Jerita Ijau “Berani”
Kara Penampok Ijau
DI BATANG Strap, pegai Lingga, dulu menya bisi tuai kitai Iban siko ke benama Ijau Berani. Ijau tu anak Sampar seduai Bukas. Nyadi Sampar, apai Ijau, parai, leboh iya ke ngiga sera ka Bukas leboh ke ngandong ka Ijau. Leboh nya Bukas bengat tak nyelai utai ka sera ari indu bukai, iya tetengok ka keruntok mensia.
Sampar parai kena tumbok munsoh ngena surong kait leboh iya enggau orang di Kelassin dalam Batang Undup nan ka rumah ari langgar munsoh. Iya leboh nya benong bejalai ngiga keruntok ka sera bini iya, lalu endang udah bulih pala munsoh sigi. Leboh bemalam ba rumah kaban iya di Kelasin dia rumah orang nya kena langgar munsoh, nya alai iya lalu enggau orang nya nan dia. Apin Sampar parai dia iya bepesan ngagai sida di Kelasin ngasoh sida nganjong antu pala ke ulih iya kayau anak dulu ari nya sereta enggau pala iya empu ngagai bini iya Bukas di Bukit Tunggal, dalam Batang Strap. Udah nya iya lalu ngapus ka seput diri. Pala Sampar sereta enggau pala sigi ke ulih iya lalu dianjong sida kaban iya ari Kelasin ngagai bini iya di Lingga.
Nyau datai ba maia ke beranak, Bukas ngada ka anak lelaki siko lalu digaga ka nama Ijau. Ijau lalu mansang besai baka anembiak bukai mega. Seduai menyanak sama ngidup ka diri bumai-betaun baka mensia maioh rambau nya.
Sakali leboh Ijau beumor sabelas taun iya diasoh indai iya ngabas umai sida ke enda bengat jauh ari rumah. Ijau pen lelu nurun mega. Datai di langkau umai dia iya meda sangkoh dientak ka tunsang di kaki tangga. Ijau lalu ngenong, berunding ka sapa orang empu sangkoh nya. Niki ka langkau peda iya munsoh tiga iko benong tindok. Ijau enda chechamang, endang lalu mantap munsoh nya. Mai iya nemu nya munsoh laban sangkoh enggau senyata bukai sida nya endang ukai gamal senyata sida dia peda iya. Nyau meda gamal sida nya, dia iya endang lalu nemu nya munsoh. Munsoh dalam langkau nya tiga iko, lalu dua mati dipantap iya, siko agi ulih rari. Pala seduai ke dipantap iya nya tadi dipumpong Ijau lalu dibai iya pulai ka rumah.
Datai di tengah laman rumah sida, Ijau lalu manjong. Orang begau ninga panjong Ijau lalu nanya ka kebuah iya ke manjong. Iya madah ka diri manjong laban bulih dengah, lalu madah ka pasal iya ke tulih ka pala nya. Tang laban ati ke enda manah ngagai Ijau, kepapas meda iya bengat ngemiak nya udah bedengah, orang maioh mechat iya madah ka nadai reti iya bulih munsoh benong tindok. Ijau bisi mega berasai malu enggau ringat meda ati sida sarumah bengat baka nya enggau iya.
Dua taun udah bekau Ijau ke bedengah nya, dia alai orang ngayau Bugau. Kebuah alai ngayau bansa Bugau (di menoa Indonesia diatu) iya nya laban Bugau bengat selalu ngachau-nyigau menoa tunga kitu. Sida bebunoh ka orang ke nurun ka umai nurun mansai, nurun nubu nurun maku. Ijau enggau orang ngayau, nitih ka bala sida aya iya. Leboh betiki bala aya iya enggai mai Ijau meda iya apin tentu tegar lalu apin tentu bisi akal nitih ka orang. Nya alai Ijau diasoh tinggal enggau orang ngibun perau. Leboh ke ngibun perau, sakali Ijau mansang bira lalu ditegah munsoh. Ijau lalu nan. Ditikam munsoh ngena sangkoh seninjik salah. Ijau malas tikam, munsoh nya tadi lalu kena pah. Udah nya iya lalu terus dipumpong Ijau. Datai ba palan sida, iya lalu manjong madah ka diri bulih pala. Tang orang semina ketawa ka iya, ngumbai iya bulih munsoh ke udah parai. Enda ga Ijau iboh ka nya, laban iya nemu orang nya kepapas.
Maia orang pulai ngayau, bala pen sama bela mulai ka diri ngagai menoa diri empu. Leboh sida Ijau enggau bala aya iya datai di pengkalan sida manjong magang. Orang ke di rumah endang udah nganti pemulai sida, sedia deka nyambut pala ke ulih.
Datai di kaki tangga, orang ke indu nantai ka pua kumbu dikena nyambut pala munsoh. Orang ke bisi bini, bini sida meh nyambut pala ke ulih ngayau. Nya alai enggi Ijau, laban iya benong ngangkat ka diri bujang lalu apin bisi bini, pala ke ulih iya disambut indai iya Bukas. Malam nya sida sarumah lalu sama rami begawai Enchaboh Arong.
