Apin lama udah bala sida Utik dialah lalu dibunoh bansa Murut di Terusan, Minggat Apai Runai ari menoa Awik lalu nurun baru ngulu ka bala anembiak iya belayar ngagai menoa Pulau Sumatra dalam taun 1890. Orang ari Awik, Krian, Melupa enggau Sebelak ke sekali tu maioh bendar enggau iya pegi. Nyadi puku ke dibai sida iya pegi ka sekali tu maioh bendar ti digumpul ngagai mata wang kira bisi bulih $10,000.00. nyadi kebuah Minggat deka pegi ngagai menoa Pulau Sumatra nya laban iya udah kelalu chukup maioh utai udah ulih ba menoa kitai di Sarawak ditu, lalu semina utai ke bedau bisi dikemisi ka iya rambau nya, iya nya guchi ti mesai buah terong Dayak. Tuan Raja sigi enda ngasoh iya pegi agi meda umur iya ti nyau tuai, tang laban Minggat tu ke kering ati nya alai iya enda ngasi.
Maioh bendar bala Iban enggau Minggat belayar ngena kapal ke benama Normanby ka menoa Singapura, nyengkaum anak iya ke tuai ti benama Munan enggau anak menyadi iya ti benama Nyanggau Apai Linggi.
Ari Singapura dia sida iya lalu nambang kapal kena ngelayang ka Pulau Sumatra. Leboh sida datai di menoa Panai, dia Minggat lalu betemu enggau Raja menoa nya ka alai iya nyua ka surat Tuan Raja Menoa Sarawak. Leboh iya ke betemu enggau Raja tu, dia Minggat sigi ngena ngepan ti udah diberi Tuan Raja Charles Brooke. Nambah ka nya sekumbang ke nengah jalai niki ngagai rumah Raja nya, Minggat sigi di iring bala anembiak iya enggau payung sutera kuning kena ngayan ka diri nya bansa raja ngagai tuai orang empu menoa nya. Udah iya nerang ka penatai diri ngagai Raja nya, Minggat enggau anembiak iya lalu begiga ka reta ka deka dibeli sida. Tang enda mukai-mukai apin sida sampal bulih magang, dia Minggat lalu sakit pedis perut ti ngujong ka iya parai di menoa Panai, Sumatra.
Udah parai Minggat, bala anembiak iya lalu pulai ari nyin di ulu ka Munan seduai Nyanggau ka menoa Sarawak. Nyadi pemulai sida tu bulih bendar reta. Datai di menoa tu, niang Minggat ka parai lalu dirapoh bala sida nitih ka adat Iban ti ngintu pemati orang parai leboh maia sida iya mindah jauh ngejang ari menoa.
Leboh sida Munan tu datai di Awik, dia tuai Iban siko ke benama Ampan endang udah digelar perintah Sarawak nyadi Penghulu ka ganti Minggat. Sereta iya udah di chiri ka nyadi Penghulu dia Ampan tu keras bendar deka muai kampong pulau papan pulau ban ke endang udah digalau sida Minggat di menoa nya kenyau ari terubah sida iya berimba ka menoa leboh sida iya baru pindah kia ka ari menoa Paku menya. Tang Munan nagang iya enda ngasoh berimba pulau nya enggai ka nadai agi alai ngiga rutan ngiga danan ka guna bala anak telesak sida iya dudi hari ila. Ninga tangang nya dia Ampan tu keras bendar, nya alai Munan lalu nemuai ka menoa Paku enggau menoa Padeh nanya ka reti adat tuai pasal atur ngalau pulau kampong di menoa lama ari Garan seduai Nanang. Leboh Munan ka nemuai tu, dia Ampan pan bisi mega nemuai ngagai Tuan Resident Bailey, lalu madah ka Munan minta bantu Garan seduai Nanang ka ngelaban perintah. Nya ninga jako padah Ampan munyi nya ke lalu ngasoh Tuan Resident Bailey balat bendar pedis ati.
