Udah meh parai tuai bansa Iban ka benama Awan, nyadi pegawa ngayau di menua Paku Ulu lalu diganti menantu iya ke benama Kaya seduai ipar iya ke benama Bayang. Nyadi laban menua rambau nya kelia kelalu balat siga dikachau bansa Seru enggau bansa Beliun, nya alai Bayang lalu diatur Kaya nyaga menua tisau laban iya beberita bengat udu berani ngelaban munsoh. Bala munsoh sida Kaya pan enda mega tentu berani enti sida iya bisi ninga berita Bayang tu bisi nan ke menua.
Nyadi menyadi Kaya ke benama Masing enggau kaban sida ke benama Angga lalu diatur Kaya ngemeran ka ngemata ke pengawa sida ti bumai sereta ngadu ka laya sida dia bejako ke antara tanah leboh ke bumai betahun.
Angkat ari menua Nanga Perak alai Awan ke lalu parai tuai, menantu iya Kaya laki Sawai lalu matak bala sida iya pindah berumah ngagai menu ke dikumbai Nanga Sungai Raya. Ari nya sida iya pindah angkat baru lalu berumah di menua ke dikumbai sida Sungai Kasai. Ari menua Sungai Kasai sida iya lalu pindah baru ngagai menua Nanga Sungai Burak. Leboh sida iya ke berumah ditu, sida iya ninga berita bala anembiak Uyut Bedilang Besi ari Anyut udah pindah melunggang ngagai menua Bukit Aban laban deka berimba ke kampong di menua Ulu Paku.
Ninga berita nya dia sida Kaya lalu angkat udah ke berumah enda lama di menua Ulu Sungai Kasai ensurok kampong dalam laban deka berebut ka menua Ulu Paku enggau bala anembiak Uyut Bedilang Besi. Datai sida di Ulu Paku lalu dibai Kaya berumah ba menua di Nanga Jikang enda jauh ari Ili Nanga Penum. Ari rumah tu sida iya lalu magi tanah ngulu ka menua Penum naka Nanga Sungai Ridan, lalu ngulu ka menua Paku naka menua Kerukoh Beketan, lalu ngulu ke Sungai Paun sampai nyentok naka Tanjung Engkala.
Udah meh sida iya magi semua tanah nya tadi sida iya lalu nyurut kediri baru pulai ke menua Nanga Kedup ke di ulu ka Kaya. Nyadi Bayang lalu mai bala anembiak iya berumah ba menua pipi Kedup muak ari ulu tang leboh maia ke bumai sida iya bumai semina sama bela nyidi bali diri empu magang. Sekumbang sida iya ke berumah dia, dia bisi anembaik siko ke benama Punoh lalu magi diri ari sida Bayang lalu matak bala anembiak iya bebai berumah di menua ke dikumbai Tebing Bindang.
Nyau ke lama sida Punoh tu udah nyerara kediri ari orang bukai dia deh bisi siko anembaik Punoh ke benama Gera ditemu ngayap ngagai siko indu anembiak Bayang ke benama Geruda. Nyadi Gera tu tadi lalu nama kediri ngagai Geruda, tang pengawa seduai tu enda di pesetuju ka Punoh jadi melaki bini. Ka ditan Punoh pan enda mega ulih lalu pia mega ka diambi iya pulai Gera ari menua sida Bayang pan enggai. Laban Gera tu endang udah keran sereta mutus ati ka bebini jadi enggau Geruda. Punoh lalu bebai mai bala anembiak iya ngambi Gera tu pulai ari rumah sida Bayang.
Nyadi leboh sida Punoh tu datai ba rumah sida Bayang dia sida iya lalu enda chamang chamang lalu nangkap Gera sereta lalu dibai pulai dikaling baka ke ngaling babi. Meda gaya Punoh ke datai ngagai rumah iya nya tadi nadai enggau basa, nya alai Bayang lalu bejako enggau Kaya madah ke pengawa Punoh nya tadi salah bendar sereta enda bebasa ke rumah iya. Udah ke ninga berita ke dikenang Bayang nya tadi, Kaya lalu bejako, “Manah kitai dulu beseruan udah nya baru kitai nunggu iya.” Kebuah sida iya enda tau enda beseruan nya, laban nya sigi endang udah adat tuai kenyau ari Simpang Impang ke nunggu Bunsu Ribut mesti beseruan dulu sebedau nunggu.
Seruan sida Bayang pan lalu bejalai ngagai rumah sida Punoh madah ke pengawa sida iya ke ngaling Gera nya ngelanggar adat rumah lalu enda tau enda kena tunggu adat sigi alas. Punoh lalu madah kediri enggai ngisi adat tunggu nya, lalu madah kediri taja bulu manok gagar pan enggai meh iya meri ngagai sida Bayang.
