Apin Lama udah bekau perintah Sarawak ngalah ke Libau Rentap di Bukit Sadok, nyadi di menoa ulu sungai endang agi meruan kachau tang ba menua muak ke ili nyau mansang talok lalu nemu begulai sejalai enggau pangan diri. Nyadi pengawa orang ke ngerompak di Tasik China Selatan pen nyau bisi ga kurang, nya alai orang ke datai ari menoa Paku siko ti benama Jamit Apai Madu lalu nurun pegi numpang sekunyir(kapal layar) bala bansa Laut(Melayu) ka nengeri Makassar, Indonesia. Iya mega lalu pegi ke Singapura laban iya ti gawa nyadi kelasi ba sekunyir nya. Datai Jamit tu di menoa Singapura dia iya lalu betemu enggau kitai bansa Iban siko ke benama Insoll. Seduai iya tu meh ke terubah iya bansa kitai Iban datai di menoa Singapura rambau nya kelia.
Udah pulai Jamit Apai Madu tu, nya baru Kedit Apai Enggang ari menoa Paku ngaga siti perau pelayar kediri empu kena iya ngulu ka bala anembiak iya pegi ka Telok Saba ke dikumbai kitai kemaia tu Nengri Sabah.
Orang ari Paku ke bisi enggau iya belayar ka Telok Saba rambau tu menya iya nya Umpang Apai Penghulu Ambun, Mambang Apai Mujah, Randi, Laman Apai Muri, Kangkik seduai Tumbing. Nyadi utai ke puku ke dibai sida belayar nya semina setawak, beras enggau bedil. Maia rambau tu kelia, penatai pemisi bansa kitai Iban kurang bendar laban ke jarang bendar bisi ngembuan mata wang baka bansa bukai. Kebuah alai pia laban nadai hari begiga, ketegal ti kiroh ngayau awak ka tulih ke nama bujang berani ari ngayau nya tadi. Nyadi sida ke nurun pegi tu sigi sedia enggau chukop senjata kena bebunoh enggau munsoh di tasik laban tunga ka utara Pulau Borneo tu sigi agi maioh Lanun enggau Bajau ti ngipa lalu ngerompak orang ke belayar ba sebelah Tasik China Selatan.
Datai sida Kedit tu di menoa Mukah dia sida iya lalu nukar puku sida nya tadi enggau pesaka lama bansa Melanau. Menoa kena pegai Raja Sarawak leboh tu menya semina naka Nanga Mukah. Duit ke dibai sida mimit mimit nya ulih sida iya ke gawa makai gaji jaga kubau Fort Lily di Betong. Nyadi gaya chap duit ke bisi di bai sida iya nya ringgit ular, ringgit burong, ringgit gambar matahari enggau duit sen. Di Telok Saba maia nya baru bisi duit ringgit Kudat ke bisi gambar bansa Dusun.
Nyadi reta ke ka digiga sida kin ka, laban sida ninga bansa Dusun di menoa nyin bisi ngembuan tajau lama sebaka enggau tajau lama ke udah dikembuan bansa Dayak Iban dalam menoa Sarawak ari asal. Nyadi bansa tajau ke endang udah dikembuan bansa Dayak Iban leboh rambau nya iya nya:
Nama Tajau Rega Sigi
Salang alang $ 150.00
Rusa Salang alang $ 200.00
Begeri $ 200.00
Rusa Begeri $ 200.00
Rusa Randok $ 250.00
Betanda Begeri $ 200.00
Betanda Bendar $ 280.00
Menaga $ 300.00 - $ 350.00
Ningka Menaga $ 320.00 - $ 370.00
Ningka Bendar $ 400.00
Sergiu $ 600.00 - $ 900.00
Guchi $ 700.00 - $1,000.00
Nyadi leboh tu, sida iya enda pegi ke Brunei tang lalu belayar lanjur ka Telok Saba. Datai sida di Telok Saba, sida lalu masuk ngagai Sungai Putatan, lalu diau dalam perau layar sida nya. Ari perau layar nya baru sida iya bejalai ngagai rumah bansa Dusun, rumah bansa Sulok, rumah bansa Tidong, rumah bansa Bajau enggau rumah bansa Lanun. Sida iya enda berani bejalai ngagai menoa tunga ke atas bukit tauka ke tebing ka agi laban sida iya enda ngelala bagi sapa orang ke beempu menoa di Telok Saba nya tadi. Udah abis puku kena sida iya meli tajau dia sida Kedit tu tadi pan lalu mulai ka diri ke menoa Paku lalu semua tajau ke ulih sida leboh ti pegi ke terubah nya semina enambelas igi aja.
