ka duit jamin nya suba meh, enti bengat nemu gamal orang ke deka ngakal ! " ko Ensama merak Biul. "Aku ga ngarap ka kita ke mutus ka jako enggau iiya. Enti aku kadiri, enggai aku mansut ka wang jamin nya kamari, tang meda kita ngeluar ka magang, nya alai aku ngeluar ka enggi diri ga," ko Biul betalat enggau Ensama. "Nadai nuan nemu utai dah. kami tu ukai baru, udah tebalan di nengeri," ko Ensama nganu Biul. Tudah Biul lalu enda bejako agi. Sida sabuat sama enda mindah sahari-hari nya, laban nganti Mandor nya datai. Belanja sida sabuat pan nyau suntok, laban endang nadai tentu maioh agi tinggal udah bekau ke ngeluar ka jamin ngagai mandor nya. Sahari-dua ke baru datai di nengeri nya tudah Manang Ula bejarit endar ngirup kopi di kedai, tang meda duit diri nyau mimit agi tinggal, nya alai iya mai sida sabuat sama nat ka diri enda makai utai. Semina asi aja. Indah nya deh dibubur ka sida enggai ka beras bekal ke dibai ari rumah nya enda chukop kena nganti ke begaji. Kalima hari sida udah nganti, nadai ga mandor ke besemaia enggau sida nya datai. Meda iya lalu enda datai, dia Ensama pan nyau mansang tusah ati nyangka iya nya amat ngakal. "Lama endar Mandor tu enda datai punggal. Maioh endar anak kuli diator iya datas din pelaba aku," ko Biul. Ati iya endang udah mutus ngumbai orang ke ngumbai diri Mandor nya amat orang ngakal sida, tang iya ke bejako nya semina kena iya ngelesey ka Ensama ke ngumbai diri nyau tebalan di nengeri. "Nadai penyadi kitai tu Igat, diayah ka Mandor bakatu. Nama pikir nuan ?" ko Manang Ula nganu Ensama. "Anang tusah. Kin ka kitai ngeripot, ngagai orang ke megai pun radio di opis din," ko Ensama. "Kada orang radio ngelala mandor nya kamari deh punggal ?" ko Ensingut. "Nadai sida tau enda nemu, indah berita di tasik din deh temu sida magang. Anang ka utai ke di nengeri tu enda temu sida. Enti sida ngumbai diri enda nemu, sigi sida iya jai. Ukai nya ulih pelalai ka orang radio nya. Indah ngelamatu berita ke ba menoa kitai empu, dudi kitai nemu, sida dulu madah ari radio," ko Ensama. NIKI RUMAH RADIO "Barang ko nuan meh Igat. Aku tu nadai pikir agi," ko Manang Ula nganu Ensama. Sida lalu niki ngagai Rumah Radio. Ensama dulu lalu ditangkan ka Biul seduai Ensingut. Manang Ula dudi ka sida. " Kini ka tunga Rumah Radio deh punggal ?" ko Ensingut nanya Ensama. "Nyin, tunga kin ka," ko Ensama nunjok tunga kili pasar ke alai sida bemalam nya. Sida sabuat bejalai enda ngetu laban enggai ka opis udah ditutup. Anti datai, enda datai. Datai ba opis siti, nanya ga Ensingut. "Ukai tu Rumah Radio, punggal ?" ko Iya. Iya meda peti radio maioh dipandang ka orang dia. "Ukai, agi jauh," ko Ensama. "Udah nuan niki ngagai Rumah Radio, Igat ?" ko Manang Ula nanya Ensama. "Anang ka niki aku enda kala ! Bejako dia deh udah, tang ukai diatu, lama udah," ko Ensama. "Kati alai kitai sarumah enda ninga jako nuan dalam radio deh punggal ?" ko Ensingut nanya Ensama. "Ni kita bisi ninga, endang ukai jako dituju ka ngagai menoa kitai tu. jako dituju ka ngagai menoa tasik," ko iya. "Nemu jako kitai Iban ga orang di tasik din kau punggal ?" ko Biul. Nyau alit ati Biul ninga jako nya dituju ka tasik kin. "Kami ga ukai ngena jako kitai Iban. Jako orang Putih dikena kami," ko Ensama. Manang Ula nyau telengga-lengga ninga randau sida leboh ke bejalai nya, nya alai tak asai ke apin jauh asai sepi iya. Semadi ensepi kaki diri nyau penat, nya baru nemu diri jauh bendar udah bejalai. "Agi jauh Rumah Radio ari tu Igat ?" ko Manang Ula ga nanya Ensama. "Enda nemu ! Suba tak urong tu ditu. Tu tak nadai agi, nyangka udah dipindah ka orang ka bukai," ko Ensama. "Salah endar orang ba radio nya bepindah ka opis. Kitai ke lelak begiga ka endor iya," ko Ensingut. Iya lalu singut-singut, pansut insak puas bejalai laban panas ba jalai nengeri nya. "Kini ka tunga ngiga tu deh, enti iya udah dipindah ka orang ?" ko Biul nanya Ensama. "Sapa kitai nemu endor orang mindah ka iya," ko Ensama."Ninga nuan udah bejako dia suba," ko Biul. "Amat suba, leboh iya agi ba sentang tu, tang diatu ga udah nadai ditu agi. Nya dia endor iya suba," ko Ensama nunjok ka utai ngapa. Tak diseremang ka iya tunjok iya nunjok ka sentang Opis Radio ke ko iya nya. "Aku enda tetitih ka kita agi Igat, nyau enda tan bejalai," ko Manang Ula nganu sida tiga. Nya baru sida minta anjong kerita ngagai rumah radio. Enda lama, sida pan datai ba rumah radio. Udah mayar tambang, sida pan tama. Lama sida ligau-ligau ngiga Bagi Iban. Dia Ensama bejako. "Amat udah dipindah ka orang opis tu. Suba lain agi ari tu. Tu nyau lain endar, nyau besapat-sapat". "Udah pan opis beganti, agi meh orang ke enggau nuan betemu suba ngelala nuan punggal," ko Ensingut nganu Ensama. "Enda nemu meh. Kada enda udah beganti ga sida nya deh. Indah opis deh udah mindah endor," ko iya. Meda sida lama bekategir ba moa pintu nya, dia orang ke nyapu lalu nanya ka pengawa sida. Sida madah ka diri deka ngagai Bagi Iban. Orang lalu ngulu ka sida sabuat. Datai ba Bagi Iban, orang ke gawa dia lalu nanya ka pejalai sida