Ninga jako Punoh bengat ngering nya dia sida ke nyadi seruan lalu mulai kediri sereta nusoi jako Punoh ngagai Bayang seduai Kaya. Bayang seduai Kaya lalu berunding ke jako Punoh nya tadi ke bengat enggai ngisi adat penti pemali berumah.
Nyadi lemai nya Bayang lalu ngempuru ke bala anembiak iya mai berunding ngiga jalai ngadu ke leman antara Punoh seduai iya. Ko Kaya seduai Bayang, “Laban Punoh tu bengat enggai ngisi adat tunggu ke udah dipinta kitai nya, pagila kitai nurun ngagai rumah sida Punoh laban ka ngerampas iya. Ninga jako orang ke tuai udah munyi nya, dia bisi anembiak siko ke benama Kandau lalu bejako, “Enti pemutus jako kitai udah munyi tu, nya alai awak ka aku dulu kin, laban din bengat maioh tanah mentua enggau tanah ipar aku magang. Din ila baru aku ngumbok sereta mujok sida iya dulu enggai ke kitai ila tau panjai kachau charut enggau pangan diri. Enti sida iya tak bengat enggai ninga ka utai ti ko aku, nadai ko enggau meh kitai, ti ka enda ngerampas meh udah nya.”
Nyadi hari siti tak baru tekerebak tebererak tawas hari alai Kandau lalu mupok bejalai dulu ngagai rumah sida Punoh. Nyadi bala orang bukai lalu nitih dudi ari iya mimit. Leboh Kandau tu tadi baru niki tangga rumah sida Punoh dia bisi siko bala anembiak Punoh ke benama Endong lalu enda chamang chamang lalu malu Kandau ngena lumpong manding lalu kena ba pala ti ngujong ke pala Kandau tu lalu pecah. Kandau pan lalu mati tekala nya ba kaki tangga rumah sida Punoh.
Sereta meda Kandau nya tadi udah mati dia bala anembiak Bayang seduai Kaya ke ngentudi ke Kandau nya tadi lalu nikal pulai berinan ke bangkai Kandau nya ngagai rumah Bayang. Nama agi deh tak naka iya pedis ati Bayang seduai Kaya meda pengawa ke udah dikerja bala anembiak Punoh. Semua sida iya lalu naka iya pengeringat lalu madah kediri pagila ka mansang baru sereta ka ngalah ke rumah sida Punoh.
Nyadi malam nya meda penusah udah kelalu balat nyadi, reti nya nyau ngiring ngagai jalai kayau, nya alai Punoh lalu naban ka bala anembiak iya ngelari kediri sereta minta di ulu ka bansa Beketan. Orang ba rumah sida Bayang enda nemu berita sida Punoh tu ka ngelari kediri laban benong nyenggai Kandau.
Datai bala sida Punoh ke ngelari kediri ba menua Nanga Panyoh dia bansa Beketan ke nyadi malin sida nya lalu dibunoh Punoh dia. Sida Punoh tu tadi lalu mupok majak ngelari kediri ngulu menua Penum sereta melaling ke menua Layar, lalu melunggang lari ngili ke menua Entabai lalu terus ngagai menua Kanowit.
Nydi udah tekerebak tawas pagi siti baru Kaya seduai Bayang mai bala anembiak seduai iya nempoh rumah Punoh. Leboh sida iya nyau datai din, sida iya lalu meda rumah Punoh sigi udah puang nadai orang. Meda utai baka nya, dia bala sida Bayang enggau Kaya lalu ngator tanah buah enggau temuda rimba sida Punoh enggau anembiak iya lalu pulai ka empa bala maioh dalam menua Batang Paku.
Nyadi semua bansa Beketan Paku meda kaban sida iya udah parai dibunoh Punoh nya alai sida iya lalu takut sereta ngelari kediri diau di menua Ulu Julau enggau ba menua bukai muak tebing kanan mudik Batang Rajang enggau menua Batang Baleh.
Nyadi tuai bansa Iban ke benama Kaya tu mati leboh sida iya ke berumah di menua Nanga Kedup. Udah Kaya mati dia anak iya ke benama Jantan lalu nampong iya nyadi ketuai bansa Iban megai semua menua Paku Ulu berengkah naka menua Nanga Samu ke ulu. Leboh maia Jantan tu nyadi ketuai , menua sida iya mansang udu kachau, lalu munsoh mega nyau mansang maioh semaioh datai ari ulu enggau ari ili.
