Nyadi orang ke dulu nganjong penemu pelajar sekula ngagai bansa Iban di Sarawak iya nya bala Mission bansa orang putih ti bejalai ka pengarap Christian. Dia dulu alai bala mission tu datai, dia mega bala sida iya bisi numboh ka sekula ke tau alai bala anembiak belajar ke lalu dulu di diri ka sida iya.
Naydi Anglican Mission tu datai di Sarawak dalam taun 1848 leboh Dr. MacDougall tu nyadi orang putih ti keterubah iya datai ka Sarawak lalu nyerita ka Injil ari pinta Tuan Raja Besai, Sir James Brooke ngagai Eklisia di menoa England.
Enam belas taun udah Eklisia nya datai di menoa Sarawak tu, nya baru gereja ti keterubah iya digaga di menoa Sarawak lalu digaga di menoa Skrang dalam menoa Bagi Kedua. Tang gereja enggau sekula dia enda nyadi laban bansa Iban ke diau dia enggai belajar, nya alai sekula enggau gereja nya lalu dipindah ka perintah Sarawak ngagai menoa Banting dalam taun 1864. Leboh sekula enggau gereja nya digaga di Bukit Banting di menoa Batang Lingga, lalu dia meh bisi bala anembiak bansa Iban Balau enggau Iban Saribas ke agi mimit bendar tuboh ka besekula dia.
Ngerekai ari menoa Banting, dia Mission lalu ngaga gereja enggau sekula baru di menoa Sabetan enggau di menoa Temudok dalam pegai ai Krian. Nambah ka nya mega sida Mission lalu ngaga gereja di Munggu Selulap dalam menua pegai ai Saribas.
Lubah bendar pengawa sida Mission nya nyadi di menoa Sarawak laban bala anembiak bansa Iban ke nadai tentu ati ka nurun belajar. Kebuah sida iya ke enggai nya, laban enti sida udah besekula dia sida iya ka enda ingat ka adat bansa diri agi laban runding sida iya ke udah diajar besalah nya kenyau ari sida iya agi mit. Kedua agi enti leboh sida iya nyau pulai ka rumah maia nya kelia, nyadi tulang sida iya ngereja pengawa pen udah jauh bendar alah laban bala anembiak ke nurun mansai gawa kenyau ari mit diau di rumah.
Deka sida iya ngemansang ka semoa utai ti udah dipelajar ka sida dalam sekula nya ngena jako chara makai gaji tang perintah Sarawak lalu enggai nerima penemu sida laban ketegal pemandai sida ti agi mekang, sereta enggau ba rambau nya kelia pengawa ke kereja perintah sigi endang semina diungkup ka bala bansa anak Laut(Melayu) ke endang udah anak orang ke besai besai pangkat gawa ka perintah.
Ari tegal ke baka nya, nya kebuah pemansang besekula ba bansa Iban nadai bendar sereta kurang berengkah ari kelia ngagai maia menoa Sarawak tu apin diserah ka Raja Sarawak ngagai perintah Colony lepas perang tu kemari.
Nya alai ke engka bala anak bansa Balau enggau anak bala bansa Iban ari menoa Saribas ka naka siko dua aja ke udah nemu reti besekula, lalu ensepi diri ke udah besekula ke lalu nadai bulih pengawa ba perintah Sarawak nya alai sida iya lalu berunding ka mawa ngagai menoa bukai, baka ngagai menoa Malaya enggau menoa Singapura.
Din baru sida iya bulih pengawa ka menggal mit ngipak ka gaya pemandai sida empu. Maioh bendar raban sida tu ke gawa di menoa bukai baka nya lalu nadai pulai agi ka menoa laban sida iya lalu diau mendam tauka gawa jauh agi baka ba menoa Siam enggau ba Pulau Jawa enggau Pulau Sumatra. Semoa sida ke gawa baka nya mega lalu bebini sereta ngaga ruang bilik di menoa bukai nyentuk ka kemaia hari tu.
Tang kemaia hari tu dunya udah jauh bendar berubah lalu pia mega atur perintah ba pengawa sekula pan nyau mansang manah. Iya meri pengawa ngagai orang ke endang patut diberi nangkup pengawa nya, reti nya ngagai orang ke sigi dikelala ditemu tau gawa mangku pengawa nya laban bisi pemandai ngereja iya.
Pia mega nambah ka sida Mission dalam menoa Sarawak tu ke udah naka ulih bala sida nguji ngemansang ka menoa dalam sida ti meri penemu pelajar sekula, kitai lalu lantang agi ngiga penemu ka dudi agi ari tu ila, laban perintah udah ngaga atur ke chukup kena mutar ka pengawa sekula, ngambi ka anembiak rebak baru maioh di menoa tu tau magang bulih pemandai.
Tang bansa Iban ke dalam menoa Sarawak tu, sida iya enda tau enda enggau naka ulih ngering ka adat ke manah ti enggi bansa diri empu, laban dalam menoa bukai enggau pulau bukai, nadai adat bukai ke tau dikumbai sida iya adat asal ti endang datai ari bansa sida iya empu. Lalu pia mega kena ngemansang ka bansa, bansa Iban enda tau enda ngingat ka enggau bendar pengering ati aki ini sida kenyau ari mungkal menoa Sarawak tu ngagai ngalah ka munsoh lalu ditampong ka sida ti ngiga pengeraja berambun ka nyawa ngagai menoa bukai, enda nemu nyawa diri besepa ngapa enggai ka anak uchu ka nampong ruang bilik nadai temu tunga pendiau agi jemah ila.
Sida ke dulu menya ngereja pengawa nyangkong kitai ti dudi hari. Sida mega naka pengeras berebah ka kampong jerong laban enggai ka anak uchu diri empu parai nadai tanah alai bumai. Pia mega bala anembiak rebak baru ke diatu patut agi bisi ngembuan megai ati ti baka nya.. Ukai semina naka berebah ka kampong jerong, tang lalu ngiga penemu enggau pelajar sekula laban sida iya enda tau enda ngira dalam ati diri enggau bala anak uchu sida iya empu ka dudi hari ila.
