Enti udah enggai nyimpan antu pala agi,kitak tau numbak ke ia memanah baka kitai nganjung mensia ke parai mega.Semina ulit ia mina tujuh ari enti menya,ia disengai dengkah ba pua celum alu tepu ba sintong dibalut manah mega,ia dibiau ke manok alu sintong enya disengkelan,udah nya baru nyengai ia.Pagi sitik alu danjung ke pendam alu ditumbak 6 kaki penalam mega alu pulai ari pendam diak bisi tambai celum mit dujak ba ulu ngau ili rumah panjai nanda ke ngulit ke antu pala.Maia ngulit ka antu pala diak enda tau ngemai tubo tauka pako.Ragak ingar pen enda tau mega.Pengambis ulit diak lumbong dipenyadi,intu ia pen sebaka alu malam beserara di adu mega.Pengudahnya diak antu pala tu ia nadai regau nadai ngacau kitak ti numbak ke ia mega.
Sempekat aku.
1) Enti kitak meda orang ka nunu antu pala nya,kitak tau ngelara ia dulu tang enti majak ka nunu.Kitak madah agai ia,lubah nunu antu pala nganti nuan udah ngelebus ari endur ia nya.Beguai guai kitak nyeliah diri ari endur bagi orang nunu antu pala nya tadi.
2)Enti kitak meda orang nya benung nunu pala nya.Kitak ngaga diri nda nemu anang ngetu ba senentang nya.Ka orang nya ngelala dik ia rerangau ngangau ke dik ketegal ka ngemai ngirup apa samoa ba diak,anang sesekali kitak ngetu tauka makai utai diberi orang ke nunu antu pala nya.Anang nyaut kangau ia,ngaga diri enda ngelala ia.Baka ke nadai diak ia dipeda kitak mega.Ngaga diri tulik ngaga diri buta enda meda ia ti nunu antu pala nya.
3)Enda tau sesekali ngeludah maia mansa orang ke nunu antu pala nya.
Kabuah ia baka tu.
1)Semengat antu pala nya udah ditunu ia alu regau alu ia ngiga orang ke ngemunas ia mega.Ia ngerau ia mucau.Enti semengat ia bisi tepeda orang bukai ke mansa diak bisi enggau ia ke nunu nya diak orang nya kena rampit tulah disumpah antu pala nya.
2)Sapa bagi nunu antu pala nya,ia ka digerau sumur idup,penulah enda atai tekala nya mega,sumpah antu pala ka ngemunas purih pantih ia ke nunu nya mega.Enti maia bisi sida ia sebilik ngandung diak antu pala tu sigi minta nyawa anak mit nya.Niang aki kala enggau ngadu penulah siku kitai iban ti disumpah antu pala suba ba menua Saribas kelia maia taun 1960an.Enti siku dah mati ba bilik nya tak bejurut mati mega.Tu utai amai anak,jang,ucu enggai kitak lesie mega enti kitak enda ngingat sempekat aku tu lebuh kitak enggai beguna ke antu pala nya agi.Tu ukai utai bertundi enda ulih ditawar ngena sembiang laban semengat antu pala tu semengat regau ti ngipa kitak ila lebuh enda ngingat agi.
3)Nya kabuah orang kelia enda kala didinga ngelara orang ka nunu antu pala laban maioh sida katuai kelia enggai madah enggai ngajar laban ngica purih pantis ia aja punas ko sida ia.Ipak ka nunu antu pala ko orang katuai kelia.Nya alai ba ditu nyempulang kenang kelia ngica kitak ila asie ngingat sempekat aku mega.Reti ia kitai enda tau ngelara orang ti nunu nya ngenangi semengat antu pala nya ngumbai kitai enggau ia ke nunu antu pala nya.
4)Semengat regau antu pala endang kering amai nyimpan pemedis ati ia.Maia orang ti nunu ia nya enda ngadang ila sigi ulih ia.Semengat ia enda parai enda sebaka pemarai kitai mensia ti ninggal ke tubuh kitai.Semengat ia tusah diperubat mega tusah ditabar enti manang tauka beliau empai atai ba adan ba penemu.
