Nyadi Munan Penghulu Dalam tu ada dalam Batang Paku, Saribas. Iya nyadi tebilang bendar ketegal iya mantu perintah ngalus ka pengachau di menoa Sarawak ti alai iya lalu di beri Raja pangkat nyadi Penghulu Dalam. Nyadi Munan tu siko ari anak Penghulu Minggat seduai Jara ari menoa Awik, Krian, Saratok. Lalu leboh iya agi mit, lebih kurang dalam taun 1854 dia iya lalu dibai apai iya Minggat apai Runai pindah ngagai menoa Awek, pati Batang Krian, Saratok. Nyadi Munan tu ada sereta asal penatai iya ari menoa Paku, Saribas udah nya pindah ke menoa Awik, udah nya iya pindah baru ke menoa Maling (Sibau/Sibu). Nyadi pemindah Munan tu ngagai menoa Maling (Sibau/Sibu) udah bekau iya ka pansut ari rumah tutup di Sarawak (Kuching) bekau ti dipetenah ka dikumbai ka ngelaban perintah oleh siko tuai bnsa Iban benama Penghulu Ampan ke nyilih apai iya Minggat ti udah nadai maia sida ka pegi ke Batang Panai, Sumatra, Indonesia. Lalu Munan tu tau mega dikumbai kitai nyadi ketuai bansa Iban di menoa Ili Batang Rajang laban iya bulih penampak lalu beberita udah iya pindah ke Maling (Sibau/Sibu) laban ari asoh perintah ngalus ka munsoh ba menoa Ulu Batang Rajang enggau Ulu Batang Ai.
Dalam taun 1890 iya enggau apai iya Penghulu Minggat pegi ke menoa Pulau Sumatera, Indonesia ti alai apai ia parai di menoa Panai laban kena sakit tuai. Munan bebini ngambi Subang ka diau di menoa Entabai, Julau. Nyadi Subang tu anak iru Tambong seduai Layang, lalu uchu tuai Iban ke benama Libau bensumbar Rentap ari menoa Ulu Skrang ka ngelaban perintah lalu nan ka kuta iya di Bukit Sadok (1853-1861). Nyadi mentua Munan benama Layang, menantu Rentap beberita udah iya ulih munoh Tuan Allan Lee di menoa Lintang Batang, semak Nanga Skrang dalam taun 1850.
Dalam pengidup iya Munan bisi tujuh kali matak kayau, semua kayau tu endang diasoh Raja Perintah menoa Sarawak. Lalu tiga kali kayau iya ka mujur bendar, keterubah, iya ngalah ka rumah Penghulu Jimbau di menoa Engkari, Ulu Batang Ai, udah nya baru iya ngalah ka Bantin seduai Ngumbang ke sama di menoa Ulu Batang Ai, enggau ketiga iya ngalah ka bansa Kayan di menoa Ulu Batang Rajang.
Lebuh iya agi biak dia Munan kala bemimpi munyi ke ditusoi tu.
Iya bemimpi asai ka bejalai nengah serimbing tingkah tebing batu ke tinggi bendar. Nyau sepengelama iya udah bejalai dia Munan lalu malik sereta tepeda ka sekayu semambu ke tumbuh semak nya ke tinggi bendar lalu nadai temu pengujung di langit ke atas kin.
“Oh Munan, uji tarit nuan semambu nya”, pia ka munyi orang bejako didinga iya. “Maioh bendar orang udah nguji ka narit nya, tang lalu nadai ulih siko. Lalu sekeda ari sida nya semina tak naka ulih ngerurut ka semambu nya aja, tang lalu enda ga ulih batak sida magang,” ko orang nya dinga iya.
