Maia Panglima Radin seduai Panglima Anji ke dulu datai di menoa Saba(Sabah), seduai iya endang udah tuai, dia menoa nya kachau bendar laban Mat Salleh ke angkat ngelaban perintah menoa Saba. Leboh maia pengachau tu, nyadi bala Nakoda Using seduai Nakoda Bali ari menoa Sabelak datai din, Nakoda Usang lalu muka kedai di menoa Papar. Leboh iya muka kedai dia perintah lalu ngasoh iya mai bala kitai Iban nyerang Mat Salleh ke benong nan ba kuta iya di menoa Sayap-Sayap di Ranau.
Nyadi kuta Mat Salleh ke diserang sida tu digaga iya tinggi bendar dinggai-dinggai ba atas tuchong bukit. Lalu kuta iya nya mega mar bendar ka ditimbak ari baroh, laban peluru ke ngelebus lepas ka langit. Buikit tu nadai utai mandong, nya alai mar bendar sida iya ka nyerang nimbak ari tanah rata.
Sekumbang Mat Salleh ke nan dia, Mat Salleh enggau bala anembiak iya lalu majak berangkut ka batu enggau lumpong kayu segala ke besai-besai kena sida iya negap ka kuta nya. Lalu enti orang mansang ka niki nguji ka ngalah ke sida, dia sida iya lalu maring ka batu enggau kayu ke endang udah disedia ka sida kena ngipa penatai bala munsoh ba kuta nya.
Nyadi orang ke nyadi manok sabong Nakoda Usang leboh rambau tu iya nya sida ti datai ari menoa Batang Ai enggau ari menoa Batang Rajang. Suah bendar bala sida tu ka nguji ngalah ka kuta Mat Salleh tang lalu nadai ga kala mujor.
Benong menoa ke kachau tu nyadi, dia Tinggi enggau tiga iko kaban iya ke sama datai ari menoa Paku pen bisi ga enggau nurun pegi ka menoa Singapura. Ari menoa Singapura sida iya lalu nambang kapal kena sida iya pegi ka menoa Sandakan. Datai sida di Sandakan sida iya lalu masok kerja perintah menoa Saba nyadi mata-mata(polis) lalu gawa besain ka pengelama tiga taun. Dua tuan bala sida tu udah gawa nyadi mata-mata alai pangkat Tinggi lalu ditiki ka perintah ari Private ngagai Lance Corperal.
Abis timpoh sain tiga taun, dia Tinggi lalu minta diri badu agi gawa nyadi mata-mata engggau perintah menoa Saba di Sandakan. Ninga Tinggi madah ka diri ka badu dia Tuan Polis lalu nanya iya, nama kebuah iya ti enggai agi gawa enggau sida. Tinggi lalu madah ka penurun diri ti pegi ari menoa sida di Paku menya ke endang enggau tuju ka gawa ngereja getah enggau rutan. Ninga jako Tinggi ka munyi nya dia Tuan Polis lalu nan ka iya, lalu besemaia ka niki ka pangkat iya ngagai Sergeant enti iya agi ka gawa enggau sida. Tang Tinggi majak madah ka diri enggai, nya alai iya lalu badu agi gawa nyadi mata-mata enggau perintah menoa Saba di Sandakan.
Lalu bala pangan Tinggi ti ka bukai iya nya, Luta, Ganggang enggau Berayun lalu sama agi gawa enggau perintah menoa Saba nyadi mata-mata(Polis). Kena Tinggi tu mungkal pengawa, dia iya lalu nginjau wang ke bisi di simpan Ganggang dua ratus ringgit.
Udah Tinggi tu nyikap diri, dia iya lalu mudik tujoh hari lalu datai di menoa Nanga Mengadau, ba menoa bansa Bisaya bechampur enggau bansa Tidong, Dusun enggau bansa bukai ke endang beempu menoa nya. Sida tu lalu ngasoh iya ngiga rutan ka iya empu di menoa Tanjung Perangan. Menoa ke alai Tinggi tu ka ngiga rutan puang bendar lalu nadai tentu maioh rutan tumboh dia. Lalu tambah mega menoa nya agi bangat mar bendar ka dipudik, lalu kira pudik sehari ari Nanga Mengadau ngagai Nanga Meridi tak penuh laban wong magang. Alah nyau ari ulu Nanga Meridi nya baru ai tak ngenjing baka lepong.
Nyadi Tinggi tu orang ke manah bendar ati, lurus ngereja pengawa sereta chukup berani, nya alai samoa orang ke gawa begulai enggau iya sigi arap bendar ka iya ngereja semoa utai ka sida leboh nya. Semoa bansa Dusun ke diau di menoa Kinabatangan ba Ulu Labuk, Ulu Sugut, Ulu Pegalan, Ulu Mumus lalu meri iya kerebo enggau chapi ke tupi. Udah meh orang meri iya jelu nya ka tupi, agi ga orang dia gaga bendar deka nulong iya nyaga sereta enggau ngundor ka jelu tupi iya nya ka nengeri awak ka bisi di jual Tinggi.
Leboh Tinggi ke diau ditu, dia perintah lalu bisi mesan ka iya, ngasoh Nakoda Usang enggau iya sama begulai nyerang Mat salleh, Tinggi nadai jako tang lalu deka sama enggau Usang begulai ngalah ka bala Mat Salleh di menoa Sayap-Sayap. Tang deh Usang lalu enda lantang bendar ati, laban iya dengki meda Tinggi diasoh perintah sama enggau iya ngiring bala anembiak mansang ngayau ngalah ka Mat salleh.
Datai sida iya di menoa Sayap-Sayap, leboh sida iya nuntong di kaki bukit Kuta Mat Salleh dia sida iya lalu ninga munyi burong embuas tak chengai-chengai.
