Leboh Sir James Brooke, iya nya bansa orang putih ke datai ari England lalu dipadu ka perintah menua Brunei diasoh nyadi Raja ti Keterubah Merintah menua Sarawak dalam tahun 1841 nyentuk ka tahun 1868, iya sigi udah nemu bala bansa Dayak Bidayuh endang udah balat bendar terbunsa merinsa sekumbang ke kena pegai perintah menua Brunei sereta enggau bala bansa Laut(Melayu) di menua Kuching ke udah angkat ngelaban perintah Brunei.
Ketegal ari pengawa Sir James Brooke ke udah mujor nulong tuai bansa Laut(Melayu) ke benama Raja Muda Hassim enggau Pengiran Badrudin ngalus ka pengachau tu, dia iya lalu digelar “Raja” sereta diasoh perintah menua Brunei merintah megai menua berengkah ari Tanjung Datu nyentuk ngagai Sungai Samarahan.
Leboh rambau tu bala bansa Iban ari menua Saribas enggau Skrang endang agi udu bendar ngereja pengawa ngayau enti leboh sida iya ke merau tauka bedarat ketegal ti bemunsoh nampong bekau laya sida ari pun nya tadi enggau Perintah Brunei sereta enggau bansa bukai ke udah sama ngaku ngumbai sida iya nya tadi munsoh. Nyadi tusah bendar menua Sarawak enggau Perintah Brunei ketegal penyarut ke baka tu, nya alai Sir James Brooke seduai Admiral Keppel lalu mai bala serang Perintah menua Sarawak dulu nyerang ngalah ka menua Saribas.
Di menua Saribas sida iya dulu ngalah ka kuta Rekaya Pemancha Dana Bayang di menua Nanga Padeh kena 10 June, 1843. Udah ke mujor ngalah ke tuai bansa Iban ke benama Rekaya Pemancha Dana Bayang di Nanga Padeh, bala serang Raja Perintah Sarawak lalu nyurut kediri ke ili lalu mudik ngagai menua Batang Paku lalu mujor ngalah sereta nunu rumah panjai bala tuai bansa Iban ke benama Linggir Mali Lebu kena 12 June, 1843. Leboh ke ngalah ke rumah panjai sida Linggir Mali Lebu tu di menua Karangan Pinggai, di menua Batang Paku dia bala Raja bisi nunu kenyali tuai niang Sang laki Salaka ke abis angus empa api.
Udah Batang Padeh enggau Batang Paku alah, bala Raja Perintah Sarawak lalu nyerang ngundor ke ili ka agi ngagai menua Batang Rimbas. Di menua Nanga Tawai sida Raja Perintah Sarawak balat bendar betempuih belaban enggau bala tuai bansa Iban ke benama Rekaya Gun ke digelar Mangku Bumi enggau Rekaya Antau ke digelar Linggang Nengri. Nyadi kuta tuai bansa Iban dua iko tu alah dalam Batang Rimbas kena 15 June, 1843. Nyadi bala serang Raja Perintah Sarawak ke mujor ngalah ka Saribas iya nya bansa Dayak Bidayuh enggau bala anembiak Temenggong Jugah ari menua Lundu ke bechampur begulai enggau bala bansa Laut(Melayu) menua Sarawak(Kuching).
Pulai bala Raja ke mujor ngalah ka menua Saribas , sida iya lalu agi mansang nyerang ngalah ke menua Batang Skrang enggau Undup. Nyadi bala tuai bansa Iban ke benama Libau Rentap sigi nan kediri di menua Karangan Peris, ba menua Skrang. Leboh orang ke begau ketegal penyarut ke nyadi tu dia Tuan Steward, Tuan Ward enggau Datu Patinggi Ali mati. Ari menua Batang Skrang bala Raja lalu undor sereta ngalah ka bala Sherif Sahap dalam menua Undup. Sida nadai tentu belaban leboh ke betempuh nya tang semua bala Raja ke parai di menua Batang Skrang lalu ditumbak ka dalam menua Undup magang.
Udah bekau serang kayau Raja Perintah Sarawak ke mujor tu nya baru bala tuai bansa Iban ke benama Rekaya Gasing, Linggi enggau Sandom tuai menua Skrang Ili lalu nundok ka perintah. Tang tuai bansa Iban siko ke benama Libau Rentap seduai Bulan Apai Jelani endang mati idup enggai nyerah nundok ngagai Raja Perintah Sarawak nya. Seduai iya agi mengkang ngelaban perintah taja pan Bulan Apai Jelani tu suah ngembuan penemu aum juak enggau Libau Rentap.
Nyadi menua lalu mansang kachau sekachau, nya alai tuai bansa Iban ke benama Mujah ke bensumbar Buah Raya lalu angkat ari menua Ulu Skrang lalu pindah ngagai menua Batang Paku. Iya lalu diau enda lama di menua Ulu Anyut, tang udah nya lalu pindah baru ngagai menua Julau laban menua Batang Paku udah kelalu maioh orang nguan.
Udah bala Raja Perintah Sarawak pulai ngalah ka menua Saribas enggau Skrang, dia Linggir Mali Lebu lalu ngulu bebai ka tuai bansa Iban ari dua bengkah menua nya bebaik enggau Tuan Raja ke Sarawak(Kuching). Leboh ke bebaik tu, Linggir Mali Lebu lalu diasoh Tuan Raja mai siti surat pulai nuju tuai tuai bansa Laut (Melayu) ke benama Laksamana Amir di menua Paku, Laksamana Omar di menua Rimbas, Datu Patinggi Dol di menua Rantau Anak, Abang Mansur seduai Satiangsa Lamudin di menua Betong enggau tuai bansa Iban ke benama Rekaya Pemancha Dana Bayang seduai Unal Bulan di menua Padeh enggau di menua Layar. Nyadi utai ke upah iya ke ngereja pengawa ngemesai nya ke diasoh Tuan Raja, iya nya iya diberi siti samenting kesumba kuning enggau generang beujok buok sepuchok.
Apin lama udah ke bekau bebaik tu, tuai bansa Iban ke benama Rekaya Rabong ari menua Skrang lalu nyerang baru ngalah ke menua Banting dalam pegai menua Lingga. Leboh ke nyerang ngayau tu iya bisi bulih pala munsoh tiga puloh lima igi. Nyadi serang iya tu dibantu semua tuai tuai kayau bansa Iban ari menua Saribas enggau Skrang.
Udah Rekaya Rabong ke nujor nyerang ngalah ke menua Banting, dia Linggir Mali Lebu lalu nurun ari menua Batang Paku ngagai Tuan Raja ke Sarawak(Kuching) lalu minta diri nyerang ngalah ka menua Lundu tauka menua Semarahan awak ke iya bulih pala kena ngetas ulit. Nyadi peminta iya tu dikemendar ka Tuan Raja, nya alai sepemulai nya Linggir Mali Lebu enggau bala anembiak iya lalu munoh bansa Laut(Melayu) ke benong berikan di Nanga Sungai Sarawak tiga iko.
Pia mega sama betunda udi enggau pengawa tu, bala Rekaya Pemancha Dana Bayang lalu betempuh ngelaban bala Rekaya Temenggong Jugah ari menua Lundu ba Nanga Batang Lupar. Leboh bala Rekaya Temenggong Jugah ba rantau jalai pulai deka ngalah ka menua Skrang ke lalu betemu enggau bala Rekaya Pemancha Dana Bayang ke benong pulai deka ngalah ke menua Lundu. Leboh ke betempuh tu sida iya nadai tentu maioh parai laban sida iya betempuh dirantau ai.