Ninga munyi nya, Munan pan madah ka diri enda berani nguji narit semambu nya. “Indah orang bukai ke dulu deh lalu enda ulih narit semambu nya,” pia ko saut iya. Tang orang nya keras bendar majak ngansak ngasoh iya narit semambu nya. Meda baka nya Munan lalu nuji narit semambu nya enggau penapat inat enggau naka pengabis pengering tulang iya. Angkat deh leboh Munan ka narit semambu nya, dinga iya tak lalu nyau begugu munyi guntur di langit din naka iya penginggar baka munyi hari ti ka jai. “Nya alai nuan Munan! Dinga nuan munyi guru guntur di langit nya tadi udah bekau semambu nya ditarit nuan, lalu baka nya mega mensia maioh ila takut ninga orang nyebut nama nuan, baka nuan ke takut ninga munyi guntur nya tadi,” pia ko orang nya madah ka iya. Munan pan lalu tedani, sereta nemu nya mimpi.
Lebuh sida Munan datai di Awik ari Smenoa umatera dalam taun 1890, dia tuai Iban siko ke benama Ampan endang udah dichiri ka perintah nyadi penghulu nganti apai iya Penghulu Minggat. Nyadi Ampan tu keras bendar deka berimba pulau kampung ka digalau sida Minggat di menua Awik, kenyau ari sida iya pindah kia ari menoa Paku menya. Munan enggau bala menyadi iya, sereta bala anembiak apai iya Minggat lalu nagang Ampan berimba ka kampung galau nya, enggai ka nadai alai ngiga rutan, ngiga danan, ngiga kayu ka perau ka guna anak telesak, uchu ambu ka dudi ari ila. Tang Ampan enda ulih ditagang iya. Meda iya enda alah tagang dia Munan lalu nemuai ngagai Penghulu Garan di Paku enggau Nanang di Padeh deka nanya ka pasal adat tuai leboh ka ngalau pulau.
Lebuh Munan nemuai ke Paku enggau Padeh, Penghulu Ampan lalu mansang betemu enggau Residen Bailey ari Simanggang lalu nanya iya kemaia iya bisi undur ke Kabong. Ampan lalu betenah madah ngagai Residen Bailey, madah ka Munan udah nemuai ke Paku enggau Padeh laban deka minta bantu Nanang seduai Garan ka ngelaban perintah. Ninga jako tusoi iya munyi nya Residen Bailey lalu pedis bendar ati.
Laban jako petenah tu Residen Bailey lalu manggil Munan ngasoh undur betemu enggau iya di kubu menoa Kabong laban iya deka nanya nentu ka hal nya ngagai Munan. Munan lalu undur ke Kabong ngena perau panjai lalu dikemudi ka Jungan Apai Chaong ari menoa Sebelak. Sereta tepeda ka perau Munan udah datai dia Tuan Bailey lalu deka nimbak iya ngena dua iti pistol, siti-siti ba jari iya sepiak-sepiak. Meda penyarut nyau deka nyadi dia Pengiran Matali, kunsil ari Simanggang ka nyempulang penatai Residen Bailey ke Kabong lalu nagang madah, nadai kebuah seduai iya tau belaya. Enti belaya ko iya, Tuan Residen seduai Munan tau sama-sama mati. Manah agi iya lalu mai Munan ke Sarawak, nanya ka penemu ari Tuan Raja, baka ni ko iya mutar ka hal Munan nya.
Datai di Sarawak, laban Tuan Raja arap ka surat ka dikirum ka Residen Bailey, dia Munan lalu ditan dalam rumah tutup enggau nadai pechara. Malam nya dia iya bemimpi asai ka betemu enggau Ranee Magaret, bini Raja Charles Brooke. Ranee Magaret lalu madah ka iya, ngasoh iya anang irau ati laban Raja enda ngukum iya, pagila iya ngelepas ka nuan. Amat mega pagi nya nyangka petara endang agi nyangkong laban penyalah endang ukai enggi iya, dia urung iya pukol semilan pagi Munan lalu dilepas ka Tuan Raja. Tang Tuan Raja nangkan Munan enggau jako madah ka iya nadai kuasa agi tau diau di menua Saribas laban iya lama udah bebini nguai ka Subang lalu nampong bilik penaik Rentap di Entabai, Julau.
