Nyadi lepas ari taun 1900 ke atas, nyadi ba menoa ili nadai agi pengachau. Semina menoa ke agi bedau kachau leboh rambau tu iya nya menoa di Ulu Batang Ai enggau di menoa Ulu Baleh, Batang Rajang. Nyadi laban pengcahau tu Munan anak Minggat ke nyadi ulu balang perintah ke lalu dikumbai Penghulu Dalam di menoa Sibau(Sibu) ke suah bendar nurun ngayau ngulu ka bala perintah. Nyadi orang ke balat agi belaban enggau Munan leboh rambau tu kelia, iya nya Penghulu Janting apai Kendawang, Penghulu Ngumbang enggau Bantin di Ulu Ai. Nyadi benong pengachau tu nyadi dia Rekaya Pemancha Nanang seduai Pengarah Ringkai ari menoa Saribas lalu parai tuai laban sakit leboh ke pulai ngayau ari menoa Delok, Lubok Antu dalam taun 1902. Nyadi Munan empu mega parai di rumah iya empu di Pulau Keretao seberai pasar Sibau(Sibu) dalam taun 1914.
Udah parai Munan Penghulu Dalam, dia iya lalu diganti menyadi iya ke benama Penghulu Rantai. Leboh Penghulu Rantai ke enggai agi diasoh perintah megai pengawa nyadi penghulu, dia pengawa peghulu tu lalu dipegai Ujang ke nyadi Pegnhulu Dalam di menoa Sibau.
Leboh Ujang ngetu nyadi ketuai, dia pangkat Penghulu Dalam badu agi diberi perintah ngagai kepala Penghulu dalam menoa Batang Rajang. Dalam taun 1924 leboh Koh ke dichiri ka nyadi kepala ketuai di menoa ulu Batang Rajang dia iya lalu diberi perintah pangkat nyadi Temenggong ke lalu dipegai iya datai ka iya parai kena 4 November, 1956. Udah parai niang Temenggong Koh dia pengawa ke nyadi Temenggong tu lalu diberi perintah ngagai Temenggong Jugah anak Barieng, siko ari Penghulu bansa Iban ari menoa Merirai pati Balih, Batang Rajang. Leboh Jugah nyadi Temenggong dia adat ba perintah menoa Sarawak mansang berubah enti dibanding ka enggau agi leboh dipegai bala ketuai ka dulu agi ari iya. Kebuah iya pia, laban ba rambau tu pemansang dunya udu bendar enda tau enda dititih ka semoa bansa Iban di menoa Sarawak nunda pemansang bansa bukai ke sama begulai pendiau dalam menoa Asia Timur Selatan tu.
Apin Bangat lama iga Temenggong Jugah udah dichiri ka nyadi Temenggong ketuai bansa Iban dalam menoa Sarawak, dia bansa bukai ke sama begulai diau enggau kitai Iban di menoa tu nyau majak bendar ngemansang ka pengawa nitih ka pemansang menoa bukai dalam dunya tu. Nya alai dalam taun 1959, bansa China diulu ka Baba Ong Kee Hui seduai Stephen Yong Kuet Tze lalu ngaga Party Politik ke dikumbai sida iya Party SUPP, reti nya Sarawak United People Party ke dalam reti ba jako Iban, iya nya gerempong siti ka alai orang tau sama serunding begulai enggau diri sama diri; ngiga jalai kena megai enggau merintah menoa Sarawak tu nitih ka jalai runding sida iya. Dalam taun 1960 dia Laut siko ke benama Datu Bandar Abang Haji Mustapha mega lalu ngaga Party Politik siti kena nimbal Party Politik ke udah digaga bansa China nya tadi. Nyadi nama Party Politik ke digaga Datu Bandar Abang Haji Mustapha tu iya nya dikumbai iya Party Negara Sarawak. Ngena Party ke ditumboh ka iya tu ko ati iya, iya tau ngempong ati semoa orang bansa asal menoa Sarawak tu, baka Melayu, Iban, Melanau, Bidayuh, Kayan, Kelabit enggau bansa bukai ke maioh tuboh ti diau nguan menoa ulu sungai di menoa Sarawak tu.
Enda ngumbang tu mega, nya alai dalam taun 1961 Stephen Kalong Ningkan, siko bansa Iban ti datai ari menoa Padeh, Saribas ke baru pulai gawa di menoa Seria, dalam menoa Brunei lalu numboh ngaga siti Party Politik lalu begulai enggau J.S.Tinker seduai Badiman Kedit ti sama bansa Iban datai ari menoa Saribas. Nyadi tuju sida tiga ke numboh ka Party Politik tu ko julok ati sida tiga, iya nya sida ulih ngempong ati raban bansa Iban laban enggai ka pechah ari diri sama diri. Lalu nama Party Politik tu dikumbai sida tiga nya Party Bansa Sarawak ti disebut ngena jako pandak SNAP(Sarawak National Party). Nyadi party sida tiga tu lalu dikering ka raban bansa Iban ti datai ari menoa Batang Layar, Batang Paku, Batang Krian, Batang Rimbas, Batang Ai, Batang Undop, Balau enggau Sibuyau ti diau dalam menoa bagi kedua rambau nya kelia.