Leboh sida nyau datai di menoa Paku, nya baru sida Kedit tu tadi nusoi berita pemegi sida ke menoa Telok Saba ke lalu ngenyit ka ati bala anak lelaki maioh ba menoa kitai di Sarawak leboh rambau tu kelia. Rindu bendar sida iya ninga berita nya, nya alai ati bala anak lelaki pen nyau beperansang deka pegi magang ngagai menoa orang, laban jako randau sida nyau siuh magang bekenang ka menoa orang ti jauh ngejang ka menoa kitai di Sarawak ke enda kala alai bala kitai bansa Iban datai ngelama tu.
Ninga berita Kedit ti pulai pegi bulih bendar reta tengkira, nya alai Abang Tek seduai Abang Chek iya nya anak Laksamana Amir enggau anak Laksaman Omar di menoa Spaoh enggau di menoa Debak ke udah diambi perintah Sarawak kerja nyadi kunsil di Simanggang lalu bisi bendar ati deka pegi baka sida Kedit tu. Tang seduai iya enda berani nurun belayar enggau bansa Laut(Melayu), laban ditemu seduai enda berani dibai seduai meraka menoa munsoh. Nya alai seduai lalu minta diulu ka Jungan, Ngindang, Kumpang Pali, Budin Antu Gerasi enggau Kandau Apai Limbak lalu semoa sida tu iya bala bansa Dayak Iban ti datai ari menoa Paku magang.
Nyadi sida iya mega ninga bansa Dusun beguna bendar ka tajau enggau guchi, nya alai sida iya dulu pegi ngagai menoa Kapuas, Kalimantan Barat, Indonesia, ninga di menoa Ulu Melawi orang dia bisi nyual guchi. Datai sida di menoa Sentang, dia sida nemu guchi sigi ke lalu dibeli sida. Udah sida iya bulih guchi sigi tu, sida lalu angkat belayar nasik ngena sekunyir melit Tanjung Datu alah nyau datai di menoa Brunei. Ari menoa Brunei sida iya belayar baru ngelayang nuju ngagai Pulau Labuan. Ari Pulau Labuan nya baru sida iya belayar baru nuju Pangkalan Stin(Weston), lalu ari Pangkalan Stin tu sida iya belayar baru masuk ngagai Sungai Putatan.
Udah sida sangkai, sida lalu diau dalam perau layar nya, enda diau di tebing. Ari perau layar nya baru sida iya bejalai ke menoa atas ngiga bansa Dusun ke deka meli guchi enggau tajau ke bisi dibai sida nya tadi. Ninga berita sida bisi mai guchi, dia bala bansa Dusun lalu begau deka meda guchi enggau tajau ke dibai sida, suman bendar baka pengangkun kitai Dayak Sarawak ke begau ka tajau leboh bansa Laut(Melayu) ke bisi datai nemuai mai utai.
Nyadi siko tuai bansa Dusun ke benama Menteri Babu lalu madah ngagai sida tuboh enam iya nya sida iya deka bekunsi meli guchi nya. Kandau seduai Ngindang pen lalu madah ka utai nya endang pesaka bansa Dayak Sarawak ke dibai sida ke deka dijual. Menteri Babu enggau kaban iya lalu nyadi meli guchi nya tadi. Nyadi ngena rega guchi nya tadi dia sida iya lalu meli tajau ngambi ka bisi dibai sida iya pulai ke menoa Sarawak.