Di Julau udah nya dia Munan lalu dichiri ka perintah nyadi Penghulu. Dalam taun 1890 dia Munan lalu dichiri ka Raja baru nyadi Tuai Kayau ngalah ka bansa Kayan enggau Kenyah Badang di Ulu Belaga enggau Ulu Balui. Kejang deka nurun ngayau kin dia Munan lalu bisi bemimpi. Iya bemimpi asai ka bumai maia nebang, lalu semua kayu udah diengkalung sida iya magang, ka semina naka kelampai sekayu aja agi tinggal apin diengkalung. Udah nya lalu datai lelaki siko lalu bejako “Tebang ulih nuan kelampai sekayu nya Munan, awak ka semua kayu ka udah diengkalung kira rebah magang ba umai kita tu”.
Munan pan lalu nebang kelampai ka besai sekayu nya, nama agi deh tak sekejap aja kayu sedandang umai nya rebah magang. Orang tuai nya lalu madah ka iya nya nanda ka Munan deka menang ngelaban munsoh. Nyau datai ba maia ngayau ka bendar dia Munan enggau bala pengayau iya ari Saribas bulih bendar dengah enggau tangkap. Dalam taun 1895, Munan sekali agi ngulu ka bala Iban ngalah ka bala bansa Kayan enggau bansa Kenyah di Ulu Batang Rajang, bebalas ketegal sida nya udah munoh siko bansa Melayu, siko bansa Cina enggau bala Iban ari menoa Saribas.
Leboh maia iya agi di Julau, dia menua Ulu Batang Ai agi udu bendar kachau bebunoh ngelaban diri sama diri tauka ngelaban Raja ka diulu ka Penghulu Ngumbang “Berauh Langit”, Bantin, Penghulu Allam, Penghulu Imba enggau Penghulu Ngelingkong dalam taun 1898. Kena ngalus ka pengachau tu dia Tuan Raja lalu ngasoh Munan ngayau bedarat ngalah ka menoa Ulu Batang Ai. Iya matak bala ngulu ka Batang Katibas lalu melunggang ngili ka Lubang Baya ka alai bala iya lalu melunggah ngili ka Batang Ai datai ke Nanga Kaong. Maia nya munsoh nadai ngadang sida iya nuntong datai ari menoa Ulu Katibas, nya alai bala Munan bulih pala lapan belas igi enda nyengkaum tangkap.
Tekenyit amat Residen Bailey di Simanggang ninga sida iya kena pansa sida Munan ka pulai ngayau. Sida Munan enda ngetu di ba kubu di Simanggang tang lalu merau meraka tasik pulai ke Maling (Sibu). Berita pemujur kayau Munan tu ngasoh Tuan Bailey pedis bendar ati ngagai Munan.
Dalam taun 1902 dia orang di Ulu Engkari di menoa Batang Ai lalu bisi kachau baru nglaban perintah lalu betuai ka Penghulu Munau apai Laja seduai anak iya Kana. Bantin seduai Kana suah bendar nyerang bala Iban ka semak pendiau enggau sida, kelebih agi bala Iban ari Lemanak. Nya alai Tuan Raja lalu ngangau ka Munan ari Maling (Sibu), Banta ari Skrang enggau Orang Kaya Insoll anak Nanang ari Padeh. Nyadi bala sida Banta seduai Insoll leboh datai ari Ulu Skrang lalu alah besatup enggau bala Kana ka nan di Rumah Penghulu Jimbau. Taja sida iya alah Insoll bendar amat ngelaban munsoh, ngenan ka bala anembiak iya datai ka sida rari nyau melunggang ngagai menua diri empu di Padeh. Semua anembiak Banta seduai Insoll ka mati lebuh nya bisi tiga belas iko.
