IBAN BETAMPIL ENGGAU BEKETAN
 |
| Add caption |
Nyadi di menua Kumpang, pati Batang Ai, udah parai Nunong anak Pateh Ambau seduai Remias, dia anak Nunong ke benama Chaong lalu angkat enggau bala anembiak iya pindah ke menua Skrang lalu diau di menua Tanjong Lipat. Nyau ka lama udah parai Chaong, nya baru anak iya ke benama Tindin ke bensumbar Pimpin Beragah Ngindang lalu angkat ari menua Tanjong Lipat enggau bala anembiak iya lalu pindah ngagai Ulu Skrang lalu berumah ba Nanga Akop.
Sida ke berumah ba menua tu chukup tusah bendar laban udu siga di kachau bansa Beketan. Nyau kepuas sida iya ke siga baka nya lalu leboh maia malam hari sida iya suah bendar mindah bemalam dalam perau, lalu awak ke sida iya lantang agi tindok belaboh ba tengah ai ngelari kediri ari di kachau bansa Beketan ke selalu nyumpit sida ngena ipoh.
Nyau kepuas ke merinsa diau ngelari kediri baka nya, dia Tindin lalu mai bala anembiak iya pindah baru ngagai endor menua ke dikumbai Seraka Dua dalam pegai menua Tebat, pati menua Batang Skrang. Sekumbang sida ke diau dia, baka nya baru ga penusah sida iya laban ke agi siga selalu dikachau bansa Beketan belama. Sida iya lalu ngelari kediri baru ari menua nya. Udah nya Tindin lalu mai sida anembiak iya nya pindah ke menua Enteban lalu berumah di menua ke dikumbai Meram.
Sekumbang ke diau dia mega sida iya pan agi tusah ati, laban ke agi siga selalu dikachau bansa Beketan. Lalu ketegal nya sida iya lalu pindah baru ke ulu agi, ngulu menua Enteban lalu berumah ba menua ke dikumbai Batang Galau. Leboh sida iya nyau bumai ba menua ke di kumbai Ulu Galau Wong ba tanah ke dikumbai sida iya Sungai Lungun, Tanah Degum nya baru sida iya nemu diri lantang nadai agi dikachau bala munsoh bansa Beketan. Tang deh leboh tu dia tak enda mukai mukai rumah Buau Nyada, menantu Buau Lembu lalu di alah ke munsoh ti datai ari menua Sebuyau. Nyadi nama Buau Nyada tu ke bendar iya nya Maling.
Nyadi bala bansa Sebuyau ke udah ngalah ka rumah Maling nya enda lalu nyerang ngalah ke rumah Tindin. Kebuah sida iya enda ngalah ke rumah Tindin nunda ko kenang cherita tuai, laban Bunga Nuing udah ngentak ka ragai sekayu kena melepa rumah Tindin ambi ka rabun ari peda mata bala munsoh.
Udah nya leboh ke agi diau ba menua di Ulu Enteban, dia Tindin lalu manjok burong ba kaki umai iya empu di menua Bukit Ensanga ba antara menua Ulu Enteban enggau menua Ulu Buai ba pati ai Padeh dalam Batang Layar, kena pegai menua Betong. Nyadi leboh iya ngabas panjok burong iya nya pagi siti, dia iya meda mata panjok iya nya bisi disintak ka orang enggau papong kayu magang. Dua tiga pagi udah nya leboh iya ke ngabas panjok dia agi ga orang bisi beduan iya baka nya.
 |
| Add caption |
Nyau kepuas nyepi diri udah dikeduan orang asai nya dia iya malam siti lalu bemalam laban deka ngipa orang ke udu ka beduan iya. Nyadi leboh agi sesebun embun pagi leboh iya ke ngabas panjok dia iya lalu betemu enggau orang siko ke benong kiroh begumpul ka burong ke udah ulih panjok iya nya lalu nganti burong nya enggau papong kayu.