“Manah burong kitai lagi,” pia ko Usang, “Laban kitai tu nyau bisi orang ke tau serang ngulu ka bala kitai.” Nya munyi jako Usang ke nyeriri Tinggi. Nyadi Tinggi lalu enda bemunyi, lalu iya pen enda mega ringat taja iya empu nemu Usang endang enda lantang ati ngagai iya. Tang iya nemu burong ke bemunyi nya sigi ukai burong ka manah sereta balat salah, laban burong ke bemunyi nya dikumbai burong sinu muai bulu menang orang ke tuai. Nyadi Tinggi empu ngasai ka diri empu ti baru iya enggau matak bala mansang ngayau.
Kejang sida iya ngator diri deka betiki, Tinggi lalu mai Usang ngaga jalai dua, awak ka nyamai agi sida iya berambat ka munsoh. Nyadi Usang lalu enda nyaut, laban iya ke endang agi pedis ati ngagai Tinggi.
Meda Usang enda nyaut, Tinggi lalu angkat lalu ditangkan ka Guroh, luta, Ugol, Jantin, Kubut, Nyanggau, Berayun, Uju, Gurang, Jaiya, Tunggay, Randi, Enteri, Ganggang, Datu, Belaki, lalu semoa sida tu sigi datai ari menoa Paku magang. Lalu orang ke datai ari menoa Krian ti nitih ka Tinggi, iya nya Bawin, Meling, Medan, Dawil enggau Tajak.
Meda sida iya udah angkat, dia Nakoda Usang lalu angkat ngerampas ngenulu ka bala. Meda nya Tinggi mengkang enda bemunyi, sida lalu mupok mansang semak agi ngagai kaki bukit. Datai sida ba kaki bukit, lalu leboh sida iya benong nengkadah ka atas dia enda mukai-mukai endor batu lalu laboh dibaring sereta ditikau ka bala munsoh ti betuai ka Mat Salleh ari atas kuta nya. Nyadi dia batu siti ke ditikau ka bala munsoh nya lalu ninggang kena ba pala Nakoda Usang. Iya lalu parai dia enda benyawa agi, laban pala iya ti pechah.
Meda Nakoda Usang tu udah tinggang penusah nya, sida iya lalu kemaia nya mulai ka diri naban ka bangkai Nakoda Usang. Nyadi sida ke ka nurun ngayau nya tadi lalu enda nyadi. Pemulai udah ke balang ngayau tu, sereta meda pengachau ke dikerja bala sida Mat Salleh tu mansang majak. Perintah menoa Saba lalu ngumbai Tinggi baru ari Ulu Kinabatangan undor ka Sandakan. Tinggi pen lalu undor sereta ditangkan ka Guroh, Nyanggau enggau Dawil, seraya ke lalu ngundor ka getah enggau rutan ke udah ulih sida.
Leboh sida iya udah datai di Sandakan, Tinggi lalu niki ke kubau ngagai Tuan Governor Creagh laban ka nanya ka nama kebuah perintah ke manggil iya kia. Tuan Gorvernor pan lalu nanya iya, nanya ka nama pengawa iya diau di menoa Kinabatangan ba Ulu Sugut. Iya lalu madah ka diri gawa ngereja getah enggau rutan. Iya mega lalu becherita ka diri nguta langkau enggau parit laban nangi ka diri dikachau maioh munsoh. “Munsoh” ko iya nusoi ngagai Gorvernor nya datai ari menoa Ranau ngagai Tambunan, lalu ka Keningau terus ka Ulu Papar sereta melit Bukit Kinabalu nyentok ka menoa Ulu Mumus. Semina menoa Sugut enggau Labuk aja ke nadai munsoh, laban Mat Salleh enda berani ngachau bansa Iban Sarawak ke benong bisi gawa dia.”
Ko Tuan Gorvernor, “Tinggi, nuan anang agi bedagang laban perintah ka ngaji nuan $50.00 sebulan. Ngambi ka nuan nyaga semoa menoa Sugut enggau Labuk. Nambah ka nya,” ko Tuan Gorvernor,”Perintah mega sedia ka meri nuan chabut sepuloh satu ari pupu pala orang ke kena jaga nuan. Nyadi gaji nya diterima nuan tiap-tiap bulan, tang kemensin pupu pala dibayar sekali dalam setaun.
Tinggi lalu madah ngagai Gorvernor iya nya menoa nya enda iboh dijaga, laban Mat Salleh udah besumpah madah ka diri enda ngachau menoa nya. “Kami Iban Sarawak ke diau dia,” ko iya “bisi gawa enggau bedagang.”
Ninga jako Tinggi munyi nya, Tuan Gorvernor lalu nyaut, “Enti munyi nya Tinggi, nuan tau bedagang dia, tang agi ga perintah minta nuan nulong ngemata ka menoa nya, nya alai perintah meri nuan gaji $25.00 sebulan lalu ditambah ka kemensin sepuloh chabut satu ari pupu pala tiap-tiap taun.” Tinggi pen lalu deka ga nulong perintah, nya alai iya lalu mulai ka diri ngagai menoa Kinabatangan.
Kejang sida Tinggi deka mudik mulai ka diri, dia Tuan Gorvernor lalu meri iya senapang genap iko tuboh bala sida ke bisi enggau iya undor maia nya. Nambah ka nya mega Tuan Gorvernor madah ngagai iya, enti menoa bisi agi kena kachau Mat salleh, iya deka nambah ka senjata sereta lalu ngasoh bala soldadu bansa Iban Sarawak mantu sida jemah ila. “Manah bendar runding nuan nya,” pia ko Tinggi nyaut. Sida Tinggi pen pulai mudik ka ulu.
