Nyadi Batang Lemanak tu benanga ba Batang Ai, enda jauh ari ili menua Engkelili nya dulu agi diuan bansa Iban ari ke nguan menua Skrang. Kebuah iya baka nya, laban Lemanak semak agi ari menau Kumpang ti endang penatai asal bansa Iban pindah bedarat melunggang ari Ulu Ketunggau enggau Merakai, Kalimantan Barat, Indonesia.
Udah sida iya mubok Batang Lemanak nya baru sida iya berimba melunggang ke menua Skrang. Sida Dayak Iban ke melunggang tu betuai ka nama Busok ke bejulok Tandok Raja, berimba Pelasok ari nanga lalu seraban agi Dayak Iban tu ke betuai ka Meriba berimba ari ulu. Nyadi Batang Enteban tu diperimba Dayak Iban ke betuai ka Saba seduai Jelema , lalu endor rumah seduai iya di Nanga Sungai Kelang. Nyadi Ulu Kelang dibubok Dayakm Iban ti betuai ka Likong, lalu di Ulu Tebat dipungkal Dayak Iban ti betuai ka Gubar seduai Japar.
Kelia, keterubah rubah Batang Skrang bisi munsoh diserang bansa Bongkap enggau bansa Bengap. Batang Skrang lalu alah, nya alai sida ke tuai Iban ba menua nya lalu dipinta munsoh mayar ukum benda sigi panding nyengala genap sigi siko, lalu anembiak naka ke udah tau bedengah dipinta munsoh mayar ukum benda sigi jabir, lalu bala anembiak redak dipinta munsoh mayar ukum benda sigi irun ninting pintu.
Bekau ke udah alah tu bansa Bongkap lalu diau mendam bedagang dia. Tang meda sida iya kelalu bilut (balat ngelakar) leboh sida iya ke bedagang melunggang ke menua Pelasok dia sida iya lalu kena tegah lalu dirampas Dayak Iban siko ke benama Chupong ke bensumbar Gila Berani. Meda diri udah dirampas Chupong Gila Berani, bansa Bongkap tu lalu pedis ati serta mulai kediri. Nya alai kejang sida iya deka angkat dia sida iya lalu bejako enggau anembiak Beriak, “Enti kita bisi meda bekau rusa, bekau babi ba menua ditu ila, kita anang tekenyit ati.”
Sereta apus meh tahun nya dia datai bala Bongkap lalu nyerang Batang Skrang enggau bala ti naka iya pemaioh. Ninga nya Chupong lalu mai anembiak iya ngelari kediri. Sida ke ngelari kediri ngema perengka reta tengkira nyengkaum tikai, padi, tajau enggau maioh macham reta pesaka sida iya ke bukai.
Nyadi ari pemaioh sida ke ngelari kediri nya, bisi siko Iban ke ngema tajau menaga ke nyau udah ikak lalu enda dapat ngelari kediri agi, dia iya lalu ngempas ke tajau nya ti ngujong ke tajau nya lalu belah dua. Nyadi laban tajau nya diempas ke iya dia, nya alai nyentok ke sehari tu jamban nya lalu agi dikumbai orang di menua Skrang “Titi Temaga”. Bala Chupong ke lari ari Pelasok nya tadi lalu begelumu di menua Bangat, kena pegai menua Betong iya nya menua di antara menua Layar enggau menua Skrang. Dia meh alai sida iya lalu betesau ngena temuku tali ngumpol penguang. Udah nyau abis penguang ke dikangau datai nya baru sida iya besetuju ka ngeram ka ipa ka bebalas lalu negah di Batang Baie pati menua Enteban. Udah kena tegah sida iya dia, bala munsoh pan lalu tasah ngelari kediri nyerangkap kampong.
Nyadi bisi bansa Bongkap siko lalu ulih ditangkap sida, lalu madah ke nama diri Ku’ut. Iya tu tadi lalu dibunoh sida ba menua lempa siti ke alai endor nya lalu dikumbai orang kelia sampai ke kemai tu hari “Lempa Ku’ut”. Nyadi siko da agi munsoh ke ulih dipelulong ka sida lalu madah ke nama diri Unju. Unju tu lalu dibunoh sida iya ba endor ke lalu dikumbai orang kelia nyentok ke sehari tu “Lulong Unju”.
