IBAN ARI BATANG AI
Nyadi Batang Ai nya endang menoa lama penatai bansa Iban. Nyadi bisi siko bansa Iban di menoa tu kelia ke endang ukai berasal ari Batang Ai. Agi kelia menoa Batang Ai tu agi nyamai bendar alai diau, labn orang ketuai agi nemu diri sama diri sereta enggau agi deka bendar bebasa ka pangan diri. Sida iya mega selalu nemuai ngundang pangan diri leboh maia sida iya bisi lepa ari ngereja pengawa, sereta agi mega bisi bepadah ka pangan diri beambi ngabang enti sema sida iya bisi ngereja pengawa begawai ka besai agi.
Nyau ke lama bansa Iban udah nguan menoa Sarawak tu menya dia bisi Iban siko ke benama Dunggat ti datai ari menoa Ulu Ai ke jadi melaki bini enggau indu siko ke benama Inche, iya nya indu siko ke datai ari menoa Kumpang. Nyadi sebedau Dunggat tu jadi enggau Inche, dia iya endang udah betunang enggau siko indu ke benama Chula, iya nya indu orang datai ari menoa Ulu Ai. Nyadi tunang seduai tu rumbau laban Dunggat nyau matak jako ketegal iya ti keras bendar ka jadi enggau Inche ke ari Kumpang nya tadi.
Apin bengat lama udah Inche nya tadi jadi enggau Dunggat alai seduai iya pen lalu bisi anak. Lalu taja pen Inche tu udah beranak siko tang Chula tu endang agi mengkang pedis ati ngagai iya ketegal ti udah begulai sejalai enggau tunang iya Dunggat ke dulu suba. Nya alai ko ati Chula, “Enti enda ketegal penemu Inche, Dunggat tentu enda mungkir janji ke ka jadi enggau iya.” Rambau nya kelia Dunggat sigi siko lelaki ke endang nyadi buah jako sida ke indu ba menoa sekayu Batang Ai.
Sekumbang Chula ke agi begedi ka Inche, dia endor Indai Lemanyie lalu bisi datai nemuai ka Kumpang ari Ulu Ai. Indai Lemanyie lalu bisi mai ilom pinang dua iti ti dikirum ka Chula ngagai Dunggat seduai Inche. Leboh Indai Lemanyie nyau datai di Kumpang dia ilom pinang nya pen lalu disurong ka iya ngagai Inche.
“Ari ni penatai ilom pinang tu ?” ko Inche.
“Ari Chula,” ko Indai Lemanyie.
Ninga saut iya tak munyi nya, Inche lalu mapa ka ilom pinang nya tadi. Nyadi ilom pinang ka dikirum Chula ka Dunggat nya tadi lalu diserungkai Inche. Nyadi peda iya dalam ilom pinang nya tak bisi bulu manok enggau bulu burong menaul, lalu bisi mega bulu ukoi enggau bulu mayau.
“Nama utai disimpan dalam ilom pinang tu tak baka tu ?” ko Inche.
Dunggat lalu nanya ka ari ni penatai ilom pinang nya.
“Ari Chula sigi dikirum iya ka nuan,” ko Inche, “dibai Indai Lemanyie.”
Udah meh meda utai tak bengat nyelai baka nya dia ilom pinang nya tadi lalu dipurok ka Dunggat ngagai lubang ka baroh rumah. Tang Inche mansang irau bendar ati, laban iya nyangka nya rachun pengaruh ka dikirum Chula ka dikena iya ngerusak Dunggat seduai iya.
Nyadi hari siti Indai Lemanyie lalu deka mulai ka diri ka Ulu Ai. Lalu laban ke agi irau ati ka kirum ilom pinang nya tadi dia Inche seduai Dunggat lalu mesan ka Chula ngasoh iya enda tau enda anang laun datai ngagai seduai iya beguai betelesai ka pasal kirum ilom pinang nya. Indai Lemanyie pan lalu mupok mulai ka diri.
Enda lama udah nya alai Chula pan lalu datai ari Ulu Ai. Nyadi leboh malam nya sida iya lalu betelesai ka ilom pinang nya enggau Inche seduai Dunggat. Chula lalu ngaku diri amat bisi ngirum ka rachun pengaruh pemenchi ngagai seduai iya laban ka ngasoh seduai nya sarak.
“Nama guna nuan ka beduan kami duai baka nya?” ko Inche, “enda iboh diberi nuan pemenchi pen enti nuan amat ka jadi enggau Dunggat, laban nuan tau nanggong iya berangkat ari aku.” Nambah ka jako nya tadi, ko Inche, “Nya alai nya ukai semina pemenchi tang rachun.”
Ko saut Chula, nyadi ilom pinang nya ukai rachun tang semina pemenchi ke ka dikena iya nyarak ka Inche seduai Dunggat.
“Rachun,”ko Inche, “enti aku mati ketegal nya ila aku enggai enda minta pati nyawa ari nuan iya nya sigi tajau menaga.”
Udah abis sida iya ke bechakah ketegal ilom pinang nya alai Chula pen lalu mulai ka diri ka Ulu Ai hari siti.
Enda bengat lama udah bekau nya alai Inche lalu kena sakit raya ke lalu ngujong ka iya parai. Ninga berita Inche nya udah parai, dia menyadi iya ke benama Lajang seduai Tugong ke diau di menoa Buie lalu ngabas penusah iya ngagai menoa Kumpang. Datai seduai iya din, seduai lalu ngempuru ka semoa tuai tuai orang Kumpang mai sida iya ngagai menoa Ulu Ai laban ka ngerampas tajau menaga sigi ke untong Chula kena betebus bebayar ka pati nyawa Inche ke udah parai laban makai ilom pinang ke digulai Chula enggau rachun pengaruh.
Pagi siti sereta meh udah niang Inche nya ditumbak ka alai Tugong seduai Lajang lalu besikap laban deka mai bala tuai tuai orang Kumpang nurun mansang ngagai menoa sida Chula di Ulu Ai. Nyadi sida ke nurun ngerampas tu nadai begaga ka langkau penunggu ke nyadi alai sida iya betandan mansang ngerampas, laban sida iya udah udu bendar pedis sereta ringat ati.