Nyadi di menua Paku Ili udah parai tuai bansa Iban ka benama Uyut ka bensumbar Bedilang Besi dia iya lalu diganti menantu iya ka benama Renggi. Nyadi Renggi tu uchu tuai bansa Iban ke benama Jatin ka bensumbar Moahari ari menua Padeh ka bebini ngambi anak tuai Uyut Bedilang Besi ka benama Pala. Udah parai Renggi nya tadi dia pengawa ka nyadi tuai bansa Iban di menua Paku Ili lalu diganti anak iya ka benama Kalanang.
Nyadi Kalanang tu mega sebaka enggau apai enggau aki iya ka dulu laban sida tiga tu sama tau nyadi tuai kayau. Iya mega suah bendar matak bala anembiak iya ngayau ngelaban munsoh ka seruran ngenusah ka sida iya disebelah kampong nunga ka menua Krian, menua Nyabor enggau di menua Luba Rajang.
Udah meh Kalanang tu parai dia iya lalu diganti anak iya ka benama Uyut. Lalu di menua Paku Ulu udah Jantan tu parai dia pengawa iya ka nyadi tuai bansa Iban lalu diganti anak iya ka benama Libau ka dikumbai Buban. Uyut tu mega tau kayau baka apai iya Kalanang, tang Libau Buban tu enda tau kayau, lalu iya semina tau nyadi ka tuai bansa Iban ka dikumbai bangat lurus bendar ati ngiring bala anembiak iya.
Dalam tuboh Uyut iya suah ngulu ka bala anembiak iya ngayau bebunoh ngelaban bansa Seru, bansa Rajang enggau bansa Melanau. Lalu pia mega di menua Paku Ulu senentang tuboh sida tu bisi tuai bansa Iban ke benama Jiram ke dikumbai Rentap mega tau kayau lalu suah ngulu ka bala anembiak iya ngayau ka Batang Rajang ngalah ka bansa Tanjung enggau bansa Kanowit.
Nyadi sekali leboh Jiram ke dikumbai Rentap tu ngulu ka bala anembiak iya nguji ngalah ka bansa Kanowit dia bala sida iya enda mukai mukai lalu alah, lalu pendiau sida iya pan lalu tasah. Jiram Rentap tu lalu parai laban kelalu ikak sereta kebuluran di menua Rantau Bidai semak menua Nanga Labah dalam pegai menua Kanowit. Nyadi ka siko dua agi bala iya ka ulih ngelari kediri datai di menua udah ka lari neresap meraka menua Batang Krian bepedoman ka Bukit Engkalat nya ka bisi nusoi berita sida ka alah ngayau nya. Semua sida Jiram Rentap tu ka parai ngayau lalu dirapoh magang lalu tanda rapoh sida iya nya datai ke kemaia tu hari agi bisi dipeda ari ulu rumah orang Danau tebing muak ka kanan ngulu ka ai Paku..
Nyadi tuai bansa Iban ke benama Uyut anak Kalanang mega suah bendar ngulu ka bala anembiak iya nurun ngayau kelimpah ari bebunoh ngelaban bansa Seru, Rajang enggau Melanau sida iya mega bebunoh ngelaban bansa Brunei, Lanun enggau Bajau ke udu balat ka ngerompak sereta ngipa sida iya di menua tebing tasik. Dalam Batang Padeh leboh rambau tu mega bisi siko tuai bansa Iban ka benama Rekaya Beti ti bensumbar Tajai Ngindang enggau Rekaya Akun ti bensumbar Badindang mega udu amat charut ngelaban perintah menua Brunei.
Di menua Layar Ili bisi siko tuai bansa Iban ke benama Unggang ti bensumbar Lebor menua pan pia mega udu amat nan ke menua sida ari ti deka dissrang munsoh. Sida Unggang tu mega lalu ngansak ka perintah Brunei nyerang Sarawak (Kuching), Sadong, Oya, Mukah, lalu terus ngagai menua Bintulu. Laban empa pemalat serang Unggang nitih ko tusoi cherita, dia deh nyau baka ka ditebas kenu ko pemaioh bangkai mensia ka dibunoh iya, nya alai Nanga Sungai Sarawak lalu dipindah ka orang nama dikumbai nyentok ka sehari tu ngagai Nanga Tebas (Muara Tebas). Nama menua nya lalu ditemu mensia nyetok ka sehari tu.