sabuat meda gamal sida tak besak-besak. Tak baru apus jako orang ke nanya sida, dia Biul lalu bejako madah ka sida sabuat kena akal Mandor. "Anang tak beguai-guai bejako, enda neju ka orang," ko Ensama nganu Biul. "Kita ga lubah endar deh," ko iya nyaut. "Pajak ka meh berita nya," ko orang radio nya nganu sida sabuat. Nya alai dia Manang Ula lalu nusoi berita pasal sida ke diakal orang nya. "Bakatu ko berita kami tu Wat. Aku nusoi ari pun-pun ngagai kita perintah," ko Manang Ula. "Tusoi meh aya," ko orang radio. "Kami sabuat tu ngiga pengawa, deka bekuli. Lima hari tu udah datai di nengeri tu. Sereta kami datai ba pengkalan kapal di pasar dia, bisi lelaki siko lalu baka ke ngelala kami, manah endar enggau kami sabuat. Ninga kami deka ngiga pengawa, dia iya lalu madah ka bisi pengawa ngereja jalai raya. Nya alai kami lalu madah ka diri deka gawa. Nyadi iya, kenu ko iya, Mandor orang ke ngereja jalai raya. Nya alai kami lalu dipasok ka iya bekereja nyadi anembiak iya. Kami lalu dipinta iya jamin tiga puloh ringgit siko-siko. Jamin nya udah dikeluar ka kami magang. Iya madah ka diri pulai dulu, lalu besemaia datai baru ngambi kami sabuat ngena kerita. Di anti kami empat-lima hari tu udah lalu nadai datai. Nya alai ati kami nyau sangka ka iya nya orang ngakal," ko Manang Ula nusoi ngagai orang radio. "Amat tusah bendar kita sabuat laban Mandor nya," ko orang radio. "Tusah Wat ! Nya alai kami tu datai dituminta tulong kita ngiga iya nya. nadai penyadi kami tu kapa-kapa di nengeri tu nadai belanja," ko Manang Ula. "Enda salah enti bisi jalai nulong. Dini alai rumah Mandor nya deh, bisi madah ka kita ga iya ?" ko bala sida ke gawa dalam Bagi Iban. "Enda nemu Igat. Nadai madah ga iya. Semina madah ka diri Mandor," ko Manang Ula. "Kati nama iya, nemu kita ?" ko sida ke di opis nya. "Nama iya enda meh kami nemu. Iya enda madah," ko Biul. "Kati pekara tu, bisi kita udah ngeripot ngagai Rumah Pasong ?" ko orang radio. Lama sida sabuat enda bemunyi. "Nadai kami udah madah ngagai Rumah Pasong, laban deka betanya ngagai kita kitu ka dulu engka kita nemu ngiga orang nya," ko Ensama. "Ukai kami enggai nulong kita, tang nadai jalai laban kita enda nemu endor rumah iya, enda nemu nama Mandor nya. Nya alai enda nemu jalai nyidi iya," ko orang radio. "Tulong meh kami tu Wat. Barang jalai kita ba radio tu. Kirum ka pesan kini ngasoh iya datai ngagai kami ba kedai China di pasar nya," ko Biul. "Enda tau kami nabor ka pesan bansa nya Unggal. Ukai utai ditabor ka ari radio utai bansa nya," ko sida ke ba radio nya. "Nadai kami jalai bukai nulong kita sabuat ba penusah tu, semina kami ke ba opis tu ulih nibar ka jako ajar ngagai kita. Ukai ngumbai kita enda nemu, tang ngambika bisi ka tambah," ko sida ke ba radio. Nya alai jako ajar orang radio nya munyi tu : "Ko penemu kitai Iban, dalam babas, dalam kampong din maioh antu, maioh utai tau nusah. Semina orang ke bidik bisi kala tepeda ka antu. Tang dalam nengeri tu lebih agi ari alam babas pemaioh antu. Nya alai, enti kitai enda bejimat, enda jaga ba nengeri tu, mudah bendar kitai tulih ka penusah laban antu. Antu dalam nengeri tu endang nyata dipeda kitai, enda baka antu dalam kampong. Tang kitai enda nemu enti kitai enda ngelala, lalu enda jaga ka diri empu. Nya alai baka kita sabuat ke kena penusah tu, laban kita udah besatup enggau antu nengeri. Nyadi antu nengeri ke ko aku nya, ngambika jako nyemetak dinga kita, iya nya orang ke ngakal, orang ke nipu kitai, baka kita ti diakal orang ke ngumbai diri Mandor ko kita nya. Nya alai ajar aku enggau kita, bakatu : "Enti kita tepeda ka orang tak jinak enggau kita, tang kita enda ngelala orang nya, dia kita anang enda ngadang laban orang nya endang orang bisi ati deka ngakal kita. Duit kita anang sekali-kali nyua ka ngapa ngagai orang ke enda dikelala kita, enti sema orang madah ka diri deka nginjau tauka minta jamin ari kita baka orang ke ngumbai diri Mandor nya tadi. nambah ka nya, ajar aku enggau kita, bakatu ; Enti kita udah nemu diri diakal orang, kita enda tau sakali-kali laun madah ngagai Pulis di Rumah Pasong. Nya orang patut alai madah ka pekara ke bansa nya. Enti kita laun madah ngagai Pulis, dikelala kita pan orang ke ngakal nya, enda ga mudah di sidi laban iya udah lari. Nya alai ke pengujong tu jako aku enggau kita sabuat, aku ngasoh kita ngeripot penusah tu ngagai Rumah Pasong diatu, nyangka ukor Pulis bisi jalai ngiga orang ke ngakal kita nya," pia ko orang ke ba radio nya ngajar sida sabuat. "Nadai ko meh. Enti kita ke ba radio tu enggai nulong," ko Ensama. "Ukai enggai nulong. Salah jako nuan nya Igat," ko Manang Ula. "Kin ka kitai madah ngagai Pulis, nitih ka ajar Wat tu tadi," ko Manang Ula nya. Sida sabuat lalu angkat mulai ka diri. Datai di jalai, dia sida berunding baru. Sekeda deka ngeripot ngagai Pulis, tang Ensama madah ka diri enggai. "Di repot pan nadai ga guna kenu," ko jako iya. "Laban utai udah laun." Nya alai ninga munyi nya sida enda nyadi ngeripot ngagai Rumah Pasong, enda nitih ka ajar orang ke ba Rumah Radio