Nyadi leboh tu bala sida ke endang udah badu nyadi mata-mata iya nya benama Guroh, Nyanggau, Dawil, Berayun, Uju, Jaiya enggau Ganggang. Semoa sida nya lalu mudik magang enggau Tinggi. Leboh sida mudik, lalu datai sida iya ba pangkalan besai di menoa Nanga Meridi, dia sida iya lalu bedarat nengah jalai alun ke endang udah digaga sida ngena wang ke diberi perintah. Kebuah sida iya bedarat nengah jalai nya laban ai mar bendar, maioh gerugu. Perau sida iya lalu dibatak bala kuli. Nyadi bala kuli ke digaji sida ngaga jalai tu menya iya nya bansa Bisaya, Dusun enggau Tidong.
Leboh sida Tinggi tu nyau datai ba pangkalan ulu, udah meh sida iya tembu bebantai, alai Mat Salleh enggau bala iya lalu rembus ga dia datai ari menoa Ulu Mumus. Meda bala sida Tinggi tu bisi dia, tak ngenong Mat Salleh. Nyau ke lama iya udah malik ngagai sida baru Mat Salleh bisi tepeda ka Nyanggau menyadi Tinggi. “Oi Nyanggau!” ko iya. “lama bendar kitai udah nadai kala betemu, nyau lelengau bendar ke pangan.” Mat salleh lalu nudok ka diri ngimbai Nyanggau. Udah meh sida iya berandau dia, Mat Salleh enggau bala iya lalu pulai baru ka menoa Ulu Mumus, enda nyadi mansang ngagai menoa Ulu Sugut, laban ati iya chukup takut ka bala bansa Iban Sarawak, ke benong be san ka senapang.
Nyadi bala Tinggi lalu mansang ka menoa Penchangan. Sehari udah sida iya datai, dia bisi tuai bansa Dusun siko ke benama Bangkut datai lalu madah ka Mat Salleh udah ngaga kuta di menoa Ranau, antara menoa Ulu Labuk enggau menoa Ulu Pegalan kena pati ai Padas. Ninga berita nya Tinggi lalu madah ngagai perintah, lalu minta kirum ka senjata enggau bala bansa Iban Sarawak ke gawa makai gaji. Perintah lalu ngirum ka Luta, Ngenang, Nion, enggau Balang lalu ditambah ka bala bansa bukai ke maioh bendar. Datai sida iya din, Tinggi lalu ngulu ka bala sida iya nyerang Mumus. Leboh ba kayau serang tu maioh bendar bansa Iban datai ari menoa Saribas pegari nama laban berani. Nyadi Luta lalu bulih ensumbar Tedong Ngelantar. Kubut lalu bulih ensumbar Bedilang Besi, lalu Maling bulih dengah tang apin deka ngaga ensumbar mindah ka nama diri.
Nyadi di menoa Ranau, Mat Salleh ukai semina begaga ka kuta, tang iya lalu niri ka kubau. Semoa bansa Dusun ke diau bekelingi dia udah rata magang ninggang iya. Kira dua ribu pintu orang ari menoa Bundu Tuhan, orang bansa Tiong enggau orang bansa Maiyan lalu udah nitih ka iya magang. Apin sida iya mantu Mat Salleh, nyadi sida tu mega udah kena pegai Tinggi magang. Nyadi Mat Salleh empu agi bedau diau di menoa Tambunan. Ari nya baru iya matak kayau anak ngalah ka tumpok menoa ke mit-mit. Semina menoa ke agi bedau nundok ka perintah Saba(Sabah) rambau nya, iya nya Labuk enggau Sugut.
Tusah ati ninga berita nya dia Tinggi lalu mai Guroh, Dawil, Nyanggau, Jantin enggau Berayun ngalah ka Mat Salleh mega ngena chara kayau anak. Orang ka anembaik sida iya ngayau tu datai ari menoa Sabelak enggau ari menoa Batang Rajang. Nyadi sida iya nurun ari menoa Penchangan lalu bemalam di menoa Ranau. Angkat sida iya ari menoa nya sida iya lalu bemalam baru ba menoa Ranagong lalu tindok ba Rumah Pasong Perintah. Leboh sida iya ke bemalam dia, agi tumu dini hari dalam, alai Jantin lalu bekindu ba luar rumah. Leboh iya ke bekindu nya, dia iya lalu ditimbak bala anembiak Mat Salleh leboh mai hari agi petang lalu kena ba perut. Sereta Jantin udah rebah nat ka bakal, munsoh lalu nimbak sida iya berari-ari ari babas. Lalu dibalas bala sida Tinggi tang malas nadai meda utai laban hari ari petang kira urong pukul empat dini-hari.
Sereta hari udah tekerebak tawas dia Tinggi lalu mai bala sida iya nitih ka Mat Salleh ninggal ka Jantin ke benong balat bendar bakal. Meda Jantin ke diadang enda nyadi, nya alai Tinggi lalu mai bala anembiak iya pulai, udah sida iya nitih ka musoh enda berapa jauh ari nya. Leboh sida iya nyau datai ba rumah pasong perintah dia sida iya lalu nemu Jantin tu sigi lama udah parai.
Sinu bendar ati semoa sida sepetunggal mai bangkai Jantin nya pulai. Iya lalu ditumbak ka sida ba menoa Nanga Mengadau ari ili menoa Penchangan. Tusah bendar meh ati semoa sida laban Jantin endang ditemu sida iya bangat berani, sereta manah enggau begulai. Iya nelap lalu mutus bendar ati ngereja semoa pengawa, sereta mega deka bendar sehati enggau semoa orang bukai, baik ka ngereja utai nyamai tauka ngereja utai ke pedis.