Nyadi sebedau Unggang tu beberita nyadi bujang berani, tau nyadi tuai kayau, sereta nyentuk ka iya tau nyadi tuai serang. Nyadi leboh maia iya baru ngangkat kediri bujang, dia Unggang tu bisi bemimpi asai ka merau nengah menua Nanga Layar lalu sangkai udah bekau ka dipuput ka ribut ba tengan Bukit Santubong. Ari tengan Bukit Santubong nya iya lalu bejalai niki ka atas ngagai tuchong bukit nya. Apin bengat lama iya udah ngejang ka perau iya, alai endor iya lalu betemu enggau dua iko indu ka naka iya pemajik gamal. Sereta meh indu dua iko nya tadi tepeda ka iya dia seduai iya lalu bejako, “Kena bendar mega maia nuan ngenatai kediri kitu Unggang, laban kami duai tu tadi tak baru udah tembu mandi.” Indu dua iko nya lalu madah ngagai Unggang seduai iya nadai hari ka berandau lama enggau iya. Sereta meh udah nyebut jako munyi nya, siko ari seduai nya lalu nyua ngagai Unggang siti batu perunsut. Nyadi ko indu ka nyua ka batu perunsut nya, “Batu tu tau nyadi ka pengaruh nuan Unggang, tau kena nuan matak serang. Nyadi semua menua ari Luba Santubong nebing muak ari kanan nyentuk ka Nanga Layar nya ulih dialah ka nuan magang kena serang. Tang enti nuan lalu nyerang ngelui berengkah ari Luba tu nyentuk ka menua Tanjung Datu kami dua sulu aku tu enda agi ulih ngemata ka semua pengawa nuan nya agi.” Indu dua iko nya lalu madah ka nama seduai iya nya tadi Kumang seduai Lulong.
Udah meh Unggang bemimpi tu tadi, iya lalu mupok beban ka perau pengayau ke naka iya pemesai bendar.Nyadi pemesai perau pengayau Unggang tu nunda ko cherita nya, tau alai kitai nganchau ka idas. Nyadi ngena perau nya tadi dia Unggang lalu nyaga Nanga Layar ari ke diserang munsoh, iya mega lalu nachah ka semua orang ke bisi enda dikelala masuk ngagai Nanga Layar.
Nyadi Unggang ke nurun matak kayau tu nadai kala mai bangkong maioh nyempulang iya laban perau pengayau Unggang tu empu sigi endang maioh sakai. Laban bangkong iya ka naka dua tiga buah aja, nya alai iya enda kala alah leboh maia sida iya belanggar enggau munsoh. Nya alai laban ketegal Unggang tu chukup beberita berani sereta kering ngelaban munsoh, lalu enti sema orang ke ka mansang ninga berita iya udah bisi beranti ngeling Nanga Layar nyentuk ka Luba Santubong, orang pan lalu nyurut kediri laban enda berani ngelanggar bala Unggang tu tadi.
Nyau Ka lama udah Unggang tu ngipa ba tasik baka nya, nya baru bisi bansa China datai bedagang di Sarawak (Kuching) lalu bejako enggau iya leboh maia iya ka bisi rembus ba pasar sida ba Nanga Kuching. Bala bansa China ka bedagang nya tadi lalu madah ngagai iya diri empu bisi ati ka bedagang ngagai menua Saribas. Unggang lalu madah ke tau, tang sida iya mesti ka nerebai ka bendera burak ba tiang layar bandong sida. China madah kediri setuju, nya alai sida iya pan lalu dikemendar ka Unggang tau bedagang ngagai menua Saribas.
Nyadi utai ke keterubah iya dibai bala bansa China ka bedagang tu ngagai menua Saribas iya nya : periok temaga, periok petani, kali, pinggai, besi gerunong, geri, buri, pelaga, marik lama, tuchong, marik engkabang, rangki enggau tanchut birang. Nyadi utai ka dikena bala kitai bansa Iban bebeli ka utai tu iya nya padi. Leboh maia tu kelia utai bukai enda dibeli bansa China ka bedagang baka rutan, dambar tauka utai bukai ka ulih begiga dalam kampong. Nyadi rega sigi pelaga iya nya sepasau padi.
Nyadi bansa China dagang tu nadai ngereja pengawa bukai semina bedagang aja. Sida iya nadai diau mendam ba menua dalam Batang Saribas. Enti semua barang ka dijual sida nya udah abis laku, sida iya lalu kemaia nya mega mulai kediri ka Sarawak (Kuching) sereta lalu nerebai ka bendera burak ba tiang laya bandong sida enggai ka bala Unggang ke ngipa ba tasik enda ngelala bandong sida.