Meda orang nya beduan iya baka nya dia Tindin lalu balat bendar ringat sereta lalu numbok orang nya ngena beruak tang tak enda kena ditumbok iya. Seduai iya lalu sama bebalas balas numbok pangan diri tang lalu sama sama enda tekena ka pangan diri mega. Nyau ke leju seduai ke udah betumbok ke pangan diri baka nya, alai Tindin nyau enda berasai lalu nanya ka sapa nama munsoh iya nya tadi. Munsoh ke enggau iya betumbok nya tadi lalu nyaut sereta madah ke nama diri, “Aku tu Entinggi bejulok Keti Aur Tulang, tuai Beketan menua Paku ke diau di tuchong Bukit Saban tinggi kediri nadai nenjang."
Entinggi pan lalu nanya ka nama Tindin. Tindin lalu madah ka nama diri, “Aku tu Tindin bejulok Pimpin Beragah Ngindang, tuai Iban Skrang ke diau di Ulu Enteban.” “Enti munyi nya badu agi tua tu bebuti unggal,” ko Entinggi nganu Tindin, “laban tua tu sama sereta nyilak ka kibong Kumang,” Sereta Entinggi udah nyebut jako nya tadi seduai iya lalu sama sama nyeliah ngelari ka pangan diri lalu pulai ke rumah diri empu.
Enda bengat lama udah nya alai Tindin lalu mai bala anembiak iya ngayau ngalah ka rumah Entinggi dalam menua Paku pati menua Saribas di tuchong Bukit Saban. Nyadi berita sida Tindin ke deka ngayau nya jampat bendar ditemu sereta didinga bala anembiak Entinggi. Lalu ketegal nya dia Entinggi lalu mai bala anembiak iya baum. Bala anembiak iya nya ari dua bagi ke dikumbai “Beketan Kampong” enggau “Beketan Temuda.” Reti nya Beketan Kampong, laban sida ke bansa tu nya enda bumai lalu Beketan Temuda tu iya nya bansa Beketan ke bumai betaun baka kitai Dayak Iban bukai. Udah meh datai semua bala Beketan, dia Entinggi lalu mai sida iya berunding ke bakani ko chara sida iya ka nan ka menua sida iya ari ke di serang sereta dilanggar bala Iban ari Skrang ke betuai ka Tindin.
“Aku,” ko Entinggi, “bisi ninga berita Tindin tuai Iban ari menua Skrang udah ngempuru ka bala iya laban deka nyerang menua enggau bansa kitai dalam Batang Paku enggau tuboh ke maioh bendar.,”
“Nyadi aku ke ngempuru ka kita maioh tu datai kitu baka nya mega, deka mai kitai maioh berunding ke bakani ko jalai kitai tau ulih nan ka menua kitai tu ari dilanggar bansa Iban nya ila. Nyadi bansa Iban tu maioh tuboh, lalu bansa kitai tu mimit bendar tuboh, nya alai kitai enti ngelaban sida tentu enda tan enti enda chukop akal. Aku sayau bendar ka menua kitai tu,” ko Entinggi, “laban menua kitai ditu semak apong maioh pantu asal, sereta enggau tanah manah bendar alai kitai ngidup kediri.” Nambah ka nya ko iya, di menua tu mega maioh bendar ikan enggau jelu.
Ninga jako Entinggi munyi nya dia Agan tuai Beketan ari menua Nanga Gelu Penuan di menua Ulu Paku lalu nyaut. Ko iya, “aku nadai tentu maioh runding, dibai kita ngansak ka munsoh deka, dibai kita nan ke menua ba menua kitai empu pan deka. Semina utai ke di ke enggai ke aku iya nya, lenyau menua dirampas orang enti kitai enda ngelaban.”
Udah Agan bejako munyi nya, nya baru Entigu tuai Beketan Kampong ari menua Ulu Paku lalu bejako, ko iya,”aku nadai meh tentu panjai penemu, tang aku nitih ka penemu kitai maioh. Nan ka indu anembiak ba menua kitai empu ditu pan deka meh aku, di bai ngansak ngagai menua munsoh pan deka meh aku tu, semina utai ti di ka enggai ke aku iya nya ngelari ke diri ninggal ka menua enda ngelaban munsoh.