Datai sida di menoa Sarawak, orang ari ulu enggau ari ili lalu begau ninga berita sida iya ke udah bulih tajau magang ari menoa Saba(Sabah). Nama agi deh ati bala anak pungka lelaki ke udah meda utai ulih sida endang nyau nadai runding bukai agi, tang nyau besemekih deka nurun pegi semoa. Semina sida tak mar merubus ke diri nurun laban menoa ke ka digagai nya bengat kelalu jauh, lalu tambah ke nya mega di Tasik China Selatan mega agi bisi siga, agi maioh bansa Bajau enggau bansa Lanun ke deka bendar ngipa lalu deka ngerompak orang ke bisi mansa ba sebelah nanga sungai.
Pemulai sida Jungan ari menoa Telok Saba, dia Minggat Apai Runai lalu nurun ngulu ka bala anembiak iya belayar ngagai menoa Telok Saba nya nunda sida ke dulu agi. Lalu orang pen maioh bendar enggau iya, tang nama sida ke enggau nya enda ulih sebut magang semina iya ke ulih di ke ingat iya nya Gundi ari Ulu Krian, Manang Nyara apai Manang Gara ari Nanga Telik. Semoa sida nya tadi bulih magang tajau, tang penyampau enggau bansa bulu tajau ke ulih siko siko nya mega enda ulih di ke ingat ka. Meda Minggat bulih bendar tajau dia ati orang ke ninga berita nya lalu gaga bendar, lalu ati bala pungka anak lelaki pen balat agi ga deka pegi udah kena peransang orang ketuai.
Besenentang enggau maia Minggat ke pulai belayar ari menoa Telok Saba, Garan Lembang Batu ari Paku lalu angkat ngulu ka bala anembiak iya ngayau bedarat ngalah ka Nanga Sut dalam menoa Balih, Batang Rajang. Manok sabong ke bisi enggau iya leboh tu iya nya Kandau Apai Limbak, Lambor, Mula, Melina ke bensumbar Bujang Berani, Enggu Apai Genilau, Kadam Apai Bai, Doo Apai Chunggat, enggau Unggang Kumpang Pali ke di menoa Entanak, Betong.
Datai sida iya di menoa Nanga Sut, Balih, Batang Rajang, sida iya lalu ngipa bala munsoh ke bisi undor ngalu. Malam nya sida iya bisi meda api munsoh ke benong cheli cheli dalam madang kayu. Nyadi bala munsoh nya merau ngundan indu anembaik. Leboh tepeda ka bala munsoh nya dia sida lalu deka ngalah ka perau munsoh nya. Sereta meh munsoh nyau tepeda ka sida dia bala munsoh lalu terjun ari perau ngelari ka diri, lalu dipegagai ka sida ka dalam babas dalam petang, nyadi semua bala munsoh tu tadi pen ulih dialah ka sida nya tadi.
Leboh ba kayau tu Lambor bisi bedengah pala munsoh sigi lalu tangkap ulih iya siko. Kandau baka nya mega bulih dengah pala munsoh sigi. Nyadi orang ke ngemudi ka perau sida leboh nya, iya nya Doo Apai Chunggat seduai Unggang Kumpang Pali. Nyau datai sida di nengeri Sibau(Sibu), nyadi perintah Sarawak naka iya pengeringat laban kayau sida tu tadi enda terang enggau pinta enggau tanya. Nyadi semoa munsoh ke nyadi tangkap sida lalu dipulai ka perintah magang, semina pala ke nyadi dengah aja ke lalu asoh perintah empu.
Enda tembu ati laban nya, Garan lalu ngulu ka bala anembiak iya nurun ngayau baru, lalu ke sekali tu iya nurun ngayau nyuong Ubong seduai Lintong Moa Hari di menoa Kanowit nguji ngalah ka menoa Ibau, pati kiba Batang Rajang enda jauh ari ili menoa Kapit. Sida leboh ke ngayau tu bulih maioh bendar munsoh, nyadai siko ari bala tangkap sida rambau tu ke agi ulih di ke ingat ka nama iya nya Sumai ke ditangkap Mula.