Nyadi semua bansa orang bukai ka enda nerebai ka bendera burak ba tiang layar bandong sida enti bisi dipeda ayan sigi diserang lalu dibunoh bansa orang Saribas tu magang. Anang agi disebut ka enti orang nya ke datai kia bansa Bajau enggau bansa Lanun ka endang sigi udah lama nyadi ka munsoh sida Unggang sama ngipa enggau sida di tasik nunga ka utara Nanga Layar. Semina bansa orang ka enda dibunoh sida Unggang iya nya bansa Laut (Melayu) Saribas ti nemu madah ka tusut diri ari peturun Temenggong Kadir seduai peturun Abang Gudam. Kebuah sida Unggang enda munoh bansa Laut (Melayu) tu laban sida iya nya endang bansa Laut (Melayu) ke udah betampil, inggap, begulai sejalai enggau bansa Iban Saribas lalu sida iya endang sama saum pemakai segulai penemuai enggai jauh pangan.
Nya alai endang adat kenyau ari tuai dulu kelia, enti sema bansa Laut (Melayu) tu ka diau semak Nanga Layar lalu nadai buah, nadai payan, nadai lalis tauka danan enggau paku tubu, sida iya lalu mudik ka ulu nukar utai nya ngagai bansa Iban ngena ikan masin, bubok, undang kupak, tesar enggau garam apong. Pia mega bansa Iban leboh kejang deka nugal, endang sigi ari asal lalu bebai ka bermacham macham utai nya tadi kena sida iya nukar salai ikan kalan enggau maioh macham bansa lauk ke bukai ti di kemisi ka bansa Laut (Melayu) leboh maia rambau nya kelia. Nyadi jako ke dikena bansa Iban tu ngangau ka bansa Laut (Melayu) ke nyadi ka pangan sida iya nya “Udong”. Nyadi jako tu nadai agi disebut agi diatu laban semina bisi di ka ingat dalam leka main kitai Iban aja.
Nyau tuai bala bansa Iban sida tu tadi iya nya anak Rekaya Beti ke digelar Rekaya Pemancha Dana Bayang, enggau Unal ka bensumbar Bulan, enggau anak Uyut ka benama Linggir bensumbar Mali Lebu, enggau Igoh apai Lamban rambau nya kelia udu balat bendar ngelaban perintah menua Brunei. Semua sida tuai bansa Iban tu nyau nguji belayar matak bala anembiak sida iya nurun ngayau merau nebing tasik terus nuju menua Mentrado, Sungai Raya, Sambas enggau Mempawah ti kena pegai perintah menua Kalimantan Barat, Indonesia kemaia tu hari.
Nyadi dalam menua kena pegai Skrang rambau tu kelia bisi siko tuai bansa Iban ke naka iya ganas bendar ngulu ka bala anmebiak iya nyerang menua tunga ka Sambas enggau Pontianak, Kalimantan Barat, Indonesia iya nya Libau ka bensumbar Rentap, Bulan Genaya, Bulan apai Jelani, Rekaya Rabong, Rekaya Gasing enggau Renggi. Nyadi di menua kena pegai Banting, Lingga nya bisi tuai bansa Iban siko ka benama Lang ka bensumbar Ijau enggau menantu iya ka benama Rekaya Janting.
Enda mukai mukai benong pengachau tu nyadi, dia bisi pengari perintah menua Brunei di menua Lingga ka benama Indra Lila iya nya menyadi Lila Wangsa seduai Lila Pelawan lalu nyabong ngasut bala bansa Iban Saribas enggau bansa Iban Skrang bemunsoh ngelaban bansa Iban Undop, bansa Iban Lingga enggau bansa Iban Banting. Laban jako petenah ke baka tu nya alai Rekaya Pemancha Dana Bayang ari menua Padeh lalu angkat nyerang rumah tuai bansa Iban ke benama Manang Langgong dalam menua Undop, lalu ngelebor ka menua nya. Ko jako tuai nyentok ka raung pan nadai meh agi bemunyi dalam menua Batang Undop udah ka bekau diserang iya.
Udah pukas mimit pengacghau tu nyadi, alai Luta anak Unggang Lebor Menua lalu bisi ninga berita orang madah ka di Pulau Belitong semak menua Jawa bisi orang nyual tuchong besai ka besai bendar lalu tau dipasok ka ngagai pala. Nyadi iya tu keras bendar deka meli nya awak ka bisi nyadi ka pesaka besai sida iya. Nyadi nya alai iya lalu mai adi iya ka benama Mulok seduai Ketit enggau iya belayar kin, tang sida tiga tu tak lalu nadai pulai tauka ditemu berita agi nyentuk ka sehari tu. Ko berita ka ditusoi dibai bansa Laut (Melayu) leboh rambau nya kelia bisi orang tetemu ka rampang perau sida tiga ba pasir di tebing tasik semak Nanga Sungai Ubah tunga kilah ujong Tanjung Datu kin ka mimit.
