Nyadi Jabu apai Umping tu semina tau kayau tang iya enda tau serang baka Orang Kaya Pemancha Dana Bayang, Linggir Mali Lebu tauka Aji Apai Limpa. Jabu tu ada di menoa Bangat, Skrang. Sida menyadi ka lelaki benama Tugang, Rekan, Ngadan apai Rembi enggau Gelayan ke endang tebilang bendar berita sama berani lalu sama mega kebal magang. Jabu suah bendar nulung Rajah James Brooke ngalus ka menua. Lalu seduai menyadi iya ke benama Ngadan meh nyadi tuai ka seruan Raja James Brooke diasoh mansang mujuk sida Nanang nunduk ka perintah maia ngayau ngagai Bukit Sadok ti ketiga kali.
Jabu bisi mimpi, lalu mimpi iya baka tu:
Nyadi sakali asai sepi iya, iya asai ka merau ngulu ka sungai, nyau ka lama iya udah mudik, endur iya rembus ba ai, lalu ai nya asai ka lubok, lalu pia mega tak asai ka letong, tang ai nya tak besai bendar sereta tak segala pemanah iya dipeda mata. Leboh iya dia, peda iya maiuh bendar sungai mati ari nya, lalu bisi gaya ai sungai nya dipeda ita tak biru empa penyiru, lalu bisi nya dipeda iya tak nyau bechura mansau (merah), lalu bisi mega ai sungai nya tak burak empa penyiru, lalu bisi mega ai sungai nya tak bechura gadong, lalu bisi nya tak bechura kuning enggau bisi mega bechura bukai. Nyau kepuas iya ke kalat-kalat merening enda nemu ni ai ke ka dipudik, iya pan lalu mudik ai sungai ke dipeda iya bechura kuning. Nyau ka lama udah iya mudik ai sungai nya endor iya meda orang lelaki siko ke benong mandi. Lelaki nya pan lalu mai iya niki ke rumah. Iya pan lalu nanchang ka perau ba pengkalan pendai orang nya. Udah nya lalu mupok baru enggau orang nya niki ke rumah
Datai di rumah, ba ruai orang ke muak ari pala tangga, dia orang bisi ayan dia pan lalu unduk ka iya tang Jabu enggai laban iya madah ka diri deka mansang bejalai ngagai menoa orang Gelong. Ninga munyi nya dia orang nya lalu madah ngagai iya, iya nya rumah nya ukai rumah orang Gelong tang rumah orang menoa Linsing Kuning. Tusah deh ati iya ensepi diri tak salah rumah ditiki. Leboh iya ke benong rindang irau ati ka nya dia alai indu siku pan lalu pansut ari bilik ngasoh iya tama. Jabu pan lalu mupok entudi ka indu nya tama ka bilik.
Lebuh Jabu dudok enggau indu nya di bilik, dia iya lalu bejako ngagai indu nya madah ka diri ka minta pangaruh ngambi ka diri tau serang. “Enda kami ditu tau ngasoh nuan tau matak serang Jabu,” pia ka indu nya. “Laban rumah tu rumah Linsing Kuning. “Ngasoh nuan kaya raja nya baru kami tu tau,” ko indu nganu iya. Iya madah ka diri enggai kaya raja, laban pangraja iya udah chukup. Nyau kepuas iya ka ngumbok minta diri tau serang ari indu nya, dia baru indu nya madah ngagai iya, lalu iya samina naka tau kayau aja, laban rumah sida indu nya ukai rurnah orang Panggau Libau tauka orang Gelong.
Indu nya pan lalu madah ngagai iya, laban iya udah datai ba rumah orang di Linsing Kuning, Nyadi baka ke dipeda Jabu nya mega pangraja sida utai ulih Jabu jemah ila. Jabu senganging madah ka diri enggai, tang agi minta diri tau matak serang. Leboh seduai ka benong betalat ka nya dia enda mukai-muakai Jabu pan lalu tedani, udah nya baru iya nemu nya mimpi.
Mimpi Jabu tu amat, laban iya semina naka suah bendar matak kayau anak. Nyadi ba pemulih utai iya amat bulih bendar pengeraja reta, tang lebuh utai ulih iya udah maioh dia rumah iya deka bendar angus laban api, laban iya dalam mimpi sigi madah ka diri ngagai indu nya, iya enggai kaya raja.
Nyadi mimpi Jabu tu ditusui Busok anak Gerijih ari menoa Entanak, Betong ngagai niang Benedict Sandin..