Nyadi ke tegal jako petenah tu, dia Tuan Resident Bailey lalu manggil Munan ngasoh iya enda tau enda undor ka kubau di Kabong ba Nanga Kalaka awak ka mutar ka pengawa nya. Munan pan lalu undor ngena perau boung panjai datai ari Awik lalu di kemudi ka Jungan Apai Chaong ari menoa Sebelak. Leboh ke datai di kubau Kabong sereta tepeda ka perau Munan nyau datai dia Tuan Bailey laban ke udah pedis ati lalu deka nimbak Munan ngena pistol siti-siti ba jari iya sepiak-sepiak.
Sereta meda pengachau tak lalu ka nyadi, nya alai Pengiran Matali iya nya siko kunsil ti datai ari Simanggang ke sama enggau Tuan Resident Bailey lalu ngerara madah ngagai seduai nadai guna belaya. Enti kita belaya ko iya, Tuan Resident Bailey seduai Munan tentu sama-sama mati. Iya lalu ngumbai nya ngena iya empu lalu mai Munan empu betemu enggau Tuan Raja ka Sarawak(Kuching). Ninga jako runding Pengiran Matali dia Tuan Bailey lalu setuju ngasoh Munan nya tadi dibai iya sama ngagai Tuan Raja ka Sarawak.
Leboh ke datai di Sarawak, laban Tuan Raja ke mending ka jako ti ditulis Tuan Bailey ba surat dia Munan tu tadi lalu kena tan sereta dibichara ka dulu. Tang laban penyalah nya sigi ukai bepun ari iya sereta petara pen enda ga ngelanjur ka Munan, nya alai iya ti di tan pan enda lama bendar alai iya lalu dilepas ka Tuan Raja baru. Leboh ti ngelepas ka iya dia Tuan Raja lalu nangkan madah ka Munan enda agi tau mendam diau ba sebelah menoa Saribas, lalu iya pan nadai agi kuasa nyadi ketuai di menoa nya, laban iya lama udah bebini nguai ka Subang lalu endang udah nampong ruai tikai Libau Rentap di menoa Julau.
Di menoa Julau udah nya Munan lalu dichiri ka perintah nyadi Penghulu. Sekumbang leboh Munan tu diau di menoa Julau dia menoa Ulu Batang Ai agi udu bendar kachau bebunoh ngelaban diri sama diri, sereta mega bebunoh ngelaban Tuan Raja di ulu ka bala sida Ngumbang, Bantin, Imba, Allam enggau Ngelingkong dalam taun 1898.
Leboh menoa ke kachau tu, Tuan Raja lalu ngasoh Munan ngayau bedarat ngalah ka menoa Ulu Batang Ai. Nyadi iya ke nurun ngayau tu ngulu ka menoa Batang Katibas, lalu melunggang ngili ka menoa Lubang Baya ke alai iya lalu munoh munsoh ngili ka Batang Ai nyentuk ka ngagai menoa Nanga Kaong. Nyadi Munan nadai ngadang bala sida iya ke nuntong nya mujor bendar, nya alai bala Munan bulih pala ka dengah lapan belas igi, enda nyengkaum tangkap.
Lalu tekenyit bendar Tuan Resident Bailey di Simanggang kena pansa bala sida Munan ti pulai ngayau tu tadi. Nyadi sida Munan tu enda ngetu di Simanggang tang lalu majak merau mulai ka diri meraka tasik pulai ka menoa Sibau(Sibu).
Apin lama udah Munan pulai ngayau ngili ka Batang Ai, endor siko ketuai bansa Iban ke benama Pasa, iya nya orang ari menoa Sekundong, Paku lalu nurun mendam diau ba menoa Kuta Waringin ba menoa kilah Kayong, Kalimantan Barat, Indonesia kin ka agi ba menoa kena pegai perintah ari menoa Banjarmassin. Datai sida Pasa tu din dia iya lalu diau ba Pengiran Ratu, iya nya kepala orang ti megai perintah ba menoa nya. Pasa lalu gawa ka Pengiran Ratu undor mudik kulu kili nitih ka asoh Pengiran Ratu. Meda Pasa nya bagas bendar gawa sereta lurus bendar ati, nya ngasoh Pengiran Ratu lalu rindu bendar ka iya.