Nyadi laya enggau penyarut antara bansa ke nguan menua rambau tu kelia nyau majak nyadi senyadi sereta lalu nangkir menangkir dalam menua Bagi Kedua. Nya alai Rekaya Temenggong Jugah ari menua Lundu nyau datai mantu bansa Balau enggau bansa Undop ngelaban bansa Iban Saribas enggau bansa Iban Skrang.
Nyadi sekali Rekaya Temenggong Jugah tu mai bala anembiak iya ngayau ngagai menua Saribas lalu mudik ngagai aip Paku, lalu ngalah ka rumah tuai bansa Iban ke benama Adir ke digelar Bungkok di menua Matop. Nyadi rumah sida Adir tu alah tang mensia nadai maioh mati laban sida iya udah dulu nemu berita sida Rekaya Temenggong Jugah tu ka datai nyerang, lalu bala indu anembiak sigi udah dulu dilalai ka sida ngagai menua Ulu Samu.
Nyadi nambah ka pengachau tu, bansa Iban Saribas enggau bansa Iban Skrang nyau mansang nyerang ngalah ka bansa Mualang enggau bansa Chengkang enda jauh ari menua Ulu Sambas, ba menua Kalimantan Barat, Indonesia. Nyadi bansa Bugau enggau bansa Memaloh pan sama sama kena rampit penusah tu lalu sida iya suah bendar dialah ka sida bala tuai bansa Iban ke benama Temenggong Simpi Pala enggau tuai bansa Iban ke benama Temenggong Apai Rusoh ari menua Ulu Batang Ai.
Sama besenentang enggau penyarut tu, sekali mega tuai bansa Iban ke benama Linggir Mali Lebu ari menua Paku angkat nyerang bansa Bugau ke diau ngalih ari menua Ulu Merakai enggau menua Ulu Ketunggau. Nyadi serang iya tu tadi rat bendar, lalu semua pala ka ulih sida iya maia nya sembilan puloh satu igi enda nyengkaum munsoh ka ditangkap lalu nyadi ka ulun sida iya udah nya.
Serambau enggau tuai bansa Iban ke benama Linggir Mali Lebu ka udah ngalah ka bansa Bugau, dia Rekaya Pemancha Dana Bayang lalu angkat ngalah ka bansa Sambas. Nyadi leboh maia serang tu maioh bendar bansa Iban Skrang enggau bansa Iban Saribas bulih munsoh sereta bulih perampasan (reta tengkira munsoh ke ulih ngerampas). Nyadi Rekaya Pemancha Dana Bayang tu bulih sebatang meriam ke lalu dikumbai iya “Bujang Timpang Berang” ke bisi ditulis chap 1515 ba batang meriam nya. Nyadi ngena meriam tu mega bala anak iya udah nya lalu diulu ka tuai bansa Iban ka benama Libau Rentap seduai tuai bansa Iban ka benama Rekaya Pemancha Nanang nan ka kuta Bukit Sadok ngelaban perintah menua Sarawak ka betuai serang ti benama Tuan Muda Charles Brooke nyentok ka sida iya alah lalu ngelari ka diri dalam tahun 1861.
Laban sama ka bebalas ngelaban pangan ka udah mungkal nyerang pangan diri enggau nadai tentu kebuah, nya alai Ijau Lang siko tuai bansa Iban Balau ari menua Banting lalu mai menantu iya ke benama Rekaya Janting mansang nyerang menua Saribas. Nyadi penurun seduai iya ka mansang nyerang menua iya nya di atur iya baka tu, iya empu ka mansang nyerang sereta ngalah ka menua Paku lalu Janting ka diasoh iya nyerang sereta ngalah ka menua Kalaka.
Sama besenentang enggau tu mega bisi siko tuai bansa Iban ka benama Unal Bulan ti datai ari menua Spak, di menua Ulu Layar pan bisi mega undor mai bala anembiak iya ka mansang nyerang menua Bukit Banting di menua Batang Lingga. Nyadi orang ka tuai manaok sabong Unal Bulan tu iya nya benama Uyu apai Ikum seduai Engkudu. Leboh bala Unal Bulan tu nyau datai di menua Palasan semak Nanga Saribas dia sida iya lalu bemalam. Nyadi semua bala sida iya ka nurun ka nyerang nya dua buah perau besai.
Nyadi malam nya dia Unal Bulan lalu ngasoh dua iko bala anembaik iya berenong ngangau ka leka “Renong Kayau”. Nyadi leboh bala Unal Bulan benong rindang ninga leka renong nya dia deh bala tuai bansa Iban Balau menua Banting ka benama Ijau Lang lalu merau ngulu Layar mansa Nanga Palasan nya. Sida iya lalu tama Palasan sereta lalu nyubok munsoh sida, iya nya bala sida Unal Bulan. Sida iya lalu ngerapat ngerakit ngagai perau munsoh ka ari ili agi udah nya baru sida iya nyerang ngamok bala sida Unal Bulan ka benong mending ka leka Renong Kayau. Nyadi leboh ka tekenyit laban munsoh, dia bala anembiak Unal Bulan lalu pepar terjun ngelari kediri ka tebing sungai.