Tiga taun udah nya agi ga Ijau berasai malu ninga orang ngumbai iya bedengah munsoh tindok enggau bedengah bangkai. Dia iya bisi ati deka nampok, nyangka ukor antu bisi sinu ka iya.
Terubah iya Ijau nampok ba kaki Bukit Lingga. Tang nadai ga iya tetemu ka Petara ke ko ati iya. Udah nya iya nampok ba tuchong Bukit Lingga nya, ba Telaga Kumang empu. Nadai mega iya betemu enggau antu. Suah bendar Ijau nampok ba sebelah menoa nya dia, tang lalu apin bisi asai. Nyau ka lama dia iya bisi mimpi. Bemimpi asai ke betemu enggau indu siko ke bajik bendar gamal. Dia indu nya bejako ngasoh iya nampok ba batu sigi, ba tengan Bukit Lingga, ke dibalut kara. Udah nya Ijau tedani.
Dani Ijau pagi nya lalu ngasoh indai iya ngaga piring ke dibai iya nampok. Samoa utai udah siap, Ijau lalu madah ka diri nurun nampok ngagai indai iya. Bejalai iya sahari-hari nya tang lalu nadai tepeda ka batu dibalut kara munyi ke dipadah ka orang dalam mimpi nya. Hari malam, bemalam ga iya ba Bukit nya. Nyau ketiga hari ketiga malam baru iya tetemu ka batu nya. Tang Ijau berasai tusah ati mimit meda batu nya bengat mar bendar ditiki. Samoa utai ngelingi batu nya tebiang magang, kayu nadai ga tumboh semak nya dia. Udah nya baru iya tepeda ka urat kara bisi ngulur ari batu datas din.
“Nadai jalai bukai katas kin, urat kara tu tiki,” ko runding Ijau.
Nyau kepuas ke bejelangkit niki urat kara nya Ijau pen datai mega ba batu datas din. Batu nya entap dipeda iya, enda berapa besai, kira dua depa pemanjai enggau sadepa pemesai. Sereta datai dia Ijau lalu berengkah miring. Udah nya baru iya nyampi ngangau ka Petara. Tembu nyampi iya lalu nudok ka diri. Kira maia tumboh lambor dinga iya utai ngenying berauh munyi pangka pasang.
“O nama utai ngenyelai nya munyi,” ko Ijau bejako kadiri berandau nengali. Balat bendar rauh utai nya didinga iya, tang nadai ga iya tepeda ka utai engkebut kiba-kanan. Lama bendar Ijau merati ka utai ke berauh didinga iya nya. Tekenyit iya meda tak bisi indu dua iko naka ka pemajik gamal dudok semak iya dia.
“Oh Ijau, lama nuan udah nganti ditu,” ko siko ari seduai nya nanya iya.
Ijau madah ka diri apin bengat lama udah datai dia. Lama udah bekelakar dia indu dua iko nya lalu meri iya pengaroh.
“Samoa utai tu diberi kami dual ngagai nuan, dikena nuan matak serang. Nadai orang ke ngelingi menoa kita tu ditu telaban ka nuan bebunoh ila. Lalu nuan tu digelar kami Ijau Berani. Lalu kami dua tu Kumang seduai Lulong,” pia ko indu dua iko nya. Seduai nya pen lalu lesap.
Pagi siti baru Ijau mulai ka diri ari endor iya ke nampok nya. Datai di baroh dia iya berunding deka ngetas urat kara ke ditengah iya niki ka atas, leboh ke mansang nampok. Kebuah alai iya betati ngetas urat kara nya laban enggai ka orang tulih ka diri nampok ka atas kin lalu tau berani ngelui ari iya empu. Ditetak iya urat kara nya, udah tembu netak baru iya mulai ka diri.
Malam nya dia Ijau bisi mimpi baru, asai ke betemu enggau indu ke meri iya pengaroh leboh iya ke nampok. Indu nya lalu bejako, “Eh, Ijau, naka tuboh nuan tu aja meh tau serang, laban nuan netak urat kara ke tangga nuan nampok. Nya alai tuboh anak-uchu nuan ila nadai nampong pemerani nuan. Enti urat kara tu nyulor terengkah ba tanah baru nya baru bisi siko orang sebaka enggau pemerani nuan, lalu tau serang baka nuan. Tang enti urat kara tu terengkah ba tanah baru menoa tu deka siga besai,” pia ko indu dua iko nya bejako enggau Ijau dalam mimpi iya. Ijau pen lalu tedani.
Nya alai baka nya ko pun pengawa pun jeda Ijau ke ngujong ka iya tulih ka nama tulih ka berita. Lalu dudi ari Ijau nya, dalam Batang Lingga, nadai orang udah tau serang lalu datai ba pemerani Ijau. Janting menya amat mega berani, tang enda tau serang semina naka tau kayau. Ngagai kemaia hari tu nadai mega orang udah kala nampok ba penampok Ijau menya. Tang ari baroh nya selalu alai mensia nampok.