Datai sida iya di menoa Ulu Ai, sida lalu ngerampas tajau menaga sigi ke endang nyadi pemai Chula empu lalu ditaban ka sida pulai ngagai menoa sida di Kumpang.
Meda pengawa sida ari menoa Kumpang nya bengat ngeneras nya dia deh Mandau, Sumping, Naga enggau Bararo lalu balat bendar enda lantang ati. “Enti kitai tu tak bengat bisi ngereja penyalah ko sida ari Kumpang nya, lapa sida iya enda dulu mansang mai betelesai ka penusah sida ba moa tuai tuai maioh, nyadi pengawa sida ke ngerampas tajau menaga pemai Chula tu nya ukai dikumbai kitai adat,” pia ko jako ransi bala sida nya tadi.
Udah meh tembu aum sida iya malam nya, pagi siti Naga lalu mai Sumping ngulu ka bala sida semoa mansang ngayau ngalah ka menoa Kumpang. Datai sida iya di Kumpang, sida iya lalu ngelaban munsoh sereta bulih dengah pala dua igi. Udah tembu nya sida iya lalu mulai ka diri baru ngagai menoa Ulu Ai.
Apin lama iga udah sida iya mulai ka diri ngayau ngagai Ulu Ai, alai bisi bala anembaik ari menoa Ulu Ai mansang ka ngalu meli garam ngagai menoa Nanga Skrang. Leboh anembiak dua iko tu mansa menoa Nanga Kumpang seduai iya lalu dibunoh Lajang seduai Tugong dia.
Udah parai seduai nya, dia pengawa kayau anak ari menoa Ulu Ai enggau Ili Ai lalu majak mansang nyadi bendar ngujong ka sida nyau balat bemunsoh enggau pangan diri ketegal ti mansang ka bebalas ngelaban pangan.
Nyadi sida iya sama enda tentu ulih ngalah pangan diri. Nyau kepuas ti idup asai nya lalu ati sida iya semampai irau takut ka bala munsoh munoh, alai Apai Ramba seduai Apai Jega lalu mai bala besai maioh mansang ngayau ngalah ka menoa Ulu Ai.
Leboh pengachau tu nyadi dia rumah Temenggong Simpi Pala enggau rumah Gunggang Gerasi di menoa Rantau Panjai enggau di Nanga Delok lalu nyadi ka alai pintu bunoh laban sida iya enda ngari ka ari nya nya ke bala sida ti bemunsoh tu.
Leboh Apai Ramba nyau datai ba rumah Temenggong Simpi Pala di menoa Rantau Panjai, dia iya lalu betemu enggau Jaburi bini Temenggong Simpi Pala ke benong mandi ba pendai. Sereta meda sida nya datai ari ili, Jaburi lalu ngasoh sida iya ngetu leboh ke mansa nya. Sida Apai Ramba nya enggai bendar ngetu tang Jaburi majak bendar ngumbok ngasoh sida iya enda tau enda ngetu. Sida Apai Ramba pan lalu ngetu ga ba pendai sida nya.
Jaburi pen lalu nanya ka nama kebuah sida iya tak datai bengat ngemaioh nya tuboh ari ili. Apai Ramba lalu madah ka pejalai sida ti nurun mansang ngayau ka ngalah ka rumah sida Mandau, rumah sida Sumping lulu pia mega terus deka ngelebor ka rumah Temenggong Apai Rusoh di menoa Ulu Ai. Ninga kebuah jako sida nyau munyi nya, dia Jaburi lalu nagang enda ngasoh sida.
“Nama kebuah kita deka kiroh datai ngenyauh nya ka nguji ngalah ka Lubang Baya, Nanga Tiga enggau Nanga Mujan lalu ngenusah ka diri ngelaban wong. Enda kita nemu orang rumah Tegaran, rumah Jangkilan di Nanga Musing nya endang orang ti beburong raya, beburong rindang. Enti malam sida nya ke bekupan bejaga ba batu anchau, enti maia pagi sida iya nya ke bejembi dipuchok kayu galau. Reti nya sida tu endang orang ke leboh malam hari besalai ka pala munsoh lalu leboh maia pagi siang hari sida iya diau betan di rumah ngirai diri.
Kebuah alai Jaburi berani meri sida Apai Ramba jako nya laban iya empu sigi endang indu datai ari Kumpang ke belaki nguai ka Temenggong Simpi Pala lalu iya empu mega endang petunggal enggau Apai Ramba. Iya mega lalu betenah madah ka orang menoa Nanga Musing ke endang ditemu diau di pintu bunoh nya sigi suah udah nulong orang ke diau di menoa Ulu Ai belalai ngalah ka menoa Kumpang.
“Enti munyi tu berita,” ko Apai Ramba seduai Apai Jega, “orang nya meh dulu dialah ka kitai, laban sida iya bengat kelalu udu udah nipu kitai.”
Kejang sida deka angkat mupok dia Jaburi lalu bepesan ngagai bala sida enda ngasoh munoh unggal iya bini Jangkilan. “Tanda iya, enti bisi berema anak lalu nyandik anak iya ngena pua lebor api,” ko iya. Udah ninga jako pesan Jaburi nya magang bala sida pen lalu nyendia ka diri deka nampong mudik baru.
Datai sida di Nanga Tebelian dia sida iya pen lalu sangkai. Ko Apai Ramba, “Nyadi semoa kita ke ngerambing bedarat nya lagi dudi, lak ka aku dulu mansang merau tu dulu kin. Kitai enda iboh bepenginau. Enti aku udah nuntong di pangkalan, nya baru kita ke ngerambing nya tau besedia ka ngalah ka rumah munsoh.”
Bala sida Apai Ramba lalu merau mupok ngejang ka nya.
Datai perau Apai Ramba ba pangkalan rumah orang Nanga Musing dia iya lalu betemu enggau bala indu ke benong mandi. Ba indu ke mandi tu tadi iya lalu mesan ngasoh Tegaran seduai Jangkilan sama nurun ka ai, laban iya deka berandau enggau seduai. Enda lama udah nya pen lalu datai Tegaran nyandik kambut lalu dikentudi ka Jangkilan ke mai kungop. Sereta seduai iya deka nudok ka diri, angkat Apai Ramba lalu ngamok sereta munoh seduai iya dia.