Apin lama udah Party SNAP tu ditumboh ka di Betong, alai Pengarah Banyang seduai Penghulu Umpau di menoa Kanowit lalu numboh ka mega siti Party Politik ke bansa Iban ti dikumbai seduai iya Party Pesaka Anak Sarawak. Kebuah tuju ati seduai ke ka numboh ka Party Politik tu iya nya ngambi ka kena seduai ngempong ati bansa Iban ti diau di menoa Bagi Ketiga ba sebelah ngelingi pelilih ai Batang Rajang.
Udah menoa Sarawak bisi empat iti Party Poltik ditumboh ka, nya alai bansa Melayu lalu ngaga siti Party Politik ke lalu digaga sida iya nama BERJASA ka kena sida iya ngempong ati bansa sida ke enda tau sehati enggau kaban sida ti udah masuk Party Negara Sarawak. Pia mega bisi dudi mimit ari bansa China ke enda ulih sahati dalam Party SUPP, dia sida nya lalu numboh ka siti agi Party Politik ti dikumbai Sarawak Chinese Association ti disebut sida ngena jako pandak SCA.
Sereta meh menoa Sarawak tu udah bisi enam bengkah macham Party Politik ti udah maju dipejalai ka, dia perintah Raja Baginda Queen Elizabeth ari Britain pen mansut ka jako, madah ka menoa Sarawak deka diasoh merintah menoa diri empu tang lalu mesti beserakup enggau menoa bukai dalam menoa Malaysia tu. Nya alai laban leboh ka ditetap ka bepilih ngundi besai ti nyau ka datai sereta iya ti keterubah laban ambi ka kena milih ni bagi Party Politik ti tau diasaoh megai lalu merintah menoa Sarawak tu leboh British ka ngelengka ka iya, nya alai Party SNAP enggau Party Pesaka Anak Sarawak ke endang sama Party Politik bansa Iban lalu dipegulai ka laban enggai ka ati bansa Iban tau pechah ari diri sama diri.
Udah nya ngambi ka runding mensia ka rindu ka pemaik nyadi ba menoa Sarawak tu sereta ulih digempong, nya alai Party Negara, BERJASA, SCA lalu ngulai diri enggau Party SNAP/PAPAS Alliance lalu ngaga nama gerempong nya disebut Party Sarawak Alliance.
Ngena nama Party Politik tu dia sida ketuai lalu berunding ka penyadi bala ari menoa Sarawak ka begulai perintah enggau perintah menoa Malaya, Singapura enggau Saba(Sabah). Nyadi orang ka ngari ka bansa Iban bejako ka pengawa tu iya nya Temenggong Jugah anak Barieng seduai Pengarah Montegerai lalu bisi mega ditambah ka tuai tuai Iban bukai ke agi nyadi kaban Kunsil Nengeri leboh ke dipegai perintah Colony rambau nya suba. Leboh tu Temenggong Jugah lalu di beri perintah Bintang O.B.E., nambah ka Bintang B.E.M., enggau Bintang Q.M.C., ti udah ulih iya dulu agi ari tu udah bekau Perang Dunya ti Kedua.
Udah perntah menoa Sarawak nyanggup begulai megai perintah enggau perintah menoa bukai ngambi ka numboh ka menoa Malaysia, nya baru pengawa ngundi bepilih besai dipenyadi, kena milih Party Politik ni ti dikerindu sereta tau dikarap ka mensia maioh megai lalu merintah menoa Sarawak tu. Udah semoa pengawa ngundi nya tembu lalu keretas undi pan tembu mega dikira, nya baru mensia maioh nemu Party Sarawak Alliance menang besai lalu tau megai Perintah menoa Sarawak. Nyadi Party SUPP ke udah alah pen lalu nyadi siti Party Penyakal ba Perintah sekumbang menoa tu ke agi kena pegai Sarawak Alliance.