Nyadi ninga penusah nya tadi udah nyadi dia Unal Bulan lalu ngasoh Uyu ngejang ka perau nya ngansak ka munsoh ka ili ka agi. Sereta meh perau sida Unal Bulan enggau perau sida Ijau Lang udah berimbas dia sida iya lalu beamok bebunoh ka pangan diri. Nyadi udu bendar sida iya beamok maia tu kelia, nyadi Engkudu anak Uyu ka ngeluan perau munyi ko cherita balat bendar malu munsoh ngena turus lalu iya ulih munoh maioh bendar munsoh. Nyadi sida ka beamok tu mega lama bendar ke ngujong ka bala anembiak Ijau Lang lalu alah. Nyadi Ijau Lang tu empu mega parai leboh kena serang kayau sida Unal Bulan tu. Nyadi pemarai Ijau Lang iya nya, mati direndam sida Unal Bulan dalam ai enggau lama bendar laban iya tu kebal lalu enggai telih laban besi.
Nyadi leboh nyau dini hari malam nya mega dia bala sida Rekaya Janting ka mansang nyerang ka ngalah ka menua Kalaka pan nuntong ba rumah Rekaya Temenggong Tandok di menua Nanga Melupa dalam ai Batang Krian kena pegai Saratok. Nyadi ba serang kayau tu rumah Rekaya Temenggong Tandok ulih dialah ka sida iya. Nyadi ba serang kayau tu mega Rekaya Temenggong tandok empu parai di bunoh bansa Iban Balau.ari menua Banting, Lingga. Nyadi penyampau semua bala anembiak Rekaya Temenggong Tandok ka parai kena bunoh munsoh enggau iya empu, iya nya seratus tiga puloh iko. Ka dua iko mimit agi ari bala sida Ijau Lang ka parai dibunoh sida Unal Bulan di menua Palasan.
Udah meh Rekaya janting ngalah ka ruimah Rekaya Temenggong Tandok di Nanga Melupa, dia deh bisi berita ke ditampong ditusoi bala Laut (Melayu) ba menua Batang Rimbas ka madah ka Rekaya Janting deka mai bala ke maioh agi ari menua Lingga datai nyerang, laban deka ngalah ka menua Batang Rimbas tauka menua Batang Paku laban deka bebalas ka pemarai mentua iya Ijau Lang ke udah alah diserang tuai bansa Iban ke benama Unal Bulan di menua Palasan dalam Saribas semak Nanga Layar.
Ninga berita nya, tusah deh ati tuai bansa Iban ke benama Rekaya Gun Mangku Bumi enggau menyadi iya ke benama Rekaya Antau Linggang Nengri ari menua Batang Rimbas. Nyadi ketegal ti kelalu irau ati dia seduai menyadi lalu berunding ka minta bantu Linggir Mali Lebu ari menua Batang Paku mai ikya sama nachah ka bala sida bansa Iban Balau ka betuai ka Rekaya Janting ari menua Banting, Lingga.
Nyadi leboh seruan seduai iya nyau datai ba rumah sida Linggir Mali Lebu, nyadi sida iya lalu bejako munyi ka di asoh Rekaya Gun Mangku Bumi enggau Rekaya Antau Linggang Nengri munyi tu, “Nyadi kami ke datai tu Linggir Mali Lebu, datai mai berita enda manah, mai ati ti naka iya penusah, laban kami bisi ninga berita ka ditusoi ditampung bala Laut (Melayu) madah ka bansa Iban Balau ari menua Banting, Lingga ka betuai ka Rekaya Janting deka datai nyerang ngayau ngalah ka semua kitai di menua Batang Rimbas tauka kitai di menua Batang Paku. Kami ka datai ngagai nuan kitu deka ninga ka penemu enggau runding nuan. Nyadi ko ati kami, manah semua kitai tu begempong begulai ngipa sida iya ke ka datai nyerang ba Nanga Rimbas. Baik ka sida iya nya mudik Batang Layar tauka mudik Batang Rimbas, tak begulai meh kitai ngipa sida nya. Kitai anang bepecah tuboh, laban perau kitai mit agi ari perau sida iya.”