Sereta udah meh parai Tegaran seduai Jangkilan, alai bala maioh besai ke bedarat pen lalu datai sereta lalu ngalah ka rumah orang Nanga Musing. Nyadi rumah orang Nanga Musing leboh tu puang bendar nadai orang ke lelaki laban sida iya udah nyau begiga ka ikan ngagai danau. Semua indu enggau anembiak, enggau orang ke tuai tuai umor aja ke agi bisi tinggal dia. Sida Apai Ramba bisi munoh munsoh lalu bulih dengah tiga puloh igi sereta bulih perapasan tajau tiga puloh igi.
Udah alah rumah orang Nanga Musing nya, baru sida iya ingat ka jako pesan Jaburi. Digiga sida iya dini alai bangkai indu ke dipadah ka bisi besandik anak ngena pua lebor api munyi ko jako pesan tang lalu nadai temu. Nyadi bini Jangkilan leboh rumah sida ke dialah ka tu, benong iya nempa periok tanah ngena pua tekalong. Lalu betudong ka pua nya iya lalu ngelari ka diri ngelesit bala maioh sereta naban ka anak iya lalu nyau. Nyadi anak indu iya siko ke benama Simpo enda sempat ngelari ka diri, nya alai iya lalu ulih ditangkap Apai Ramba empu.
Udah alah rumah orang Musing, Apai Ramba lalu mai bala iya pulai ke Kumpang. Leboh sida nyau datai di rantau ai lalu mansa rumah Gunggang Gerasi dia Apai Ramba lalu ngetu sereta nusoi diri ngagai Gunggang Gerasai madah ka diri udah ngalah ka rumah sida Tegaran enggau rumah sida Jangkilan di menoa Nanga Musing.
“Oh naka ga nuan tak baka tu, mansang nurun ngayau enda bepadah lalu munoh orang baik ke nadai penyalah,” ko Gunggang Gerasi nyaut iya.
Gunggang Gerasi lalu nurun nangkin nyabor mai Apai Ramba bepantap. Apai Ramba enggai lalu iya pen enda engkeretik. Nyau kepuas iya ke ninga jako putap Gunggang Gerasi nya baru iya nusoi diri ngalah ka orang Nanga Musing laban ari jako asoh Jaburi bini Temenggong Simpi Pala ke madah ngagai iya orang Nanga Musing tu aum juak enggau orang ari menoa Ulu Ai lalu bisi kala udah enggau munoh orang ari menoa Kumpang.
“Bula Jaburi,” ko Gunggang Gerasi, “nadai orang Nanga Musing kala enggau sida Naga, sida Temenggong Apai Rusoh enggau Sumping mansang ngayau ngalah ka menoa kita.”
Nama agi deh lalu nesal sereta berasai tusah hati Apai Ramba ninga jako Gunggang Gerasi nya tadi, nya alai iya lalu mai bala iya undor.
Undor meh sida iya lalu leboh datai ba pendai rumah Temenggong Simpi Pala di menoa Rantau Panjai, sida iya lalu ngetu baru nusoi berita diri ngagai Temenggong Simpi Pala iya nya perau sida benong sarat laban pala orang ari menoa Nanga Musing.
“Enti dek ka nanam igi semakau ba amau dan kara di menoa Nanga Musing tau dek mudik kulu,” ko jako bungah Apai Ramba enggau Temenggong Simpi Pala. Tekenyit bendat Temenggong Simpi Pala ninga jako iya nya lalu angkat sereta ngedar ka nyabor lalu mansang ngeransi ka tanju, lalu sepiak rarat. Iya lalu ngangau mai sapa bagi sida Apai Ramba deka betangali alan bebunoh ngelaban iya. Nyadi Apai Ramba enggai, lalu sida iya pen lalu majak undor kili pulai ka Kumpang.
Nyau kelama sida iya ke undor nya, sida pen lalu datai ba menoa Nanga Buie, sida lalu ngetu ba rumah Untu, rumah Bulan enggau rumah Bantin.
“Dini kita nurun ngayau nya unggal? “ ko Untu.
“Dia,” ko saut Apai Ramba, “di menoa Nanga Musing.”
“Bulih kita?” ko Untu nanya Apai Ramba.
“Bulih!” ko Apai Ramba Nyaut, “dengah bisi bulih tiga puloh igi pala, lalu tangkap bisi tiga puloh iko mega bai kami.”
Nyadi leboh Untu nyau tepeda ka Simpo udah nyadi ka tangkap Apai Ramba iya lalu berasai sinu bendar ati, lalu minta diri deka nebus Simpo ari tangkap nya.
“Tau,” ko Apai Ramba, “enti dek amai ka nebus Simpo nya tau meh tang mesti ngena tajau menaga sigi ke ditutup enggau setawak selabuan.”
Untu lalu nyadi nebus Simpo nya ari ke nyadi tangkap Apai Ramba, nadai nemu ko enda nebus Simpo nya laban iya tak bengat anak sida diri petunggal. Nyadi Simpo pan lalu diau tinggal ba aya iya Untu di menoa Nanga Buie.
Apin lama udah meda orang menoa Nanga Musing ke udah punggor dialah ka bala sida Apai Ramba ari menoa Kumpang dia Gunggang Gerasi, Naga, Sumping lalu nurun nyuong Ujan, Mandau enggau Temenggong Simpi Pala mansang ngayau bebalas nguji ngelebor ka ngalah ka menoa Kumpang. Sida lalu mai bala bansa Beketan ari menoa Ulu Ai kira bisi bulih seribu iko tuboh enggau sida nurun ngayau nya.
Dia Gunggang Gerasi lalu bejako “Enti Temenggong Simpi Pala enggai enggau kitai nurun ngayau, rumah iya ila lalu alah ka ulih bala kitai, laban pengawa kitai ke kachau tu bepun ari jako mulut bini iya Jaburi, ke ngepun ka orang menoa Kumpang nya ke ngayau ngalah ka menoa Nanga Musing.”