Tang siti agi pengawa lalu ka digiga perintah menoa Sarawak, iya nya sapa orang ti patut dipadu ka nyadi Governor nyadi kepala megai perintah menoa Sarawak. Leboh ka ngiga orang ke patut megai pengawa tu dia bansa Iban lalu keras bendar ati ka nudoh Temenggong Jugah ngambi ka iya dichiri nyadi Governor laban iya sigi siko ketuai ti tau dikarap ka bansa Iban maioh agi ari bansa bukai ke diau nguan menoa Sarawak. Tang Temenggong Jugah sigi besangkal madah ka diri empu enda ulih mangku pengawa nya laban menteri enggau Governor enda tau sama bansa Iban. Enti orang ke dipadu ka nyadi Kepala Menteri ti keterubah nya ukai Stephen Kalong Ningkan ti datai ari menoa Saribas, ti endang sama bansa Iban, nya baru Temenggong Jugah ulih dichiri ka nyadi Governor kitai dalam menoa Sarawak tu rambau nya kelia.
Nyadi laban Temenggong Jugah enda ulih dichiri ka nyadi Governor dalam menoa Sarawak nya alai pengawa iya nya pen lalu diberi ngagai Datu Abang Haji Openg bin Abang Haji Spie’e ti bansa Melayu ke endang sama bansa asal di menoa tu nyadi Governor menoa Sarawak ti keterubah.
Tang taja pen Temenggong Jugah enda dichiri ka nyadi Governor, laban iya endang sigi agi nyadi ketuai bansa Iban menoa Sarawak sereta dikarap ka mensia maioh, nya alai perintah menoa Malaysia lalu nyiri iya nyadi Menteri ti bekuasa ka semoa perkara dalam menoa Sarawak ke lalu ngasoh iya lalu diberi perintah pangkat ti meri iya gela nyadi Dato. Pia mega laban bebasa ka pemesai pengawa ti dipangku iya dia perintah menoa Saba(Sabah) lalu meri iya siti pangkat ti dikumbai Panglima Darjah Kinabalu ke lalu meri iya gela nyadi Dato mega.
Udah nya leboh rambau Governor Sarawak ngintu hari pengada iya ti keterubah leboh iya ti udah megai perintah menoa Sarawak dia Temenggong Jugah lalu diberi perintah pangkat baru ke dikumbai Panglima Negara Bintang Sarawak ti mai gela iya Dato baru. Nya alai laban pemaioh gela ke udah ulih iya, nya alai semoa pangkat iya lalu dirintai ka baka tu ba ujong nama iya; Dato Temenggong Jugah anak Barieng, P.N.B.s., P.M.N., P.D.K., O.B.E., Q.M.C.
Lalu baka nya mega Stephen Kalong Ningkan ke udah kena pilih nyadi Kepala Menteri menoa Sarawak, leboh rambau Yang Di-Pertua Negara menoa Saba(Sabah) ngintu hari pengada iya, dia iya lalu meri gela ngagai Stephen Kalong Ningkan nyadi Dato laban ke diberi iya pangkat ti dikumbai Panglima Darjah Kinabalu, ketegal iya ti nyadi Kepala Menteri ke udah enggau naka pemendar nyerakup ka ati semoa orang menoa Sarawak enggau Sabah bekempit lebih agi ari ke udah nya.
Pia mega leboh Governor menoa Sarawak ngintu hari pengada iya kena 5 October,1964, Dato Stephen kalong Ningkan lalu diberi pangkat Dato baru ke dikumbai Panglima Negara Bintang Sarawak.
Nyadi bansa Iban dalam menao Sarawak sigi endang enda ulih dipechah ka orang sereta kering sahati. Sida enggai bendar beserara runding enggau pangan diri sama diri leboh ka berunding ka pengawa utai ti besai. Nitih ka penyerikat ati aki ini sida iya maia orang ke agi ngayau mulau, bebunoh bemunsoh kelia, lalu sekeda ati bansa Iban kemaia hari tu pen agi baka nya, laban sida iya ngelala ati pangan diri enti sema ka sida iya pechah, bansa Iban ka nadai temu tunga sereta pendiau laban sida nemu semina dalam Pulau Borneo tu aja ke bisi tau alai bansa Iban diau.
Pia mega laban bala anembiak bansa Iban rebak ka diatu udah bisi pelajar besekula, lalu ngena pelajar nya sida iya mega ulih ngintu sereta ngerempong ka ati bansa diri enggai ka belaya sereta pechah. Ngena pelajar besekula nya mega sida iya enggau naka penemu enggau pemandai merintah menoa Sarawak tu ti enggi sida empu, ti udah numpah ka darah getah aki ini sida iya kelia kategal pengering ati ti enggai ka diri diperintah bansa bukai.
Nya alai berengkah ari sehari tu nyentuk ka dudi hari ila, kitai ngarap ka Peturun Iban dalam menoa Sarawak enggau dalam Pulau Borneo tu mega tau sama keras ati belajar sereta besekula enggai ka diri tinggal penemu enggau pemansang akal laban bansa bukai.