Udah bekau parai Jantin, Mat Salleh lalu berengkah baru nembu ka kuta iya di Ranau. Nyadi kuta iya nya dikering ka agi lalu ditambah ka iya ngena bedil enggau senapang ka ulih iya ngerampas ari maioh bengkah menoa ke udah alah laban serang iya.
Nyadi Tinggi lalu madah ngagai perintah Saba di Sandakan. Mat Salleh benong ngering ka diri ba kuta iya di Ranau. Tinggi lalu minta bantu perintah enggau bala Iban Sarawak ke gawa nyadi mata-mata rambau nya. Nyadi kuta Mat Salleh nya udah kukoh bendar digaga iya dikelingi enggau parit ke tau nyadi alai bala anembiak iya belalai. Ninga pesan Tinggi udah munyi nya dia perintah lalu enda ngasoh Sergeant Nion, Sergeant Ringgit enggau Sergeant Ngenang agi enggau ngayau, laban sida tiga tu ke sama udah tuai. Kedua agi laban keboh nya Iban Sarawak ke agi biak umur pen maioh bendar udah datai gawa nyadi mata-mata di menoa Saba. Bala sida tu lalu mudik ke ulu laban ka mantu penusah bala sida Tinggi ke diulu ka ketuai benama Tuan Jones.
Datai sida ba rumah Tinggi di menoa Ulu Sugut, dia sida iya lalu baum. Nyadi ko jako sempekat sida iya nya semoa orang ke gawa enggau perintah lalu nitih ka Tuan Jones, lalu orang bukai nya lalu nitih betuai ka Tinggi magang.
Nyadi bala Mat Salleh pen udah magang betugong di kubau sida di Ranau. Ninga berita nya Tuan Jones lalu bejako,”Kitai anang laun ngalah ka kuta Mat Salleh.”
“Manah meh enti munyi nya,” ko saut Tinggi, “Enggai ka kubau sida iya nyau majak mansang kukoh sekukoh.” Tinggi mega madah ka ngagai Tuan Jones ngelama tu iya ngayau endang enggau ati ke lantang, tang ba serak ke sekali tu iya naka iya penusah laban iya deka bebalas ka pemarai niang Jantin ke baru udah lepas pana. Guroh pen lalu bejako enggau Tuan Jones, “Enti tak baka kerja bukai, aku apin ulih dibai ngindik menoa Ranau, laban aka niang Jantin ke udah dibunoh bala sida Mat Salleh nya tak bangat petunggal kami duai Ugol. Tang ka tu laban tu tak nurun ngayau bebalas ka pemarai iya, nya alai ko penemu aku nadai ko kami duai menyadi enda enggau,” ko Guroh.
Berayun pen munyi nya ga jako udah ka ninga jako serabana Guroh enggau ai mata. Ninga jako serabana bala sida iya sekaban, Tinggi lalu madah ka pagila nya sida iya enda tau enda mupok nurun ngayau ka Ranau ngalah ka kubau enggau kuta Mat Salleh. Sida lalu nyikap diri bendar enggau senjata enggau bekal bukai ka chukup. Nyadi orang ke nyadi manok sabong Tinggi leboh ke ngayau tu iya nya Luta Tedong Ngelantar, Guroh, Nyanggau, Ugol, Uju, Berayun, Kubut, Badindang, Randi, Enteri, Sergeant Jerenang, Sergeant Balang, Dawil, Bawin, Jaiya, Ganggang bensumbar Pipit Manchal, Meling enggau Medan.
Ko Tinggi bejako enggau sida iya seraban, “Kitai tu mansang bebalas ka pemarai niang Jantin, nya alai semoa kitai anang takut sereta anang nagang diri. Semoa tengkira kitai bai kitai lalu dikena magang. Tang dalam kitai empu mesti ka mai pemerani,” ko iya, “Kitai anang nyudu ka diri ngapa enda ngena kira, laban moa bedil Mat Salleh sigi udah besedia nganti penatai bala kitai. Kitai mesti nyeliah leboh bejalai, anang nguji napak, anang enggai ngerembang babas. Takut ka iya kitai sigi endang enda, laban kitai tu mai ukor enggau nasip ke dibai kitai tu ari ada menya ari menoa kitai di tanah Sarawak.”
Nyadi manok sabong ke ngambu dulu ka bala sida Tinggi iya nya Guroh seduai Luta enggau Kubut seduai Bawin. Nyadi tuai bansa Dusun ke benama Bangkut lalu diasoh Tinggi enggau bala anembiak iya mai barang sida. Nyadi semoa bansa Iban Sarawak enda diasoh iya mai utai bukai kelimpah ari ka nyan senapang, duku enggau sangkoh.
Sida iya lalu bejalai ngulu ka sungai Sugut. Kira nyau pukul tiga lemai nya baru sida iya datai ba menoa Ulu Labuk. Sereta sida iya udah datai dia, bala bansa Dusun ke mai utai sida iya lalu berengkah ngaga langkau magang, laban bala bansa Iban Sarawak tu lalu dibai Tinggi nyurong ngiga munsoh. Tuan Jones pan deka mega enggau ngiga munsoh, tang Tinggi enggai mai laban takut ka sida tau bulih penusah ke enda disadang. Nyadi sida ke begiga nya nadai betemu enggau munsoh.
Nyadi malam nya sida iya lalu dibai Tinggi baum, berunding ka jalai sida iya ka nuntong ka kayau ngalah ka kuta Mat Salleh. Udah putus aum lemai nya, nya baru sida iya nat ka diri, lalu bala bansa Dusun nya mega nyadi ka jaga langkau, lalu ka wan ai sida.
Kejang sida iya deka angkat mupok pagi siti, Tinggi lalu bejako, “Kitai bejalai anang niti jalai raya sereta anang mega niti belakang tinting enggai ka munsoh ulih meda kitai. Nyadi gaya jalai kitai, iya nya nyerimbing neresap nengah babas.