Sida pen lalu undor, nyadi leboh sida nyau datai di menoa Nanga Pan ke enda jauh ari ulu rumah panjai Temenggong Simpi Pala, dia sida lalu ngetu lalu ngasoh bala bansa Beketan begiga ka ipoh. Sekumbang sida ke ngetu bergaga ka laja enggau ipoh dia, ari nya baru Sumping seduai Naga beseruan ngagai Temenggong Simpi Pala mai iya nurun enggau sida nurun ngayau ngalah ka menoa Kumpang.
Ninga jako anjong seruan Sumping seduai Naga nya, dia Temenggong Simpi Pala lalu bejako. “Oh! kati ko aku tu ka enggau kita mansang nurun ngayau ngalah ka bala ipar enggau ngayau ngalah ka bala mentua aku din.”
“Enti nuan enggai enggau kami nurun ngayau ngalah ka menoa Kumpang ngambi ka bebalas ka pemarai bala orang ari menoa Nanga Musing, rumah nuan tu ga dialah ka kami ila,” ko seruan madah ngagai Temenggong Simpi Pala jako Sumping seduai Naga.
“Endai! Kati ko nya tau tak baka nya deh bakih. Nama chara aku tu dibai bala kita, nurun mansang ngayau munoh bala mentua enggau ipar aku magang di menoa Bukong enggau di Salindong nya,” ko saut Temenggong Simpi Pala.
Ninaga jako saut iya tak majak madah ke diri enggai nyadi enggau sida Gunggang Gerasi tu mansang ngayau ngagai menoa Kumpang, dia bala seruan nya tadi pen lalu pulai sereta nusoi jako ke udah di saut Temenggong Simpi Pala nya tadi ngagai Gunggang Gerasi. Ninga jako saut Temenggong Simpi Pala nya tak melintang bendar, sida Gunggang Gerasi lalu berasai tusah bendar ati. Nya alai sida iya pen lalu undor laban enggai enda bejako betemu moa enggau Temenggong Simpi Pala nya empu.Datai sida di rumah Temenggong Simpi Pala, sida lalu berandau enggau iya empu laban ka nentu ka jako iya nya tadi.Nyadi Temenggong Simpi Pala endang nadai berubah jako laban madah ka diri enda nemu chara ka nurun enggau sida iya ngayau ngalah ka menoa bala mentua enggau bala ipar iya empu di menoa Kumpang.
Gunggang Gerasi pen lalu nyaut,”Nuan Temenggong Simpi Pala enda tau enda nurun enggau kami ngayau ngalah ka menoa Kumpang, laban orang ari menoa Nanga Musing udah parai sereta bulih pengerusak enti enda ketegal jako petenah ari bini nuan Jaburi ngagai bala sida Apai Ramba ke nurun mansang ngayau suba.”
Ninga jako nya Temenggong Simpi Pala sigi ngenjing enda berait, tang sida iya lalu mai orang maioh ngaga kuta ba rumah panjai sida iya dulu beguai enggai ka bala sida iya ka nurun undor ngayau. Sehari nya sida iya ngaga kuta ngelingi rumah panjai sida nya pen lalu ulih ga ditembu ka. Nyadi bekau kuta rumah panjai sida tu agi bedau ulih dipeda nyentuk ka sehari tu ba tebing kanan Rantau Panjai mudik Batang Ai.
Leboh sida iya betatam di menoa Rantau Panjai, nyadi berita sida nya bisi kena dinga bala sida Apai Ramba ari menoa Kumpang. Nyadi bala sida ke ari ili pen endang udah besedia nganti rumah sida ari ke ka diserang munsoh, iya nya bala sida Gunggang Gerasi. Nyadi sida Apai Ramba lalu ngaga ipa jaga ba Nanga Seremat.
Nyau ngalih hari bala sida Gunggang Gerasi pen lalu undor. Nyadi malam nya sida undor ari ulu merau begadai gadai. Nyadi kira maia tengah malam dia bala ke jaga ipa ai sida Apai Ramba di Nanga Seremat lalu bisi tepeda ka kenaya api orang datai nyau baka liau datai nuju sida agi di ulu din. Meda utai tak baka nya, sida lalu belanda beguai guai ngerah orang ke di rumah madah ke bala munsoh bisi datai ka ngalah ka rumah sida bebala besai maioh. Sereta ninga berita nya, dia Apai Ramba lalu bejako madah ka utai ke bisi dipeda sida nya semina api chak lut tang ukai api bala munsoh. Iya lalu nganu bala jaga iya nya ngumbai bala sida buyan sereta takut.
Api Ramba lalu muru bala jaga iya nya ngasoh bala sida kin ka baru. Leboh sida nyau datai di Nanga Seremat dia sida iya nadai agi meda api laban bala munsoh udah ngelebus merau ka ili. Sida pen lalu pulai madah ka diri nadai agi meda utai nya agi ngagai Apai Ramba. Ninga berita nya dia Apai Ramba lalu bejako “ Nya alai aku tadi ngumbai nya utai ngapa ke bisi dipeda bala kita.”
Kira meh nyau maia dini hari dia bala sida Sumping enggau bala sida Naga pen lalu ngalah ka rumah sida Gelau enggau rumah sida Kamarau di menoa Setuga. Rumah nya pen lalu ulih mega dialah ka sida laban orang ke lelaki nadai agi dia laban udah enggau bala sida Apai Ramba ngeram ka ipa di ulu din. Nyadi dengah, tangkap enggau perapasan ulih bala sida Sumping enggau Naga tu maioh bendar tang nadai madah ka penyampau. Nyadi rumah panjai bukai ke ulih dirumban sida Sumping enggau Naga dikayau ngelingi menoa nya sigi lalu rentong magang ditunu sida ngena api.
Leboh maia agi urap hari benong bala sida Apai Ramba ke agi ngeram ka ipa ba Nanga Seremat dia bala sida iya lalu tekenyit maia malik ke ili laban meda langit nyau terang kuning laban asap enggau pandang api ke ngangus ka rumah ti udah ditunu bala munsoh. Nya baru sida iya ngadang rumah sida din sigi udah rentong magang ditunu munsoh malam nya.
