Nyau nadai agi Rekaya Pemancha Nanang, Pengarah Ringkai enggau Penghulu Garan dalam sitak menua Saribas ari taun 1903, dia Iban di menoa nya lalu berengkah enda berapa agi ngemeran ka diri ngereja pengawa ngetah dalam babas besai enggau kampong dalam. Lumpoh anak Budin Gerasi enggau Ragai anak Penghulu Insoll ke kerja nyadi kerani di menoa Pusa enggau di menoa Lubok Antu lalu ngajar bansa Iban, madah ke manah agi sida iya belaboh nanam kayu getah pera ba kaki tangga diri empu awak ka bisi dikerja sida iya enggau bini anak, ari sida iya ke berambun bebuai ka nyawa belelang ngagai menoa orang enggau pulau menoa bukai ke jauh agi ngejang ka rumah tangga sida.
Ninga penemu seduai tu tak ngena bendar munyi, lalu keterubah iya bansa Iban di menoa Sarawak bisi nanam getah pera iya nya benama Budin Gerasi ke datai ari menoa Stambak Ulu, Penghulu Insoll ari menoa Padeh, Thomas anak Ngadan ari menoa Seruai, Manggat seduai Machup ari menoa Bangai, Menggin seduai Anding ari menoa Gensurai. Lalu semoa sida tu datai ari Batang Layar magang
Nyadi dalam Batang Paku orang ka bisi nyereta sida nya bekebun getah pera iya nya Penghulu Sang, Nyaru anak Munji, Kalanang apai Diak, Luta Tedong Ngelantar enggau Bai anak Kadam. Dalam menoa Batang Krian mega orang ke sama bisi dulu enggau nanam getah pera tu iya nya Saudagar Jeti enggau di menoa Sibau(Sibu) iya nya Munan Penghulu Dalam seduai Penghulu Rantai. Lalu bala orang ke bukai nya bisi mega enggau nanam getah pera tang dudi agi ari bala sida ke udah disebut nama tu tadi.
Leboh sida tu ngulu ka bala anembiak diri dulu matak mai bekebun getah pera, dia bansa Iban maioh bendar ke tesat runding, lalu bisi nya madah ka diri enggai laban bisi enda manah mimpi laban enti sida iya ngereja pengawa bekebun getah pera dia antu padi ka rari laban ke alah laban penumboh getah pera nya tadi. Nyadi laban utai ke munyi nya dia bansa Iban ke tesat runding, ke udah nguji nanam getah pera ka menggal mit lalu mabut getah ke udah ditanam sida iya nya.
Lalu laban nya mega kabuah semoa orang ke udah tesat runding tu tadi nyau bekarungkak ngema selabit nurun mansang bekuli ngagai menoa orang ka dulu agi udah bisi kebun getah pera dalam taun 1941 nyentuk ngagai taun Jepun ti ngalah ka menoa Sarawak tu leboh perang dunya ti kedua menya.
Pulai ka pun mimit cherita, berengkah ari taun 1908, maioh bendar mega bansa Iban Sarawak nurun bekerja ka menoa Malaya. Nyadi utai ke dikerja sida di menoa nyin iya nya, bisi nya kerja nyadi polis, bisi nya kerja nyadi tukang timbak ba Selangor Museum, bisi sida nya begiga ka burong ka menoa Siam(Thailand), Paupua New Guinea, Saba(Sabah), Kalimantan Barat, Pulau Celebes, Pulau Jawa enggau ka Pulau Sumatra. Nyadi semoa sida ke nurun pegi enggau bansa orang putih ngagai menoa pulau bukai, maioh bendar menoa enggau bansa utai ka dipeda. Sida iya mega meda gaya pemansang bansa orang bukai, meda gaya macham pasok pakaian orang bansa bukai, lalu sida iya meda gaya macham utai ka dikebun ka dikena orang menoa nya ngidup ka diri enggau ngemansang ka menoa sida.
Leboh udah pemulai sida tu ke pegi, dia sida iya lalu nguji ngena semoa penemu baru ke udah dipeda sida ba menoa orang. Sida iya lalu nambah ka penyampau kebuh getah pera ke udah ditanam apai indai sida ka udah. Lalu pia mega sida iya ari ke udah meda gaya rumah bansa bukai, nya mun ka sida ke pulai pegi tu tadi lalu ngerah orang ke diau di menoa diri empu lalu mupok berumah manah ka agi ari ke udah, lalu nganti bansa ramu ka ditanchang ngena ribis. Lalu ngaga iya ngena ramu ka dilantak ngena paku lawang.