Ninga jako semua bala tuai sida udah setutok penemu magang, Entinggi pan lalu bebai sama nyikap diri magang ngansak ka munsoh. Bala Beketan ke enggau iya ngayau iya nya bala anembiak ke betuai ka Marjuong ari Ulu Bu’ut, bala anembiak ke betuai ka Marjillan ari Ulu Serudit, bala anembiak ke betuai ka Bangkit ari Paku Tengah, bala anembiak ke betuai ka Agan ari Nanga Gelu Penuan enggau bala anembiak ke betuai ka Entigu ari Ulu Paku. Sida nurun bedarat ngili ai Paku lalu ngulu ka ai Sekundong enggau ngili ka ai Pasa, udah nya baru sida iya ngulu ka ai Layar. Datai meh sida iya ba Nanga Padeh dia sida iya lalu ngulu ka ai Padeh lalu betiki ngulu ka Geraji mansang ngagai menua Skrang.
Nyau ka lama udah sida iya nya tadi bejalai sida iya pan nyau datai ba Tinting Kayu Ukir ba empelai tinggi bandir alai sida iya pan lalu besatup enggau bala Tindin. Sida iya pan lalu betempuh beamok betumbok enggau seligi enggau sangkoh. Balat bendar sida iya belaban betachah dia tang lalu sama sama nadai ulih ngalah ka pangan diri.
Nyau ke lama sida iya nya tadi udah belaban alai Entinggi pan lalu ngangau ka Tindin, “Oi Isan Tindin, uji ngetu dulu semua kitai tu beamok ka pangan diri.”
Ninga Entinggi nyau ngangau ka iya nya tadi ngena jako “isan” Tindin pan lalu nyaut nanya ka nama kebuah Entinggi nya tau ngumbai iya nya tadi “isan”.
“Kati nuan bisi anak bujang alai nuan tadi tau tak lalu ngisan ke aku ?” pia ko Tindin nanya Entinggi.
“Bisi,” pia ko saut Entinggi.
“Kati ko nuan deh bisi anak dara ?” pia ko Entinggi mega nimbal Tindin.
“Bisi,” pia ko saut Tindin mega nyaut tanya Entinggi nya tadi.
“Enti munyi nya manah agi tua tu anang agi belaya lalu beamok ka pangan diri, manah tua lalu bejadi ka anak tua melaki bini, awak ka laya tua tu badu” pia ko Entinggi madah ka Tindin bebai bebaik enggau pangan diri.
Ninga jako Entinggi nya tadi dia Tindin pan lalu bejako, “enti nuan deka bejadi ka anak tua, aku pan deka mega enti nuan deka ngisi derian nitih ka pinta aku.”
“Nama derian ke ka dipinta nuan kena tua bejadi ke anak tua deh?” pia ko Entinggi.
Tindin lalu madah kediri minta derian, “Palit Mata” nya pala sigi engkerebai ditutup enggau gong ketegal seduai iya betampil ari dulu udah bebunoh. Entinggi lalu madah kediri deka ngisi derian ke di pinta Tindin nya tadi, tang maia iya kia ka baru datai ngisi derian nya nganti maia bulan purnama ke ka datai.
Tembu Entinggi seduai Tindin bebaik ngena jako semaia nya tadi semua sida iya ari sepiak sepiak lalu mulai kediri ngagai menua diri empu. Tang bangkai Bikup ke parai leboh sida ke beamok nya tadi lalu dibai bala sida Entinggi pulai ke Paku lalu ditumbak ke sida ba menua ke dikumbai orang diatu Bukit Bikup ba menua antara Ulu Sekundong enggau Ulu Serudit enda jauh ari tinting antara menua Paku enggau menua Layar.
Apin lama udah pulai nya, Entinggi lalu mai bala anembiak iya ngayau baru kena begiga ke pala munsoh kena sida iya ngisi derian “Palit Mata” ke di pinta Tindin. Pulai sida iya ngayau nya tadi, nyau purnama bulan baru, nya baru Entinggi mai bala anembiak iya nganjong derian ngagai Tinting Kayu Ukir, empelai tinggi bandir, pah Bukit Ensanga antara Ulu Buai enggau Ulu Enteban, alai Tindin enggau bala anembiak iya ke endang udah nganti sida Entinggi nitih ka semaia sida maia ke beamok dulu ari nya.