Udah ke ulih ngalah ka rumah sida Apai Ramba dia Naga seduai Sumping lalu ngulu mai bala anembiak seduai pulai mudik ka ulu. Nyadi bala anembiak Temenggong Simpi Pala siko ke benama Kibong lalu ngulu ka bala orang bukai nya pulai bedarat. Meda Kibong udah ngenulu ka bala sida ke pulai ngayau nya bedarat dia bala sida Apai Ramba enda munoh iya laban iya nya tak petunggal sida empu.
Leboh sida ke pulai bedarat tu dia Temenggong Simpi Pala sigi bejalai enggai dulu tauka enggai mega dudi ari bala maioh laban iya naka iya ka penakut ka diri parai dibunoh bala sida Apai Ramba. Udah meh sida iya meda bala munsoh mansa, nya baru Apai Ramba seduai Apai Jega mai bala anembiak seduai ngepong bala sida ke bedarat nya ngulu ka Nanga Seremat laban deka negah bala sida nya di Nanga Piyat. Datai bala Naga di menoa Nanga Piyat, dia Apai Ramba lalu ngangau ka sida agi mai sida ngetu bebuti. “Di ili tadi agi belala,” ko bala sida ngayah ka bala sida Sumping enggau Naga.
Ninga jako Apai Ramba nya dia Sumping seduai Naga lalu nyaut madah ka diri endang deka. Nyadi perau kayau sida pen lalu disangkai ka tebing laban beguai ka diri ti ka belaban. Nyadi orang ke nyadi manok sabong Sumping nya benama Taboh sigi udah dulu agi putus ari enggi sida ke bukai dengah ulih iya, lalu ditaban bai iya ngagai tugong bala. Udah nya datai ga Sibat ke nyadi manok sabong Naga lalu madah ka semoa munsoh ke udah bakal endang udah dianjong sida iya ka menoa Ulu Piyat.
Sibat empu lalu bulih dengah rawai empat, lalu iya ke bensunbar Enturan Besi mega bulih dengah pala sigi. Udah meh sida nyau nemu endor bala anembiak Apai Ramba ke baka nya belalai, sida lalu mupok nyidi kin lalu ulih munoh semoa bala anembiak Apai Ramba ke udah bakal nya tadi. Nyadi Apai Ramba nya tadi pen lalu alah, lalu semoa bala sida iya ke agi idup lalu ngelari ka diri ngagai menoa Kumpang.
Nyadi Naga seduai Sumping nya aki Penghulu Gerinang enggau Penghulu Jinggut ke diau di menoa Baleh, Batang Rajang. Nyadi Simpang ke bedengah Radin Apai Embuas leboh maia kayau tu nya aki Penghulu Imong enggau Penghulu Jalek ke diau di menoa Kumpang. Radin nya aki Penghulu Masam ke diau di menoa Katibas, Song lalu sama petunggal diri menyadi enggau Simpang.
Dulu ari tu kelia menoa Batang Ai nadai kala bebunoh nglaban diri sama diri, laban sida iya endang sama diri sekaban diri sebelayan magang, endang nadai orang bukai. Nyadi kenyau ari tu nya baru menoa nyau kachau, kachau belama lama, alah datai ngagai bala bansa Iban ke lalu disabong Raja Sarawak bebunoh ngelaban diri sama diri. Leboh ke bebunoh ngelaban Raja Sarawak bisi meh bala sida nya kemang ke ulu lalu bisi meh nya kemang ka ili lalu bebunoh diri sama diri enda beapai enda beindai laban enggai enda dikumbai orang kering sereta berani rambau nya kelia.
Agi ngingat ka diri ti udah alah tu dia Apai Ramba lalu mai bala besai maioh baru mansang ngayau ngalah ka rumah sida Apai Likop di menoa Entago ari atas menoa Nanga Jengin. Nyadi leboh tu rumah Apai Likop nyau udah punas kena serang bala sida Apai Ramba.
Meda menoa sida nyau agi majak kachau lalu enda nemu bebaik agi dia alai Sumping lalu mai Temenggong Simpi Pala pindah ngiga menoa ke nyamai agi tau alai sida iya diau. Nyadi Temenggong Simpi Pala lalu madah ka diri enggai pindah, laban iya enda tetinggal ka Petara ke bisi ngemata ka iya ba Bukit Tunggal ari ili Nanga Kaung.
Meda iya enggai enggau dia Sumping lalu mupok pindah ka menoa Batang Jekelan. Nyadi Naga lalu mai bala anembiak iya pindah ngagai menoa Batang Kanyau, Kalimantan Barat, Indonesia lalu diau ari ulu menoa bansa Memaloh. Nyau ke lama udah diau dia, dia Naga lalu pindah baru melunggang ka menoa Ulu Katibas, Song lalu berumah ba menoa Rantau Likau. Leboh sida berumah ba menoa tu, sida iya endang agi meruan dititih ka bala sida Apai Ramba ngena chara kayau anak ari menoa Kumpang, tang bala sida iya nadai kala pedis baka ke udah.
Ari menoa nya sida Naga lalu merurut ngili ka Batang Katibas lalu berumah ba menoa Nanga Menuan. Nyadi Sumping tu parai leboh sida iya berumah ba menoa Genting Tilan ba menoa Bukit Chundong, ba antara menoa Ulu Katibas enggau Ulu Jekelan. Udah parai Sumping dia iya lalu diganti anak iya ke benama Gerinang Nitek seduai menyadi iya ke benama Unggat.
Nyau ke lama udah Sumping seduai Naga udah nyau pindah, nya baru Temenggong Simpi Pala pindah ari menoa Rantau Panjai ka menoa Seriang. Di menoa Seriang nya baru iya balat bendar bebunoh ngelaban bansa Tawang, bansa Selimbau enggau bansa Kantu.
Bala sida Temenggong Simpi Pala tu menang, nya alai bala bansa Iban bisi bulih bagi enggau beempu danau dia datai ka kemaia tu hari. Papan antara Danau empu bansa Iban enggau bansa bukai agi bedau bediri dia datai ka sehari tu ke lalu dikumbai orang menoa nya Tanda Tembang.