nya tadi. Nya alai sida lalu mulai ka diri ngagai kedai China ke alai sida diau. Datai dia lalu sama nukong. Lama sida sama enda bemunyi. Kaki nyau lelak bejalai, perut nyau lapar laban lalu enda makai sahari-hari nya. NGAGA PAGAR MANOK Nyau kelama udah nya, dia Manang Ula bejako. "Berunding meh Igat, ngiga alai kitai tu bekuli. Nuan nemu agi putar-putar utai di nengeri tu," ko Manang Ula nganu Ensama. "Kin ka kitai bejalai, tunga ka atas nengeri tu, ngiga rumah Tuan. Ba rumah Tuan bagas bisi pengawa salamatu," ko Ensama. "Kami duai punggal Biul tu pemai kita. Amat ga bisi pengawa. Nadai penyadi bengat nadai belamja sasen bakatu. Kena meli daun ruku deh nadai," ko Ensingut. Nyau meliur tudah Ensingut nat ka diri enda nginsap. Pagi siti sida empat lalu bejalai. Ensama ngulu ka sida ngiga rumah Tuan. Bejalai sapagi-pagi nya. Datai ba rumah sabuah lalu nanya ga sida, ukai ga rumah Tuan. Datai ba rumah sabuah, tanya sida ga, ukai ga enggi Tuan. "Dini alai rumah Tuan tu deh Igat ?" ko Manang Ula. "Enda nemu meh, laban utai tak udah berubah magang diatu. Suba sebelah tu meh rumah Tuan, nyangka udah diruboh orang kini," ko Ensama. "Nyelai endar ga rumah orang di nengeri tak semampai mindah. Engka bisi jai mimpi kini," ko Biul. "Nya lah Igat. Amat endar jako orang radio kamari, amat maioh antu di nengeri tu," ko Manang Ula. "Enti baka kitai di rumah panjai di menoa din, tak dipelian ka utai bansa tu, nya baru antu lari. Tang di nengeri tu, engka perintah enggai kiroh," ko Ensingut nguing ngagai Manang Ula. Sakumbang-kumbang ke berandau nya sida sabuat endang enda ngetu bejalai, tang enda nemu tunga diri, mina tak bejalai lalu rembus ba rumah sabuah jauh ari jalai besai. Datai dia, Manang Ula lalu ngangau ari kaki tangga nanya ka rumah Tuan. "Dini alai rumah Tuan, bisi semak tu ditu ?" ko iya. "Apa lumah Tuang kah ? ko orang nyengok ari jenila. "Nama tu tak rumah China deh aya ?" ko Ensingut nganu Manang Ula. "Salah tu ! Bejalai kitai," ko Ensama. Sida lalu bejalai baru. Kira sabatang ruku ari nya, dia sida rembus ba rumah batu sabuah. Datai dia, Ensama lalu nanya. "Rumah sapa tu ?" ko iya. Nadai ga orang nyaut. kadua kali iya ngangau, nya baru pansut lelaki siko besai, tinggi sereta burak. "Nya ! Tuan nya punggal. Nadai orang bukai burak enti enda Tuan. Ditanya nuan ngena jako kitai tadi, ni iya deka nyaut. Uji tanya ngena jako Tuan dia," ko Ensingut. "Amat ga. Nama di rumah din tak lanchar endar nuan jako orang nya," ko Biul nganu Ensama. Udah nya bari Ensama bejako. "Halau Tuan ! Tabi Sikin !" kio iya ngangkat ka jari. "Bloody Fool, get out there !"ko orang nya. "Nama utai ko iya, tak inggar nyawa ! Kada enda nganu kitai ?" ko Ensingut nanya Ensama. "Dini nya nganu, endang munyi jako orang nengeri," ko Ensama. "Nama utai ko iya nyaut nuan tadi deh Igat ?" ko Manang Ula. Nyau kesal gamal moa tudah Manang Ula. "Pagila kitai diasoh iya ngaga pagar, lalu ngasoh kitai mai tali enggau tukol," ko Ensama nganu Manang Ula. "Isa meh ti bisi pengawa. Anang ga iya tak nganu," ko tudah Manang Ula. Sida sabuat enda tama ka dalam rumah. Ensama lalu mai sida mulai ka diri. Datai ba jalai besai, dia sida sama bekajengau ngiga tunga uing jalai pulai ka pasar. Malik tunga ka baroh, dia Manang Ula tepeda ka Rumah Tua Pek Kong ba puting pasar ke alai sida diau. "Nama rumah Apik Pikong nya tak baka iya ke ba ujong pasar alai kitai diau, gamal nya peda aku," ko iya nganu Ensama. Ensama lalu malik. "Endang ga iya. Iga kita bengat enda ingat," ko iya nganu Manang Ula. Iya empu endang enda ingat, enti Manang Ula enda nunjok ka dulu, tang iya jampat endar ngelalai ka diri ke mai sida tesat sahari-hari nya. Sida lalu pulai ngagai kedai China ke alai sida diau, laban endang enda jauh ari nya. Datai dia sida lalu berapi ngelimat beras ke agi bisi tinggal mimit. Tembu makai nya hari pan malam. Sida lalu tindok laban udah lelak bendar bejalai sahari-hari nya. Pagi siti Ensingut tumu-tumu mai sida nurun. Manang Ula lalu nginjau tukul China ke alai sida diau nya. Biul mutik-mutik tali guni sebelah kedai ke semak nya. Bisi sekeda China nganu iya, meda iya beruntun ka tali guni ke endang udah dilumpong-lumpong orang kena betanchang ka utai. Manang Ula bulih nginjau tukol. Biul pan udah ga bulih tali. Nya alai Ensingut lalu ngansak sida mai nurun. Ensama lembau bendar nurun laban iya endang nemu Tuan ke ditabi iya hari siti nadai ngasoh sida ngaga pagar. Kabuah iya ngembal ka jako Tuan nya ngasoh sida ngaga pagar laban enggai ka sida Ensingut nemu iya enda nemu jako orang Putih. Sida empat lalu mupok mansa Rumah Tua Pek Kong mansang ngagai rumah Tuan ke udah digagai sida hari siti. Datai ba moa rumah nya, dia sida betemu enggau orang ke bekereja ba rumah Tuan nya. Orang nya bansa bukai, tang iya nemu ajko Iban. "Ka kini kita empat bebai ak tali, bebai ka tukol bakatu deh ?" ko orang nya nanya sida sabuat. "eh ! Deka ngaga pagar ke ko Tuan kamari," ko Biul. "Pagar nama nya deh ?" ko orang nya. "enda nemu, tak pagar ko iya kamari," ko Biul. "Enda au