Leboh sida iya ke bejalai, dia deh Datu ke datai ari menoa Nanga Pek, Rimbas tak lalu bejalai niti jalai raya. Iya lalu ditimbak bala munsoh ari kubau, kena lalu parai tekala nya dia. Meda utai udah baka nya, dia angkat Tuan Jones kia lalu ditimbak musoh sereta kena lalu sama-sama parai betinggang bukang bangkai enggau Datu.
Nyadi Tinggi ke di kentudi ka Luta, Guroh, Ugol enggau Nyanggau lalu bejalai nyerimbing ari baroh jalai nya. Sida lalu masang bedil ke lalu kena kubau Mat Salleh. Bala Mat Salleh nadai tentu maioh kena bedil sida, laban munsoh maioh belalai dalam parit ke endang udah sedia digaga sida ngelingi kuta nya. Nyau kepuas sida iya udah belaban betimbak nya baru kubau ulih dialah ka sida Tinggi. Bala Tinggi pen lalu niki kia. Datai sida iya dia, sida nemu bala Mat Salleh endang udah nyau rari magang melaling kubau muak ka ari sepiak. Sida nadai bulih maioh munsoh, laban serang tu enda baka kayau kitai di menoa Sarawak, nadai bebalut enggau indu anembiak. Pulai sida iya, sida lalu mai bangkai Tuan Jones enggau Datu ke lalu ditumbak ka sida ba pendam menoa Nanga Mengadau.
Udah bekau ke alah kubau nya dia Mat salleh lalu enda berani agi ngintu menoa Sugut enggau Labuk. Bala sida Tinggi lalu nguta rumah sida iya kukoh bendar, bala bansa Iban Sarawak ke nyadi mata-mata pen bela mulai ka diri gawa ka Sandakan.
Enda lama udah nya, alai Tinggi, Nyanggau, Guroh, Ugol, Berayun enggau Dawil lalu ngundur ka rutan ka menoa Sandakan sereta lalu nganjong senapang perintah ke udah dikena sida pulai ka nengeri. Tang pulai sida iya ke undur tu dia perintah menoa Saba lalu meri sida iya senapang ninting tuboh kena sida iya nyaga diri.
Leboh sida iya datai di rumah, sida iya lalu ninga berita ke madah ka bala sida Mat Salleh tu udah betugong di menoa Tambunan. Nyadi pemesai padang nya ke alai Mat Salleh ngaga kubau kira bisi lima belas batu besegi. Nyadi nama tuai bansa Dusun ke ditemu mantu bala Mat Salleh iya nya Ramantai, Kenyawan enggau Sabayai. Nyadi bansa Iban sarawak ke udah masuk enggau bala sida Mat Salleh iya nya benama Salang seduai Impin. Nyadi seduai tu udah kena salah ba atur perintah dulu ari nya, lalu udah mega kena tutup tang ulih ngelari ka diri ari rumah pasong.
Maioh bendar mega bansa orang udah nitih ka Mat Salleh, nyengkaum bansa Bajau, Suluk enggau bala bansa Dayak ari ai Segama, di Lahad Datu. Nyadi pengawa sida nya negap ka kuta, numbak tanah ke lalu di kering ka sida enggau tugong kayu. Nyadi di menoa nya maioh bendar buloh. Nyadi ramu rumah orang ke beempu menoa nya endang digaga ari buloh magang. Datai ka kayu kena sida iya berapi pan buloh magang.
Udah tembu kubau nya dia Mat Salleh lalu pindah kia enggau bini anak iya. Nyadi bala anembiak iya semina sida ke lelaki aja di bai iya diau dia, bala indu anembiak di tinggal ka sida ba rumah sida empu. Udah Mat Salleh tegap diau dia, nya baru iya nyerang menoa Keningau. Semoa orang ke nundok ka iya lalu enda dibunoh, tang enti sida iya ngelaban enda nundok, nya baru sida iya dibunoh iya leboh ke ngayau nya.
Udah Mat Salleh ngalah ka menoa Keningau nya baru iya ngalah ka menoa Papar enggau Tuaran. Udah alah nengeri dua bengkah tu, nya baru iya ngalah ka menoa Embawan(Nebawan). Dulu menya semoa nengeri tu udah magang nundok ka perintah Saba udah bekau ke diserang Nakoda Radin seduai Nakoda Usang, iya nya bansa Iban Sarawak ari menoa Layar enggau Sabelak.
Benong pengachau tu, nyadi perintah Queen Victoria di England lalu muka Gawai Besai ke dikumbai sida iya Golden Jubilee gaga kena nanda ka Queen Victoria udah lima puluh taun megai perintah ba menoa England. Kena perintah menoa Saba ngari ka bala perintah nya, dia sida iya lalu nitah ngasoh Sergeant Balang, iya nya siko bansa Iban Sarawak ke datai ari menoa Rimbas Ili, Saribas, ngulu ka mata-mata enggau orang datai baris kin ka dikumbai sida iya Royal Parade. Sida ke dikeingat ka nama bisi enggau kin leboh maia tu iya nya, Sergeant Luta ke bensumbar Tedong Ngelantar ari menoa Paku, Sergeant Jerenang ari menoa Batang Ai, Sergeant Ngenang ari Batang Rajang, Luta ari Entanak, Betong, Layar, Saribas enggau Enteri apai Jerupan ari Penunus, Rimbas, Debak.