Nyadi saut Linggir Mali Lebu baka tu, “Ba runding aku pan ngena mega munyi penemu kita nya , laban tuboh sida tentu maioh sereta bangkong sida pan tentu besai agi ari enggi kitai ditu. Enti kitai belanggar ba ai besai, kitai tentu enda tan laban bangkong kitai mit agi. Nyadi atur kitai ila nganti sida iya baka tu, kitai manah agi beranti dalam Batang Rimbas. Nyadi semua kita ka bisi diau ba rumah di tebing ai ngulu ka Batang Rimbas manah agi lari dulu. Endor kitai ila beranti sereta belali iya nya ba masuk Sungai Undai, awak ka kitai nyamai nitih ka sida enti sida iya mudik ngulu ka ai Batang Rimbas.”
Udah meh tembu baum nya, bala sida ka datai ari Batang Rimbas lalu mulai kediri laban begaui deka nyikap diri deka nurun mansang ngayau. Leboh pemulai sida nya mega sida iya lalu betesau ngagai semua orang ke diau berumah ba nebing Batang Rimbas sereta lalu ngasoh sida iya ngelari kediri jauh ngejang ari batang ai. Udah meh semua sida iya sikap magang enggau reta tengkira pan udah mega dilalai ka ba sebelah langkau umai enggau dalam babas kampong, sida iya pan lalu begerah bebai undor nganti penatai bala Linggir Mali Lebu ka datai ari menua Paku nitih ka semaia aum sida.
Nyadi semua orang Batang Rimbas iya ke agi regas endang enggau nurun ngayau magang. Sekumbang sida iya ke ngundor Batang Rimbas dia deh dua buah bangkong digalang ka sida ambi ka bisi alai endor orang berenong ngangau ka leka Renong Kayau. Nyau kelama sida iya pan lalu datai di menua Nanga Undai ke enda berapa jauh masuk Batang Rimbas ari nanga, udah nya sida iya lalu deka tama Undai. Kejang sida iya deka tama Undai dia sida iya bisi meda api orang cheli cheli ke datai ari ili, tang lemambang ka berenong ka leka Renong Kayau nya agi majak ka leka renong seduai.
Nyadi ko ati sida api ke cheli cheli dipeda sida iya nya api bala sida Linggir Mali Lebu ke datai ari menua Paku. Sereta meh api ke dipeda sida nya nyau nadai agi, dia alai sida meda perau sida tak karam sebuah, udah nya lalu sebuah dialah ka munsoh. Semua sida ke tau nyemerai lalu terjun ka dalam ai ngidup ka nyawa diri nyemerai ngagai tebing sungai. Nyadi semua sida ke bakal enggau ke enda tau nyemerai nya tadi lalu abis mati lemas tauka amti dibunoh munsoh.
Nyadi nama tuai bansa Iban ke parai leboh ke tasah tu iya nya Entaban anak Rekaya Gun Mangku Bumi, Nyelang seduai Anyum ke bensumbar Bujang Berani. Maioh bendar pungka lelaki menua Batang Rimbas parai leboh maia tu kelia, datai ka nyau nadai mai perau pulai nusoi berita ka rumah diri empu agi. Nyadi ari semua anak Rekaya Gun Mangku Bumi ka siko aja anak iya ke enda enggau nurun ngayau.
Apin lama udah bekau pengachau tu dia Linggir Mali Lebu ari menua Paku lalu nyerang ngalah ka menua bansa Melanau di Matu enggau di menua Ilas. Maioh bendar bala anembiak Linggir Mali Lebu bedengah maia ngayau tu. Sida iya ngalah ka rumah Melanau nyau ulih nepok belindong ngena bangkong ari baroh rumah.
Sama besenentang enggau Linggir mali Lebu ke ngalah ka ilas, dia tuai bansa Iban ke benama Libau Rentap ari menua Skrang lalu matak bala anembiak iya ngayau ngalah ka bansa Sambas enggau bansa Mempawah di menua Kalimantan Barat, Indonesia. Di menua Mempawah dia sida Libau Rentap tu bulih bendar perampasan enggau dengah ke ulih sida iya ngelanggar ngalah ka kapal bansa Belanda.
Enda lama udah bekau Libau Rentap ke ngalah ka bansa Sambas ari menua Kalimantan Barat, Indonesia dia tuai bansa Iban ke benama Linggi apai Belabut ari menua Bangkit, Paku lalu matak bala anembiak iya ngayau nyerang bansa Dayak Bidayuh di menua Tinting Bra’ang lalu terus bebunoh terus ka menua Duri ke kena pegai menua Sambas, Kalimantan Barat, Indonesia. Di menua Duri sida Linggi Apai Belabut tu maioh bendar tetemu ka emas tang enda nemu guna enggau nya, nya alai lalu dibuai sida iya ka ai