nemu. Lagi nganti aku nanya ngagai Tuan empu," ko orang nya tadi. Pulai ke bejako enggau Tuan, dia orang nya madah ka iya nadai ngasoh sida ngaga pagar munyi ko sida. "Kati alai jako munyi nya deh punggal ? Nama tak lurus endar ga munyi dipadah ka nuan ngagai kami kamari deh ?" ko Ensingut nanya Ensama. "Sigi iya enda ingat ! Nama penadai nya," ko Ensama. Ninga sida bechakah dia, nya alai orang nya madah ngagai Tuan dalam bilik. Tuan pan pansut meda sida betunjok ka moa pangan. Biul seduai Ensama ke betunjok ka moa pangan nyau ka belaya. Ninga sida keras ngiga pengawa, nya alai Tuan nya lalu ngasoh sida nangkir pagar manok iya ke endang udah tembu, tang apin tentu chukop pemesai, laban iya maioh manok. Tiga hari berunggu sida empat ngaga pagar nya, iya pan tembu. Tuan nya lalu meri sida sapuloh ringgit siko. Pulai ari nya, Manang Ula lalu beguai-guai mansang ngagai orang ke bejual buah semangka, laban iya lama endar udah tetengok ka buah semangka. Udah nya sida mulai ka diri ngagai kedai ke alai sida diau, laban hari nyau lemai. Datai dia lalu mela diri. Tembu makai nya, sida empat sama ngali ka diri tindok. PENUSAH MANANG ULA Pagi siti Ensingut mai sida nurun baru ngiga pengawa, tang Manang Ula madah ka diri pedis rusok. "Kada enda lelak bai nuan nyan kayu pagar manok Tuan kamari, nya deh aya ?" ko Biul. "Enda Igat ! Tak lain asai tu. Tak sekut-sekut asai seput laban pemedis tu," ko iya. "Nadai nya ngawa dah. Nuan tinggal di kedai tu. Kami tiga nurun agi ngiga pengawa," ko Ensama nganu Manang Ula. "Nadai ko enggau meh, enti kita enggai enda nurun saharitu," ko Manang Ula. Sida tiga lalu nurun. Manang Ula tinggal, laban enda dapat. Sapagi-pagi nya sida tiga ngiga pengawa, tang lalu enda bulih. Nyau tengah hari, nadai ga tetemu ka orang bisi pengawa alai bekuli. Hari nyau ngalih, sida tiga mulai ka diri ka kedai nya baru. Datai dia meda Manang Ula kasak-kasak nat ka rusok iya ke pedis. "Kati asai pemedis nuan deh aya ?" ko Ensingut nanya iya. "Nadai tentu temu asai agi isi aku tu Igat. Seput aku tak tesat," ko Manang Ula. Ensingut lalu nguntus rusok Manang nya. Ensama ngeringak muchau, laban nya pansa utai kenu ko penemu iya. Biul berunding deka nganjong iya ngagai Rumah Sakit perintah, tang Ensama madah ka lutor perintah enda nemu ngubat pansa utai. Pemedis Manang nya nyau mansang balat kebalat. Iya pan ngenying ngelingkang nat ka rusok ke pedis. "Lain asai seput aku tu Igat. Kada aku tu idup," ko iya nganu sida tiga. "Nya alai enti aku parai, samoa ubat enggau sakang aku ke di menoa din pulai ka nuan Igat Ensingut," ko iya nganu Ensingut. Kembai moa Ensingut ninga Manang Ula deka meri samoa ubat enggau sakang ngagai iya, tang sinu ga iya berunding ka pemedis Manang nat ka penyakit nya. Laboh ga ai mata iya. Udah nya bejako baru ga Manang Ula. "Enda meh aku tu idup," ko iya nguing ngagai Ensingut. "Sinu endar ati aku berunding ka ibu nuan di menoa din. Kejang kitai nurun suba bisi tudah tuai bepesan ngasoh aku meli rumpong enggau perut terubok leboh kitai pulai bejalai tu. Lebu endar meh ibu nuan din nganti ngapa. Aku tu tak parai di menoa orang bakatu," ko Manang Ula. Jako iya endang udah rapas-rapas. Nya alai enda lama udah nya nyawa iya pan nadai. Nyadi sakumbang sida ke agi ngidup ka Manang nya tadi, China ke di kedai nya enda nemu, laban sida enda madah. Semadi tudah Manang udah nadai, nya baru sida tiga madah ngagai towkay dalam kedai nya. Towkay nya enda ngasoh sida lama nyimpan bangkai nya dalam kedai iya. Nya alai iya meri sida duit mimit kena meli utai ka santubong aya Manang. Duit enda chukop kena meli papan, nya alai Ensama semina meli tikai kena sida ngiling bangkai nya, sereta lalu dianjong sida tiga ngagai pendam kampar ke enda tentu jauh ari nengeri nya. Bangkai tembu simpan sida, hari pan petang. Sida mulai ka diri ngagai kedai nya baru, lalu sama enda makai lemai nya, sinu ka tudah niang Manang Ula. BIUL NGAGA LEMAN Meda Manang Ula udah nadai, dia Ensingut keras mai Ensama seduai Biul pulai, tang Ensama apin deka laban lalu enda bulih duit. Kadua agi, laban ag belala diau di pasar. Sida tiga ngiga kereja baru. Pengawa enda tentu, ama bisi, ama nadai. Datai ka dua-tiga hari diau, nya baru bisi ga kereja gaji-hari. Kengka duit ke ulih bekuli nya semina umbas kena meli beras. Nyadi Ensama gila meda wayang. Kengka duit ke ulih iya bekuli, abis kena meli ticket wayang. Beras enda meli, semina ngarap ka Ensingut seduai Biul. Seduai nya barang ko iya, laban Manang Ula udah nadai nya alai nadai ga nekup iya. Nyaia ali tak peneka ati iya enggau Ensingut seduai Biul. Biul sabengkah ga jalai ngabis ka duit kengka ke ulih bekuli. Terubah baru datai di nengeri apin berani bejalai kadiri, tang nyau kalama iya enda takut agi lalu selalu lesap-lesap nutu bala sida Kuda Belang ke sebelah tisi jalai dia. Nyadi Ensingut lain ga jalai muai belanja. Iya tu keras deka nyadi Beliau. Nya alai sabarang orang enggau betemu di pasar nya endor iya betanya magang, nanya ka ilmu, baka sida puchau enggau utai ke bansa nya. Nya