Datai sida Entinggi din, dia bala Tindin endang sigi udah nganti. Udah sida tembu besurong ka derian nya tadi, bala Entinggi pan lalu di bai Tindin sama enggau ngagai rumah panjai sida iya laban sida iya deka melah pinang anak dara Tindin ke benama Rinda enggau anak bujang Entinggi ke benama Demong. Udah meh tembu pengawa sida nya ke melah pinang, Entinggi pan lalu mai menantu iya nya tadi pulai ke Paku nitih ke adat melah pinang bejadi melaki bini bansa Dayak Iban.
Pia mega nunda nitih ke adat derian “Palit Mata” tu dudi ari nya enti sema ka bisi tuai tuai kitai Dayak Iban bisi bejadi ke anak sida belaki bebini ari dulu udah bebunoh, sida deka minta derian “Palit Mata” laban sida iya ka bebaik ngerja pengawa ke manah udah bekau ke bebunoh enggau pangan diri, tang dikumbai “Palit Mata” laban kena nebus ai amata kaban belayan tauka suku juru sida ti udah parai nadai, lesi bebadi maia sida ke udah beamok bebunoh nya tadi.
Apin lama udah bekau pengawa melah pinang nya, Tindin pan lalu nemuai ngusong isan iya Entinggi ke menua Batang Paku. Datai iya din, Entinggi lalu mai iya nemuai meda gaya rampa menua Batang Paku, menua Samu enggau menua Anyut. Sekumbang seduai iya ke bejalai meda rampa menua Tindin lalu dibai Entinggi betemu enggau tuai Beketan siko ke benama Agan ba menua Paku Tengah, seduai iya mega lalu betemu enggau Entigu siko tuai Beketan Kampong ba menua Ulu Paku.
Nama rindu bendar ati Tindin meda pemanah bala Beketan dia nyambut penatai sida iya sereta pemanah rampa menua dia mega. Tindin lalu madah ngagai Entinggi ati diri ke ka pindah ngagai menua Paku enti sema Entinggi enggau tuai tuai bansa Beketan bukai ka nerima penatai iya enggau bala anembiak bansa Dayak Iban bukai ari menua Skrang.
Ko saut Entinggi, “Manah bendar runding nuan nya enti bala kita sama ka diau ba menua kami ditu, laban menua kami ditu agi maioh puang.” Ninga saut isan iya Entinggi nya tadi, Tindin lalu mulai kediri ke menua Skrang lalu ngambi bala anembiak iya bebai pindah ngagai menua Batang Paku.
Datai iya di menua Skrang, Tindin lalu nusoi berita iya ke pulai nemuai ngagai isan iya Entinggi enggau pemanah rampa menua Paku ke dipeda iya laban agi maioh ikan, maioh jelu, semak apong enggau maioh kayu tapang. Iya madah kediri deka mai bala anembiak iya pindah ka menua Paku laban bansa Beketan di menua Paku deka mai sida begulai sejalai saum menua enti sida iya deka. Ninga berita munyi nya, dia semua bala anembiak Tindin pan lalu sampal deka magang enggau iya pindah ke menua Paku.
Nyadi sida pindah ari menua Skrang nya merau ngili ka Batang Ai, lalu ngelayang ka Nanga Layar. Dalam menua Layar sida iya lalu bemalam ba menua Telok Semaruang, angkat ari nya sida iya lalu bemalam ba menua Tanjung Orang Tuai ke lalu di kumbai orang diatu Tanjung Pendam tauka Tanjung Rangka. Angkat ari menua Tanjung Rangka sida iya pan lalu datai di menua Nanga Pingan dalam menua Paku ke lalu nyadi alai sida Tindin tu tadi keterubah iya berumah. Nyau ke lama udah sida Tindin tu diau dia, sida iya pan lalu pindah baru ke ulu ke agi lalu berumah ba menua Lubok Berutan. Angkat ari menua Lubok Berutan sida iya lalu pindah baru ngagai menua pun Tanjung Melanyut ke alai Tindin tu lalu mati tuai.