Leboh sida iya ke enggau ngerami Gawai Golden Jubilee, dia sida iya lalu diasoh orang menoa England ngajat, bepencha enggau bekuntau. Semoa jako Queen Victoria ngagai orang maioh lalu ditemu sida magang laban lalu disalin ngagai jako Laut. Nyadi pengelama sida iya di England iya nya enam bulan. Udah lepas Gawai Golden Jubilee nya sida iya lalu dibai orang diau mendam di menoa Scotland enggau maioh menoa dalam Pulau England.
Udah sida iya pulai ari menoa United Kingdom, sida iya lalu nemu berita Mat Salleh agi udu ngelaban perintah menoa Saba. Leboh nya Tinggi lalu diasoh perintah ngayau baru, laban Mat Salleh baru udah ngalah ka menoa Putatan, Jesselton(Kota Kinabalu) enggau Kimanis.
Nyadi leboh Mat Salleh benong negap ka kuta iya baru di Tambunan dia Tinggi lalu mansang ngayau. Nyadi kayau iya tu betul bendar nunda ka jalai kayau bansa Iban di menoa Sarawak. Enti rumah alah semoa orang dia lalu dibunoh semoa. Nya alai laban Mat Salleh takut ninga berita serang kayau sida Tinggi tu, iya lalu enda berani agi ngachau semoa menoa ngalih ari Sugut enggau Labuk baka ke dulu agi ari tu.
Sekumbang Mat Salleh ngukoh ka diri ba kuta iya di menoa Tambunan, dia perintah Saba tak ngelak ka iya lalu nadai kala nguji ngayau kia.
Makin lama makin kukoh agi ga pendiau Mat Salleh. Udah meh iya nyau kukoh bendar, nya baru iya ngayau baru ngalah ka menoa Jesselton(Kota Kinabalu). Semoa barang bansa China lalu abis magang dirumpak iya. Rumah perintah menoa Saba abis mega dirusak ka iya magang. Orang ke gawa jaga kubau Mat Salleh leboh tinggal iya nurun ngayau tu, iya nya Kenyawan, Ramantai enggay Sebayai, sida iya takut bendar ka bala sida Tinggi ari Sugut enggau Labuk. Nyadi rita tu ditusoi Ramantai udah bekau menoa nyau baik.
Nyadi jalai Mat Salleh ke nyerang Jesselton(Kota Kinabalu) ari menoa Embawan(Nabawan) ka Papar lalu ka Putatan. Ari Putatan sida dulu ngalah ka nengeri Pasir China. Leboh sida iya ke ngalah ka Pasir China, sida iya balat bendar belaban enggau orang putih ke benong merintah menoa nya. Udah nengeri nya alah sida iya lalu ngerampas barang bansa China enggau ubat ke bisi dalam opis perintah. Udah tembu sida iya ngalah ka Pasir China, nya baru Mat Salleh mai bala anembiak iya merau ngalah ka Pulau Gaiya(Pulau Gaya) ke lalu ulih alah. Leboh begau tu, dia tuan ke megai wang perintah lalu kena tangkap sida sereta lalu dibai sida pulai. Pia mega semoa senapang enggau ubat-ubat enggau macham-macham barang bukai ti enggi perintah sigi abis dibai sida ka perampasan. Rumah perintah mega lalu abis ditunu sida, tang China nadai kena bunoh, laban China nadai angkat jari ngelaban bala sida.
Apin lama udah alah Pulau Gaiya(Pulau Gaya), nya baru Manang Jabu seduai Sadai ke datai ari menoa Krian lalu datai pegi ke menoa Saba sereta enggau Jampi ke datai ari menoa Paku. Sida tu lalu nitih ka bala Mat Salleh, nya alai bala sida tu bulih bendar reta enggau dengah. Nyadi orang ke nyadi ketuai sida tu rambau nya nitih ka Mat Salleh iya nya benama Gurang seduai Dana ari menoa Paku. Nyadi semoa dengah sida nya tadi enda di asoh perintah bai sida iya pulai ka menoa Sarawak lalu dengah sida iya rambau tu ka tiga iko aja. Nyadi Gurang seduai Dana agi keras bendar deka nitih ka bala munsoh. Tang perintah enda ngasoh seduai agi nyentok ka seduai iya nyau di tan sereta di ambi bala Polis baru seduai iya deka pulai.
Datai di kubau ba menoa Tambunan dia tuan ke gawa nyadi penyaga wang perintah lalu di simpan Mat Salleh dalam kuta kena iya jaga diri empu. Tuan tu lalu di bai Mat Salleh nudok sereta ngerintai ka bedil enggau senapang ti digaga ngebus ka ari dinding kuta. Ari dalam kubau tu mega bisi digaga ka sida iya alai belalai ba dalam lubang tanah.
Nyadi leboh nya laban iya ke bangat kukoh bendar, Mat Salleh sigi enda ngadang bala perintah ti datai ari menoa Sandakan deka ngayau ngalah ka iya. Semina utai ke bisi di adang ka iya, iya nya bala sida Tinggi ke diau ba menoa Labuk enggau Sugut aja.
Tang perintah mupok ngayau laban deka ngambi pulai semoa menoa ke udah di alah ka Mat Salleh. Leboh ke nyau ka ngalah ka kuta Mat Salleh di menoa Tambunan dia pedis bendar bala perintah berangkut ka semua senjata ke deka kena sida ngalah ka iya. Tujoh hari penapat bala perintah berangkut ari menoa Nanga Putatan nya baru sida iya ulih datai di menoa Tambunan. Sereta bala perintah udah datai dia, sida iya lalu belangkau ngelingi padang ke lalu nyadi ka kubau alai kuta Mat Salleh. Sida iya lalu ngadu ka endor alai ti manah, tau nyadi ka alai sida iya ulih nimbak kubau Mat Salleh ke digaga ba tengah padang berindik ari bukit miti sigi ke kira bisi lapan batu penyauh. Enti ditimbak ari tisau padang nya bendar, peluru bedil nya enda tentu datai ba kubau Mat Salleh.