Udah sida ke ngalah ka menoa Ibau, nyadi bala munsoh semak enggau menoa nya pen nyau nadai agi. Garan lalu nurun baru ngulu ka bala anembiak iya ngayau baru ngalah ke menoa Memaloh ke kena pegai perintah Belanda di menoa Kalimantan Barat, Indonesia. Datai sida di menoa Memaloh, sida lalu diasoh bansa Memaloh munoh orang gila siko ke benama Sangun ke endang diau kediri diri di langkau umai. Nyadi langkau ke alai iya diau tu tinggi bendar begantung ari tanah, enggai nyadi dirurok ngapa ngena sangkoh ari baroh langkau nya.
Meda bala sida anembiak Garan tu nyau ngelulong langkau iya dia Sangun tu tadi lalu nan ka diri matak sangkoh kena nutok sida ari atas langkau nya. Nyadi mata sangkoh iya ngenjing kilap kilap baka pupu empa penajam udah dikilir iya. Nyadi bala sida anembiak Garan tu tadi ko cherita naka iya bebendar amat ngelulong langkau nya deka ngulih lalu ka munoh Sangun, tang Sangun sigi enggai ngalah kediri lalu enggai nurun ngapa ari langkau iya nya. Ka ditebang sida iya tiang langkau nya tadi tang enda ga ulih, laban Sangun majak deka manchak sida iya ari atas. Udah nya nyau ditepok sida iya enggau asap ari baroh langkau, nya baru Sangun nurun mai sangkoh, nangkin ilang enggau minching terabai endang nyendia ka diri deka bebunoh ngelaban bala sida anembiak Garan tu tadi. Lalu dipelaban ka sida Mula tudah Sangun tu tadi enda ga ulih bunoh sida. Tang sida iya enggai mai Garan empu enggau sida munoh Sangun tu laban meda iya ke udah maioh bulih dengah. Nyau ke lama sida ke belaban enggau Sangun lalu enda ga iya ulih bunoh.
Udah nya Sangun lalu deka nguji ngelari ka diri, lalu udah meda iya baka nya sereta enggai ka iya tepejoh rari jauh, nya baru Garan mansang lalu mantap Sangun. Balat bendar Garan seduai Sangun tu tadi belaban deka nguji munoh pangan diri, datai ka terabai seduai nyau baka setak nangkis silat pangan. Nyau ke lama udah nya baru Garan ulih mungga pah Sangun ngena jari kiba iya lalu ngemakal ka iya balat bendar. Meda Sangun nyau rebah lalu enda dapat ngelaban sida iya agi nya baru Garan ngasoh Mula munoh iya. Mula pen lalu mumpong pala Sangun nyadi ka dengah iya.
Pemulai kayau Garan tu bala Iban ari menoa Paku lalu nadai agi ngayau diulu ka tuai diri empu enti enda enggau nitih ka kayau perintah. Apin lama udah kayau tu nya baru perintah ngayau ngalah ka Bukit Batu di menoa Ulu Batang Rajang kena 9 February, 1881. Leboh ke ngayau tu manok sabong Tuan Raja iya nya Minggat Apai Runai seduai Chulo Tarang Apai Dungkong ari menoa Krian. Seduai tu lalu sama dititih ka bala menyadi enggau bala menantu seduai empu leboh ke nurun ngayau nya. Leboh ke ngayau tu maioh bendar bala anembiak Minggat enggau Tarang bakal, nya alai munsoh lalu enda ulih dialah ka sida iya. Meda munsoh nya tadi lalu bedau ulih dialah ka, nyau kira tujoh bulan udah nya baru perintah Sarawak ulih ngalah ka Bukit Batu kena 6 September, 1881. Dua taun udah bekau kayau tu nya baru nengeri Lampong Pechah(Pulau Kerakatao anchur laban gunong berapi) kena 27 August,1883.
Nyadi sama taun enggau perintah Sarawak ke ngalah ka Bukit Batu di Ulu Batang Rajang, perintah mega nurun ngayau ngabis ka pengachau enggau Kedu Lang Ngindang ari menoa Skrang ke endang udah lama kachau kenyau ari taun 1879. Nyadi endor pengabis laya Kedu Lang Ngindang tu dialus ka perintah Sarawak di menoa Bukit Stulak ba antara menoa Ulu Skrang enggau Ulu Kanowit.