Munan lalu ngempuru ka bala Iban ari meno Ili Batang Rajang enggau Iban ari menoa Kanowit ka betuboh lebih kurang 900 iko. Bala Munan lalu merau ari Kanowit, udah nya baru sida iya lalu bedarat nuju Ulu Ketibas. Datai di Batang Ai, Munan lalu mai bala iya ngetu enda jauh ari rumah Penghulu Jimbau. Bala sida Munan ke ngayau ka nuntong tu kira tiga ari udah bekau bala sida Banta seduai Insoll ka alah laban sida. Rumah Jimbau maia tu padat laban orang Ulu Ai ka bisi datai sama nguang kia.
Munan lalu mai bala baum milih sapa ka tuai tau diasoh nyerang bala munsoh, Munan lalu milih tiga iku manok sabong ka dikarap ka iya, sida tiga tu iya nya Ajah ari Binatang(Bintangor), Ajah ari Entaih, Entabai, Julau enggau Ajah ari Melangan. Munan mega sempat nundi sida tiga. “Enti kita tiga enda tulih ka dengah siko, badu aku agi ngangauka kita ila Ajah”, pia ka Munan.
Nyau datai ba maia tengah malam dia Munan lalu ngasoh dua tiga iko bala anembiak iya nengkila ka rumah munsoh, maia nya sida Penghulu Jimbau serumah benong begawai enchaboh arong, ngintu pala bala anembiak Banta seduai Insoll ka udah ulih sida. Lebuh ka belalai ba baroh rumah, nengkila ka ulah munsoh dia indu siko lalu pansut ari bilik, lalu bejako enggau Kana, iya madah ka diri bemimpi meda bala munsoh deka datai nyerang sida lalu ngasoh Kana besedia. Ninga nya Kana lalu bejako “Ni munsoh ka agi deka datai, orang Skrang enggau Saribas udah alah magang, sida iya udah pulai ngagai menua sida empu” pia ka saut Kana. “Nadai munsuh tau nurun ari langit lalu nyerang kitai” ka Kana nyambung jaku iya ka dulu tadi. Udah nya bala Munan lalu beguai-guai mulai ka diri laban deka madah ka nama pengawa enggau ulah bala munsoh ka udah didinga tauka dipeda sida.
Ninga munsoh benong begawai enchaboh arong, Munan lalu mai bala iya ngalah ka rumah munsoh sebedau maia dini ari pagi nya. Leboh sida iya datai ba rumah munsoh dia tiga iko manok sabong Munan ka bela benama Ajah enggau tujoh iko bala ka bukai, nyengkaum Banyi apai Ibi ari Julau lalu matak serang nengah ruai. Nyadi laban ari ka agi tumu pagi bendar, sereta maioh munsoh nyau buntau sereta mabok dia mudah bendar bala Munan ngalah ka bala sida. Nyadi bala Munan ka bukai tu tadi lalu ngipa munsoh ka rari ari pala tangga, ari tanju tauka ari ujung bilik. Dalam serang tu bala Munan bulih lima puluh tiga igi pala enggau lima iko tangkap, tang Penghulu Munau enggau anak iya Kana sereta engau menyadi indu Kana ulih ngerari ka diri. Bala Munan ka mati semina dua iku aja.
Dalam bulan Tiga, taun 1904 sekali agi Munan ngulu ka bala iya betempoh enggau bala Bantin seduai Kana ba endor ka benama Wong Adai di Ulu Entabai. Dalam kayau tu Bantin seduai Kana mega alah, lapan belas iko bala anembiak seduai iya mati. Udah bekau ka alah tu Bantin lalu mai bala anembiak iya rari ngagai bukit ka dikumbai Mikai Pambar ba antara menoa Sarawak enggau Kalimantan, ka kena pegai perintah menoa Belanda di Indonesia. Nyadi Kana taja pan iya bisi kala kena timbak bala Sarawak Renjer, tang iya ulin ngerari ka diri. Kayau Munan ka sekalai tu mega dikumbai “Kayau Bongkap” laban bala Bantin ngayau ngena perau pengayau ka digelar sida bongkap.