Leboh bala perintah nyendia ka diri deka belaban enggau Mat Salleh, nyadi parit ke jalai ai rarat ngagai kubau nya lalu di tekat bala perintah magang. Lalu ketegal nya bala sida Mat Salleh ke diau sereta betan dalam kubau nya tadi lalu tusah bendar. Sida Mat Salleh tu tadi lalu majak kurang sereta nadai ai ka di irup enggau ka di kena sida iya mandi. Nyadi penyauh sida Mat Salleh tu tau bulih ai bukai ngejang ka kubau nya kira bisi tujoh batu. Bala sida Mat Salleh semina ulih nyauk ai maia malam hari aja laban sida takut ka diri ditimbak bala perintah ke sigi meruan ngemata ka tunga bala sida iya bejalai pansut ari kubau.
Udah sedia semoa utai nya, nya baru bala perintah nyerang nimbak kubau kuta Mat Salleh ngena bedil periok. Nyadi leka bedil ke ditimbak ka bala sida nya lalu kena bendar ba kuta Mat Salleh, tang ke terubah tu bala sida Mat Salleh bedau betatam dia ngenjing nadai bemunyi, laban tuboh sida empu nadai kena. Semua sida iya belalai dalam lubang ke tegap bendar ari dalam kuta.
Enda lama udah nya baru bala perintah nimbak kubau nya baru. Nyadi ba iya ti kedua kali tu nya baru leka bedil nya bisi kena tuboh Mat Salleh empu enggau maioh agi bala kaban sida dia ke bukai. Nyadi Mat Salleh tu kena ba pala lalu parai kemaia nya. Meda Mat Salleh tu udah parai, nya baru Ramantai, Kenyawan enggau Sabayai mai orang bukai rari. Leboh sida tu ke rari dia sida iya ke tuai agi umur lalu kepai-kepai nyan menira burak ke tanda alah lalu badu agi ngelaban perintah. Udah nyau bala rari, nya baru tuan tukang wang ke udah kena tan ka Mat Salleh dalam kubau nya pansut.
Nyadi bala sida Ramantai tadi lalu madah ngagai Tuan Brett ke nyadi ketuai bala perintah iya nya Mat salleh udah mati. Ninga berita nya Tuan Brett enggau bala pemesai bukai ke bisi enggau iya dia lalu tama ka dalam kubau deka meresa bangkai Mat Salleh. Datai sida din sida lalu meresa bangkai iya nya. Udah tembu semoa tubuh, pemesai enggau peninggi Mat Salleh nya tadi tembu di sukat sida iya, nya baru sida iya muntas perut ngambi atau Mat Salleh ke lalu dibai sida iya pulai.
Nyadi kenu ko berita, atau Mat Salleh tu lalu dikirum ka sida iya ka menoa Europe. Udah tembu semoa pengawa nya, nya baru perintah mai bini Mat Salleh tiga iko nya enggau anak sida iya pulai ka nengeri. Nyadi bini Mat Salleh siko nya lalu jadi enggau Impin, bansa Iban Sarawak ke datai ari Batang Ai ke sama bisi enggau Mat Salleh nan ka kuta nya di Tambunan. Nyadi pesaka Mat Salleh ke lalu diberi perintah menoa Saba ngagai Tinggi, iya nya setawak selabuan ti nyadi ka tanda Tinggi tu udah puas bendar enggau ngayau nyerang Mat Salleh. Setawak tu manah bendar gaya ke nyau ngenjing liau-liau gamal sereta lalu nadai chelum mimit. Enti iya dipalu nyawa setawak tu mega ngenjing rengong-rengong.
Meda perintah menoa Saba udah meri setawak nya ngagai Tinggi, dia bini Mat Salleh ke tuai lalu deka nganti setawak nya ngena rega $200.00 ari Tinggi, tang Tinggi sigi enggai laban enti setawak nya udah di jual iya, nyadi pesaka nya lalu nadai agi di peda nyadi ke tanda iya udah nyerang ngayau sereta ulih ngalah ka Mat Salleh.
Di Saba maia nya kelia, semoa menoa ke nundok ka perintah kena serang Tinggi enggau bala Iban Sarawak ke bukai iya nya Tuaran, Timbau Batu, Mumus, Sugut enggau Labuk. Tang leboh Mat Salleh benong kering ka semina Sugut enggau Labuk aja ke enda ulih dialah ka iya dalam menoa Saba laban ke takut ke bala sida Tinggi.
Udah abis pengachau laban Mat Salleh dia Tinggi lalu ngemansang ka dagang iya baru ba menoa Ulu Sugut, iya bedagang ka getah, rutan enggau jelu tupi. Nyadi semoa jelu kerebo ke bisi ditupi, iya nya seratus lima puluh iko enggau jelu chapi ke bisi di tupi iya nya seratus lapan puluh iko. Gaji ke di terima iya ari perintah menoa Saba iya nya $25.00 ninting bulan agi mega di asoh Tuan Governor Creagh di terima iya berari-ari nambah ka kamensin ari chabut pupu pala semoa orang ke kena pegai iya $750.00 dalam setaun.
Tang Tinggi tu enda panjai umur laban iya parai ketegal iya ti bisi pemedis ti di adap iya, iya nya penyakit bengkak belakang. Balat bendar iya berubat ba perintah, manang enggau dukun di menoa nya kelia tang pemedis nya majak enggai gerai ke lalu naban ka nyawa iya. Nyadi leboh Tinggi tu mati lalu laban ngenang pemesai tulong iya ngagai perintah menoa Saba, dia perintah lalu ngantung bendira setengah tiang sehari nya.