alai orang ke deka ngayah ka iya, enggau orang ke semina deka ngambi duit iya madah ka diri maioh penemu. Pengambi amat enda besai dipinta orang ke alai iya betarak nya, tang samoa orang ke nemu ko jako, alai iya ngambi penemu magang. Sabengkah puchau dipelajar ka Ensingut nya puchau kena nangkap kala. Ensepi diri udah lanchar nyebut leka puchau nya, dia iya lalu deka nguji ka pemisa iya. Nya alai sakali, lemai hari iya bejalai ba tisi moa kedai ke alai sida tiga diau nya. Seninjik bendar tak pansut kala siko ragang-ragang ba tisi parit. Sereta meda kala nya, Ensingut lalu muchau. Abis leka puchau nya lalu ditangkap iya kala nya tadi. Sereta jari iya datai, sepi iya ngenying asai ke megai bara api sengat kala nya. "Bangkai puchau ! Ni ke bisa ko orang nya suba !" ko iya mutap kadiri ba tisi parit dia. Iya lalu mulai ka diri ka dalam kedai ngagai endor sida tiga ke di belakang din. Nyau jauh malam, dia Biul datai. "Nama main nuan kasak-kasak bakanya deh punggal ?' ko iya nanya Ensingut. "Akai-rai punggal ! Bebadi endar aku tak disengat semati kala ba tisi dinding dia tadi," ko iya. "Kapa nuan megai iya deh ?" ko Biul. "Ni nya bisi megai iya. benong aku ngantong kibong ba tisi dinding dia tadi, ensepi jari diri tak asai ke ngenggam bara api. Tenggau aku, meda nya kala," ko iya. "Kini nuan tadi deh, laun endar pulai ? ko Ensingut nanya Biul. Agi ga iya dapat nanya. "Akai-rai punggal ! Rindu endar. Nyau ka enggai asai ati aku pulai tadi. Tang semadi berunding ka nuan tinggal kadiri," ko iya. "Nama utai deh punggal ?" ko Ensingut. "Es ! Sida Kuda Belang. Iya magang-magang, sebelah jalai dia enti kitai nemu ngiga," ko iya. "Rindu ati punggal ?" ko Ensingut. Enda berasai agi jari iya ke pedis laban kala nyau ninga jerita Kuda Belang nya. "Lekat asai sempulut ? " ko iya ga agi itok nanya Biul. "Kapa nyebut !" ko Biul. Iya lalu ngali ka diri, madah ka diri lelak. Hari siti sida tiga baum baru ngiga kereja. "Enggai nyadi enda bekuli, nyau abis duit tu," ko Ensama. Biul madah ka diri enda enggau sahari nya. Nya alai iya tinggal ba pasar ke alai sida diau. Ensama seduai Ensingut nurun ngiga pengawa. Seninjik bendar seduai lalu bulih pengawa, nya alai lalu bekereja. Nyadi tinggal seduai ke bekereja nya Biul ke tinggal di pasar nya tadi ngenchuri duit towkay China. Penyampau duit dichuri iya lima puloh ringgit. Towkay nya empu enda meda iya ke ngambi duit nya, tang bini towkay nya ari sadau tepeda ka iya nyengkau duit nya. Sereta iya udah ngambi duit nya tadi, iya lalu beguai-guai mulai ka diri ngagai endor sida ke diau di belakang kedai din. Bini towkay nya lalu beguai-guai madah ngagai laki iya. Towkay nya lalu nitih ka Biul kin. Datai din, meda iya baru nyilak ka geregom deka nyimpan duit nya. Duit nya tadi agi mengkang digenggam iya ba jari. Nya alai iya lalu ditangkap towkay nya sereta lalu direpot ngagai Rumah Pasong. Biul lalu ditan ka dalam Rumah Pasong nganti ke bechara. Leboh Ensama seduai Ensingut pulai bekuli lemai nya, nemu Biul nadai dia. Seduai nanya ngagai Towkay. Towkay madah ka iya udah ditangkap Pulis laban ngenchuri duit iya. Hari siti Biul lalu di pechara ka dalam court. Iya nadai besangkal ka penyalah diri, nya alai lalu di tutup dua bulan. Leboh iya ke bechara, Ensingut seduai Ensama bisi ngemata ka iya, tang lalu enda sempat bejako enggau iya laban iya terus dibai orang ngagai Rumah Tutup. Meda Ensama seduai Ensingut deka pansut ari Rumah Pasong nya, dia Biul nyapa ari dalam bilik nyin. "Enti bisi daun ruku enggau semakau, nganjong ka aku ila punggal !" ko iya nganu Enssama. Ensama enda nyaut iya laban takut ka Pulis ke jaga dia. BELAYA Pemulai ari nya, dia Ensama seduai Ensingut berunding. Ensingut keras mai pulai laban Manang Ula udah parai, lalu Biul pan kena penusah udah kena tutup. Kadua agi meda pengawa mar bendar digiga di nengeri, laban timpang penemu enda nemu surat. Nya alai iya nyau berati deka pulai ka menoa. Tang Ensama enggai dibai iya pulai, laban malu ka diri udah nurun nadai utai ulih dibai pulai. "Nadai guna pulai ka menoa. pedis endar gawa di rumah," ko Ensama nganu Ensingut. "Enda iboh enti nuan enggai pulai. Aku pulai kadiri," ko Ensingut nganu iya. "Pulai meh nuan. Enti nuan berani kadiri. Aku enda enggau nuan !" ko Ensama. "Bedau temu meh. Tesat kapal, tesat meh aku,' ko iya nyaut Ensama. "Nuan badu enda deka pulai meh ! Ngiga pengawa di nengeri tu nadai meh orang deka nerima, nuan ga nadai penemu," ko Ensama. "Meda nuan ke bisi penemu nya deka enggau kami bekuli ngaga pagar Tuan suba meh," ko Ensingut ngelaban iya bejako. "Semadi ngulu ka kita. Ti aku, diatu pan minta nyadi kerani, bulih meh," ko Ensama. "Nuan badu enda enggai pulai ka menoa. Nuan ga ngelusu ! Ngambi kayu deh enggai," ko Ensingut. Nyau kapuas betalat, dia Ensingut lalu angkat ngagai towkay nanya ka maia muto bisi belayar ngagai pasar di nanga Madu Midang. Towkay madah ka muto nadai belayar dalam dua-tiga hari nya, laban gelumbang kelalu besai musim landas. belaboh ari nya Ensama seduai Ensingut lalu enda bejako