Nyadi Gerinang Nitek seduai Unggat pindah ari menoa Nanga Menuan ke alai seduai iya balat bendar bebunoh ngelaban bansa Lugat, bansa Ukit enggau bansa Tanjong ke berumah panjai ba menoa Nanga Gat. Nyadi laban munsoh ke maioh, nya alai sida iya nama nya nyurut ka diri ke ili, lalu nama nya nyurut ka diri ke ulu Batang Rajang enggau Baleh, sereta lama bendar ke baka nya pendiau.
Udah meh parai Gerinang Nitek nya alai pengawa ke nyadi ketuai lalu diganti Gunggang Matahari. Udah parai Unggat dia alai iya ke nyadi ketuai lalu diganti Keling. Nyadi Keling seduai Gunggang Matahari tu diri menyadi, iya nya sama sama anak Unggat, tang Gunggang Matahari tu udah diiru Gerinang Nitek.
Gerinang Nitek bebini ngambi anak Simpo ke udah kena sebut kitai ba cherita pun pengachau sida Apai Ramba di menoa Nanga Musing, nya ke beranak ka Gunggang ke bensumbar Matahari. Gunggang Matahari tu beranak ka Semalan ke lalu belaki ngambi Lon, ke lalu beranak ka Miloh. Nyadi Miloh tu belaki ngambi Penghulu Attan lalu beranak ka Penghulu Nyanggau seduai adi iya ke benama Penghulu Jinggut di menoa Mujong dalam pati menoa Baleh, Batang Rajang.
Nyadi Keling lalu beranak ka Rando, ke lalu belaki ngambi Lang. Seduai iya lalu beranak ka Penghulu Gerinang dalam menoa Batang Gat. Penghulu Gerinang lalu beranak ka Penghulu Kumbong ke lalu nganti iya nyadi ketuai ba menoa Batang Gat.
Di menoa Seriang, Temenggong Simpi Pala lalu berumah di menoa Nanga Badau, alai iya lalu beranak ka Temenggong Runggah. Temenggong Runggah lalu beranak ka Temenggong Buah, Temenggong Guntor enggau Ba. Nyadi Ba tu jadi enggau Bejau leboh sida iya agi diau di menoa Nanga Badau lalu beranak ka Garong. Nyadi garong tu lalu belaki ngambi Jubang, lalu beranak ka Temenggong Koh leboh sida iya diau di menoa Pulau Ensulit dalam menoa Batang Kanyau. Nyadi bala sida Temenggong Koh tu diri menyadi maioh, nya alai menyadi iya siko ke jadi enggau Penghulu Gerinang lalu beranak ka Penghulu Kumbong dalam menoa Batang Gat.
Ari menoa batang Kanyau, Ba lalu pindah ka menoa Katibas, tang iya endang dudi agi pindah ari bala anembiak ke betuai ka Sumping seduai Naga. Leboh Ba datai di menoa Bukit Mubau, dia iya lalu betemu enggau Iban siko ke benama Malintang ke datai pindah ari menoa Batang Ai, ari menoa ke dikumbai Tembawai Sandong, enda berapa jauh ari menoa Nanga Delok. Ari Bukit Mubau, Melintang lalu nitih ka Ba berari ari nyentok ka menoa baru alai sida iya pindah nya nyau nadai utai ngachau agi.
Leboh Ba tu diau di menoa Bangkit dalam Katibas dia sida iya lalu pechah empat buah rumah. Nyadi sekeda nya lalu diau mendam dalam Katibas lalu bisi sekeda nya pindah ka menoa Kanowit. Nyau kelama udah nya Ba lalu pindah baru sereta diau enda jauh ari menoa Nanga Katibas. Ba menoa tu iya lalu bepangan enggau Sekalai seduai Sawing, iya nya tuai bansa Kanowit enggau bansa Tanjong. Leboh nya seduai iya apin nundok ka perintah menoa Sarawak ke betuai ka Raja Brooke.
Udah nya Ba lalu pansut ari menoa Nanga Katibas lalu berumah di menoa Nanga Ngelai enda jauh ari menoa Song. Leboh iya diau ba menoa tu, iya lalu besebila(bepangan) baru enggau Sawing. Sawing lalu meri iya tajau menaga sigi lalu Ba malas Sawing enggau ulun iya siko ke benama Attok.
Kira tiga taun iya udah diau dia, dalam taun 1870 maia Balang tuai Iban ke diau di menoa Katibas ke angkat ngelaban Raja Sarawak, iya lalu dibantu menyadi iya ke benama Enjop. Meda pengachau nya udu nyadi, nya alai Ba lalu mai bala anembiak iya pindah nikal ngagai menoa Batang Kanyau. Ari menoa nya taja iya enda tentu bebendar ngelaban Raja Sarawak, tang iya selalu datai mantu bala sida Balang. Nyadi penyarut lama bendar nyadi di menoa Katibas nyentuk ka datai maia Balang tu nyau parai digayang bala perintah Sarawak di menoa Pulau Selalau, semak menoa Sibau(Sibu) dalam taun 1871.
Udah meh parai niang Balang digayang perintah di menoa Pulau Selalau semak menoa Sibau(Sibu) dia menyadi iya ke benama Enjop lalu angkat baru ngelaban perintah Sarawak dalam Batang Katibas dalam taun 1876.
Tiga taun udah pukas pengachau ke diketuai ka Enjop tu alai Kedu ke bensumbar Lang Ngindang ke datai ari menoa Skrang mega lalu angkat ngelaban perintah Sarawak ketegal iya ringat bendar kena tagang perintah muka laya enggau bansa Kantu. Nyadi Kedu Lang Ngindang tu ngelaban perintah empat taun brengkah ari taun 1879 nyentuk ka taun 1881. Dalam taun 1881 iya lalu nundok di Bukit Setulak ba antara menoa Ulu Skrang enggau Ulu Kanowit begulai enggau bala Libau Rentap. Udah Kedu Lang Ngindang nya tadi dialah kena serang bala sida Tuan Maxwell, Orang Kaya Pemancha Nanang, Jabu enggau Utik, iya lalu mai bala anembiak iya rari baru ka menoa Kanowit udah bekau sida diukom perintah ngena tajau sepuloh igi. Ari menoa Ulu Kanowit nya baru bala anembiak iya angkat baru pindah baru ngili ka menoa Kanowit lalu diau berumah baru ba menoa Embawang Assan(Bawang Assan) datai ka keamaia tu hari.