Nyadi Rinda seduai Demong tu endang sigi udah bisi anak leboh Tindin tu mati. Semua anak seduai iya nya tadi lima iko, lalu benama Kelanang, Kelimbang, Bundak, Jawai enggau Bakak ke bensumbar Asu Rangka. Leboh Rinda nya beranak ka Bakak dia iya lalu parai, laban leboh iya ke benong bekindu dia iya lalu ditinggang kasau indu lalu kena ba bubun aji iya ti lalu ngujong ke iya nadai. Bangkai Rinda nya tadi lalu ditumbak ka begulai enggau pendam apai iya Tindin di pendam banchak menua Nanga Beduru.
Udah parai Rinda, Demong pan lalu bebini baru. Nyadi sekali tu iya enda agi bebini ngambi indu bansa Iban tang bebini ke indu bansa sida iya empu ke benama Lemia ke lalu enggau iya beranak maioh bendar. Enggau bini baru iya tu Demong lalu pindah ke menua Julau sereta ninggal ke bala anak dulu iya diau begulai enggau bansa Dayak Iban dalam Batang Paku.
Nyadi anak indu Demong ke benama Jawai leboh iya nyau baru angkat dara lalu parai. Ketegal ti tusah ati ka pemarai Jawai laban ti ka siko nya aja anak indu iya enggau Rinda, nya alai Demong enggau bala anak dulu iya lalu ngelumbong ke bangkai Jawai tu ba tuchong Bukit Lumbong enda jauh ari ulu Nanga Matop dalam menua Paku.
Nyadi anak bunsu Demong ke benama Bakak nya tadi enda bebini jadi enggau indu Iban dalam menua Paku tang iya bebini jadi enggau indu Iban ari menua Batang Ai. Kejang Bakak tu deka nurun bebini ngagai menua Batang Ai kin dia tabak antu pala enggi iya di tumbak ka iya ba Nanga Tumbai atas pala Lubok Tembop dalam menua Paku.
Nyau leboh Demong udah tuai bisi sekali iya ngundang bala anak dulu iya ari menua Julau ke Paku, lalu leboh ke nemuai nya iya bisi mai batu besai sigi ke lalu diujak ke iya ba Nanga Entaih ari ili Nanga Awas di Ulu Krian ke kena pegai menua Saratok. Nyadi kebuah Demong tu ngujak ke batu nya tadi ambi ke nyadi antara menua kena iya magi bala anak dulu iya di menua Paku enggau bala anak dudi iya ari menua Julau. Nyadi batu nya tadi lalu dikumbai orang ba menua Ulu Krian “Batu Tanam” ke lalu diatu ngimbai nya lalu bisi pendam orang Ulu Krian ke di kumbai sida Pendam Batu Tanam kira pejalai kaki setengah jam ari Rh. Langan, Ulu Krian enggau Rh. Jawi, Awas, Krian, Saratok.
Nyadi ko sumpah Demong, “Nyadi bala anak dulu aku tau pindah ka ujong jalai meraka batu tu, tang bala anak dudi aku enda tau nikal ngelui batu tu ka pun jalai.”
Nyadi Demong tu parai tuai di menua Julau, tang bangkai iya diambi bala anak dulu iya lalu ditumbak ke sida iya mungkal Pendam Pejok ari ili menua Samu dalam menua Paku. Udah parai Demong, anak iya ke benama Kelanang, Kelimbang enggau Bundak lalu nyadi ke tuai orang ngintu menua Batang Paku. Rambau tu tuboh sida iya nguan menua nya bedau maioh lalu nadai maioh macham bansa penyakit ke tau munoh nyawa mensia mega. Lalu sida iya nguan menua Paku pan lantang senang laban menua nya agi manah sereta nadai munsoh ngachau pendiau sida ngidup kediri besari sari.