Nyau ke lama Pasa tu udah gawa sereta diau ba Pengiran Ratu, dia Pengiran Ratu lalu meri iya tajau lama lima igi, iya nya benda timbang orang ke salah ngelaban perintah. Pasa lalu gaga bendar ati beempu tajau lama nya lalu dibai iya pulai ka menoa. Datai di menoa iya lalu begawai nama ka tajau nya, ti chukup ngerindu ka ati bala pengabang maioh meda gaya pemidik iya ke diberi Pengiran Ratu reta.
Udah tembu gawai tu tadi dia Pasa lalu nurun baru sereta disempulang Libu ke bensunbar Bedilang Besi ka menoa Kuta Waringin. Leboh ke pegi tu Pasa seduai Libu Bedilang Besi enda berapa bulih tajau, lalu ka semina Libu Bedilang Besi aja ke bulih tajau ka sigi aja.
Tinggal sida ti pegi tu alai orang di menoa Ulu Engkari lalu kachau baru ngelaban perintah dalam taun 1902. Sida tu lalu di asoh perintah kayau Munan ti datai ari menoa Sibau, Banta ari menoa Skrang enggau Insoll ari menoa Padeh. Nyadi bala Insoll seduai bala Banta ke datai ari Ulu Skrang nya tadi alah leboh ka betempoh enggau bala sida Kana ke benong nan ka rumah Jimbau. Semoa bala anembiak Banta seduai Insoll nya tadi ke parai leboh tu bisi tiga belas iko.
Nyadi bala Munan ke nuntong ba rumah Jimbau tiga hari dudi agi ari bala sida Insoll seduai Banta ka udah alah, lalu bulih ngapar ngalah ka rumah Jimbau nya leboh orang benong begawai enchaboh arong gaga ka pala dengah sida iya ke udah ulih tiga hari dulu ari nya. Semoa pala dengah ke ulih bala sida Munan leboh tu iya nya lima puloh igi enda nyengkaum tangkap. Rumah Jimbau ke udah alah laban Munan tu tiga taun dudi ari bala perintah ti di ulu ka Munan belanggar ba menoa Wong Adai dalam menoa Kanowit ngelaban bala sida Bantin.
Nambah ka kayau ti kena sebut tu, Munan mega suah bendar nyadi ka penchilin(sabong) bala Tuan Raja ngelaban Bantin seduai Ngumbang di menoa Batang Ai enggau ngayau ka menoa Batang Rajang enggau menoa Batang Balui di Belaga ngelaban bansa Iban enggau Badang ke agi ngelaban perintah.
Munan parai dalam taun 1914 lalu di kubor ka ba menoa Pulau Keretau seberai pasar Sibau(Sibu). Leboh iya diau di Sibau udah ke angkat ari menoa Julau ari taun 1905, dia iya lalu di chiri perintah nyadi Penghulu Dalam, nambah ka nya iya mega lalu nyadi kaban Kunsil Nengeri begulai enggau Rekaya Pemancha Nanang seduai Pengarah Ringkai ngari ka bansa Iban rambau nya kelia.
Nyadi orang ke sama serambau enggau Pasa tu pegi ka menoa Kuta Wairingin, alai orang ari menoa Paku begulai enggau orang ari menoa Rimbas enggau menoa Krian lalu nurun pegi di ulu ka Nyaru anak Munji iya nya orang ari menoa Karangan Pinggai dalam ai Paku, lalu sida tu pegi ngagai menoa Sumatra. Semoa tubuh sida tu bisi sereta nurun iya nya tujoh puluh empat iko. Datai sida iya di menoa Jambi dia sida iya nadai bulih getah. Laban ketegal nya alai sida iya lalu mulai ka diri ngelayang ka Malaya laban deka ngiga pengawa ngelingi menoa Kula Lumpur.
Datai sida iya di menoa Kuala Lumpur, nyadi perintah menoa nya sigi enda agi ngasoh orang berimba ngerumpang kampong puang. Nyadi sida lalu dibai perintah menoa Malaya ngayau ngalah ka menoa Pahang. Udah sida iya ulih ngalah ka menoa Pahang, nya baru sida iya bebagi tuboh, sekeda nya bekerja di menoa Bidor, sekeda nya di menoa Sungkai, Ipoh enggau Tanjung Malim, semoa nya di menoa Perak magang. Nyadi Nyaru seduai Entingi Apai Berenai lalu ngulu ka anembiak seduai ngiga pengawa ngagai menoa Terengganu, lalu Melina ari menoa Ulu Anyut lalu ngulu ka anembiak iya gawa ka menoa Perak. Nyadi sida pulai enda sereta, tang semoa sida ti pegi ka menoa Perak bulih agi wang ari orang ka bukai.