enggau pangan. Makai sama kadiri. Tindok enda begulai, berimbai deh enggai. Ensama agi-agi deka nanya Ensingut leboh ke bepansa sebelah kedai China dia, tang Ensingut endang enggai nyaut iya. Meda Ensingut enggai nyaut, dia Ensama nganu iya ngena jako orang Putih. "Bladis Gut !" ko iya nunjok ka Ensingut. Ensingut enda memunyi laban enda nemu jako orang Putih. BESERARA Udah bekau ke betalat nya, seduai lalu beserara. Ensama pulai ngagai rumah siwa. Ensingut mengkang ba bilik China nya, laban nganti muto bisi belayar ngagai menoa sida. Tiga hari udah nya, nyau kapuas ke nadai pengawa di pasar nya, Ensama dudok ba kedai kopi. Apin lama iya udah dudok dia, datai apai tuai orang siko lalu nudok ka diri ba kedai kopi nya deka ngirup ai manis. Meda iya dudok dia, Ensama lalu angkat ari kerusi ke alai iya, lalu nudok ka diri ba kerusi ke semak apai tuai nya. Apai tuai nya enda berani nanya iya, laban iya ngumbai Ensama nya kerani meda maioh bendar puntin pin ba kandi baju iya. Meda apai tuai nya lalu enda nanya, dia Ensama lalu bejako. "Ari ni penatai dek aya ?" ko iya nanya apai tuai nya. "Datai ari rumah kami di Nanga Loba Alit di ili dia," ko apai tuai nya. "Ni penyauh ari pasar tu aya ?" ko Ensama. "Pama ga, kira kayuh tiga jam ari pasar tu," ko orang tuai nya. "Berapa pintu rumah kita dia, nya ?" ko Ensama. "Lebih dua puloh pintu, Igat ," ko iya. "Dek tu ari ni penatai deh Igat ?" ko apai tuai nya nanya Ensama. "Aku tu jauh penatai, aya," ko iya. "Ni penyauh nya ari menoa tu deh Igat ?" ko orang tuai nya. "Dua hari dua malam ngena muto nya baru datai ba pasar kami din," ko Ensama. "Nama pejalai dek tak jauh amat menselit kitu ka deh Igat ?" ko orang tuai nya. "Eh, aku tu kamari kena panggil perintah, di asoh sida nyadi kapala kerani di kubu dia. Datai aku ditu kamari lalu nanya sida di kubu dia. Pengawa endang bisi, nya alai sida lalu deka ngasoh aku belaboh gawa. Tang aku enda nyanggup, laban gaji apin aroh ati diri," ko Ensama nyaut apai tuai nya. "Ni pemesai gaji beri perintah, deh Igat ?" ko tudah tuai. "Sida deka meri aku tiga ratus setengah, tang aku enda nerima," ko Ensama. "Besai amat nya Igat. Enti dek nyadi kerani kitai dia nyamai amat kami bisi kitai Iban di kubu. Ngelamatu puas bebayar ka pupu, laban kerani ke dia enda nemu jako kitai," ko orang tuai nya. "Apin aku nerima pengawa nya. Gaji nya apin chukop," ko Ensama. "Enti dek enda nyadi bekereja di kubu dia, lalu ngagai menoa kami dek Igat. Kala udah rembus ba menoa tu," ko apai tuai nya. "Enda nemu meh aya. Ati tu enggai lama ninggal ka menoa, laban nadai orang jaga injin beras enggau kedai stor ke di menoa din," ko Ensama. "Amat nya Igat, aroh dek enggai nyadi kerani, bisi utai dijaga di rumah," ko tudah tuai. "Nya lah aya. Nemuai ngagai kita kia, bisi ga ati tu ngambi enda lama," ko Ensama. "Rindang ati dek ba rumah kami nya Igat. Bisi utai dia," ko apai tuai nya bungah mimit enggau Ensama. Malam nya Ensama angkat ari rumah siwa ke alai iya nya, lalu nyempulang apai tuai orang nya diau ba kedai China ke alai orang tuai nya. Samalam nya sama begulai dia seduai. Pagi siti Ensama lalu enggau apai tuai nya ngagai rumah sida di Nanga Loba Alit. Datai di rumah nya meda rumah puang. Orang abis turun kumai, laban nya maia nugal. Nyau lemai nya baru orang ke nugal nya pulai. Datai di rumah lalu beterebas nurun mandi. Ensama lalu mandi nyerumba orang ke dara-dara. Jari sapiak, enggi Ensama minching bungkus segerit. Jari sapiak nyerepit insap. Datai di ai, sida lalu sama mandi. Tembu mandi lalu betunda-udi pulai ka rumah. Nyau berandau lemai, dia sida sarumah nya nanya ka penatai, nanya ka apai indai iya. Randau bukai enda alah tusoi, laban orang ke nanya ka berita iya maioh endar. Ensama madah ka diri anak Penghulu Ibok, sida di Batang Lidang, tang iya muka pengawa ator sereta enggau injin beras ba rumah orang di Madu Midang, kenu ko iya nusoi ngagai orang sarumah nya. "Besai endar pengawa Igat tu di menoa sida din. Ukai enda iya deka diambi orang di kubu kitai dia nyadi kapala kerani, tang gaji semina tiga ratus setengah diberi orang, nya alai iya enggai," ko tudah apai tuai orang ke betemu enggau Ensama di pasar nya tadi. Nyau saminggu udah dia, apin ga Ensama pulai. Kadua minggu, nadai ga iya nyebut diri deka pulai. Siang hari enggau orang nugal ka umai. Ukai enggau orang nugal, tang semina begulu enggau orang ke bedurok. Sida ke nugal pan enda ati mai iya ngentak ka tugal, laban belaba ka iya endang enda tentu tau enggau orang megai kereja berat laban ninga iya ke madah ka diri bisi stor, bisi injin beras. Nya alai belaba ka iya enda enggau orang ngereja pengawa bukai. Semina empat lima kali iya ngelulu ka diri enggau orang ngentak ka tugal, udah nya lalu madah ka jari diri letup. Apus sabulan udah Ensama dia, nadai ga iya madah ka diri deka pulai. "Naka meh stor enggau injin beras dek di menoa din nadai orang nyaga tinggal dek tu ?" ko sida ke rumpas-rumpas nanya Ensama. "Leboh aku nadai din, bisi ga orang bejalai ka nya, laban aku bisi ngaji China