Udah pulai Insoll pegi ari menoa Telok Saba ngulu ka anembiak iya ari Padeh belayar, alai Utek Apai Lamengkai seduai Gajong ari Paku enggau Anyut nurun ngulu ka anembiak belayar ka menoa Telok Saba.
Nyadi orang ke sama nepan perau layar enggau Utik iya nya Nyanggau, Ngadan, Munan, Nuing enggau Timbang. Lalu orang ke sama nepan perau layar enggau Gajong iya nya Antau, Kalom Ujan, Melebar, Maji enggau lemambang Kelali Apai Kedungking.
Nyadi duit puku ke bisi dibai Utik seduai adi iya ke benama Nyanggau nya bisi bulih $900.00. Rambau nya kelia, jarang bendar bansa kitai Iban ke bisi ngembuan ngemaioh nya duit, laban duit agi mar bendar digiga. Nyadi sida iya ke belayar nya tadi seruran nebing tasik berari lalu sambil nya sida iya lalu ngereja pengawa ngetah.
Datai sida iya di menoa Terusan, Lawas dia sida lalu sangkai ba pangkalan bansa Murut. Nyadi sida empu enda niki ka tebing tang semina ngasoh bansa Murut nya ngiga ka sida iya tajau. Lalu sekumbang sida iya ke udah datai, dia bansa Murut maioh bendar setiap lemai berandau enggau sida ba perau. Lantang bendar meh ati sida meda orang ke beempu menoa nya tak bela rindu magang ka penatai sida kia.
Nyadi malam ti ke ketiga leboh sida iya ke benong nganti bansa Murut nya ngiga tajau ke bala sida dia sida lalu ngasoh lemambang Kelali nya berenong. Laun bendar sida tindok malamnya nyau alah datai ngagai maia dini hari dalam. Leboh pagi, leboh maia agi urap hari, nyadi Kelali ke tindok ba luan perau pen dani. Lalu benong iya empungas, dia tak enda mukai mukai alai iya lalu ditimbak bansa Murut ari tebing ti lalu ngujong ka iya parai sereta laboh ka dalam ai. Lalu bansa Murut majak nimbak semua sida ke dia berari ari. Nyadi Ngadan lalu angkat ari perau Utik ke belaboh ba puak ai lalu nyemerai nguji deka rari. Leboh iya ke nyemerai, dia iya lalu kena timbak bansa Murut ke lalu ngasoh iya parai sereta tengelam dalam ai. Udah nya lalu terjun ga Timbang ka dalam ai lalu iya kena timbak bansa Murut kena ba jumbal burit. Tang iya benasib laban agi dapat berarat, lalu ditumbok munsoh ngena sangkoh lalu kena ba betis tang semina bakal aja. Iya lalu mupok ngidup ka diri berarat berari ari. Nyadi Gajong laban ke berani agi lalu angkat engkechit ka tebing betangkin ilang lalu belaban bepantap mepat bala munsoh ke bisi ba tebing nya. Maioh bendar bala munsoh nya ulih pepat iya, alah sampai iya empu nyau parai dipasong bala munsoh laban iya ke bangat kebal. Lama bendar bala munsoh nya tadi besaup ka Gajong siko aja.
Nyadi Utik ke nyadi ketuai sida iya lalu ngebu ka diri naban ka selabit puang, ngena selabit nya iya lalu ulih nyilat enggau nangkis pantap bala munsoh. Iya lalu rari ngidup ka diri neresap ba sebelah kampong. Lalu sida ke bukai dalam perau nya lalu parai magang ditimbak bala munsoh, bansa laban nadai chara sida iya ulih ngelaban.
Nyadi tudah Timbang ke ngidup ka diri berarat nya tadi lalu sangkai ba tebing lalu niki pun rian ke repa bendar dibalut randau raka. Nyadi bala munsoh agi majak begiga nitih ka iya, tang sida iya enda tetemu ka alai iya belalai ba rampu randau raka di puchok rian. Nyau udah pulai bala munsoh, lalu nyau ka lama iya udah nat ka diri dia, endor iya lalu tepeda ka siko burong ti besai bendar benong ngindang puchok rian ke alai iya belalai nya tadi. Umor iya nadai kala meda burong bangat ngemesai nya.
Nyadi leboh malam nya, udah nyau nadai agi orang bisi bemunyi baru iya nurun ari puchok rian enggau rinsa mai bakal lalu ngiga perau ka kena iya berarat ngili ka ai. Iya seninjik bendar laban ulih naban ka perau munsoh, tang bekayuh ngena jari laban enda tetemu ka sangayuh. Nyadi batang ai Terusan tu nyamai di undor ka laban ai ke enda deras sereta nadai gerugu.
Nyau ka lama iya udah bedayong ngena jari alai iya pen sangkai datai ba pangkalan bansa Tidong. Nyadi bansa Tidong tu endang orang bansa asal menoa nya, tang gaya pakaian ngepan sida iya nyau nunda ngepan bansa Laut. Iya lalu ngetu dia nindok ka diri di intu bansa Tidong.
Nyau pagi siti baru bansa Tidong tu nganjong iya ka Pulau Labuan. Datai iya di Pulau Labuan nya baru perintah menoa nya nyungkit peluru ke agi lekat ba jumbal burit iya. Apin lama iga udah iya nya datai endor Utik ke rari neresap sebelah kampong tadi pen datai ga ba Pulau Labuan. Ari Labuan seduai iya lalu mulai ka diri ka Kuching numpang ba kapal perintah menoa nya.
Datai seduai iya dia menoa, seduai lalu nusoi penusah ke baru udah nuntong sida ti parai tiga belas iko mati di alah ka bansa Murut di menoa Terusan. Ninga penunsah bala anembiak iya dia Penghulu Garan Lembang Batu lalu nemuai ka Sarawak minta malas ngayau Murut ngagai Tuan Raja. Tang Tuan Raja enda ngasoh, laban menoa Terusan rambau nya kelia agi di pegai perintah menoa Brunei lalu menoa kena pegai perintah Sarawak rambau nya semina naka menoa Nanga Baram.
Udah nya bansa Murut di Terusan nyau mansang kachau lalu perintah menoa Brunei pen nyau enggai megai sida agi, nya alai lalu nyerah ka menoa nya ngagai perintah Sarawak dalam taun 1885. Tang Ukong seduai Dayong lalu bebunoh ngelaban perintah Sarawak udah nya, nya alai Tuan Raja Sir Charles Brooke lalu ngayau ngalah ka bansa Murut dalam taun 1900. Leboh perintah Sarawak ke ngayau tu Melina Apai Mundat lalu bedengah ke alai iya lalu madah ka ensumbar diri ari Bujang Berani ngagai Balai Nyabong Nanga Terusan. Udah perintah ngalah ka bansa Murut di menoa Terusan dia Penghulu Garan Lembang Batu pen parai kena 23 July,1900.