Nambah ka nya ngambi ka sida iya enda seruran berumah dia sida iya lalu mai orang ke baru ka berumah lalu ngena ramu kayu tebelian, lalu enggai agi betiang sereta beramu ka kayu ti lembut. Nyadi mun Iban nya tadi ngubah rumah diri ari gaya iya ke kalia nya ari taun 1915 ngagai taun 1945. Lepas ari nya orang maioh pen nyau bisi magang pengerindu ati ka ngadu ka gamal rumah sida empu manah ka agi,tang gaya rega kayu di menoa Sarawak nyau udah mupok mar bendar rega, udah bekau perang dunya ti kedua tu suba.
Nambah ka pengawa ke udah disebut diatas nya tadi, laban nunda nitih ka pengawa ke udah dikerja bansa bukai, Insoll anak Rekaya Pemancha Nanang ke datai ari menoa Padeh lalu nyadi orang ti keterubah bansa Iban Sarawak diasoh Tuan Raja nupi Chapi. Lalu nunda pengawa Insoll ke nupi jelu chapi nya mega orang ari menoa Paku ti diulu ka Nyaru anak Munji di menoa Karangan Pinggai dalam taun 1926.
Semoa bansa Iban ke dulu agi bekebun getah nya tadi, lalu dulu agi nemu utai ka dikumbai orang “dulu bayam duit” ke pama agi ari orang bukai. Kebuah pia laban leboh rambau nya orang ke apin bisi kebun getah, maioh bendar sida iya bekuli ngereja getah orang ke udah dulu agi. Tang taja pia rambau nya menya, nyadi gaya sida ke bulih duit nya tadi agi mudah bendar gamal datai, nya alai sida ketuai rambau nya kelia sigi apin tentu nemu reti jako betaroh ka duit tegoh ambi ka nyadi penyaga maia tusah ke dudi hari.
Naka utai ke bisi dalam runding sida iya, iya nya meli pasar ke lalu tau disewa bansa China alai sida iya bekedai, enggau pengawa ke bebunga ka duit ti enda meruan tentu besurat kena bansa China bedagang. Nya alai laban pengawa ke enda tentu besurat baka nya alai maioh bendar bansa Iban nya tadi rugi ngapa semampai dikelakar bansa China ke ngemula madah ka dagang diri empu bengkerap. Ka siko dua aja bansa Iban ke rambau tu ke bisi ngembuan penemu ka nyimpan duit dalam bank bansa China tang sida iya nyimpan duit nya enggau ati ti rawan sereta nangi enggai ka diri kena tipu bansa China.
Nyadi bansa Iban ke jampat dulu datai ati ngining pengawa orang ba nengeri lalu nyau nemu nunda bansa China tu bedagang. Bansa Iban ka dulu mungkal pengawa bedagang tu iya nya benama Lumpoh seduai adi iya ke benama Ujih enggau Langi bedagang lalu bekunsi meli sekunyir(kapal layar) ka dikena sida iya belayar ari Sarawak ngagai menoa Singapura ngundan kayu ramu bansa tebelian. Nyadi pengawa dagang sida menyadi tu bengkerap laban kachau leboh perang dunya ti kesatu tu suba.
Lepas nya bisi siko dua agi bansa Iban ka nguji ke diri ka bedagang. Di menoa Batang Krian bisi Iban siko ke benama Saudagar Jeti, di menoa Batang Rimbas bisi Saudagar Gelanggang enggau di menoa Batang Paku bisi siko ke benama Saing anak Bai. Nyadi iya tu meli kapal ke lalu dikena iya bedagang ari menoa Spaoh ka Kuching. Nyadi semua pengawa bala saudagar tu tadi nadai pengujong lalu dikumbai kitai “Upang Ngapa”, laban sida iya nadai penemu sereta bansa Iban rambau nya mega apin nemu reti ngering ka pengawa dagang bansa diri empu, lalu tau mega dikumbai kitai sida iya enggai bejual bebeli enggau bansa Iban empu.
Nyadi kejang Jepun ke ngalah ka menoa Sarawak dalam taun 1940 dia bisi siko bansa Iban ke benama Langi anak Budin lalu bisi muka siti kompeni dua macham, lalu iya bepuku ka mata wang ti lebih $40,000.00 ngereja pengawa bedagang ngena chara meli rumah ke lalu diasoh iya ke disewa. Tang meh enda mukai mukai leboh sida iya baru muka dagang, dia sida iya lalu betemu enggau penusah ke kena tuntong perang ke lalu ngujong ka pengawa dagang sida iya puntan. Pengawa dagang sida iya ngetu bendar dalam taun 1959.
Lalu nya gaya semoa macham utai ke udah dikerja bansa Iban kenyau ari dulu kelia. Diatu udah dunya nyau bebali bendar, kitai kemaia hari tu ka ngemata ka pemutus ati bala anembiak rebak baru dalam dunya ke disebut kitai mansang tu, ngereja semoa pengawa nunda pengawa enggau pemansang bansa bukai. Kitai arap ka utai ke udah tu tau nyadi ka ajar enggau lalau bala anembiak ke angkat baru rebak kemaia tu hari.