Di Katibas udah bekau bala sida Enjop nundok ka perintah, nya baru bala anembiak Ba mulai ka diri kia ka baru ari menoa Batang Kanyau. Tang Ba udah parai tuai di menoa Batang kanyau. Nyadi orang ke ngulu ka bala sida pulai baru nikal ka Batang Katibas iya nya menantu Ba ke benama Jubang apai Temenggong Koh. Leboh sida iya datai di menoa Katibas, sida iya nadai agi numboh ka pengachau di menoa nya, tang sida iya apin mayar pupu ngagai perintah Sarawak laban kena sungkak pengachau bala Iban di menoa Ulu Batang Ai.
Sekumbang sida iya diau jenoh tu, nya alai sida iya lalu bisi ari ka pindah ngulu enggau ngili ka ai Batang Rajang. Di menoa Ulu Batang Rajang sida Jubang apai Temenggong Koh lalu bebunoh ngelaban bansa Sakapan, bansa Kejaman, bansa Punan, bansa Lahanan, bansa Kayan enggau bansa Kenyah Badang di menoa Ulu Belaga. Pia mega sida ke mudik ai Baleh lalu bebunoh ngelaban bansa Lugat enggau bansa Lusom di menoa Nanga Gat.
Udah abis pengachau bebunoh ngelaban bansa bukai berebut ka menoa di kandang menoa ulu, dia bansa Iban lalu angkat baru ngelaban perintah Sarawak ke betuai ka Janting apai Pengarah Banyang seduai Ayum di Bukit Batu. Lama bendar perintah Sarawak kiroh laban pengachau ke digaga sida tu nyentuk ka sida nyau bebaik enggau perintah Sarawak dalam taun 1924.
Nyadi di menoa Batang Ai dalam taun 1884, Ngumbang lalu angkat mai bala iya ngelaban perintah Sarawak. Dia Tuan Raja lalu ngayau bala sida Ngumbang tu enggau bala maioh besai kena 9 March, 1886. Nyadi bala sida Ngumbang tu alah lalu alai endor sida iya nan ngelaban bala Raja Sarawak, iya nya di menoa Tinting Kedang. Tu mega pengachau ke nyadi di menoa Ulu Ai sekumbang perintah Sarawak udah ngayau sida iya sekali dalam taun 1868.
Nyadi dalam taun 1893, Ngumbang lalu angkat baru ngelaban perintah Sarawak lalu dibantu Bantin ke endang sama deka ngelaban perintah Sarawak. Tang rambau nya orang ke diau di menoa Yong enggau menoa Cheremin dalam Batang Rajang pen bisi mega pengachau. Lalu sida iya diserang perintah dalam bulan May taun 1894. Pemulai bala perintah Sarawak ke udah menang ngalah ka menoa Yong enggau Cheremin, nya baru bala perintah Sarawak nya ngayau ngalah ka bala sida Bantin di menoa Delok. Nyadi leboh kayau tu siko anak Bantin parai leboh maia sida iya ke begau.
Apin puas hati ngelaban Raja Sarawak dia Bantin lalu angkat baru, lalu diserang Raja Muda Sir Charles Vyner Brooke begulai enggau Tuan Deshon di menoa Delok kena 9 June, 1902 ke lalu dikumbai kitai kelia Kayau Buntu. Semoa bala Raja Sarawak ke enggau sama nurun ngayau kira ka bisi dua belas ribu iko, tang kira ka seribu iko ari bala sida nya parai ketegal kena sakit muang ai. Lalu orang ke nyadi penchilin bala Raja Sarawak maia tu iya nya Munan Penghulu Dalam ke datai ari menao Sibau(Sibu).
Laban ke enda jera ka penusah bala sida ke udah kala alah ngelaban perintah Sarawak, dia Bantin enggau bala anembiak iya angkat baru ngelaban perintah Sarawak lalu ulih dialah ka Tuan Bailey di menoa Engkari. Udah alah bala sida Bantin tu, dia Tuan Bailey lalu ngalah ka rumah sida Ngumbang dimenoa Betong Wi, udah bala sida iya ke rarat pindah ari menoa Tuchong Pan. Nyadi kayau dua bengkah tu sama nyadi dalam taun 1902, tang lalu enda nemu ngasoh bala bansa Iban ke diau di menoa ulu tau jera.
Meda bala bansa Iban ke diau di menoa ulu lalu enda nemu jera, nya alai Tuan Raja empu lalu nurun ngulu ka mansang ngayau ngalah ka bala sida nya baru. Nyadi pejalai bala sida ke nurun ngayau nya tadi lalu betiki ari menoa Nanga Menyang kena 5 March, 1903 lalu ulih ngalah ka menoa Bukit Seligi di menoa Ulu Jengin. Naydi ketegal kayau tu Ngumbang seduai Bantin lalu bebai besemaia ka nundok ngagai perintah Sarawak, tang lalu kachau baru enda lama udah nya.
Meda bansa Iban di menoa Ulu Ai agi ngaga pengachau, nya alai perintah Sarawak lalu nurun ngayau sida iya baru kena 16 June, 1904 diketuai ka Tuan Baring Gould. Pejalai sida ke nurun ngayau tu iya nya betiki ari menoa Nanga Mepi lalu beramok di menua Bukit Kedang. Nyadi bala raban siti ke diketuai ka Tuan Owen lalu bedarat meraka Sungai Telaus ngagai menoa Ulu Engkari. Bala sida tu nadai betempoh enggau munsoh, tang semoa umai enggau rumah munsoh abis magang kena tujah bala sida sereta abis ditunu magang. Udah bekau kayau tu bansa Iban ke diau di menoa Ulu Engkari enggau Pan lalu sama nundok ka perintah Sarawak lalu ka betemu enggau Raja Muda di menoa Lubok Antu ba ujong taun nya.