nyaga pengawa nya kejang ke nurun tu suba. Nya alai aku enda tentu berumban pulai," ko iya. "Ngelamatu enda aku kala ngaji orang leboh aku nadai di rumah. Tang tu kamari, aku endang nyadang diri lama, nya alai enggai nyadi enda ngaji orang laban enggai ka nadai alai sida ke di rumah din bebeli ka utai," ko iya nganu sida ke dia. Sakumbang ke di rumah orang nya, Ensama bejarit endar bejalai malam diulu ka sida ke anembiak. Sida ka dara pen andal endar ga ati ninga iya madah ka diri anak Penghulu, umba bisi kedai enggau injin beras. Nyau kalama iya dia, iya pan nama ka diri ngagai anak Tuai Rumah. Apai indu nya pan nadai ga jako. Nya alai lalu diator sida sarumah nya jadi seduai iya. ENSINGUT PULAI KADIRI Padam cherita Ensam, lalu pansut jerita Ensingut. Nyau kalama ke nganti di pasar nya tadi, nya baru muto bisi belayar ngagai pasar di Nanga Madu Midang. Ensingut pan nepan dia. Duit nyau ka abis, semina chukop ka tambang. Sakumbang ke belayar di tasik nya, Ensingut endang enda angkat laban mabok. Semadi sangkai di pasar sida din, nya baru iya angkat lalu niki ka pasar. Datai dia, meda bala sida sarumah nyau ka sampal bisi di pasar nya. Iya lalu begulai enggau sida. "Ni sida Aya Manang, sida Ensama enggau Biul deh ?" ko sida nanya iya. "Em ! Sida tiga apin pulai," ko iya nyaut sida. Agi pelesak ati iya nya tadi, apin deka nusoi berita. "Nama pengawa kita tak sampal undor deh ?" ko iya nanya sida. "Kami tu ngambi paong getah kawin ari Opis Betanam, laban samoa kitai sarumah ke tinggal kita bejalai tu suba, udah masok Ator Pemansang Bekebun Getah," ko sida nganu iya. "Kati ko redas ke ditinggal ka aku bejalai kamari, nyadi ga nya ?" ko iya nanya Bujang. "Dini nuan nemu redas nya agi. Indah kitai sarumah udah angkat ari menoa nya," ko Bujang nyaut iya. "Dini kita berumah diatu deh aya ?" ko Ensingut nanya Tuai Rumah Enchaboh. "Samoa kitai sarumah ke di Madu Midang suba udah digelumu ka perintah ngagai Ator Pemansang ba Nanga Sungai Batu Belah ba antara rumah kitai suba enggau pasar tu," ko Enchaboh. "Kati ko ini aku deh ?" ko iya. "Ini nuan pan nitih ka kami meh, tang iya apin masok bekebun getah laban nadai orang ngereja pengawa kena tinggal ka nuan tu kamari," ko Enchaboh. "Kasih tudah ini," ko iya. Iya pan lalu singut-singut malik ka tisi. Pagi siti sida mudik. Ensingut lalu nepan ba sida. Datai di rumah, lemai nya sida nanya ka berita ngagai Ensingut. Nya baru iya nusoi pengawa enggau penusah sida sabuat ke pegi nya tadi. "Ensama tu kamari, apin pulai laban agi rindu di menoa orang. Nyadi Biul bisi salah jari, ngenchuri duit China. Nya alai iya kena tutup dua bulan," ko iya. "Ni aya dek deh Igat ?" ko Bini Manang Ula nanya Ensingut. Lama Ensingut enda bemunyi. Udah nya baru iya bejako. "Nyadi Aya Manang tu kamari kena sakit udah bekau kami ke bekuli ngaga pagar Tuan. Nadai enda ubat, sakang kena ngunsut iya, tang baka ke enda diubat. Makin ditawar, makin majak pemedis iya. Nya alai iya tu kamari udah nadai," ko Ensingut. Ninga berita nya, tudah Bini Niang Manang Ula lalu rauh-rauh pulai ka bilik. "Naka pengelebu-lebu aku ke arap ka iya mai rumpong pulai kita ke bejalai tu," ko leka sabak tudah Bini Manang Ula. Sida ke indu-indu pan sama bela beterong nyabak. "Sapa ke dikarap ka kitai tu berubat leboh ke renga pedera," ko serabana sida ke nyabak ka iya. "Umbas nya nyabak. Kati ko enggau, udah maia iya beserara enggau kitai. Jalai kitai ngintu, jalai kitai ngerapoh iya ga perunding ka kitai," ko Bujang nganu sida ke nyabak. Nya alai sida lalu nguing ka jako berunding ka jalai ngerapoh Manang Ula. Nyadi laban ator nya endang nitih ka jalai selama, nya alai utai nya lalu tembu diator sida dia. Sida Biul sabilik sama bekesingut nyabak, kasih ka iya ke kena tutup. "Nadai nya ulih disabak ka kita, iya ga endang udah kena tinggang penyalah. Bakatu penyalah, bakatu gaya ukom perintah enggau kitai," ko Bujang nganu sida ke bekesingut nyabak nya tadi. "Kati ko perau aku ke dikena kita undor suba deh Igat ?" ko Tuai Rumah Enchaboh nanya Ensingut. "Eh, nya lah, enda mukai-mukai ga perau nya suba, tak dichuri orang malam kami ke angkat ari pasar kitai, di ili dia suba. Puas kami ngiga, tang nadai temu," ko Ensingut nyaut Enchaboh. "Sayau endar perau aku nya suba. Penyau nya, enti enda Aya Manang nginjau nya suba, enggai aku nyali. Laban endang nemu kita bukai enda jimat," ko Enchaboh. "Nya lah aya. Ngumba endar ka perau nya enggai enda dichuri orang. Orang ke enchuri nya lungau ga, baka ka nadai ga perau orang bukai," ko Ensingut. Iya lalu singut-singut. Nyau lama lemai, dia Bini Niang Manang Ula pansut ka ruai berandau enggau Ensingut, agi nanya ka berita. "Kati ko samoa ubat-ubat enggau puchong sakang aya dek, ke dibai iya suba deh Igat ?" ko iya nanya Ensingut. "Nyadi samoa sakang enggau ubat iya nya kamari diberi iya ngagai aku magang. Samoa ubat enggau sakang sereta enggau perengka lupong iya ke di rumah tu pan diberi iya ngagai aku samoa," pia ko Ensingut nganu Bini Manang Ula. Bini Manang nadai ga jako, laban ngasai