URUP IBAN DUNGING – KENYALANG – BULAN LIMA 2007 - BA LAMBAR 5-(MENOA)
Kitai bansa Iban ti keterubah nengkebang ngaga urup ka diri empu ianya Dunging anak Gunggu. Dunging anak Gunggu tu dikira ka ada dalam taun 1904 lalu iya parai dalam taun 1985. Nyadi asal penatai Dunging tu iya nya ari menoa Nanga Ulai, siti rumah panjai kitai Iban dalam ai Rimbas dalam bagi menoa Ulu Saribas, dalam pelilih pegai menoa Debak dalam serangkung Bahagian Betong ke diatu.
Dunging tu nadai kala nemu utai ke dikumbai orang besekula tang iya jauh tajam bendar ati sereta pintar ba pasal penemu kitai ke macha enggau nulis nitih ka jako roman (rumi) ti endang dipelajar ka iya empu kediri. Kelimpah ari ti rindu ka penemu enggau pengawa besekula, Dunging mega bisi ngembuan pemandai kena iya berunding ka ngaga leka urup jako bansa Iban ti tau dikena kitai nulis lalu enggau munyi iya ti betul.
Nyadi ke banding, kitai nulis ti mudah iya nya, Urup Iban Dunging ulih mida ka antara tulis leka jako “mata” - (Perengka tubuh kitai mensia kena meda) enggau leka jako “mata” – (buah ti bedau mansau/utai dipanduk ti bedau tau diempa). Urup Iban Dunging tu endang agi mengkang dikembuan enggau manah ulih siko anak iru iya ke benama Bagat anak Nunui, ti nyadai Tuai Rumah orang ba menoa Nanga Ulai dalam taun 2007.
Ari padah sereta ajar Bagat anak Nunui tu meh urup jako bansa Iban ke ditengkebang Dunging nya kala udah dipansik Dr. Bromeley Pgilip, siko ari bala pengajar ba Universiti Teknologi Mara, Sarawak. Nyadi atur pansik Dr. Bromeley tu nyengkaum ngadu ka ripih leka Urup Iban Dunging nitih ka bagi tusun konsonan (consonants) enggau vocal (vowels).
Dalam pansik Dr. Bromeley, nyadi urup ti keterubah ditengkebang Dunging tu iya nya digaga iya dalam taun 1947, lalu iya bisi udah nengkebang tujoh puloh tujoh iti bansa leka jako ti ngudan munyi leka jako ti tau dikena kitai dalam jako bansa Iban. Nyau ka sepemanjai Dunging tu udah ngena urup ti digaga iya empu, dia baru iya bisi berati ka leka urup ti udah ditengkebang iya nya sereta udah dikena iya bisi beserak guna (overlap) enggau munyi pangan diri. Iya pen lalu berati ka semoa leka urup tadi lalu milih leka jako ti enda diguna laban beserak enggau munyi leka jako ti endang patut tau dikena dalam jako bansa Iban.
Bisi kira lima belas taun Dunging tu semampai mansik enggau silik gaya enggau chara leka urup bansa Iban ti bisi beserak munyi nyentuk ngagai taun 9162 baru iya ngelumu ka penyampau semoa leka urup ti patut tau dikena enggau betul.
Nyadi semoa penyanpau leka urup bansa Iban kenyau ari taun 1962 iya nya lima puloh sembilan iti sampai ka sehari tu. Lalu semoa lima puloh sembilan iti ti agi dikena lalu mega agi dalam pansik Dr. Bromeley ngena chara saintifik.
Tuju Urup Iban Dunging tu ila, enti udah tembu dipansik Dr. Bromeley, lalu ka dikerembai ka iya ngagai bala pelajar ke ba sekula. Nya alai beduduk ari pansik ti keterubah dia Dr. Bromeley agi deka ngemaju ka pansik iya sampai ka Urup Iban Dunging tu tau dikelala mensia di serata dunya, iya nya bansa Iban pan baka bansa bukai lalu bisi ngembuan leka urup kediri empu. Bekaul enggau dalam perambu pansik iya nya, Urup Iban Dunging tu mega deka dipasuk ka ngagai tusun pelajar jako Bahasa Iban ti endan g udah bisi diatu dipelajar ka bala anembaik ba sekula ba menoa kitai di Sarawak tauka di Malaysia.
Lalu pengawa pansik Dr. Bromeley pasal leka Urup Iban Dunging tu kala udah dipejurai ka iya ba Borneo Research Council (BRC) Conference dalam taun 2006 ba Holiday Inn, Kuching ti diatur ulih Universiti Malaysia Sarawak (UNIMAS). Nyadi leboh maya Urup Iban Dunging tu dipejurai ka iya dia maioh bendar bala orang ti bepenemu baka bala bansa ribai mandang ka diri bisi pengerindu sereta enggau pengalit ati bala sida iya meda kitai bansa Iban endang udag bisi kala ngembuan leka urup ka diri empu.
Nya alai beduduk ari pansik iya ti keterubah dia Dr. Bromeley agi deka ngemaju ka pansik iya baru sampai ka Urup Iban Dunging tu udah dikelala semoa mensia di serata dunya iya nya bansa Iban pen baka bansa bukai bisi ngembuan leka urup ka diri empu. Bekaul enggau juluk ati ti deka ngemaju ka Urup Iban Dunging tu ngagai dunya luar, Dr. Bromeley kala udah nguji ngiga research grants ti keterubah ari School of Oriental Studies, University of London.
Enti sida SOAS tu kala besetuju ka meri iya research grant tu dia Urup Iban Dunging tu ulih dikemaju ka. Dr. Bromeley mega kala minta bantu ari belanja (fund) E-Science ari Kementerian Sains dan Teknologi dan Alam Sekitar (MOSTI). Lalu dalam sebarang macham tulong ti diberi tauka diulih, Urup Iban Dunging tu mesti dikemaju ka ngagai tingkat dunya luar ngambi ka bansa Iban tau dikelala bansa luar ari gaya urup bansa Iban empu.
Kelimpah ari pengawa ti ka ngemaju ka Urup Iban Dunging tu, lalu begiga ka belanja bukai, Dr. Bromeley mega kala berambu ngadu ka tusun leka jako ditulis ngena Urup Iban Dunging (Iban Alphabet Dictionary) ti tau nyadi ka teladan bansa kitai Iban ti ka belajar ka ngena Urup Iban Dunging tu ila.
Dr. Bromeley mega kala berambu deka ngadu ka Urup Iban Dunging tu awak ka ulih dikena naip ngean computer keyboard. Iya mega kala nanya Comapny Microsoft pasal ngadu ka keyboard ti endang tau dikena Urup Iban Dunging, lalu sida Company Microsoft pan bisi udah mandang ka pengeran ati ngena chara ti dikumbai sida iya UNICODE.
Nyadi Dr. Bromeley tu iya nya ukai orang bukai enggau niang Dunging anak Gunggu, laban iya dikira ka uchu bilik sepiak Dunging, laban aki Dr. Bromeley ti benama Mawan anak Gunggu tu menyadi tampung pala enggau Dunging. Lalu bilik sida Dr. Bromeley tu mega berimbai bilik enggau bilik niang Dunging ke ti ditampung Tr, Bagat anak Nunui. Nya alai endang udah tanggung jawab Dr. Bromeley empu meh ngadu sereta ngemaju ka urup Iban ti udah ditengkebang aki iya empu.
 Kitai bansa Iban ti keterubah nengkebang ngaga urup ka diri empu ian...){kind=link}