Dalam taun 1906 dia Ngumbang seduai Bantin suah bendar nurun mansang ngayau ngalah ka rumah bansa Iban ke besemak enggau sida empu. Udah bekau nya seduai iya lalu madah ka diri ka nundok ka perintah Sarawak, tang leboh Tuan Bailey nganti seduai undor ka kubau di Lubok Antu tang seduai iya nadai datai.
Nyau kepuas perintah Sarawak ke meda bala bansa Iban ke seruran nadai pengawa bukai ngaga pengachau enggau pangan diri bekayau baka nya, dia perintah Sarawak lalu ngasoh bala semoa tuai tuai raban bansa datai begempuru baum di menoa Kapit. Nyadi orang ketuai ke bisi kena kangau ngagai aum tu iya nya ketuai ari menoa Ulu Batang Rajang, ketuai ari menoa Kanowit, ketuai ari menoa Ulu Batang Ai enggau ketuai ari menoa Ili Batang Rajang. Nyadi leboh pengawa tu sida iya bisi bebunoh babi kena 16 May, 1907.
Lalu taja pen semua ketuai ketuai raban bansa udah besemaia enda tau bebunoh agi, tang Bantin leboh ke bebaik di menoa Lubok Antu dalam bulan September taun nya agi mengkang endang madah ka diri enggai bebaik enti iya enda dulu agi nunggu semoa bala bansa tuai tuai bansa Iban ke udah nundok ka perintah Sarawak. Nyadi ketegal jako Bantin tu orang lalu enda nyadi bebaik.
Nyadi kena 31 December, 1908 dia Tuan Bailey lalu mai bala iya mudik nurun mansang ngayau ari Simanggang(Sri Aman) laban ka nguji ngalah ka menoa Delok enggau menoa Mikai Pambar. Sida iya lalu betempoh enggau munsoh tang enda lama bendar. Semoa rumah enggau semoa umai ba menoa ngulu ka ai Jengin nyentuk ka ai Mikai Pambar nya lalu abis magang ditunu bala Tuan Raja. Udah bekau kayau tu nya baru bansa Iban di menoa Batang Ai nadai agi ngaga pengachau, lalu tu meh nyadi ke pengabis enggau penudi kayau Tuan Raja ngulu ka Batang Ai ke sigi endang menoa lama sereta nyadi keterubah iya alai penyangkai enggau penatai bansa Iban ngagai menoa Sarawak tu.
Nyadi dalam taun 1915, maioh bendar bala pungka lelaki bansa Iban di menoa Batang Rajang ke ngereja pengawa nyamun sereta ngerumpak orang bansa bukai nadai tentu beradat. Nyadi bansa Ukit enggau bansa China sigi nadai tentu nyamai digasak ka bala bansa sida tu baik ka di ai tauka dibabas. Nyadi pengawa ke ngaga pengachau ke baka tu lalu dikemesai ka Penghulu Merom enggau ketuai ketuai maioh dalam menoa Baleh.
Meda menoa Ulu Baleh nyau deka bisi pengachau baru, nya alai perintah Sarawak lalu kemaia nya mega deka ngabis ka pengachau nya. Bansa Iban dalam menoa Gat lalu kena kayau 22 Febuary, 1915 ke lalu ngasoh bala sida iya alah bendar di menoa Sungai Biru kena 31 March, 1915.
Kena 18 May, 1915 dia Tuan Baring Gould lalu mai bala maioh besai nurun mansang ngayau nagagai menoa Ulu Mujong laban deka nguji ngalah ka bansa Iban ke diau sereta nan di menoa Bukit Salong. Nyadi kuta bansa Iban ke ba menoa nya lalu ulih dialah ka bala perintah Sarawak udah kuta sida ke ditimbak bala perintah ngena bedil periok dua tiga kali. Udah ketegal ke udah alah tu, semoa bansa Iban ke kachau lalu diasoh pindah magang sereta diasoh diau ari ili kubau Kapit. Tang sekeda pungka lelaki menoa nya lalu ngelari ka diri lalu nguji nan baru di menoa Ulu Gat lalu ba menoa tu suah bendar sida iya dikayau perintah Sarawak nyentuk ka bala sida iya nadai agi ngaga pengachau.
Udah bekau ke kachau di menoa Ulu Baleh, lalu lama bendar bansa Iban nadai agi ngaga pengachau, nya alai sida iya lalu ngaga pendiau diri semak ka agi ngagai nengeri lalu belaboh ngereja pengawa bekebun getah pera ke tau meri bala sida iya penyamai enggau pengelantang baka ke diasai ka sida iya sebedau nyadi perang dunya ti kedua suba.
Tang taja pen orang ke diau di menoa ili udah ngemansang ka diri ngereja pengawa bekebun, lalu orang ke agi mengkang diau di menoa ulu endang agi ngemeran ka diri deka ngereja pengawa ngayau. Lalu bisi siko bansa Iban ke benama Asun ti belaboh ngaga pengachau ketegal iya ti enggai mayar pupu pasu, gantang, senapang, chupak enggau dachin. Iya lalu dibantu bansa Iban siko ke benama Kana ti datai ari menoa Ulu Engkari enggau maioh mega bansa Iban bukai ke agi bendar bisi ati ngembuan ati ka bebunoh. Udah meh sida iya tu kena kayau perintah Sarawak kena 12 Febuary,1932 dia Asun seduai Kana enggau Kendawang lalu bebai sama nundok ka perintah lalu diasoh perintah diau di menoa Lundu awak ka sida iya nadai agi ngaga pengachau di menoa ulu.
Nya gaya pengabis pengachau ke digaga bansa Iban dalam menoa Sarawak. Udah bekau tu lalu nadai agi orang di menoa Sarawak ke berani ngaga pengachau ke tau ngenatai ka penusah orang maioh baka nya . Tang ati berani bansa Iban Sarawak endang agi dikembuan sida iya belama tang sida enda ngemeran ka nya agi kena sida iya bebunoh. Bansa Iban Sarawak lalu diau manah enggau pangan diri, lalu nemu begaga ka rumah manah nitih ka gaya pemansang dunya, lalu nemu mega ingin ka belajar ka penemu besekula kena ngulih ka pemandai nunda pengawa enggau pemansang bansa bukai ke sama bisi diau begulai enggau sida iya dalam menoa Sarawak tu.