Udah alah Kedu Lang Ngindang di Bukit Stulak, orang menoa ili lalu agi mupok pegi baru ka menoa awak tunga ka utara Pulau Borneo. Nyadi orang ke nurun pegi ngiga pesaka ke sekali tu iya nya Linggi enggau anak iya ke benama Anji seduai Radin ari menoa Bangkit, Paku. Datai sida iya di menoa Brunei dia Anji tu tadi lalu kena asoh Sultan Brunei ngalah ka munsoh di menoa Ulu Tutong enggau Ulu Belait ke udah angkat ngelaban perintah. Nyadi munsoh tu tadi alah magang laban Anji, lalu utai ke nyadi ka upah iya ke udah menang nyerang munsoh ba menoa nya kelia iya nya, iya lalu ditiki ka Sultan Brunei pangkat nyadi Panglima.
Udah alus menoa Brunei, dia Anji seduai Radin lalu enggau apai seduai nurun pegi ngiga pesaka ngagai meno Teluk Saba(Sabah). Datai sida din, Radin lalu kena asoh perintah Borneo Chartered Company ngalah ka orang menoa nya ke benong angkat ngelaban perintah dia. Nyadi lalu di alah ka Radin berengkah ari menoa Jesselton(Api-Api/Kota Kinabalu) terus nyentuk ngagai menoa Kinabatangan, lalu semoa menoa tu alah laban iya magang. Udah munsoh tu tadi alah laban Radin, sida Anji menyadi enggau apai seduai ke pegi kin lalu masok megai pengarap agama Islam, taja mega leboh ke agi di menoa Sarawak tu sebedau sida iya nurun pegi ke Telok Saba sida iya endang udah megai pengarap Kristian Anglika, sama enggau sida Katikis Buda, Unting enggau Belabut menyadi sida Anji ke endang agi tinggal di menoa Paku ditu.
Nyadi leboh sida Radin ke ngalah ka munsoh di menoa Jesselton nyentuk ngagai menoa Kinabatangan dalam menoa Saba(Sabah), Tuan Raja di menoa Sarawak lalu ngayau ngalah ka Kedang, Manok sabong Tuan Raja leboh tu iya nya Rekaya Pemancha Nanang ke baru udah dichiri ka di kubau Simanggang dalam taun nya, Minggat Apai Runai enggau Jabu Apai Umping ari menoa Bangat di Skrang. Nyadi bala munsoh ke udah dialah ka sida tu nyau rari ngalih ka menoa Kalimantan Barat, Indonesia ke rambau nya benong kena pegai perintah Belanda ari sepiak nyin.
Sama sereta nyiri Nanang nyadi Rekaya Pemancha iya nya Ringkai di Betong pen lalu dichiri ka nyadi Iban ti keterubah iya nyadi Pengarah di menoa Sarawak.
Udah ke menang ngalah ka menoa Kedang dalam taun 1887 dia Chula Tarang Apai Dungkong ari menoa Krian pen parai. Leboh rambau tu Chula Tarang endang udah masuk megai pengarap Kristian Anglika.
Apin lama Chula Tarang Apai Dungkong udah parai, dia Kelanang Apai Diak di menoa Paku lalu ngaga perau pelayar kediri empu ka kena iya ngulu ka bala anembiak iya belayar ngagai menoa Telok Saba. Nyadi orang ke bisi enggau iya pegi kin rambau nya, iya nya Kalom, Rekan, Chuwi, Gadin, Tangai enggau Mancha. Sida ke pegi tu bulih magang tajau, tang Kelanang lalu bulih sergiu. Pulai sida iya ari menoa Saba(Sabah) dia sida iya sempat ngetu di menoa Brunei lalu meli bedil. Datai sida iya di menoa Spaoh nyadi bedil nya tadi endang tak seruran segom segom berai ari ditimbak ka bala sida, alah meh nyau datai di rumah sida di Nanga Matop dalam ai Paku. Orang ke ninga pemulai sereta enggau pemulih sida tu tadi utai lalu gaga bendar ati. Udah nya ati orang ke anembiak rambau nya kelia nyau nadai tentu runding bukai agi laban deka pegi ngiga pesaka magang.