Dalam bulan Lima, 1907 dia Bantin enggau bala tuai-tuai Iban Batang Ai enggau Ulu Batang Rajang ka selalu angkat ngelaban perintah lalu besetuju bebaik enggau perintah sereta bala Iban Ili Batang Rajang enggau Ili Batang Lupar. Pengawa bebaik tu lalu diator ba pasar Kapit. Penghulu Dalam Munan nyadi wakil ke bansa Iban Ili Batang Rajang bebaik enggau sida Bantin. Nyadi Raja Charles Brooke empu enggau Residen Charles Hose nyadi saksi pengawa bebaik tu ngari ka perintah Sarawak.
Kena 31 ari bulan Lapan taun 1908 sekali agi Penghulu Dalam Munan diasoh Raja ngulu ka bala perintah ngayau ngalah ka Bantin di bukit Mikai Pambar. Kena pegai perintah Belanda di Indonesia. Sebedau nurun ngayau dia Munan bemimpi bejalai nisi rumah panjai orang, leboh iya mansa mua penyenguk dia siko indai tuai orang ngeludah ka rampang pinang iya lalu kena baju Munan. “Oh kasih meh nuan Munan, ukai sengaja aku deka ngelua ka rampang pinang kena nuan Munan” pia ko indai tuai nya. Indu nya madah ka Munan. “Ba kayau nuan ka sekali tu ila Muan nuan deka telih laban munsoh” Udah nya indu nya tadi lalu madah ka diri Indai Abang ari Gelong. Munan pan lalu tedani.
Datai ba maia ka nurun ngayau tu dia datai sida di Nanga Delok bala Munan lalu bebagi dua, sebagi merau ngulu ka Delok lalu sebagi agi ngulu ka Jengin. Amat sida iya ngadang sida iya tentu ka besatup enggau munsoh tang laban udah disumpah antu, maia ka ngalah ka Bantin di Mikai Pambar tu, dia Munan telih ba pah iya kena tumbuk munsoh ka benama Jugu, siko ari manok sabung Bantin ka berani sereta kebal.
Kena ngujong ka cherita Munan, kitai nikal ka pun baru. Dalam taun 1903, ketegal pemanah pengawa iya ba perintah, sereta pemerani iya ngulu ka kayau ka diasoh perintah dia Munan lalu diasoh perintah pindah ari Julau lalu diau di Pulau Kertau semakMaling (Sibau/Sibu). Enda lama udah nya iya lalu diberi Perintah Menoa Sarawak pangkat nyadi Penghulu Dalam (Great Chief). Tu pangkat tuai Iban ka pemadu tinggi maya nya kelia, iya lalu diberi perintah gaji bulan sereta bisi opis di Sibu. Nambah ka nya ketegal peneleba enggau pengelandik iya ngiring rayat sereta dipebasa ka orang ba pelilih menua Ili Batang Rajang dia Munan lalu dipilih nyadi kaban penuh Kunsil Nengeri dalam taun 1906, nganti Pengarah Ringkai ari Rantau Anak, Betong. Munan nyadi kaban Kunsil Nengeri nyentok ka iya parai dalam taun 1914, di Sibu. Iya dikubur ka di Pulau Kertau, Sibu. Lalu perintah madu ka Munan diau di Pulau Kertau, Sibu. laban ngambi ka perintah menoa Sarawak nyamai ngemataka ulah iya, takut ka iya angkat ngelaban perintah.
Nyadi dua iti ari mimpi munan tu ditusoi Mujah anak Mambang, Paku, Saribas enggau Umpi nak Rantai ari Awek, Krian, saratok.