ka diri udah tuai. Nya alai samoa perengka Niang Manang diserah ka iya ngagai Ensingut. Ensingut pan, belaboh ari nya lalu nyadi Manang, lalu tau begama, tau belian. Kira sabulan lebih udah nya, peda jengur-jengur Biul datai di rumah sida. Datai dia lalu betemu enggau Ensingut. Seduai lalu beberap. "Idup nuan punggal !?" ko Ensingut nganu iya. "Akai-rai punggal ! Ukai utai dikereja dalam rumah tutup," ko Biul. Sida sabilik enggau sida bukai pan lalu begau meda iya datai. Indai Ensama lalu nanya ka penunga Ensama. Tang Biul enda nemu, laban iya endang lalu nadai meda Ensama kenyau ari iya ke tama Rumah Tutup. MAKAI SELAMAT Tiga bulan lepas nya, dia Ensama pan datai. Tang bini iya enda enggau, laban apin iya mulai ka diri, seduai bini iya endang udah sarak. Nya alai taja Manang Ula udah nadai, tang sida sarumah nyau berasai gaga laban udah diterima perintah ba Ator Pemansang. Ulit Manang Ula udah diketas sida, nya alai gaga ka sida Ensama enggau Biul sereta enggau Ensingut ke pulai gerai nyamai, taja nadai bulih utai. Ari nya sida berunding ngaga pengerami makai salamat. Sida ke indu sama diasoh mandok beram magang. Sida ke lelaki sama naka ulih ngiga belanja ke dikena rami. Sapuloh hari lepas nya, tuak pan mansau, belanja pan sama udah bisi mengal mit. Nya alai pengawa sida pan lalu nyadi. Nyadi sida sarumah nya, taja sida udah pindah ngagai Ator Pemansang ke ditumboh ka perintah, tang sida mengkang niti nali adat lama. Nya alai dalam pengerami nya, apin sida nudok ka bungah bukai, dia Komiti rumah sida madu ka Bujang bejako ngagai orang maioh ke ngulu pengerami sida nya. Bujang pan enda ga betanggoh, laban iya endang selalu dipadu ka sida ba senentang pengawa ke bansa nya. Nya alai leboh mensia maioh udah jenoh, dia iya bejako : "Aku ke bejako tu tak bengah-bengah, tak luba-luba peda kita maioh. Tang deka aku enda, laban utai tu endang udah ari ator ari runding kami sarumah maioh ke ditu," pia ko iya. "Nya alai," ko iya, "jako tu digaga aku panjai mimit, laban jerita tu asai ke enda ditusoi enti enda disidi ari pun. Nya baru Bujang ngelantar ka jako. "Kitai sarumah tu lama bendar udah kasak-kasak pendiau baka manok ke nadai meruan penepan. Menya kitai begulai enggau sida Aya Engkaul di menoa Dilah Tanah. Tang kitai enda entap dia. Ukai kategal Engkaul enda manah, ukai laban iya enda tegempong ka kitai, tang laban deka ngiga menoa ke lantang agi alai ngidup ka diri. Nya alai kitai angkat ngagai menoa Madu Midang. Menoa nya endang ditemu kitai tanah simpan perintah. Tang meda tanah nya puang nya alai kita ke tuai, baka Aya Enchaboh, matak kitai pindah kia." "Nyadi datai dia suba, enda ga mujor pendiau kitai sabuat. Baru udah tembu dampa, endor kitai kena tipu orang ke ngumpol chukai. Lepas nya lalu kena ukom perintah laban kitai pindah ngagai tanah simpan nadai terang ari perintah. Udah nya, ngeransi ka diri udah kena ukom perintah, dia punggal Ensama berunding bebai nurun ngiga pengawa ka nengeri. Nya alai sida Aki Manang Ula, sida Ensingut enggau Biul lalu nurun. Arap ga kitai, nyadang sida mujor lalu tulih ka belanja bai pulai, tang nya ga baka kena tinggang penusah. Unggal Biul kena salah ba adat perintah, tudah Manang Ula lalu tinggal parai di menoa orang. Nya alai naka penyinu, naka pengasih kitai berunding ke tudah tuai, tang nadai ko enggau laban udah datai ba sain iya diberi Petara. " "Nyadi sida ke gerai, baka sida tiga ke enggau iya bejalai tu kamari, sama udah mulai ka diri. Taja sida nadai tentu utai ulih nitih ka ati ke nurun suba, tang sama pulai gerai nyamai, lalu sama enggau kitai masok Ator Pemansang tu." "Nya alai gaga ke kitai sabuat ke udah diterima perintah ba Ator Pemansang tu, sereta rindu ka sida tiga ke sama udah pulai bejalai, nya kabuah kitai saharitu berami makai salamat, lalu arap ka perintah mengkang ngiring kitai ngereja pengawa dalam Ator Pemansang tu, ngambika pengawa tu tau mansang lalu pulai ka penguntong enggau pengelantang kitai ke masok ditu. Nya alai nya naka jako aku, lalu arap ka kitai maioh tu sama gaga, sereta lantang ngintu pengerami kitai tu," pia ko Bujang. Tembu jako Bujang nya, dia sida ke biak-biak lalu muka macham main. Nambah ka main asal diri, sekeda sida ka biak-biak muka gendang tanda. Dua tiga genteran lagy sida ke begendang nya udah pansut, dia Ensingut lalu angkat betanda sereta lalu belagu. "Buah pudado masak satangkey........................," ko iya. Baru naka nya pantun tudah Ensingut, dia sida ka biak-biak lalu engkakah katawa ka iya. Meda sida katawa ka iya, iya lalu ngetu naka nya lalu enda nyadi betanda. Sida ke berami nya ngapus ka malam, nadai enda main dibantai ka sida. Lepas nya samoa sida sama kenanas ngereja pengawa dalam Ator Pemansang nya nitih ka ator enggau ajar perintah. Nya alai lima taun lepas nya, getah ke ditanam sida ba tanah nya pan mupok tau dikereja. Samoa utai bukai ke ditanam dia pan udah mansut ka belanja. Nya alai sida sarumah ke masok dalam Ator Pemansang nya sama lantang laban pengidup udah bisi, lalu pendiau pan udah tetap.