Udah mati Tinggi, dia pengawa dagang iya tadi lalu tebasau bendar laban menyadi iya ke benama Nyanggau ti enda nemu surat. Tang ari semoa utai ti di pedagang ka iya nya semakau ke balat udu amat ngerugi iya. Laban danji iya udah mati rega $60.00 sepikul lalu besain enggau towkay China. Nambah ka nya semoa puku bukai nya lalu enda ulih di jual Nyanggau laban iya kurang agi pemintar ari Tinggi sereta lalu di balut enda nemu surat.
Meda Tinggi udah mati lalu agi ngenang budi iya perintah menoa Saba lalu nyiri Nyanggau nukar iya megai menoa ka udah dipegai Tinggi ba Ulu Sugut enggau Labuk. Nyadi Nyanggau tu lembau bendar dichiri ka nyadi tuai laban iya nemu diri empu enda berapa pintar ati megai orang baka Tinggi. Lalu pia mega leboh iya ke nampung dagang niang Tinggi, iya mega enda tetagih ka utang orang, lalu reta bukai baka chapi enggau kerebo tak lalu nyau ngapa.
Udah meh ninga berita Tinggi tu udah parai dia unggal iya ke benama Luta Tedong Ngelantang ke datai ari menoa Paku ke udah pulai ke menoa Sarawak lalu mai Mujah anak Mambang ngabas pengawa iya kin. Leboh seduai iya nyau datai di menoa Ulu Sugut dia ka naka utai ke di kemisi ka niang Tinggi agi bisi tinggal iya nya kerebo enam iko enggau chapi ka dua puluh iko aja, nambah ka setawak, bedil empat batang, chanang Kimanis enam labuan, gong enam labuan, engkerumong seraban enggau tajau rusa sigi. Nyadi utai bukai ke bisi disimpan Tuan Aplin di Pulau Labuan iya nya setawak selabuan, bedil dua batang sama berat sepikul enggau chanang Kimanis dua labuan. Udah semoa utai tu ditemu, dia Luta seduai Mujah lalu mulai ka diri mai semoa reta nya pulai ka menoa Paku, Saribas.
Sekumbang Nyanggau ke megai menoa di Ulu Labuk enggau Sugut, menoa nya agi mimit bisi kachau. Nya alai laban Nyanggau suah kayau anak kena iya ngalah ka munsoh. Udah parai Nyanggau dia Guroh mega lalu dichiri ka perintah menoa Saba nyadi ketuai nganti Nyanggau. Lalu Guroh tu suah bendar ngayau ngelaban munsoh ke agi ka ngaga pengachau di tisau menoa enggau menoa ulu. Nyadi Guroh tu landik bendar megai menoa laban iya bisi bendar penemu sereta tau mansut ka runding diri laban iya bangat landik bendar bejako. Sekumbang Tinggi agi nyadi tuai megai menoa nya, dia Guroh sigi berari-ari nangkan ka iya ngadu ka runding sida ba pengawa enggau serang kayau.
Leboh Guroh udah parai dia anak menyadi iya ke datai ari menoa Bangkit dalam ai Paku ke benama Begeri seduai Luat anak Ibi lalu ngambi reta iya ari menoa Saba. Tang leboh seduai iya nyau datai di Saba din, dia menyadi seduai siko ke benama Gadoh ke endang udah lama gawa lalu diau begulai enggau aya sida ke benama Guroh seduai Ugol din, lalu pulai sereta enggau seduai ka Sarawak kitu mai bini anak.
Nyadi sama sereta enggau Gadoh tu pegi ke menoa Saba iya nya Nakoda Kassim seduai menyadi iya ke benama Muling ari menoa Awik dalam pati ai Krian. Nyadi Muling tu udu beberita bendar kering tang iya parai di menoa Sandakan.
Leboh Kassim seduai Muling baru datai di menoa Sandakan, Saba, nyadi seduai iya endang sama gawa dalam babas baka bala bansa Iban bukai. Tang udah bekau mati niang Tinggi seduai Nyanggau, leboh maia Guroh ke nyadi ketuai, dia Guroh lalu minta Kassim tu nyadi ketuai megai menoa Labuk, lalu iya empu ngemeran ka diri semina megai menoa Sugut.
Leboh iya ke nyadi ketuai tu, lalu laban iya sigi endang udah nemu reti besekula di menoa Sarawak tu sebedau iya nurun pegi ke menoa Sandakan kin, nyadi Kassim lalu diasoh perintah menoa Saba nyadi Majistrate ngena pangkat Assistant District Officer(ADO/Kunsil) di Ranau. Nyadi iya megai pengawa nya lama bendar di menoa Ranau ke alai iya lalu dititah perintah sereta diberi pangkat Orang Kaya-Kaya(OKK). Nyadi Kassim tu bebini di Saba ngambi anak tuai bansa Dusun.
Udah Orang Kaya-Kaya Kassim tu pulai ari menoa Saba enggau bala anak bini iya ke menoa Sarawak, lalu leboh iya udah datai di menoa Awik dia iya balat bendar ngemeran ka pemansang bansa Iban. Iya balat bendar nulong bejalai ka pengawa pengarap Christian nyadi Anglican Mission di menoa Saratok lalu enggau orang numboh ka sekula St.Peter’s Primary School, Saratok ambi ka bisi nyadi ka alai bala anak bansa Iban belajar ka reti besekula. Pengawa Kassim ke keras bendar ngemansang ka bansa Iban nya meruan agi dikenang bansa Iban datai ke kemaia tu hari. Iya parai di menoa Awik lalu ditumbak ka ba pendam Gereja St.Peter’s di Saratok dalam taun 1927..
, seduai iya endang udah tuai, dia menoa nya kachau bendar laban...){kind=link}