Udah bala sida tu datai di menoa, nya baru Legam anak Lemada, iya nya orang ari menoa Jukun, Paku lalu nurun ngulu ka orang pegi ka menoa Sandakan dalam menoa Saba(Sabah). Datai sida din, sida lalu ngereja getah semalam. Pulai sida ke pegi tu, semoa sida tu bulih magang wang.
Udah pulai bala Legam ari menoa Sandakan, Mujah anak Mambang iya nya orang ari menoa Nanga Boung, Paku lalu nurun ngulu ka orang pegi ka menoa Perak. Terubah sida iya datai kin iya nya nambang kapal ari Sarawak(Kuching) ka menoa Singapura, tang perintah enda ngasoh sida iya nya mindah jauh. Meda baka nya, dia sida iya lalu rari, lalu ngenchuri nurun belalai nambang kapal ari Pulau Labuan. Datai meh sida iya di menoa Singapura dia sida lalu bekayuh ngena perau diri empu ka menoa Malaya. Datai sida iya din dia perintah benong enda ngasoh orang berimba ngerumpang kampong puang.
Meda perintah nagang sida iya berimba ngerumpang kampong puang dia sida iya lalu mulai ka diri ka menoa Singapura baru. Datai sida iya dia, sida lalu betemu enggau Penghulu Sang, Rumpang seduai Nyaru ke baru datai mai bala anembiak pegi ari menoa. Ari Singapura Mujah lalu betuai ka Kok Apai Berangum nitih ka Geraman ke udah nyau ka menoa Pulau Langkat. Ari menoa Pulau Langkat sida iya lalu belayar baru ka menoa Temiang ngena perau ban sida empu. Sida bekayuh mudik Temiang kira ka ulih pudik kapal sehari ngagai simpang. Leboh nya menoa benung kachau bendar antara perintah Belanda mgelaban bansa Acheh di menoa Indonesia. Tang sida ke gawa tu endang ati neresap ka diri ensurok menoa rambau nya ka benong kachau.
Nyadi semoa bala anembiak ke nitih ka Geraman serak tu bisi tujuh puluh enam iko iya nya champur bansa Iban ari menoa Paku, Layar, Rimbas, Krian, Sabetan, Sabelak enggau Undup. Di menoa Temiang sida iya bejalai berema lima hari sereta betiki ka bukit, udah nya baru sida iya bisi tetemu ka getah ke tau dikerja. Pengelama sida iya bekerja dia, iya nya lima bulan, alah meh nyau datai maia sida iya udah bisi parai tiga iko sereta bakal siko leboh kena serang bansa Acheh ari Indonesia.
Sida tiga iko ke parai nya benama Asut ari Undup, Apai Sumping enggau Atar ari menoa Sabelak. Nyadi sida ke bakal nya benama Unjil ari menoa Undai, Rimbas. Meda anembiak diri udah kena laban penusah baka nya dia bala sida iya nyau beban terabai laban deka bebalas. Tang runding orang ka tuai mar alai malas, laban tuboh sida iya mimit lalu bala munsoh sigi ditemu endang maioh bendar.
Nya alai sida lalu dibai orang ke tuai mulai ka diri. Nyadi orang ke lalu mendam diau din leboh nya, iya nya Sana, Pasai, Entipan, Merupi, Sunggom, Antin enggau Lidom. Sida tu nyau ka semoa orang ari menoa Getah dalam menoa Anyut magang. Nya alai laban rumah nyau puang nadai orang agi nampong ketegal nadai agi pulai udah sida iya ka pegi, rumah Danggat Apai Manin di menoa Getah, Anyut pan lalu pechah laban ke engka orang ke agi tinggal di menoa nya enda tediri ka rumah agi ketegal tuboh sida ke lelaki nyau abis enda pulai pegi ari menoa orang. Kemaia tu, rumah tu meh ke panjai bendar kelia udah nampong rumah orang bukai magang.