Udah pulai Kelanang ke nurun belayar alai Entering seduai Lumpoh ari menoa Ulu Paku ga nurun. Leboh tu Lumpoh baru apin lama udah sarak enggau Chenggit anak Minggat di Awik. Iya apin lama iga udah nerima benda antara seduai iya ke sarak; lunga baut siti enggau sengkilong randu raru ke beri Minggat. Sempama benda ke nyadi antara nya tadi lalu meransang Lumpoh, enti iya amat besai ati, iya bedengah sekali ka bulih tajau ka tasik kin ka ulih iya neresa menoa munsoh.
Nyadi menoa ke ka digagai seduai tu belayar iya nya Telok Saba. Datai seduai iya din Lumpoh lalu meli sergiu sigi di Pulau Gaya, lalu Entering meli tajau dua igi, lalu baka nya mega orang ke bukai ke sama bisi enggau seduai endang bulih magang tajau.
Pemulai nya kena Lumpoh nimbal peransang Minggat, leboh sida nyau datai di menoa Lubo Igan dia iya lalu ngambi lemambang Indai Engkai mengap ka gawai iya nama ka tajau. Gawai Tajau tu nyadi ba rumah Penghulu Mula di Nanga Nyalong enda jauh ari Ili Nanga Penum. Lumpoh ke begawai enggai dipengap ka bala lemambang ari menoa Paku, lemambang ari menoa Rimbas enggau lemambang ari menoa Krian, enggai ka mentua iya Apai Runai enda ninga berita iya ke bulih pesaka.
Pemulai Lumpoh seduai Entering pegi ari menoa Telok Saba, alai Sang Apai Rimbu ari menoa Paku Ili nurun belayar begulai enggau Kadam orang ari menoa Teru dalam ai Rimbas ngagai Telok Saba Datai sida din semoa bala anembiak ke di ulu ka belayar nya tadi endang bulih magang tajau semina siko Sang empu ke lalu bedau bulih, laban tajau ke nadai agi. Sida lalu pulai nyurut ka diri, datai sida di menoa Trusan kena pegai Brunei, dia baru sioda iya bisi nemu orang nyual tajau dua igi. Leboh iya nyau mutus deka meli tajau tu tadi deh, dia Sang lalu madah ke puku iya enda chukup kena nangkup nayawa tajau dua igi nya. Ati iya keras bendar deka meli, nya alai iya lalu bekerepas, datai ka baku, kuran enggau kachit enggi iya pan abis dijual kena iya nyukup ka nyawa tajau dua igi nya.
Pemulai Sang ke bensumbarRumpang seduai Kadam pegi tu, alai ati sida ketuai pematak anembiak rambau nya pan tembu bendar, laban anembiak udah diulu ka sida iya belayar magang ngiga reta ngelaban utai ke pedis ensurok menoa munsoh. Empa pemendar sida iya ke ka ngiga nama laban ke enggai alah randau enggau diri serambau, lalu maioh bendar mega bansa Iban parai di menoa orang sekali ka laban sakit tauka laban mati dibunoh munsoh, tauka malu pulai laban nadai utai ulih.
Udah pulai Rumpang seduai Kadam pegi, endor Jungan ari menoa Matop nurun pegi baru ka menoa Baram sambil lalu enggau orang ngereja getah. Orang ke enggau iya belayar leboh tu iya nya, Ketit, Ibi, Belaki, Makop, Enteri enggau Jugah. Semoa sida tu datai ari Paku magang. Leboh sida ke belayar tu Jugah lalu mati, taun nengri Lampong Pechah dalam taun 1883. Sida iya enda bulih tajau din, tang pemulai nya semoa sida bisi meli magang betanda(rebana) bai Laut.
Nyadi orang Layar Ili ke diau ngelingi kubau Betong, ketungkah ari Budin Antu Gerasi, enda tentu pegi. Kebuah alai sida enda enggau orang pegi ngiga pesaka, laban orang ke patut ngulu ka sida pegi abis diambi bekerja ka perintah nyadi jaga ba kubau di Betong.
Nyadi orang ke datai ari menoa Padeh, udu agi pegi laban Insoll anak Rekaya Pemancha Nanang bisi ngulu ke sida. Iya bisi enggau orang jaga kubau tang enda lama.
